Yusuf Begtas:

ܫܽܘܼܕܳܠܐ ܡܪܰܥܝܳܢܐ ܘܚܰܘܪܳܐ ܥܰܡܽܘܼܛܳܐ

ܝܰܘܣܶܦ ܒܶܓܬܰܫ

 

ܫܽܘܼܕܳܠܐ ܡܪܰܥܝܳܢܐ ܘܚܰܘܪܳܐ ܥܰܡܽܘܼܛܳܐ

«ܗܿܰܘ ܕܒܶܗ ܚܳܝܪܰܬ܆ ܐܶܢܳܐ ܐܺܝܼܬܰܝ. ܒܪܰܡ ܗܿܰܘ ܕܚܳܙܶܝܬ܆ ܐܰܢ̱ܬ ܐܺܝܼܬܰܝܟ!»

ܠܰܝܬ ܒܽܘܼܝܳܢܳܐ ܕܠܰܝܬ ܒܶܗ ܒܽܘܼܨܳܪܳܐ. ܘܟܰܕ ܗܳܟܰܢ ܗ̱ܺܝܼ ܦܰܐܝܽܘܼܬ ܐ̱ܢܳܫܳܐܝܼܬ ܘܳܠܝܳܐ ܕܢܶܚܒܽܘܿܩ ܬܪܺܝܼܨܽܘܼܬܳܐ ܘܫܰܪܺܝܼܪܽܘܼܬܳܐ ܘܟܺܐܢܽܘܼܬܳܐ ܘܢܶܪܚܽܘܿܩ ܡܼܶܢ ܥܩܺܝܼܡܽܘܼܬܳܐ ܘܙܺܐܦܳܢܽܘܼܬܳܐ ܘܥܳܠܽܘܿܒܽܘܼܬܳܐ.

 ܒܣܽܘܼܟܳܠܐ ܗܳܢܳܐ ܡܿܰܢ ܚܶܟܡܬܳܐ ܘܣܰܟܽܘܼܠܬܳܢܽܘܼܬܳܐ ܘܦܳܪܽܘܿܫܘܼܬܳܐ ܕܒܰܪܢܳܫܳܐ ܠܳܐ ܝܳܪܒܳܐ ܐܶܠܳܐ ܒܡܰܕܥܳܐ ܚܠܺܝܼܡܳܐ ܘܰܒܪܰܒܽܘܼܬ ܢܰܦܫܳܐ ܗܿܳܝ ܕܢܳܨܚܳܐ ܡܰܪܕܽܘܼܬܳܢܳܐܝܼܬ ܒܝܕܰܥܬܳܐ ܕܰܫܪܳܪܳܐ ܫܰܪܺܝܼܪܐ ܘܰܬܪܺܝܼܨܳܐ. ܐܶܠܳܐ ܒܪܰܡ ܥܰܡܗܳܕܶܐ ܠܳܐ ܟܰܣܝܳܐ ܕܠܰܡ ܟܽܠܢܳܫ ܚܳܙܶܐ ܘܦܳܪܶܫ ܘܦܳܫܰܪ ܘܒܳܕܶܩ ܘܡܳܫܰܚ ܘܬܳܩܶܠ ܠܦܽܘܼܬ ܕܪܽܘܼܟܼܝܶܗ ܘܣܽܘܼܟܳܠܶܗ ܘܡܰܕܥܶܗ ܘܢܘܼܗܪܶܗ ܐܰܘ ܠܦܽܘܼܬ ܪܰܒܽܘܼܬܳܐ ܘܰܙܥܽܘܼܪܽܘܼܬܳܐ ܕܢܰܦܫܶܗ ܐܳܘ ܛܳܒܽܘܼܬܳܐ ܘܒܺܝܼܫܽܘܼܬܳܐ ܕܬܰܪܥܺܝܼܬܶܗ ܐܰܘ ܠܦܽܘܼܬ ܢܺܝܼܫܶܗ ܟܰܣܝܳܐ ܘܓܰܠܝܳܐ. 

ܩܰܪܺܝܼܪܳܐ ܗ̱ܝ ܪܽܘܼܚܳܐ ܕܒܰܪܢܳܫܳܐ ܗܿܰܘ ܕܪܰܚܺܝܼܩ ܡܼܶܢ ܢܽܘܼܗܪܳܐ ܕܩܽܘܼܫܬܳܐ ܘܬܺܐܪܬܳܐ. ܘܟܕ ܠܳܐ ܢܰܗܺܝܪ ܡܰܕܥܶܗ ܘܣܽܘܼܟܳܠܶܗ܆ ܐܰܡܺܝܼܢܳܐܝܼܬ ܡܶܬܥܰܪܙܰܠ ܒܚܶܫܽܘܼ̈ܟܳܬܳܐ ܘܰܒܠܺܝܼ̈ܠܳܬܳܐ. ܡܶܟܳܐ ܡܶܫܬܰܕܰܠ ܦܽܘܼܫܳܩܶܗ ܘܪܽܘܼܨܳܢܶܗ ܘܛܽܘܼܝܳܡܶܗ ܘܥܳܡܶܛ ܚܰܘܪܶܗ ܛܰܥܝܳܐܝܼܬ ܟܰܕ ܗ̱ܽܘܼ ܠܳܐ ܪܓܺܝܼܫ. ܒܰܕ ܠܳܐ ܚܳܙܐ ܐܶܠܳܐ ܗܿܰܘ ܡܳܐ ܕܐܺܝܼܬ ܠܘܳܬܶܗ ܘܰܒܡܰܚܫܰܒܬܶܗ. ܘܠܳܐ ܚܳܟܶܡ ܘܦܳܪܶܫ ܐܶܠܳܐ ܗܿܰܘ ܡܳܐ ܕܰܫܟܺܝܼܚ ܒܬܰܪܥܺܝܼܬܶܗ. ܘܠܳܐ ܡܶܣܬܰܟܰܠ ܐܶܠܳܐ ܗܿܰܘ ܡܳܐ ܕܰܩܒܺܝܼܥ ܒܡܰܕܥܶܗ. ܡܶܛܠܗܳܕܶܐ ܐܳܡܰܪ Epiktetos ܐܶܦܺܝܟܬܶܬܳܘܣ (50-135): «ܐܰܝܟܰܢ ܡܰܨܝܳܐ ܕܢܶܬܶܠ ܒܰܪܢܳܫܳܐ ܠܐ̱ܚܪ̈ܳܢܶܐ ܗܿܰܘ ܡܳܐ ܕܠܰܝܬ ܠܘܳܬܶܗ؟» 

ܡܳܕܶܝܢ ܐܳܘ ܒܰܪ ܠܘܺܝܼܬܳܐ. ܐܳܘ ܒܰܪ ܓܶܢܣܳܐ. ܐܳܘ ܒܰܪ ܒܶܣܪܳܐ: ܒܨܺܝܼ ܘܰܒܩܺܝ ܕܺܝܼ̈ܢܰܝܟ ܒܰܪ̈ܳܝܶܐ. ܘܰܦܪܽܘܿܫ ܘܰܒܕܽܘܿܩ ܕܽܘܼܪ̈ܟܳܢܰܝܟ ܓܰܘܳܝ̈ܶܐ. 

ܐܶܢ ܠܳܐ ܫܟܺܝܼܚ ܠܘܳܬܳܟ ܐܰܝܟܰܢܳܐ ܡܰܨܝܳܐ ܕܬܶܣܬܰܟܠܰܢܝ ܟܕ ܠܳܐ ܣܳܐܶܢ ܐܰܢ̱ܬ ܡܣܳܐܢܝ ܒܢܺܝܼܫܳܐ ܕܰܬܕܽܘܼܫ ܟܽܘܼ̈ܒܶܐ ܘܕܰܪܕܪ̈ܶܐ ܕܰܫܒܺܝܼ̈ܠܐ ܥܰܣ̈ܩܶܐ ܘܥܰܪ̈ܡܶܐ ܒܦܰܘܫܳܐ ܘܟܽܘܼܬܳܪܳܐ ܘܚܘܼܡܣܳܢܳܐ ܘܥܽܘܼܙܳܝܳܐ ܕܐܰܬܪ̈ܳܢܳܝܳܬܳܐ؟ 

ܐܰܝܟܰܢ ܡܰܨܝܳܐ ܕܬܶܦܪܽܘܿܫ ܗܿܰܘ ܡܳܐ ܕܒܶܗ ܨܪܺܝܼܪܺܝܼܢ ܚܽܘܼ̈ܫܳܒܰܝ ܘܡܶܢܶܗ ܡܶܬܬܰܪܣܶܝܢ ܚܽܘܼ̈ܦܳܛܰܝ ܟܕ ܪܽܘܼܚܳܐ ܕܺܝܼܠܳܟ ܩܰܪܺܝܼܪܳܐ ܒܦܽܘܼܚܳܡܳܐ ܕܪܳܡܽܘܼܬܐ ܘܡܳܪܽܘܼܬܳܐ ܕܐܶܢܳܢܳܝܽܘܼܬܳܐ. ܘܪܰܚܺܝܼܩܳܐ ܡܼܶܢ ܒܽܘܼܝܳܢܳܐ ܕܰܚܢܳܢܳܐ ܘܚܰܘܣܳܢܳܐ ܕܐܶܢܰܚܢܳܝܘܼܬܳܐ؟ 

ܐܰܝܟܰܢܳܐ ܡܰܨܝܳܐ ܕܬܶܒܕܽܘܿܩ ܛܢܳܢܳܐ ܚܠܺܝܼܨܳܐ ܕܪܰܒܰܬ ܒܰܝܬܳܝܽܘܼܬܳܐ ܕܒܳܗܿ ܫܰܡܫܶܬ ܟܽܠܶܗ ܗܳܢܳܐ ܢܽܘܼܓܪܳܐ ܐܰܪܺܝܼܟܳܐ ܕܬܶܫܡܶܫܬܝ ܥܕܬܳܢܳܝܬܳܐ ܘܐܘܼܡܬܳܢܳܝܬܳܐ ܘܡܰܪܕܽܘܼܬܳܢܳܝܬܳܐ ܟܰܕ ܐܰܢ̱ܬ ܚܙܺܝܼܩ ܒܗܶܪܬܳܐ ܘܚܶܪܝܳܢܳܐ ܘܣܶܢܶܐܬܳܐ ܦܳܠܘܿܓܬܳܐ ܘܕܳܚܽܘܿܩܬܳܐ؟   

ܡܶܟܐ ܠܳܐ ܡܶܬܡܰܟܟܳܢܳܐܝܼܬ ܬܳܠܶܐ ܐ̱ܢܳܐ ܩܳܠܝ ܘܐܳܡܰܪ ܐ̱ܢܳܐ ܟܰܕ ܠܰܣܛܰܪ ܣܳܐܡ ܐ̱ܢܳܐ ܘܰܠܗܰܠ ܦܳܪܶܫ ܐ̱ܢܳܐ ܚܰܕܚ̈ܕܳܢܶܐ ܐ̱ܢܳܫ̈ܺܝܢ: ܦܳܪ̈ܽܘܿܫܶܐ ܘܒܽܘܼ̈ܟܢܶܐ ܥܺܕ̈ܳܬܢܳܝܶܐ ܘܐܘ̈ܡܬܳܢܳܝܶܐ ܘܡܰܪ̈ܕܽܘܼܬܳܢܳܝܶܐ.    

ܡܰܬܩܳܠܳܟ ܠܳܐ ܬܳܩܶܠ ܠܺܝܼ ܛܳܒܳܐܝܼܬ ܘܰܬܪܺܝܼܨܳܐܝܼܬ. ܒܰܕ ܠܳܐ ܡܦܳܣ ܐ̱ܰܢܬ ܒܕܽܘܼܒܳܪ̈ܶܐ ܫܰܪܺܝܼܪ̈ܶܐ ܕܪܳܥܝܳܐ ܛܳܒܳܐ ܗܳܢܽܘܿܢ ܕܫܰܒܚܶܬ ܘܢܰܨܚܶܬ ܐܶܢܽܘܿܢ ܗܳܐ ܡܼܶܢ ܫܽܘܼܪܳܝ ܡܕܰܒܪܳܢܽܘܼܬܝ...  

ܘܐܰܩܢܳܟ ܠܳܐ ܒܳܚܰܪ ܠܺܝ ܛܳܒܳܐܝܼܬ ܘܰܬܪܺܝܼܨܳܐܝܼܬ. ܒܰܕ ܣܺܝܼܡܬܳܐ ܕܬܰܪܥܺܝܼܬܳܟ ܓܠܺܝܼܙܳܐ ܡܼܢ ܚܽܘܼ̈ܟܳܡܶܐ ܚܠܺܝ̈ܨܶܐ ܕܫܳܡܪܳܝܳܐ ܛܳܒܳܐ ܗܿܳܢܽܘܿܢ ܕܙܰܝܚܶܬ ܘܫܰܡܠܺܝܼܬ ܐܶܢܽܘܿܢ ܗܳܐ ܡܼܶܢ ܛܰܘܪܳܐ ܕܰܥܠܰܝܡܽܘܼܬܝ...

ܘܡܳܫܽܘܿܚܳܟ ܠܳܐ  ܡܳܫܰܚ ܠܺܝܼ ܛܳܒܳܐܝܼܬ ܘܰܬܪܺܝܼܨܳܐܝܼܬ. ܒܰܕ ܠܰܝܬ ܠܘܳܬܰܟ ܬܰܨܒܺܝܼ̈ܬܶܐ ܬܺܐܪ̈ܬܳܢܳܝܶܐ ܡܰܟܺܝܼ̈ܟܶܐ ܗܿܳܢܽܘܿܢ ܕܰܒܕܰܪܓܽܘܼܫܬܗܽܘܿܢ ܩܡܺܝܼܛ ܐ̱ܢܳܐ ܘܰܒܥܰܙܪܽܘܼܪ̈ܰܝܗܽܘܿܢ ܟܪܺܝܼܟ ܐ̱ܢܳܐ ܗܳܐ ܡܼܶܢ ܫܰܒܪܽܘܼܬܝ...

ܗܘܰܝܬ ܓܶܝܪ ܝܳܕܰܥ ܬܰܡܳܢ ܒܓܰܘ̈ܝܳܬܳܐ ܗܺܝܼ ܬܺܐܪܬܳܐ ܬܳܩܠܳܐ ܘܡܳܫܚܳܐ ܘܒܳܚܪܳܐ ܘܒܳܩܪܳܐ ܘܕܳܝܢܳܐ. ܘܒܳܗ̇ ܡܶܬܚܙܶܐ ܘܡܶܬܺܝܕܰܥ ܬܪܺܝܼܨܳܐ ܡܼܶܢ ܙܠܺܝܼܡܳܐ. ܘܒܳܗܿ ܡܶܬܦܪܶܫ ܘܡܶܬܕܰܠܳܠ ܫܰܪܺܝܼܪܳܐ ܡܼܶܢ ܡܙܰܝܦܳܐ. ܘܒܳܗ̇ ܘܰܒܡܰܚܙܺܝܼܬܳܗ̇ ܚܳܙܶܐ ܘܦܳܪܶܫ ܟܽܠܢܰܫ ܗܽܘܼ ܠܶܗ ܐܰܟܡܳܐ ܕܐܺܝܼܬܰܘܗܝ ܒܶܠܥܳܕ ܫܽܘܼ̈ܕܳܠܶܐ ܡܪ̈ܰܥܝܳܢܶܐ ܘܚܰܘܪܳܐ ܥܰܡܽܘܼܛܳܐ. ܒܰܕ ܬܺܐܪܬܳܐ ܩܳܠܳܐ ܗ̱ܝ ܚܰܝܳܐ ܕܰܐܠܗܳܐ ܒܓܰܘܶܗ ܕܒܰܪܢܳܫܳܐ ܘܡܰܬܩܳܠܐ ܗ̱ܝ ܬܪܺܝܼܨܳܐ ܕܟܺܐܢܽܘܼܬܳܐ ܘܕܽܘܼܒܳܪ̈ܶܐ ܬܰܩ̈ܢܶܐ.

ܡܶܛܠܗܳܕܶܐ ܠܳܐ ܦܰܐܝܳܐ ܕܢܶܛܥܶܐ ܚܰܝܠܐ ܣܰܟܽܘܼܠܬܳܢܳܝܳܐ ܕܡܶܠܬܳܐ ܗܕܐ ܕܐܳܡܿܪܳܐ: «ܠܳܐ ܬܕܰܥܟܽܘܿܢ ܪܘܼܚܳܐ» (ܬܣܠܘ̈ܢܺܝܩܳܝܐ ܩܰܕܡܳܝܬܐ 5:19). ܒܰܕ ܐܠܘܼܠܳܐ ܡܰܕܥܳܐ ܪܘܺܝܼܚܳܐ ܕܣܰܟܽܘܼܠܬܳܢܽܘܼܬܳܐ ܗܳܕܶܐ ܡܶܬܬܰܒܪܺܝܼܢ ܟܽܠܗܽܘܿܢ ܐܰܡܽܘܼ̈ܡܶܐ ܕܪ̈ܺܝܼܫܶܐ. ܘܠܳܐ ܡܰܨܝܳܐ ܕܢܶܡܫܚܽܘܿܢ ܘܢܶܬܩܠܽܘܿܢ ܐܰܟܡܳܐ ܕܘܳܠܝܳܐ ܘܙܳܕܩܳܐ ܒܶܣܬܪܳܝܽܘܼܬܳܐ ܕܚܽܘܼ̈ܫܳܒܶܐ ܘܓܽܘܼܪ̈ܳܓܶܐ ܕܒܰܪܢܳܫܳܐ ܗܿܰܘ ܐܰܝܢܳܐ ܕܕܽܘܼܒܳܪ̈ܰܘܗܝ ܘܚܽܘܼ̈ܦܳܛܰܘܗܝ ܘܦܽܘܼ̈ܥܳܠܰܘܗܝ ܡܶܬܠܰܒܛܺܝܼܢ ܘܡܶܬܬܰܪܣܺܝܼܢ ܡܼܶܢ ܡܰܒܽܘܼ̈ܥܶܐ ܫܰܚܺܝ̈ܢܶܐ ܕܪܽܘܼܚܶܐ. 

ܒܰܕ ܐܰܡܺܝܼܪܳܐ ܗ̱ܝ «ܐܶܠܐ ܡܥܰܪ̈ܦܳܢܶܐ܆ ܠܳܐ ܚܳܟܼܡܺܝܼܢ ܛܺܝܼܡܳܐ ܝܰܩܺܝܼܪܳܐ ܕܡܰܪܓܳܢܺܝܼܬܳܐ. ܘܠܳܐ ܚܳܙܶܐ ܫܽܘܼܦܪܳܐ ܕܰܟܒܺܝܼܢ ܫܰܦܺܝܼܪܳܐ ܐܶܠܳܐ ܗܿܰܘ ܕܢܰܗܺܝܼܪܺܝܼܢ ܕܰܘ̈ܩܰܘܗܝ ܓܰܘ̈ܳܝܶܐ.»

  

ܝܰܘܣܶܦ ܒܶܓܬܰܫ 


 
Please Leave Your Thinking

Leave a Comment

You can also send us an email to karyohliso@gmail.com