ܛܘܼ̈ܦܶܐ ܕܡܰܚܫܰܒܬܳܐ

ܛܘܼ̈ܦܶܐ ܕܡܰܚܫܰܒܬܳܐ

ܟܽܠ ܡܳܐ ܕܐܺܝܼܬ ܠܰܢ ܓܽܘܼܥܠܳܢܳܐ ܐܺܝܼܬܰܘܗܝ ܕܡܰܫܠܰܡ ܘܝܺܗܺܝܼܒ ܠܰܢ ܡܼܶܢ ܐܠܗܳܐ. ܐܰܝܟܰܢܳܐ ܟܰܝ ܢܳܛܰܪ ܘܰܡܫܰܘܫܶܛ ܓܽܘܼܥܠܳܢܳܐ ܗܿܰܘ ܕܠܳܐ ܡܗܰܝܡܶܢ ܘܰܡܗܰܝܡܰܢ ܒܝܰܕ̈ܥܶܐ ܩܪ̈ܝܼܚܶܐ ܕܣܽܘܼܟܳܠܐ ܗܳܢܳܐ؟ ܘܐܰܝܟܰܢ ܡܶܫܬܰܦܶܐ ܠܶܒܳܐ ܘܡܶܬܢܰܩܠܳܐ ܐܘܼܪܚܳܐ ܕܗܿܰܘ ܕܠܳܐ ܦܳܫܰܪ ܘܛܳܚܶܢ ܘܚܳܟܶܡ ܣܽܘܼ̈ܟܳܠܰܘܗܝ؟ ܒܰܕ ܒܶܠܥܳܕ ܦܳܫܽܘܿܪܽܘܼܬܐ ܘܦܳܪܘܿܫܽܘܼܬܳܐ ܕܗܰܝܡܳܢܽܘܼܬܳܐ ܗܳܕܶܐ  ܠܳܐ ܟܳܫܰܪ ܒܰܪܢܳܫܳܐ ܘܐܳܦܠܳܐ ܢܳܨܰܚܝ ܕܰܪܓܑܳܐ ܘܐܰܩܡܳܐ ܥܳܗܢܳܐܝܼܬ ܐܰܟܡܳܐ ܕܘܳܠܝܳܐ ܘܙܳܕܩܳܐ. 

ܝܰܘܣܶܦ ܒܶܓܬܰܫ

ܟܽܠ ܡܳܐ ܕܐܺܝܼܬ ܠܰܢ ܡܼܶܢ ܐܠܗܳܐ ܩܰܒܶܠܢܰܢ. ܘܟܽܠܰܢ ܥܰܡ ܟܽܠܰܢ ܗܦܽܘܼ̈ܟܝܶܐ ܦܪ̈ܺܝܼܫܶܐ ܐܺܝܼܬܰܝܢ ܕܰܚܕܳܐ ܪܽܘܼܚܳܐ ܕܐܺܝܼܬܶܝܗ̇ ܨܽܘܼܪܰܬ ܐܠܗܳܐ. ܘܪܽܘܼܚܳܐ ܗܳܕܶܐ ܡܥܺܝܼܢܳܐ ܗ̱ܝ ܕܬܽܘܼܩܦܳܐ ܘܟܽܠܳܗ̇ ܝܕܰܥܬܳܐ. ܒܪܰܡ ܡܶܫܬܰܚܩܳܐ ܘܡܶܫܬܰܢܩܳܐ ܟܰܕ ܡܶܬܩܰܪܡܳܐ ܒܛܺܝܼܢܳܐ ܐܶܢܳܢܳܝܳܐ. ܐܶܢܗܽܘܼ ܕܒܳܥܶܝܢܰܢ ܕܰܢܦܽܘܼܫ ܒܐܽܘܼܪܰܚ ܫܽܘܼܡܠܳܝܳܐ ܘܫܽܘܼܘܫܳܛܳܐ ܐܰܡܺܝܼܢܳܐ ܙܳܕܶܩ ܕܰܢܩܰܘܶܐ ܐܰܣܺܝܪ̈ܶܐ ܒܢܽܘܼܗܪܳܐ ܕܪܽܘܼܚܳܐ ܗܳܕܶܐ. ܘܶܐܠܳܐ܆ ܡܶܪܚܰܩ ܪܳܚܩܺܝܼܢܰܢ ܡܼܶܢ ܢܰܦܫܰܢ. ܘܗܺܝܼ ܗܳܕܶܐ ܗܳܘܝܳܐ ܥܶܠܬܳܐ ܕܢܶܬܒܰܠܒܰܠ ܘܢܶܨܛܰܪܰܟ ܘܢܶܬܡܰܣܟܰܢ ܚܽܘܼܒܳܐ ܘܰܚܢܳܢܳܐ ܘܚܰܘܣܳܢܳܐ ܘܟܺܐܢܽܘܼܬܳܐ ܘܚܺܐܪܽܘܼܬܳܐ ܘܒܰܣܺܝܼܡܽܘܼܬܳܐ ܕܺܝܼܠܰܢ ܓܰܘܳܝܬܳܐ..

ܝܰܘܣܶܦ ܒܶܓܬܰܫ

ܡܶܬܢܰܩܠܐ ܘܡܶܬܦܰܬܚܳܐ ܐܘܼܪܚܳܐ ܕܒܰܪܢܳܫܳܐ ܗܿܰܘ ܐܰܝܢܳܐ ܕܐܝܼܬܰܘܗܝ ܠܶܒܶܗ ܕܰܟܝܳܐ.

ܝܰܘܣܶܦ ܒܶܓܬܰܫ

ܚܰܝ̈ܶܐ ܡܿܰܢ ܐܰܪ̈ܝܼܟܺܝܼܢ ܘܒܰܣܺܝܼ̈ܡܺܝܢ ܘܛܰܥܡ̈ܳܢܺܝܼܢ: ܟܰܕ ܝܳܠܦܺܝܼܢܰܢ ܕܢܶܦܠܽܘܿܚ ܬܰܪܥܺܝܼܬܰܢ ܒܦܽܘܼܠܳܓܳܐ ܕܐܺܝܼܩܳܪܳܐ. ܘܢܶܟܪܽܘܿܒ ܬܰܪܒܺܝܼܬܰܢ ܒܰܚܢܳܢܳܐ ܘܚܰܘܣܳܢܳܐ ܒܩܽܘܼܒܳܠܐ ܕܩܰܪܺܝܼܒܳܐ. ܘܢܺܐܠܰܦ ܐܘܼܪܰܚ ܡܕܰܒܪܳܢܽܘܼܬܳܐ ܕܕܽܘܼܪ̈ܟܳܢܶܐ ܘܩܽܘܼ̈ܒܳܠܶܐ ܩܒܺܝܼ̈ܥܶܐ. ܘܰܕܪ̈ܶܓܫܶܐ ܘܕܺܝܼ̈ܢܶܐ ܘܦܽܘܼ̈ܥܳܠܐ ܘܰܗܦܽܘܼ̈ܟܝܶܐ ܘܣܽܘܼ̈ܟܳܝܶܐ ܘܚܰܫ̈ܶܐ ܓܰܘ̈ܳܝܶܐ ܦܰܐܝܳܐܝܼܬ ܡܶܛܠ ܩܽܘܼܝܳܡܳܐ ܘܫܽܘܼܘܫܳܛܳܐ ܘܬܘܼܩܳܢܳܐ.

ܝܰܘܣܶܦ ܒܶܓܬܰܫ

ܐܶܠܘܼ ܐܺܝܼܬ ܗ̱ܘܳܐ ܠܶܫܳܢܳܐ ܠܡܰܝ̈ܳܐ... ܐܳܡܪܺܝܼܢ ܗ̱ܘܰܘ: ܥܡ ܦܰܓܪ̈ܰܝܟܽܘܿܢ ܘܐܺܝܼܕܰܝ̈ܟܽܘܿܢ ܘܐܰܦܰܝ̈ܟܽܘܿܢ ܐܰܫܺܝܼܓܘ ܒܒܳܥܽܘܼ ܐܳܦ ܩܽܘܼ̈ܡܠܶܐ ܕܢܰܦܫ̈ܳܬܟܽܘܿܢ ܘܠܶܒܰܘ̈ܳܬܟܽܘܿܢ ܘܬܰܪ̈ܥܝܳܬܟܽܘܿܢ.

ܝܰܘܣܶܦ ܒܶܓܬܰܫ

ܒܰܪܢܳܫܳܐ ܡܿܰܢ ܗܿܰܘ ܕܠܳܐ ܡܶܫܟܰܚ ܘܐܳܦܠܳܐ ܛܳܚܶܢ ܘܦܳܫܰܪ ܣܽܘܼ̈ܟܳܠܶܐ ܕܪܽܘܼܚܳܐ «ܘܡܶܠܬܳܐ» ܒܓܰܘܶܗ܆ ܦܳܐܶܫ ܟܕܺܝܼܢܳܐ ܘܰܟܒܺܝܼܠܳܐ ܒܰܠܚܽܘܿܕ ܒܣܽܘܼ̈ܟܳܠܐ ܕܒܶܣܪܳܐ «ܘܠܰܚܡܳܐ». ܡܶܛܠܗܳܕܶܐ ܥܳܐܶܠ ܬܚܶܝܬ ܫܽܘܼܠܛܳܢܳܐ ܕܒܶܣܪܳܐ ܘܡܶܫܬܰܘܰܫ ܫܒܺܝܼܠܳܐ ܕܡܰܪܕܺܝܼܬܶܗ. ܘܪܳܚܶܩ ܡܼܶܢ ܗܿܳܝ ܕܢܶܫܟܰܚ ܢܺܝܼܫܳܐ ܡܨܰܝܒܳܢܳܐ ܘܰܡܪܰܒܝܳܢܳܐ ܕܐܺܝܼܬܽܘܼܬܶܗ ܡܰܪܕܺܘܼܬܳܢܳܝܬܳܐ ܘܗܺܝܼܝܽܘܼܬܶܗ ܐܽܘܼܡܬܳܢܳܝܬܳܐ.

ܝܰܘܣܶܦ ܒܶܓܬܰܫ

ܠܰܝܬ ܕܒܰܣܺܝܼܡ ܐܰܝܟ ܒܰܝܬܳܐ. ܘܠܳܐ ܡܶܬܬܢܺܝܼܚ ܒܰܪܢܳܫܳܐ ܐܶܠܳܐ ܒܒܰܝܬܶܗ: ܡܰܒܽܘܥ ܡܶܣܬܰܟܠܳܢܽܘܼܬܳܐ ܘܒܽܘܼܝܳܢܳܐ. ܐܶܠܳܐ ܒܪܰܡ ܠܳܐ ܝܳܪܶܒ ܣܽܘܼܟܳܠܐ ܘܒܽܘܼܝܳܢܳܐ ܒܒܰܝܬܐ ܕܠܐ ܕܳܢܰܚ ܒܶܗ ܢܽܘܼܗܪܳܐ ܕܝܕܰܥܬܳܐ ܘܐܺܝܼܩܳܪܳܐ ܘܰܚܢܳܢܳܐ ܘܚܰܘܣܳܢܳܐ. 

ܝܰܘܣܶܦ ܒܶܓܬܰܫ

ܠܰܝܬ ܡܿܰܢ ܕܢܳܗܰܪ ܘܝܳܪܶܒ ܘܢܳܨܰܚ ܐܰܝܟ ܗܿܘ ܕܒܳܩܶܐ ܘܕܳܐܶܢ ܢܰܦܫܶܗ ܒܚܰܘܪܐ ܟܺܐܢܳܐ ܕܰܫܪܳܪܳܐ ܪܰܒܳܐ. ܘܠܰܝܬ ܡܿܰܢ ܕܚܳܫܶܟ ܘܙܳܥܰܪ ܘܦܳܟܰܗ ܐܰܝܟ ܗܿܰܘ ܕܥܳܕܶܠ ܘܣܳܩܰܪ ܠܗܳܢܳܐ ܘܰܠܗܰܘ ܟܰܕ ܪܳܚܶܩ ܡܼܶܢ ܚܰܘܪܳܐ ܟܺܐܢܳܐ ܕܰܫܪܳܪܳܐ ܪܰܒܳܐ.

ܝܰܘܣܶܦ ܒܶܓܬܰܫ

ܪ̈ܓܫܶܐ ܡܰܗܪ̈ܳܢܶܐ ܘܚܰܫ̈ܶܐ ܡܰܟܝ̈ܳܢܶܐ ܕܪܳܡܽܘܿܬܳܐ ܘܡܳܪܽܘܿܬܳܐ ܡܫܺܝܼܡܺܝܢ ܘܰܡܟܺܝܼܒܺܝܼܢ ܥܳܠܡܳܐ ܓܰܘܳܝܳܐ ܕܒܰܪܢܳܫܳܐ. ܘܶܐܠܘܼܠܳܐ ܣܽܘܼܠܳܩܳܐ ܗܰܘܢܳܢܳܝܳܐ ܘܒܽܘܼܕܳܩܳܐ ܕܩܽܘܼܫܬܳܐ ܘܬܰܪܒܺܝܼܬܳܐ ܕܝܰܨܪܳܐ ܘܨܶܒܝܳܢܳܐ܆ ܠܳܐ ܡܶܫܬܰܘܙܰܒ ܘܐܳܦܠܳܐ ܡܶܬܚܰܪܰܪ ܒܰܪܢܳܫܳܐ ܡܼܶܢ ܡܰܥܒܕܳܢܽܘܼܬܗܽܘܿܢ ܡܫܺܝܼܡܳܢܺܝܼܬܳܐ ܘܡܰܟܶܐܒܳܢܺܝܼܬܳܐ.

ܝܰܘܣܶܦ ܒܶܓܬܰܫ

ܢܽܘܼܗܪܳܐ ܡܕܰܠܶܠ ܘܰܡܒܰܣܶܡ. ܘܚܶܫܟܳܐ ܡܥܰܣܶܩ ܘܰܡܫܰܚܶܩ. ܐܶܢܳܐ ܡܼܶܢ ܬܰܡܳܢ ܒܥܳܠܡܳܐ ܓܰܘܳܝܳܐ ܟܰܕ ܡܛܺܝܼܬ ܠܦܳܠܫܰܬ ܐܽܘܼܪ̈ܚܳܬܳܐ ܣܰܦܩܶܬ ܚܰܝܠܳܐ ܕܐܶܪܚܽܘܿܩ ܡܼܶܢ ܚܶܫܟܳܐ (ܟܡܳܐ ܕܡܰܨܝܳܐ) ܘܰܓܒܺܝܼܬ ܠܐܘܼܪܰܚ ܢܽܘܼܗܪܳܐ ܕܰܡܫܺܝܼܚܳܐ ܘܝܕܰܥܬܳܐ ܘܚܶܟܡܬܳܐ ܘܝܽܘܼܠܦܳܢܳܐ ܣܒܺܝܼܣܰܬ ܥܩܽܘܼ̈ܠܐ. ܘܗܺܝܼ ܗܳܕܶܐ ܗܰܕܝܰܬ ܘܫܰܒܠܰܬ ܡܰܪܕܺܝܼܬܝ ܠܨܰܘܒܳܐ ܕܣܽܘܼ̈ܟܳܠܐ ܩܪ̈ܺܝܼܚܶܐ ܘܰܚܪ̈ܺܝܼܩܶܐ ܡܶܛܽܠ ܕܽܘܪܳܓܳܐ ܘܫܽܘܼܡܳܫܳܐ ܕܡܽܘܼܟܳܟܳܐ ܘܐܝܼܩܳܪܳܐ ܘܰܚܢܳܢܳܐ ܘܚܰܘܣܳܢܳܐ ܬܰܪܥܺܝܼܬܳܢܳܐܝܼܬ ܘܬܰܪܒܺܝܼܬܳܢܳܐܝܼܬ. 

ܝܰܘܣܶܦ ܒܶܓܬܰܫ

ܢܽܘܼܗܳܪܳܐ ܡܶܛܽܠ ܡܕܰܒܪܳܢܽܘܼܬܳܐ ܕܬܶܫܡܶܫܬܝ ܒܗܳܠܶܝܢ ܕܥܺܕ̈ܬܳܢܳܝܳܬܳܐ ܘܡܰܪ̈ܕܽܘܼܬܢܳܝܳܬܳܐ ܘܠܶܫ̈ܳܢܳܝܳܬܳܐ ܘܐܘܼܡ̈ܬܳܢܳܝܳܬܐ ܘܐܰܬܪ̈ܳܢܳܝܳܬܳܐ: «... ܫܰܪܺܝܼܬ ܘܪܰܒܰܬ ܫܰܡܫܶܬ ܘܪܶܗܛܶܬ ܒܙܰܒܢܳܐ ܕܐܘܼ̈ܠܨܳܢܶܐ ܡܰܪܺܝܼܪ̈ܶܐ ܕܡܰܚ̈ܫܽܘܼܠܐ ܙܩܺܝܼ̈ܦܶܐ ܒܐܰܬܪܐ ܪܕܺܝܼܦܳܐ ܘܰܣܢܺܝܼܩܳܐ. ܘܫܰܡܠܺܝܼܬ ܒܚܶܟܡܰܬ ܪܳܥܝܳܐ ܛܳܒܳܐ ܘܰܒܪܽܘܼܚܳܐ ܕܫܳܡܪܳܝܳܐ ܛܳܒܳܐ. ܒܪܰܡ ܒܦܳܪܽܘܿܫܽܘܼܬܳܐ ܕܐܝܼܩܳܪܳܐ ܘܰܒܡܰܕܥܳܐ ܕܚܽܘܼܡܣܳܢܳܐ ܘܚܰܘܪܳܐ ܕܚܰܘܣܳܢܳܐ ܘܨܶܒܝܳܢܳܐ ܚܺܐܪܳܐ ܐܰܝܟܰܢܳܐ ܕܠܳܐ ܕܬܶܕܥܰܟ ܪܽܘܼܚܳܐ ܕܝܳܪܬܽܘܼܬܰܢ ܬܢܳܢ ܒܰܦܢܺܝܼܬܰܢ. ܘܗܳܐ ܡܶܬܚܰܦܰܛ ܘܡܰܩܶܦ ܐ̱ܢܳܐ ܒܶܠܥܳܕ ܡܰܐܝܼܢܽܘܼ ܠܦܽܘܼܬ ܣܳܦܩܽܘܼܬܝ܀»

ܝܰܘܣܶܦ ܒܶܓܬܰܫ

ܣܰܓܺܝܼ̈ܐܝܼܺܢ ܩܶܛܪ̈ܶܐ. ܒܪܰܡ  ܫܪܳܝܳܐ ܚܰܕ ܗ̱ܽܘܼ. ܘܰܚܕܳܐ ܗ̱ܝ ܐܽܘܼܪܚܳܐ ܕܰܫܪܳܝܳܐ ܕܩܶܛܪ̈ܶܐ. ܘܐܺܝܼܬܶܝܗ̇: ܥܽܘܼܠܳܝܳܐ ܕܡܰܕܥܳܐ. ܘܟܽܘܼܝܳܢܳܐ ܕܫܰܘܝܽܘܼܬܳܐ ܡܰܚܫܰܒܬܳܢܳܝܬܳܐ ܚܕܰܬܳܐ.

ܝܰܘܣܶܦ ܒܶܓܬܰܫ

ܚܰܝ̈ܶܐ ܡܿܰܢ ܠܳܐ ܩܳܝܡܺܝܼܢ ܘܐܳܦܠܳܐ ܢܳܨܚܺܝܼܢ ܐܶܠܳܐ ܒܡܰܗܒܳܐ ܘܡܰܣܒܳܐ ܕܛܽܘܼܟܳܣܳܐ ܣܢܺܝܼܩܳܐ. ܡܶܛܠܗܳܕܶܐ «ܐܶܢܳܐ» ܗܽܘܼ ܠܝܳܬܶܗ ܠܳܐ ܡܨܶܐ ܕܢܶܒܢܶܐ ܣܽܘܼܟܳܠܐ ܒܰܣܺܝܼܡܳܐ ܘܛܰܥܡܳܐ ܗܰܢܺܝܳܐܐ. ܒܰܕ ܣܽܘܼܟܳܠܐ ܠܳܐ ܫܳܘܰܚ ܘܛܰܥܡܳܐ ܠܳܐ ܝܳܪܶܒ ܐܶܠܳܐ ܒܐܰܣܺܝܼܪܽܘܼܬܳܐ ܨܶܒܝܳܢܳܝܬܳܐ ܘܚܰܘܣܳܢܳܝܬܳܐ ܕ«ܐܶܢܳܐ» ܥܰܡ «ܚܢܰܢ». ܒܪܰܡ ܒܡܰܘܬܳܐ ܕܐܶܢܢܳܢܳܝܘܼܬܳܐ ܘܣܶܢܶܐܬܳܐ ܘܰܒܢܽܘܼܚܳܡܳܐ ܕܐܶܢܰܚܢܳܝܽܘܼܬܳܐ ܘܰܚܢܳܢܳܐ.

ܝܰܘܣܶܦ ܒܓܶܬܰܫ

ܒܰܪܢܳܫܳܐ ܓܶܝܪ ܕܰܚܣܺܝܼܟ ܡܼܶܢ ܝܕܰܥܬܳܐ ܟܢܺܝܼܟܬܳܐ ܕܝܽܘܼܠܦܳܢܳܐ ܘܐܺܝܼܩܳܪܳܐ ܘܰܣܦܺܝܼܩ ܡܼܶܢ ܡܰܪܕܽܘܼܬܳܐ ܡܰܟܺܝܼܟܬܳܐ ܕܰܚܢܳܢܳܐ ܘܚܰܘܣܳܢܳܐ ܕܳܡܶܐ ܠܐܦܰܕܢܳܐ ܕܠܰܝܬ ܠܶܗ ܬܽܘܼܩܳܢܳܐ ܕܐܰܓܽܘܼܓܳܐ ܕܪ̈ܰܣܢܳܐ.

ܝܰܘܣܶܦ ܒܓܶܬܰܫ

ܒܫܽܘܼܚܬܳܐ ܓܶܝܪ ܡܶܬܟܰܣܶܐ ܘܡܶܬܩܪܶܡ ܡܰܕܥܳܐ ܗܿܰܘ ܕܠܳܐ ܡܶܬܦܠܰܚ ܒܬܰܪܒܺܝܼܬܳܐ ܕܝܕܰܥܬܳܐ ܘܚܶܟܡܬܳܐ ܐܺܝܼܬܺܝܼܩܳܝܬܳܐ. ܘܟܰܕ ܠܳܐ ܡܶܬܢܰܩܰܕ ܒܝܕܰܥܬܳܐ ܚܕܰܬܐ ܠܳܐ ܓܳܪܶܣ ܘܐܳܦܠܳܐ ܛܳܚܶܢ ܐܰܟܡܳܐ ܕܘܳܠܝܳܐ ܘܙܳܕܩܳܐ. ܡܶܟܳܐ ܦܳܐܶܫ ܒܰܬܥܺܝܼܫܽܘܼܬܳܐ ܟܰܕ ܪܳܚܶܩ ܡܼܶܢ ܚܰܝ̈ܐ ܒܰܣܺܝܼ̈ܡܶܐ ܕܨܶܒܝܳܢܳܐ ܟܺܐܢܳܐ ܘܚܺܐܪܳܐ.

ܝܰܘܣܶܦ ܒܶܓܬܰܫ  

ܒܰܪܢܳܫܳܐ ܡܳܪܰܐ ܗ̱ܘ ܕܰܬܠܳܬܐ ܒ̈ܳܬܶܐ. ܩܰܕܡܳܝܳܐ: ܒܰܝܬܰܐ ܗ̱ܘ ܕܒܶܗ ܥܳܡܰܪ ܘܚܳܝܶܐ. ܘܰܒܝܰܕ ܟܶܣܦܳܐ ܡܶܫܬܰܦܰܪ ܘܡܶܬܒܰܣܰܡ. ܬܪܰܝܳܢܳܐ: ܒܰܝܬܰܐ ܗ̱ܘ ܕܒܳܢܶܐ ܒܠܶܒܳܐ ܕܰܒܢܰܝ̈ܢܳܫܳܐ. ܘܰܒܝܰܕ ܕܽܘܼܒܰܪ̈ܰܘܗܝ ܐܺܝܼܬܺܝ̈ܩܳܝܶܐ ܡܶܫܬܰܦܰܪ ܘܡܶܬܒܰܣܰܡ. ܬܠܺܝܼܬܳܝܳܐ: ܒܰܝܬܰܐ ܗ̱ܘ ܕܒܶܗ ܡܶܬܩܒܰܪ ܒܚܰܪܬܳܐ. ܘܰܒܝܰܕ ܥܒܳܕܰܘ̈ܗܝ ܛܳܒ̈ܶܐ ܡܶܫܬܰܦܰܪ ܘܡܶܬܒܰܣܰܡ.

ܝܰܘܣܶܦ ܒܓܶܬܰܫ