Yusuf Begtas:

ܡܶܛܽܠ ܗܳܝ ܕܰܐܠܗܳܐ ܒܰܣܺܝ̣ܡ ܗ̱ܽܘ. ܠܐܰܝܠܶܝܢ ܕܪܳܚܡܺܝ̣ܢ ܠܶܗ ܒܟܽܠܡܶܕܶܡ. ܘܰܠܥܶܠ ܡܶܢ ܟܽܠ ܡܶܕܶܡ

ܠܘܼܩܳܛܳܐ ܡܶܢ ܡܶܠܟ̈ܶܐ ܕܬܐܳܘܡܰܐܣ ܟܰܡܦ̇ܺܝ̣ܣ.

 

ܡܶܛܽܠ ܗܳܝ ܕܰܐܠܗܳܐ ܒܰܣܺܝ̣ܡ ܗ̱ܽܘ. ܠܐܰܝܠܶܝܢ ܕܪܳܚܡܺܝ̣ܢ ܠܶܗ ܒܟܽܠܡܶܕܶܡ. ܘܰܠܥܶܠ ܡܶܢ ܟܽܠ ܡܶܕܶܡ

ܗܳܐ ܐܰܠܳܗܝ ܕܺܝ̣ܠܝ ܘܥܰܡܶܗ ܟܽܠ ܡܶܕܶܡ. 

ܡܽܘܢ ܒܳܥܶܐ ܐ̱ܢܳܐ ܝܰܬܺܝ̣ܪ ܘܡܽܘܢ ܝܰܬܺܝ̣ܪ ܛܽܘܒܬܳܢ ܡܨܶܐ ܐ̱ܢܳܐ ܠܡܶܒܥܳܐ. 

ܟܡܳܐ ܚܰܠܝܳܐ ܘܒܰܣܺܝ̣ܡܳܐ ܗܳܕܶܐ ܡܶܠܬܳܐ. 

ܒܪܰܡ ܠܐܰܝܠܶܝܢ ܕܪܳܚܡܺܝ̣ܢ ܠܐܰܠܳܗܳܐ ܘܠܳܐ ܗ̱ܘܳܐ ܠܥܳܠܡܳܐ ܘܟܽܠ ܡܳܐ ܕܐܺܝ̣ܬ ܒܶܗ. 

ܐܰܠܳܗܳܐ ܕܺܝ̣ܠܝ ܘܰܕܟܽܠ ܡܶܕܶܡ. ܕܒܶܗ ܢܶܣܦܰܩ ܚܰܟܺܝ̣ܡܳܐ ܡܰܠܝܳܐܺܝ̣ܬ. 

ܘܐܺܝ̣ܬܰܘܗܝ ܚܰܠܝܳܐ ܘܒܰܣܺܝ̣ܡܳܐ ܠܪ̈ܳܚܡܰܘܗܝ. 

ܘܐܶܢ ܡܶܬܥܰܦܰܦ ܣܰܓܺܝ̣ܐܳܢܳܐܺܝ̣ܬ ܗܽܘ ܟܰܕ ܗܽܘ ܐܺܝ̣ܬܰܘܗܝ ܒܰܫܪܳܪܳܐ. 

ܟܰܕ ܢܶܫܬܟܰܚ ܟܽܠܡܶܕܶܡ ܢܶܚܕܶܐ ܘܢܶܪܘܰܙ. ܘܐܶܢ ܢܺܐܙܰܠ ܟܽܠ ܡܶܕܶܡ ܡܰܗܪܳܢܰܐ ܗ̱ܘ. 

ܐܰܢ̱ܬ ܬܢܺܝ̣ܚ ܠܠܶܒܳܐ ܘܬܶܬܶܠ ܠܶܗ ܫܠܳܡܳܐ ܣܰܓܺܝ̣ܐܳܐ ܘܚܰܓܳܐ ܡܚܰܕܝܳܢܳܐ.

ܐܰܢ̱ܬ ܬܶܥܒܶܕ ܕܒܰܪܢܳܫܳܐ ܡܶܬܚܰܫܰܒ ܟܽܠܡܶܕܶܡ ܛܳܒܳܐܺܝ̣ܬ. 

ܘܡܰܘܕܶܐ ܠܳܟ ܥܰܠ ܟܽܠܡܶܕܶܡ ܦܨܺܝ̣ܚܳܐܺܝ̣ܬ. ܘܒܶܠܥܳܕ̈ܰܝܟ ܠܳܐ ܡܶܨܛܒܶܐ ܒܡܶܕܶܡ ܢܰܓܺܝ̣ܪܳܐܺܝ̣ܬ. 

ܘܐܶܢ ܡܩܰܒܶܠ ܡܶܕܶܡ ܒܰܣܺܝ̣ܡܳܐܺܝ̣ܬ. ܡܶܢ ܟܽܠ ܦܪܽܘܣ ܙܳܕܶܩ ܕܛܰܝܒܽܘܬܳܟ ܬܶܚܕܪܺܝ̣ܘܗܝ ܟܽܘܠܳܢܳܐܺܝ̣ܬ. 

ܘܗܽܘ ܢܶܬܡܰܕܰܟ ܒܰܡܡܰܕܟܽܘܬ ܚܶܟܡܬܳܟ ܪܽܘܚܳܢܳܐܺܝ̣ܬ. 

ܡܰܢ ܕܰܛܥܶܡ ܒܰܣܺܝ̣ܡܽܘܬܽܟ ܟܽܠ ܡܶܕܶܡ ܒܰܣܺܝ̣ܡ ܗ̱ܘ ܠܶܗ. 

ܘܡܰܢ ܕܠܳܐ ܛܰܥܡܳܟ ܐܰܪܰܐ ܟܰܝ ܡܳܢܳܐ ܛܥܶܡ؟ 

ܚܰܟܺܝ̣ܡ̈ܰܘܗܝ ܕܥܳܠܡܳܐ ܘܰܡܦܰܢܩ̈ܶܐ ܒܦܰܓܪ̈ܳܢܝܳܬܳܐ ܡܶܬܒܰܠܡܺܝ̣ܢ ܩܕܳܡ ܚܶܟܡܬܳܟ ܟܰܪ ܬܰܡܳܢ. 

ܗܳܢܰܘ ܒܶܝܬ ܚܰܟܺܝ̣ܡ̈ܶܐ ܕܥܳܠܡܳܐ ܫܟܺܝ̣ܚ ܗܶܒܠܳܐ ܪܰܒܳܐ. 

ܘܗܳܪܟܳܐ ܫܟܺܝ̣ܚ ܡܰܘܬܳܐ ܦܰܓܪܳܢܳܝܳܐ. 

ܒܪܰܡ ܐܰܝܠܶܝܢ ܕܢܰܩܦܽܘܟ ܒܳܬܰܪ ܕܰܟܦܰܪ ܒܥܳܠܡܳܐ ܘܐܰܡܺܝ̣ܬܘ ܦܰܓܪ̈ܰܝܗܽܘܢ. 

ܐܶܬܛܰܒܰܒܘ ܒܶܝܬ ܚܰܟܺܝ̣ܡ̈ܶܐ ܫܰܪܺܝ̣ܪܳܐܺܝ̣ܬ. ܒܰܕܫܰܢܺܝ̣ܘ ܡܶܢ ܗܶܒܠܳܐ ܠܰܫܪܳܪܳܐ. 

ܘܡܶܢ ܦܰܓܪܳܐ ܠܪܽܘܚܳܐ. ܗܳܠܶܝܢ ܐܶܬܒܰܣܰܡܘ ܒܐܰܠܳܗܳܐ. 

ܘܒܰܝܬܺܝ̣ܘ ܠܐܰܠܳܗܳܐ ܒܳܪܽܘܝܗܽܘܢ ܟܽܠ ܡܳܐ ܕܐܺܝ̣ܬ ܒܰܒܪܺܝ̣ܬܳܐ. 

ܒܪܰܡ ܫܽܘܚܠܳܦܳܐ ܪܰܒܳܐ ܘܦܽܘܪܫܳܢܳܐ ܣܰܓܺܝ̣ܐܳܐ ܫܟܺܝ̣ܚ ܒܰܝܢܳܬ ܒܽܘܣܳܡܳܐ ܕܒܰܐܠܳܗܳܐ ܘܒܽܘܣܳܡܳܐ ܕܰܒܒܶܪ̈ܝܳܬܳܐ. 

ܒܰܝܢܳܬ ܡܬܽܘܡܳܝܽܘܬܳܐ ܘܙܰܒܢܳܐ ܘܒܰܝܢܳܬ ܢܽܘܗܪܳܐ ܒܰܪܝܳܐ ܠܢܽܘܗܪܳܐ ܡܰܢܗܪܳܢܳܐ. 

ܐܰܘ ܢܽܘܗܪܳܐ ܡܬܽܘܡܳܝܳܐ ܕܥܶܠܳܝ ܡܶܢ ܟܽܠ ܢܽܘܗܪܳܐ ܒܰܪܝܳܐ.

ܫܰܕܰܪ ܡܶܢ ܪܰܘܡܳܐ ܕܩܽܘܼܕܫܰܝ̈ܟ ܘܐܰܒܪܶܩ ܒܰܪ̈ܩܰܝܟ ܡܶܬܓܰܘ̈ܝܳܢܶܐ ܠܥܽܘܼܡܩ̈ܰܘܗܝ ܕܠܶܒܝ. 

ܕܰܟܳܐ ܢܰܦܫܝ ܘܚܰܝܶܠܺܝܗ̇ ܘܚܰܕܳܗ̇ ܘܐܰܢܗܰܪܺܝܗ̇ ܘܐܰܚܳܗ̇ ܘܒܰܝܐܝܳܗ̇. 

ܐܰܝܟܰܢܳܐ ܕܐܶܬܡܛܶܐ ܠܘܳܬܳܟ ܘܐܶܬܚܰܝܰܕ ܥܰܡܳܟ. ܒܓܶܠܝܳܢ̈ܶܐ ܡܚܰܕܝܳܢ̈ܶܐ. 

ܘܰܐܗ ܐܶܡܰܬܝ ܬܺܐܬܶܐ ܗܳܕܶܐ. 

ܛܽܘܒܬܳܢܺܝ̣ܬܳܐ ܘܰܪܓ̣ܺܝܓ̣ܬܳܐ ܕܒܳܗ̇ ܬܰܣܒܰܥܰܝܢܝ ܡܶܢ ܚܰܕܽܘܬܶܗ ܕܦܰܪܨܽܘܦܳܟ.

ܘܐܰܢ̱ܬ ܬܶܗܘܶܐ ܠܺܝ ܟܽܠܳܐ ܒܟܽܠܳܐ. 

ܘܶܐܢ ܠܳܐ ܬܶܬܺܝ̣ܗܶܒ ܠܺܝ ܗܳܕܶܐ ܡܰܘܗܰܒܬܳܐ ܠܳܐ ܡܨܶܐ ܐ̱ܢܳܐ ܠܡܶܩܢܳܐ ܚܰܕܽܘܬܳܐ ܡܫܰܡܠܰܝܬܳܐ. 

ܗܳܘܳܝ ܗܳܘܳܝ ܕܒܰܪܢܳܫܳܐ ܥܰܬܺܝ̣ܩܳܐ ܥܕܰܟܺܝ̣ܠ ܚܰܝ ܗ̱ܽܘܼ ܒܺܝ.

ܘܠܳܐ ܙܩܺܝ̣ܦ ܟܽܠ ܟܽܠܶܗ ܐܳܦܠܳܐ ܡܺܝ̣ܬ ܡܫܰܡܠܝܳܐܺܝ̣ܬ. 

ܐܶܠܳܐ ܡܰܩܪܶܒ ܠܽܘܩܒܰܠ ܪܽܘܚܳܐ. ܘܰܡܙܺܝ̣ܥ ܩܪ̈ܳܒܶܐ ܓܰܘܳܝ̈ܶܐ. 

ܘܠܳܐ ܫܳܒܶܩ ܕܬܶܬܢܺܝ̣ܚ ܡܰܠܟܽܘܬ ܢܰܦܫܳܐ. 

ܡܳܕܶܝܢ ܐܰܢ̱ܬ ܡܳܪܝ ܘܰܐܳܠܗܝ ܕܫܰܠܺܝ̣ܛ ܥܰܠ ܓܰܐܝܽܘܬܶܗ ܕܝܰܡܳܐ ܘܰܡܫܰܬܶܩ ܙܰܘܥ̈ܶܐ ܕܓܰܠܠܰܘ̈ܗܝ. 

ܩܽܘܼܡ ܒܥܽܘܼܫܢܳܟ ܘܥܰܕܰܪܰܝܢܝ. 

ܘܒܰܕܰܪ ܠܡܰܠܟܘ̈ܳܬܳܐ ܕܨܳܒܝ̈ܳܢ ܩܪ̈ܳܒܶܐ. 

ܘܰܬܒܽܘܪ ܐܶܢܶܝܢ ܒܚܰܝܠܳܟ. 

ܕܰܩܶܩ ܐܶܢܶܝܢ ܒܝܰܡܺܝ̣ܢܳܟ. 

ܒܳܥܶܐ ܐ̱ܢܳܐ ܡܶܢܳܟ ܕܰܬܚܰܘܶܐ ܬܶܕܡܪ̈ܳܬܳܟ ܘܰܓܒܰܪ̈ܘܳܬܳܟ. 

ܕܬܶܫܬܰܒܰܚ ܝܰܡܺܝ̣ܢܳܟ ܘܢܶܬܗܰܕܰܪ ܕܪܳܥܳܟ. 

ܒܰܕܠܰܝܬ ܠܺܝ̣ ܣܰܒܪܳܐ ܘܒܶܝܬ ܓܰܘܣܳܐ ܐ̱ܚܪܺܢܳܐ ܐܶܠܳܐ ܐܶܢ ܐܰܢ̱ܬ. 

 

ܢܘܼܗܳܪܐ: ܟܬܝܼܒܬܐ ܗܕܐ ܠܘܼܩܳܛܳܐ ܐܝܼܬܶܝܗܿ ܡܶܢ ܡܶܠܟ̈ܶܐ ܕܬܐܳܘܡܰܐܣ ܟܰܡܦ̇ܺܝ̣ܣ.


 
Please Leave Your Thinking

Leave a Comment

You can also send us an email to karyohliso@gmail.com