ܪܶܚܡܰܬ ܩܽܘܼܫܬܳܐ ܘܒܰܪܢܳܫܳܐ ܓܰܘܳܝܳܐ

ܪܶܚܡܰܬ ܩܽܘܼܫܬܳܐ ܘܒܰܪܢܳܫܳܐ ܓܰܘܳܝܳܐ

ܡܼܶܢ ܕܰܪܓܳܐ ܫܪܳܪܳܐ ܥܶܠܳܝ ܘܰܛܢܳܢܳܐ ܡܼܶܢ ܫܽܘܼܠܛܳܢܳܐ.

ܩܰܫܺܝܼܫܳܐ ܗ̱ܝ ܐܳܦ ܟܺܐܢܽܘܼܬܳܐ ܡܼܶܢ ܛܶܟܣܐ ܘܡܼܶܢ ܢܳܡܽܘ̈ܣܶܐ.

ܡܳܪܝ ܐܝܼܣܚܳܩ ܕܐܰܢܛܝܽܘܿܟ (490+ )

 

ܐܶܠܘܼܠܳܐ ܡܰܕܥܳܐ ܕܩܽܘܼܫܬܳܐ܆ ܠܳܐ ܡܶܬܩܰܠܦܺܝܼܢ ܩܠܳܦ̈ܶܐ ܕܩܳܪܡܺܝܼܢ ܢܽܘܼܗܪܳܐ ܘܬܽܘܼܩܦܳܐ ܕܪܽܘܼܚܳܐ. ܘܐܳܦܠܳܐ ܡܶܬܓ̈ܰܠܓܳܢ ܬܰܚܦ̈ܝܳܬܳܐ ܓܰܘ̈ܳܝܳܬܳܐ ܕܒܰܪܢܳܫܳܐ. ܒܰܕ ܩܽܘܼܫܬܳܐ܆ ܣܘܼܟܳܠܐ ܗ̱ܘ ܪܰܒܳܐ ܕܢܳܛܰܪ ܕܽܘܼܒܳܪ̈ܶܐ ܐ̱ܢܳܫ̈ܳܝܶܐ ܟܰܕ ܚܠܺܝܼܡܺܝܼܢ: ܒܡܰܟܺܝܼܟܽܘܼܬܳܐ ܘܫܰܪܺܝܼܪܽܘܼܬܳܐ ܘܰܟܢܺܝܼܟܽܘܼܬܳܐ ܘܰܦܫܺܝܼܛܘܼܬܳܐ ܘܰܚܠܺܝܼܨܽܘܬܳܐ ܕܬܐܺܪܬܳܐ ܘܟܺܐܢܽܘܼܬܐ ܘܚܺܐܪܽܘܼܬܳܐ. ܘܐܰܩܢܳܐ[1] ܐܺܝܼܬܰܘܗ̱ܝ ܪܺܝܼܫܳܝܳܐ ܕܒܶܗ ܡܶܬܒܰܚܪܺܝܼܢ ܘܡܶܬܬܟܺܝܼܠܺܝܢ ܪ̈ܶܥܝܳܢܶܐ ܘܰܥܒ̈ܳܕܶܐ ܘܢܺܝܼ̈ܫܶܐ ܐ̱ܢܳܫ̈ܳܝܶܐ ܟܣ̈ܰܝܳܐ ܘܰܓܠܰܝ̈ܳܐ. ܘܠܰܝܬ ܪܰܒܘܼܬܳܐ ܥܰܫܺܝܼܢܬܳܐ ܐܰܝܟ ܪܰܒܽܘܼܬܳܐ ܗܳܝ ܕܢܳܗܪܳܐ ܘܨܳܡܚܳܐ ܒܚܽܘܼ̈ܟܳܡܶܐ ܕܩܽܘܼܫܬܳܐ: ܬܳܓܰܐ ܙܰܟܳܝܳܐ ܘܰܟܠܺܝܼܠܐ ܙܰܗܝܳܐ ܕܣܽܘܼ̈ܟܳܠܐ ܗܳܠܶܝܢ. ܡܶܛܠܗܳܕܶܐ ܓܠܺܝܼܙܽܘܼܬ ܡܰܕܥܶܗ ܡܰܘܠܶܕ ܡܥܽܘܼܣܝܳܐ ܡܛܰܪܦܳܢܳܐ ܒܥܳܠܡܳܐ ܓܰܘܳܝܳܐ. ܟܒܰܪ ܚܰܝܠܶܗ ܠܳܐ ܐܰܒܺܝܼܕ ܒܪܰܡ ܐܰܟܡܳܐ ܕܡܶܬܬܡܺܝܼܫܳܐ ܥܰܡܽܘܼܛ ܘܰܚܫܺܝܼܟ ܒܽܘܼܝܳܢܶܗ ܘܩܰܗܝܳܐ ܡܰܥܒܕܳܢܽܘܼܬܶܗ ܒܰܝܢܳܬ ܐ̱ܢܳܫܽܘܼܬܰܢ. ܘܥܰܝܢܳܐ ܓܰܘܳܝܬܐ «ܥܰܝܢܳܐ ܕܠܶܒܳܐ ܘܥܰܝܢܳܐ ܕܪܽܘܼܚܐ» ܠܐ ܕܳܝܩܳܐ ܫܪܳܪܳܐ ܪܰܒܳܐ.

ܡܶܟܳܐ ܬܒܺܝܼܪ ܘܰܫܚܺܝܩ ܘܰܩܛܺܝܼܦ ܒܰܪܢܳܫܳܐ ܓܰܘܳܝܳܐ. ܘܰܕܠܺܝܼܚ ܘܰܟܬܺܝܫ ܘܰܡܥܺܝܼܣ ܘܠܳܐ ܢܺܝܼܚ ܘܐܳܦܠܳܐ ܦܨܺܝܼܚ. ܠܡܳܢܳܐ ܟܰܝ؟

ܐܰܪܰܐ ܠܰܝܬܶܝܗܿ ܡܶܛܠ ܕܠܳܐ ܐܶܫܟܰܚ ܒܰܪܢܳܫܳܐ ܢܰܦܫܶܗ ܘܠܳܐ ܫܟܺܝܼܚ ܥܰܡ ܢܰܦܫܶܗ ܘܪܰܚܺܝܼܩ ܡܼܶܢ ܣܘܼ̈ܟܳܠܐ ܕܚܰܝ̈ܐ ܫܰܪܺܝܼܪ̈ܶܐ ܘܩܽܘܼ̈ܫܬܺܝܼܢܳܝܶܐ؟

ܣܽܘܼܟܳܠܐܝܼܬ ܡܿܰܢ ܩܽܘܼܫܬܳܐ ܪܰܒ ܘܥܶܠܳܝ ܡܼܶܢ ܛܶܟ̈ܣܶܐ ܘܕܰܪ̈ܓܶܐ ܘܐܰܩ̈ܡܶܐ ܥܳܠܡ̈ܳܢܳܝܶܐ. ܘܠܳܐ ܡܬܽܘܿܡ ܪ̈ܳܚܫܳܢ ܒܰܬܚܽܘܼ̈ܡܰܘܗܝ ܣܰܢܝ̈ܳܬܳܐ ܘܒܺܝܼ̈ܫܳܬܐ ܣܛܰܪ ܡܼܶܢ ܢܰܗܺܝܼܪ̈ܳܬܳܐ ܘܫܰܦܺܝܼܪ̈ܳܬܳܐ. ܘܡܶܬܚܰܒܰܠ ܘܡܶܙܕܰܝܰܦ ܡܽܘܼܙܳܓܳܐ ܓܰܘܳܝܳܐ ܘܒܰܪܳܝܳܐ ܟܰܪ ܕܠܳܐ ܡܰܡܠܶܟ ܫܽܘܼܠܛܳܢܶܗ. ܘܬܰܪܥܺܝܼܬܳܐ ܘܬܰܪܒܺܝܼܬܳܐ ܘܬܰܫܥܺܝܼܬܳܐ ܕܒܰܪܢܳܫܳܐ ܝܳܪܒܳܐ ܐܰܘ ܙܳܥܪܳܐ܆ ܘܡܶܬܡܰܚܠܳܐ ܐܰܘ ܡܶܬܥܰܫܢܳܐ܆ ܠܦܽܘܼܬ ܡܫܽܘܼܚܬܳܐ ܕܪܰܒܽܘܼܬܳܐ ܘܰܙܥܽܘܼܪܽܘܼܬܳܐ ܕܰܢܗܽܘܿܪ ܩܽܘܼܫܬܳܐ ܗܳܢܳܐ ܕܡܶܙܕܠܰܚ ܒܥܳܠܡܳܐ ܓܰܘܳܝܳܐ. ܘܰܟܡܳܐ ܕܙܳܐܡ ܚܺܝܼܠ ܨܰܘܬܶܗ܆ ܝܰܬܺܝܼܪ ܥܳܠܶܒ ܘܢܳܨܰܚ. ܘܰܟܡܳܐ ܕܡܶܫܬܡܰܥ ܩܳܠܶܗ܆ ܝܰܬܺܝܼܪ ܡܥܰܕܰܪ ܘܡܶܫܬܰܠܰܛ. ܒܕ ܐܰܩܢܰܐ ܗ̱ܘ ܕܒܶܗ ܗܼܽܘ ܡܶܬܬܟܺܝܼܠܺܝܼܢ ܘܡܶܬܒܰܚܪܺܝܢ ܟܽܠܗܽܘܿܢ ܢܺܝܼ̈ܫܶܐ ܘܥܰܡ̈ܠܐ ܘܕܘܼܒܳܪ̈ܶܐ ܘܣܽܘܼܥܪ̈ܳܢܶܐ ܐ̱ܢܳܫܳܝ̈ܶܐ. ܘܐܶܠܳܐ ܠܡܳܢܳܐ ܟܰܝ ܐܳܡܰܪ ܗ̱ܘܳܐ ܡܫܺܝܼܚܳܐ ܗܿܳܝ ܕܐܶܡܰܪ: «ܘܬܶܕܥܽܘܢ ܫܪܳܪܳܐ ܘܗܽܘܼ ܫܪܳܪܳܐ ܢܚܰܪܰܪܟܽܘܿܢ» (ܝܘܚܢܢ 8. 32).

ܠܳܐ ܠܰܡ ܥܳܡܪܳܐ ܚܶܟܡܬܳܐ ܒܢܰܦܫܳܐ ܗܿܳܝ ܕܡܰܠܝܳܐ ܚܳܪܥܽܘܼܬܳܐ ܘܰܨܢܺܝܼܥܽܘܼܬܳܐ ܘܡܶܬܠܰܬܟܳܐ ܒܒܺܝܼ̈ܫܳܬܳܐ. ܡܶܟܳܐ ܠܳܐ ܡܶܬܚܰܟܰܡ ܒܰܪܢܳܫܳܐ ܐܰܝܢܳܐ ܕܠܳܐ ܡܰܙܗܰܪ ܘܡܰܦܪܶܓ ܒܣܽܘܼ̈ܟܳܠܐ ܕܩܽܘܼܫܬܳܐ. ܒܰܕ ܐܶܠܘܼܠܐ ܒܽܘܼܚܪܳܢܶܗ܆ ܠܐ ܨܳܡܰܚ ܘܐܳܦܠܐ ܬܳܩܶܢ ܒܰܪܢܳܫܳܐ ܓܰܘܳܝܳܐ. ܘܐܠܘܼܠܳܐ ܢܽܘܼܗܪܶܗ܆ ܠܳܐ ܡܶܫܬܰܟܚܺܝܼܢ ܣܽܘܼ̈ܟܳܠܐ ܕܪܽܘܼܚܳܐ܆ ܘܐܳܦܠܳܐ ܡܶܫܬܰܟܢܳܐ ܥܺܝܼܪܽܘܼܬܳܐ ܘܚܶܟܡܬܳܐ ܒܰܝܢܳܬ ܕܠܽܘܼܚܝܳܐ ܕܰܒܠܺܝܼܠܽܘܼܬܳܐ. ܘܐܠܘܼܠܳܐ ܝܕܰܥܬܳܐ ܗܳܕܶܐ ܡܫܰܒܠܳܢܺܝܼܬܳܐ܆ ܠܳܐ ܡܶܫܬܰܦܝܳܐ ܬܰܪܥܺܝܼܬܳܐ. ܘܐܳܦܠܳܐ ܡܶܬܡܰܪܩܳܐ ܡܰܚܙܺܝܼܬܳܗܿ ܒܰܚܢܳܢܳܐ ܘܚܰܘܣܳܢܳܐ ܕܠܶܒܳܐ ܒܰܣܺܝܼܡܳܐ. ܘܰܥܒܳܕܳܐ ܗܳܢܳܐ ܠܳܐ ܡܶܫܬܰܡܠܐ ܐܶܠܳܐ ܒܝܰܕ ܗܰܘܢܳܐ ܚܠܺܝܼܡܳܐ ܘܡܰܕܥܳܐ ܬܪܺܝܼܨܳܐ: ܫܽܘܼܘܕܳܥܰܐ ܩܪܺܝܼܚܳܐ ܕܩܽܘܼܝܳܡܳܐ ܘܪܽܘܼܒܳܝܳܐ ܘܫܘܼܘܫܳܛܳܐ ܬܰܩܢܳܐ ܕܒܰܪ̈ܳܝܳܬܐ.

ܡܶܛܠܗܳܕܶܐ ܚܽܘܼܫ̈ܳܒܶܐ ܘܣܽܘܼ̈ܟܳܠܐ ܘܓܶܠܝ̈ܳܢܶܐ ܪ̈ܰܒܶܐ ܨܺܝܼܪܺܝܢ ܘܰܨܪܺܝܼܪܺܝܼܢ ܒܪܶܚܡܰܬ ܩܽܘܼܫܬܳܐ. ܒܰܕ ܠܰܘ ܒܰܠܚܽܘܿܕ ܠܰܫܪܳܪܳܐ ܘܟܺܐܢܽܘܼܬܳܐ ܘܰܬܪܺܝܼܨܽܘܼܬܳܐ ܘܚܶܟܡܬܳܐ ܚܳܒܫܳܐ܆ ܐܶܠܐ ܐܳܦ ܨܳܝܪܳܐ ܘܓܳܠܝܳܐ ܚܽܘܼܫܳܒܳܐ ܫܰܘܝܳܐ ܒܰܝܢܳܬ ܣܽܘܼܥܪ̈ܳܢܶܐ ܐ̱ܢܳܫ̈ܳܝܶܐ ܘܨܶܒܘ̈ܳܬܳܐ ܕܥܳܠܡܳܐ. ܘܡܳܫܚܳܐ ܘܬܳܩܠܐ ܘܓܳܡܪܐ ܬܰܪܥܺܝܼܬܳܐ ܒܫܰܦܺܝܼܪ̈ܳܬܳܐ. ܘܬܰܦܢܟܳܐ ܗ̱ܝ ܩܰܕܝܼܡܳܝܳܐ ܠܡܰܕ̈ܥܶܐ ܚܠܺܝܼ̈ܡܶܐ ܗܿܳܢܽܘܢ ܕܝܳܕܥܺܝܼܢ ܟܰܕ ܝܳܒܫܺܝܼܢ ܥܶܩܳܪ̈ܶܐ ܘܓܽܘܼܙܥܳܐ܆ ܠܐ ܡܰܗܢܶܐ ܘܐܳܦܠܳܐ ܡܰܘܬܰܪ ܬܰܚܬܽܘܼܪܳܐ ܘܬܰܟܬܽܘܼܫܳܐ ܒܗܳܠܶܝܢ ܕܛܰܪ̈ܦܶܐ ܘܫܰܒܘܼ̈ܩܶܐ ܘܣܰܘ̈ܟܳܬܐ. ܘܡܶܟܳܐ ܟܰܕ ܒܳܥܶܝܢ ܕܢܶܬܪܰܚܩܽܘܿܢ ܡܶܢ ܕܽܘܼܘ̈ܳܢܶܐ ܨܳܠܶܝܢ ܐܶܕܢܳܐ ܠܗܿܳܕܶܐ ܕܐܳܡܪܳܐ: «ܠܶܒܳܐ ܬܰܩܢܳܐ ܩܳܢܶܐ ܚܶܟܡܬܳܐ. ܘܐܶܕܢܳܐ ܚܰܟܝܼܡܬܳܐ ܨܳܝܬܳܐ ܝܕܰܥܬܳܐ» (ܡ̈ܬܠܐ 18:15).

ܐܰܟܡܳܐ ܕܫܳܪܳܐ ܡܼܶܢ ܡܰܣ̈ܝܽܘܼܢܶܐ ܘܡܰܫܩ̈ܠܳܢܐ ܥܒܺܝܪ̈ܶܐ ܕܐ̱ܢܳܫܽܘܼܬܳܐ ܠܳܐ ܢܳܗܪܳܐ ܬܰܪܥܺܝܼܬܳܐ ܘܐܦܠܳܐ ܒܳܗܪܳܐ ܐܽܘܼܪܰܚ ܡܰܪܕܘܼܬܐ ܘܰܡܕܺܝܼܢܳܝܽܘܼܬܳܐ ܒܰܡܗܰܒ̈ܒܳܢܝܳܬܳܐ ܐܶܢ ܠܳܐ ܨܳܡܰܚ ܘܢܳܨܰܚ ܣܽܘܼܟܳܠܐ ܕܩܽܘܼܫܬܳܐ ܒܥܳܠܡܳܐ ܓܰܘܳܝܳܐ «ܕܒܰܪܢܳܫܳܐ.» ܘܰܕܠܳܐ ܦܽܘܼܫܳܟ ܫܪܳܪܳܐ ܗܳܢܳܐ ܡܶܬܒܰܕܰܩ ܒܰܣܝ̈ܳܡܶܐ ܩܽܘܼܫ̈ܬܺܝܼܢܳܝܶܐ ܕܡܰܠܦ̈ܳܢܶܐ ܣܽܘܼܪ̈ܳܝܝܶܐ ܘܰܕܥܳܠܡܳܐ ܓܰܘܢܳܐܝܬ. ܒܰܕ ܐܰܟܡܳܐ ܕܡܶܬܬܡܺܝܼܫܳܐ ܡܶܫܬܰܚܰܩ ܘܡܶܬܕܰܘܰܕ ܒܰܪܢܳܫܳܐ ܟܰܕ ܛܡܺܝܼܪ ܘܰܩܒܺܝܼܪ ܩܽܘܼܫܬܳܐ ܒܟܶܬܳܐ[2] ܕܚܰܫ̈ܶܐ ܢܰܦܫ̈ܳܢܳܝܶܐ ܘܰܒܥܰܦܪܳܐ ܕܝܰܨܪ̈ܶܐ ܒܶܣܪ̈ܳܢܳܝܶܐ ܘܐܶܢܳܢ̈ܝܶܐ. ܗܿܳܢܽܘܢ ܕܡܶܢܗܽܘܿܢ ܒܳܠܨܺܝܼܢ ܘܢܳܒܥܺܝܼܢ ܣܽܘܼܓܐܳܐ ܕܩܶܛܪ̈ܶܐ ܘܒܽܘܼ̈ܠܒܳܠܐ ܘܐܘܼ̈ܠܨܳܢܶܐ ܘܢܶܣܝ̈ܽܘܼܢܶܐ ܡܛܰܪ̈ܦܳܢܶܐ. ܘܫܽܘܼܘܙܳܒܐ ܬܰܠܝܰܐ ܗ̱ܘ ܘܐܰܣܺܝܼܪ ܒܫܽܘܼܒܳܠܐ ܕܡܶܨ̈ܥܳܝܶܐ ܦܪ̈ܺܝܼܫܶܐ. ܘܚܰܕ ܡܶܢ ܗܳܠܶܝܢ ܡܶܨ̈ܥܳܝܶܐ ܪ̈ܺܝܼܫܳܝܶܐ ܥܘܼܩܳܒܰܐ ܗ̱ܘ ܘܦܽܘܼܬܳܫܳܐ ܕܰܨܠܶܡ ܩܽܘܼܫܬܳܐ ܒܚܰܘ̈ܩܶܐ ܕܰܟܬܳܒ̈ܶܐ ܗܿܳܢܽܘܢ ܕܒܰܙܒܰܢ ܡܶܬܕܰܡܝܢ ܠܢܳܪ̈ܓܶܐ ܬܳܒܪ̈ܰܝ ܓܠܺܝܼܕܳܐ ܕܡܰܚܫܰܒܬܐ ܐ̱ܢܳܫܳܝܬܳܐ. ܘܒܰܙܒܰܢ ܡܶܬܛܰܦܣܺܝܼܢ ܒܡܰܚܙܺܝܼܬܳܐ ܕܒܳܗܿ ܡܶܬܚܰܙܝܳܐ ܫܰܦܺܝܼܪܽܘܼܬܳܐ ܘܰܫܟܺܝܼܪܽܘܼܬܳܐ. ܘܰܚܘܺܝܼܚܽܘܼܬܳܐ ܘܰܗܦܺܝܼܟܺܘܼܬܳܐ. ܘܡܰܠܝܽܘܼܬܳܐ ܘܰܒܨܺܝܼܪܘܼܬܳܐ.

ܒܰܪܢܳܫܳܐ ܡܿܰܢ ܐܺܝܼܬܝܰܐ ܗ̱ܘ ܪܽܘܼܚܳܢܝܳܐ ܘܒܶܣܪܳܢܳܝܳܐ ܕܡܶܬܟܰܝܰܢ ܡܼܶܢ ܥܳܠܡܳܐ ܒܰܪܳܝܳܐ ܕܦܰܓܪܳܐ ܘܗܽܘܼ̈ܠܳܢܳܝܳܬܐ. ܘܡܼܶܢ ܥܳܠܡܳܐ ܓܰܘܳܝܳܐ ܕܪܽܘܼܚܳܐ ܘܣܽܘܼܟ̈ܠܳܝܳܬܳܐ. ܘܗܺܝܼܝܽܘܼܬܶܗ ܐ̱ܢܳܫܳܝܬܳܐ ܠܳܐ ܕܳܢܚܳܐ ܘܐܳܦܠܳܐ ܨܳܡܚܳܐ ܐܶܠܳܐ ܒܣܽܘܼܟܳܠܐ ܦܰܛܢܳܐ ܘܓܽܘܼܡܳܪܳܐ ܬܰܩܢܳܐ ܕܰܬܪ̈ܰܝܗܽܘܿܢ ܥܳܠܡ̈ܶܐ ܣܽܘܼܢܩܳܢܗܽܘܿܢ. ܘܐܰܟܡܳܐ ܕܡܶܬܬܡܺܝܼܫܳܐ܆ ܪܳܘܶܙ ܘܕܳܐܶܨ ܒܰܪܢܳܫܳܐ ܒܰܫܟܳܚܬܳܐ ܕܣܽܘܼܟܳܠܐ ܘܫܽܘܼܦܪܳܐ ܒܰܪܳܝܳܐ܆ ܒܪܰܡ ܣܽܘܿܓܳܐܐ ܕܙܰܒܢ̈ܺܝܢ ܛܥܶܐ ܘܰܛܫܶܐ ܣܽܘܼܟܳܠܐ ܘܫܽܘܼܦܪܳܐ ܕܥܳܠܡܳܐ ܓܰܘܳܝܳܐ ܘܠܰܝܬ ܨܶܦܬܳܐ ܠܰܫܟܳܚܬܶܗ ܐܰܝܟ ܕܡܶܬܒܰܥܝܳܐ. ܘܐܶܢ ܡܰܗܡܶܝܢܰܢ ܒܥܳܬܳܐ ܘܰܒܨܳܬܳܐ[3] «ܕܛܰܥܡܳܐ ܘܣܽܘܼܟܳܠܐ» ܕܥܳܠܡܳܐ ܓܰܘܳܝܳܐ ܦܳܝܫܺܝܼܢܰܢ ܒܟܽܘܼܫܳܪ̈ܶܐ ܫܚܺܝܼ̈ܡܶܐ ܘܠܳܐ ܡܳܢܥܺܝܼܢܰܢ ܠܟܽܘܼܫܳܪ̈ܶܐ ܫܰܪܺܝܼܪ̈ܶܐ.

ܐܰܟܡܳܐ ܕܡܰܣܓܶܝܢ ܘܝܳܗܒܺܝܼܢ ܛܰܥܡܳܐ ܦܪܺܝܼܫܳܐ ܘܒܰܣܺܝܼܡܳܐ ܘܗܰܢܺܝܳܐܐ ܐܰܨܪ̈ܶܐ[4] ܟܰܕ ܡܶܬܡܰܕܟܺܝܼܢ ܒܒܽܘܼܫܳܠܐ ܐܰܘ ܒܡܶܐܟܠܐ܆ ܒܰܗܿ ܒܰܕܡܽܘܼܬܳܐ ܡܘܼܙܳܓܳܐ ܘܣܽܘܼܩܳܡܳܐ ܘܬܽܘܼܩܳܢܳܐ ܕܰܬܪ̈ܰܝܗܽܘܿܢ ܥܳܠܡ̈ܶܐ ܡܒܰܣܶܡ ܡܰܕܥܳܐ ܒܦܳܪܽܘܿܫܽܘܼܬܳܐ: ܐܶܡܳܐ ܕܝܕܰܥܬܐ ܝܬܰܡܬܳܐ ܘܰܡܚܰܟܡܳܢܳܝܼܬܳܐ ܕܰܡܫܰܒܠܢܳܐ ܓܰܘܳܝܳܐ. ܒܰܕ ܐܶܠܘܼܠܐ ܦܳܪܽܘܿܫܽܘܼܬܳܐ ܕܚܰܘܣܳܢܳܐ܆ ܠܳܐ ܡܳܐܢܳܐ ܠܶܗ ܒܰܪܢܳܫܳܐ ܡܼܶܢ ܗܿܰܘ ܡܳܐ ܕܙܳܕܩ ܕܢܶܬܒܛܶܠ ܠܶܗ ܥܠܰܘܗܝ. ܘܐܳܦܠܐ ܡܶܬܬܙܺܝܼܥܳܐ ܒܶܗ ܪܽܘܼܚܳܐ ܕܡܰܬܚܰܦܛܳܐ ܒܦܽܘܼܪ̈ܣܶܐ ܐܽܘܼܟ̈ܦܳܢܳܝܶܐ ܕܐܳܙܠܺܝܼܢ ܠܫܽܘܼܩܳܝܳܐ ܘܬܽܘܼܪܣܳܝܳܐ ܕܫܽܘܼܡܠܳܝܳܐ ܘܣܽܘܼܢܩܳܢܳܐ.

ܠܰܝܬ ܡܶܕܶܡ ܕܗܳܟܰܢܳܐ ܥܰܙܺܝܼܙ ܘܰܫܚܺܝܼܩ ܐܰܝܟ ܚܶܪܝܳܢܳܐ ܕܚܳܝܶܐ ܒܰܪܢܳܫܳܐ ܒܥܳܠܡܶܗ ܓܰܘܳܝܳܐ ܩܶܨܰܬ ܟܪܺܝܼܗܽܘܼܬ ܢܰܦܫܳܐ ܘܡܰܕܥܳܐ. ܘܐܰܝܟ ܫܰܪܟܳܐ ܕܰܐ̱ܚܪ̈ܳܢܶܐ ܐܳܦ ܬܒܳܪܳܐ ܘܡܰܪܥܳܐ ܗܳܢܳܐ ܣܢܺܝܼܩ ܗ̱ܘ ܠܰܥܨܳܒܳܐ ܝܕܰܥܬܳܢܳܝܳܐ ܘܣܽܘܼܡܣܳܡܳܐ ܡܰܕܥܳܢܳܝܳܐ ܐܰܝܟܰܢܳܐ ܕܢܶܬܚܠܶܡ ܘܢܶܬܥܰܫܰܢ ܒܰܪܢܳܫܳܐ ܒܕܺܝܼܠܶܗ. ܘܰܟܬܳܒ̈ܶܐ ܬܘܼܪܣܳܝܳܐ ܐܶܢܽܘܢ ܪܺܝܼܫܳܝܳܐ ܕܰܒܗܽܘܿܢ ܡܶܬܚܰܠܡܳܐ ܢܰܦܫܳܐ ܘܡܶܬܡܪܶܩ ܡܰܕܥܳܐ ܘܢܳܗܪܺܝܼܢ ܕܰܘ̈ܩܶܐ ܓܰܘ̈ܳܝܳܐ[5]. ܘܣܰܪ̈ܒܳܢܐ[6] ܡܶܬܚܰܫܒܺܝܼܢ ܒܦܽܘܼܪܳܫ ܐܽܘܼܪܰܚ ܩܽܘܼܫܬܳܐ. ܗܿܳܝ ܕܡܶܛܽܠܳܬܶܗ ܐܳܡܿܰܪ ܩܰܕܺܝܼܫܳܐ ܡܳܪܝ ܐܰܦܪܶܝܡ (306-373): «ܟܬܳܒ̈ܶܐ ܣܺܝܼܡܺܝܼܢ ܐܰܝܟ ܡܰܚܙܺܝܼܬܳܐ. ܕܫܰܦܝܳܐ ܥܰܝܢܶܗ ܨܰܠܡܳܐ ܕܩܽܘܼܫܬܳܐ ܚܳܙܶܐ ܬܰܡܳܢ. ܢܽܘܼܗܪܳܐ ܦܐܶܐ ܠܥܰܝ̈ܢܶܐ ܘܩܽܘܼܫܬܳܐ ܠܬܰܪܥܺܝܼܬܳܐ. ܢܽܘܼܗܪܳܐ ܓܒܺܝܼ ܠܥܰܝܢܳܟ. ܟܬܳܒ̈ܶܐ ܠܬܰܪܥܺܝܼܬܳܟ. ܟܽܠ ܝܽܘܿܡ ܕܠܳܐ ܩܳܪܶܐ ܐܰܢ̱ܬ. ܘܡܼܶܢ ܟܬܳܒ̈ܶܐ ܠܳܐ ܝܳܬܰܪ ܐܰܢ̱ܬ. ܕܰܥ ܕܡܼܶܢ ܫܺܐܕ̈ܶܐ ܡܶܙܕܟܶܐ ܐܰܢ̱ܬ. ܘܥܰܡ ܒܰܛܝܼ̈ܠܶܐ ܡܶܬܶܡܢܶܐ ܐܰܢ̱ܬ.»

ܘܩܶܪܝܳܢ ܣܶܦܪ̈ܶܐ ܘܰܟܬܳܒ̈ܶܐ ܙܢܳܢܳܝ̈ܶܐ ܘܰܦܪ̈ܺܝܼܫܶܐ ܝܳܗܶܒ ܣܽܘܼܟܳܠܐ ܘܛܰܥܡܳܐ ܚܠܺܝܼܡܳܐ ܠܡܰܕܥܳܐ. ܘܰܡܫܰܦܶܝܢ ܠܥܰܝܢܳܐ ܠܡܶܚܙܳܐ ܨܰܠܡܳܐ ܕܩܽܘܼܫܬܳܐ. ܘܐܰܝܢܳܐ ܕܠܳܐ ܚܠܺܝܼܡ ܒܽܘܼܝܳܢܶܗ ܘܠܳܐ ܫܰܦܝܳܐ ܥܰܝܢܶܗ ܠܳܐ ܡܶܣܬܰܝܒܰܪ ܡܼܶܢ ܡܳܙܽܘܿܢܗܽܘܿܢ. ܘܟܰܕ ܠܳܐ ܡܶܣܬܰܝܒܰܪ ܠܐ ܡܶܫܟܰܚ ܐܶܠܳܐ ܩܽܘܼܫܬܳܐ ܒܨܺܝܼܪܳܐ ܕܢܰܦܫܶܗ. ܘܗܳܢܳܐ ܡܶܕܶܡ ܓܳܪܶܦ ܠܫܽܘܼ̈ܢܳܩܶܐ ܘܕܽܘܼ̈ܢܳܩܶܐ. ܒܰܕ ܠܐ ܡܶܬܚܰܟܰܡ ܐܰܝܢܳܐ ܕܠܳܐ ܥܰܠܺܝܼܠ ܒܰܢܗܽܘܿܪ ܣܽܘ̈ܟܳܠܶܐ ܕܩܽܘܫܼܬܳܐ ܪܰܒܳܐ «ܐܰܠܗܳܝܳܐ». ܘܰܐܠܝܼܨ ܝܰܨܪܳܐ ܗܿܳܘܶܐ ܕܰܡܪ̈ܺܝܼܛܳܢ ܐܶܒܪ̈ܰܝ ܬܰܪܥܺܝܼܬܶܗ. ܘܛܳܥܶܐ ܕܐܺܝܼܬܰܘܗܝ ܫܒܶܫܬܳܐ «ܪܰܘܛܳܐ» ܕܰܓܦܶܬܐ. ܘܡܶܫܬܰܥܠܶܐ ܘܡܶܬܪܰܘܪܰܒ ܒܰܝܢܳܬ ܠܶܗ ܘܰܠܢܰܦܫܶܗ ܟܰܕ ܚܳܫܶܒ ܗܽܘܼ ܠܶܗ ܓܦܶܬܐ «ܣܰܬܐ» ܒܝܳܬܳܗܿ.

ܘܰܬܢܳܢ ܫܰܦܺܝܼܪܳܐ ܕܢܶܨܠܐ ܐܶܕܢܳܐ ܠܡܰܬܠܐ ܐܰܒܳܗܳܝܳܐ ܕܐܳܡܿܰܪ: «ܩܶܪܝܳܢ ܣܶܦܪ̈ܶܐ ܕܠܳܐ ܒܨܳܬܳܐ܆ ܥܰܡܠܳܐ ܐܺܝܼܬܰܘܗܝ ܒܰܛܺܝܼܠܐ. ܘܕܳܡܶܐ ܠܰܕܙܳܪܥ ܪܽܘܼܚܳܐ. ܘܚܳܨܶܕ ܡܰܫܒܳܐ ܘܥܰܠܥܳܠܐ. ܫܳܘܶܐ ܓܶܝܪ ܩܶܪܝܳܢܳܐ ܫܚܺܝܼܡܳܐ ܥܰܡ ܩܳܝܶܡܬܳܐ ܦܰܚܺܝܼܚܬܳܐ. ܘܕܳܡܶܐ ܠܫܶܒܠܳܐ ܕܠܳܐ ܩܰܡܚܳܐ. ܘܠܰܥܡܺܝܼܪܳܐ ܒܙܰܒܢܳܐ ܕܪܽܘܼܚܳܐ. ܕܩܳܪܶܐ ܒܶܠܥܳܕ ܦܽܘܼܫܳܩܳܐ܆ ܥܡܺܝܼܪܳܐ ܟܳܢܶܫ ܕܐܶܓܳܪ̈ܶܐ. ܘܦܽܘܼܠܚܳܢܶܗ ܗܳܘܶܐ ܣܪܺܝܼܩܳܐ. ܐܳܦ ܥܰܡܠܶܗ ܕܠܳܐ ܝܽܘܼܬܪܳܢܳܐ.»

ܘܠܳܐ ܟܰܣܝܳܐ ܡܼܶܢ ܦܳܪ̈ܽܘܿܫܶܐ ܕܠܰܡ ܣܽܘܼܓܳܐܐ ܕܩܶܛܪ̈ܶܐ ܘܒܽܘܼ̈ܠܒܳܠܐ ܒܳܠܨܺܝܼܢ ܡܼܶܢ ܐܶܣܟܺܝܼܡܳܐ «ܐܳܕܫܳܐ» ܕܡܰܚܫܰܒܬܳܐ ܡܶܬܗܰܠܟܳܢܺܝܼܬܳܐ ܗܿܳܝ ܕܰܬܪ̈ܺܝܼܨܶܐ ܚܳܫܒܳܐ ܠܦܰܘ̈ܕܶܐ ܕܪ̈ܺܝܼܫܶܐ. ܘܠܳܐ ܢܳܒܥܺܝܼܢ ܡܼܶܢ ܬܰܪܥܺܝܼܬܳܐ ܕܠܺܝܼܚܬܳܐ ܐܶܠܐ ܡܪ̈ܺܝܼܡܳܢܝܳܬܳܐ ܘܡܰܗܪ̈ܳܢܝܳܬܳܐ ܕܫܳܓ̈ܫܳܢ ܘܰܡܪ̈ܺܝܼܒܳܢ. ܘܡܰܠܙܳܢܽܘܼܬܳܐ ܬܥܺܝܼܫܬܳܐ ܕܢܳܒܥܳܐ ܡܼܶܢ ܐܶܣܟܺܝܡ ܡܰܚܫܰܒܬܳܐ ܕܪܺܝܼܫܬܳܐ܆ ܠܳܐ ܡܶܫܬܰܓܢܝܳܐ ܠܡܰܕܠܳܢܽܘܼܬܳܐ ܒܪܺܝܼܟܬܳܐ܆ ܐܶܠܳܐ ܒܪܽܘܼܨܳܢܳܐ ܒܗܺܝܼܠܳܐ ܘܚܽܘܼܟܳܡܳܐ ܓܡܺܝܼܪܳܐ ܘܰܪܘܺܝܼܚܳܐ ܕܰܨܠܶܡ ܩܽܘܼܫܬܳܐ. ܗܳܢܳܐ ܕܰܡܨܰܝܒ ܡܰܚܫܰܒܬܳܐ ܘܬܰܪܥܺܝܼܬܳܐ ܠܨܰܘܒܳܐ ܬܪܺܝܼܨܳܐ ܕܬܰܪܒܺܝܼܬܳܐ ܘܡܰܪܕܺܝܼܬܳܐ ܕܠܳܐ ܢܳܟܝܳܐ ܘܐܳܦܠܳܐ ܢܳܟܬܳܐ ܠܗܳܢܳܐ ܘܰܠܗܿܰܘ ܫܺܝܼܛܳܐܝܼܬ.

ܐܳܡܰܪ ܡܰܬܠܳܐ: «ܗܰܘܿ ܕܙܳܪܰܥ ܥܰܘܠܳܐ܆ ܚܳܨܶܕ ܥܶܬܳܐ». ܟܰܕ ܚܳܨܕܺܝܼܢܰܢ ܗܿܰܘ ܡܳܐ ܕܙܳܪܥܺܝܼܢܰܢ܆ ܡܳܕܶܝܢ ܫܰܦܺܝܼܪܳܐ ܗ̱ܝ ܕܢܶܙܪܽܘܿܥ ܪ̈ܶܥܝܳܢܶܐ ܘܢܺܝ̈ܫܶܐ ܡܣܺܝܼ̈ܡܳܢܶܐ ܠܡܶܩܦܰܣ ܥܠܰܠܬܳܐ ܛܳܒܬܳܐ. ܐܰܝܟ ܕܐܰܡܺܝܼܪܳܐ: «ܡܼܶܢ ܬܰܘܬܳܪ̈ܰܝ ܠܶܒܳܐ ܓܶܝܪ ܡܡ̈ܰܠܠܳܢ ܣܶܦܘ̈ܳܬܳܐ» (ܠܘܩܐ 6: 45).

ܘܟܰܕ ܪܶܥܝܳܢܳܐ ܐܺܝܼܬܰܘܗܝ ܕܡܶܫܬܰܚܠܰܦ ܠܥܶܢܝܳܢܐ ܘܕܽܘܼܒܳܪܳܐ ܘܗܽܘܼܦܳܟܳܐ܆ ܡܶܟܺܝܠ ܙܳܕܶܩ ܕܢܶܓܒܶܐ ܘܢܶܩܪܶܐ ܪ̈ܶܥܝܳܢܶܐ ܕܡܰܛܦܺܝܼܢ ܒܽܘܼܣܳܡܳܐ ܘܫܽܘܼܘܫܳܛܐ. ܕܐܳܡܿܰܪ ܫܠܶܝܡܽܘܢ ܚܰܟܺܝܼܡܳܐ: «ܡܼܶܢ ܦܺܐܪ̈ܰܝ ܦܽܘܼܡܶܗ ܕܓܰܒܪܳܐ ܬܶܣܒܰܥ ܟܰܪܣܶܗ. ܘܥܰܠ̈ܠܬܳܐ ܕܣܶܦܘ̈ܳܬܶܗ ܢܶܣܒܰܥ. ܡܰܘܬܐ ܘܚ̈ܰܝܶܐ. ܒܝܰܕ ܠܶܫܳܢܰܐ ܗ̱ܘ. ܘܰܕܪܳܚܡ ܠܶܗ ܢܶܐܟܽܘܿܠ ܡܼܶܢ ܦܺܐܪ̈ܰܘܗܝ» (ܡ̈ܬܠܐ 18: 21-20).

ܘܰܒܣܽܘܼܟܳܠܐ ܗܳܢܳܐ ܣܶܦܪܳܝܽܘܼܬܳܐ ܕܶܝܢ ܩܰܢܝܳܐ ܕܰܘܪܳܐ ܡܣܺܝܼܡܳܢܳܐ ܘܰܡܦܺܝܼܣܳܢܳܐ ܒܬܶܫܡܶܫܬܳܐ ܕܐ̱ܢܳܫܽܘܼܬܳܐ. ܕܦܳܪܣܳܐ ܘܓܳܠܚܳܐ ܡܶܬܝܰܩ̈ܢܳܢܘܳܬܐ «ܫܽܘܘ̈ܕܳܥܶܐ ܣܽܘܼ̈ܟܳܠܳܝܶܐ ܕܡܶܬܬܨܺܝܼܪܺܝܼܢ ܒܬܰܪܥܺܝܼܬܳܐ» ܕܪ̈ܶܓܫܶܐ ܘܢܶܒ̈ܗܶܐ ܘܪ̈ܶܥܝܳܢܶܐ ܒܪܽܘܼܟܳܒܳܐ ܦܪܺܝܼܫܳܐ ܫܰܪܝܳܐܝܼܬ ܘܰܡܡܰܫܚܳܐܝܬ. ܘܪܶܥܝܳܢܳܐ ܕܢܳܒܰܥ ܡܼܶܢ ܥܽܘܼܡܩܳܗܿ ܡܰܦܶܩ ܡܼܶܢ ܩܠܽܘܼܒܝܳܐ ܡܫܰܚܩܳܢܳܐ. ܘܕܳܡܝܳܐ ܠܟܰܗܪܳܒܳܐ ܕܠܳܐ ܡܬܶܚܙܶܐ ܐܶܠܳܐ ܒܪܰܡ ܡܰܢܗܰܪ ܘܰܡܫܰܒܶܠ ܬܰܪܥܺܝܼܬܳܐ ܕܒܰܪܢܳܫܳܐ ܒܢܘܼܗܪܳܐ ܦܪܺܝܼܫܳܐ. ܕܢܳܛܶܦ ܘܢܳܨܶܠ ܥܽܘܼܬܪܳܗܿ ܣܦܺܝܼܪܳܐ ܒܥܳܠܡܳܐ ܣܘܼܟܳܠܳܝܳܐ ܕܡܰܚܫܰܒܬܳܐ. ܗܳܢܳܐ ܡܶܕܶܡ ܕܰܫܒܰܩ ܘܫܳܒܶܩ ܕܢܶܫܬܰܓܢܶܐ ܥܳܠܡܳܐ ܘܢܶܗܘܶܐ ܒܰܕܡܽܘܼܬ ܫܽܘܼܩܳܐ ܕܠܰܝܬ ܠܶܗ ܬܰܪ̈ܥܶܐ ܘܐܳܦܠܳܐ ܫܽܘܼܪ̈ܶܐ ܘܰܬܚܽܘܼ̈ܡܶܐ. ܡܶܟܳܐ ܡܶܬܒܰܕܩܳܐ ܕܐܺܝܼܬܶܝܗܿ ܡܰܚܙܺܝܼܬܳܐ ܕܓܰܘܳܐ. ܘܠܶܫܳܢܳܐ܆ ܐܶܣܛܽܘܼܟܣܳܗܿ ܪܺܝܼܫܳܝܳܐ. ܘܰܬܪ̈ܰܝܗܽܘܿܢ ܥܳܫܢܺܝܼܢ ܒܰܚܕ̈ܳܕܶܐ. ܘܡܳܪܩܺܝܼܢ ܡܽܘܼ̈ܡܶܐ ܘܰܡܚܰܠܠܺܝܼܢ ܩܽܘܼ̈ܡܠܶܝܗܿ[7] ܕܢܰܦܫܳܐ. ܡܶܛܠܗܳܕܶܐ ܟܳܬܶܒ ܘܐܳܡܿܰܪ ܣܳܦܪܳܐ ܦܪܰܢܫܳܝܳܐ Albert Camus ܐܠܒܶܪܬ ܓܰܡܘܼܣ (1913-1960): «ܟܰܪ ܕܐܺܝܼܬ ܣܶܦܪܳܝܽܘܼܬܳܐ ܬܰܡܳܢ ܫܟܺܝܼܚ ܐܳܦ ܣܰܒܪܳܐ.»

ܠܰܝܬ ܘܳܠܺܝܼܬܳܐ ܕܠܳܐ ܙܶܕܩܳܐ. ܘܐܳܦܠܳܐ ܙܶܕܩܳܐ ܕܠܳܐ ܘܳܠܺܝܼܬܳܐ ܒܥܳܠܡܳܐ ܢܰܗܺܝܼܪܳܐ. ܘܠܰܝܬ ܡܶܕܶܡ ܕܰܦܫܺܝܼܩ ܘܰܕܠܺܝܼܠ. ܘܝܕܰܥܬܳܐ ܐܰܝܕܳܐ ܕܗܺܝܼ ܠܳܐ ܡܶܬܓܰܫܡܳܐ ܐܶܠܐ ܒܚܽܘܼܒܳܐ ܙܳܩܽܘܼܬܳܐ ܘܰܛܢܳܢܳܐ ܫܓܺܝܼܪܳܐ ܕܐܰܣܺܝܼܪ ܒܢܺܝܼܫܳܐ ܘܥܰܡܠܳܐ ܪܰܒܳܐ. ܒܰܕ ܐܳܡܪܺܝܼܢ ܩܰܕܡ̈ܳܝܶܐ: «ܠܳܐ ܬܶܐܡܰܢ ܠܳܟ ܐܶܢ ܕܰܥܺܝܼܟܺܝܼܢ ܠܰܡܦܺܐܕ̈ܶܐ ܘܰܦܪܺܝܼܣ ܚܽܘܼܒܝܳܐ ܘܥܰܡܛܳܢܐ. ܐܰܢ̱ܬ ܕܽܘܼܩ ܡܰܦ̈ܩܳܢܶܐ ܒܰܢܗܽܘܿܪ ܣܰܗܪܳܐ».

ܣܽܘܼ̈ܟܳܠܐ ܘܦܽܘܼܪ̈ܓܳܠܶܐ ܗܳܠܶܝܢ ܡܫܰܒ̈ܠܳܢܶܐ ܡܰܚܡܶܝܢ ܠܪ̈ܶܓܫܰܝ ܓܰܘ̈ܳܝܶܐ. ܘܰܦܝܳܣ̈ܶܐ ܕܡܰܚ̈ܒܳܢܶܐ ܘܰܡܚܰܦ̈ܛܳܢܐ ܡܓܰܪܓܺܝܼܢ ܕܐܶܩܽܘܼܡ ܒܫܽܘܼܡܠܳܝܳܐ ܕܥܰܡܠܳܐ ܣܶܦܪܳܢܳܝܳܐ ܘܕܳܪܳܢܳܝܳܐ. ܘܡܶܛܠܗܳܕܶܐ ܪܰܒܰܬ ܥܳܡܶܠ ܐ̱ܢܳܐ. ܘܟܳܬܶܒ ܘܦܳܪܶܣ ܐ̱ܢܳܐ ܒܢܺܝܼܫ ܢܽܘܼܦܳܫܳܐ ܠܶܫܳܢܳܝܳܐ ܘܛܘܼܥܳܡܳܐ ܪܶܥܝܳܢܳܝܳܐ. ܗܺܝܼ ܗܳܕܶܐ ܥܳܒܶܕ ܐ̱ܢܳܐ ܠܦܽܘܼܬ ܡܚܺܝܼܠܽܘܼܬܝ ܝܕܰܥܬܝ ܐܰܝܟܰܢܳܐ ܕܠܳܐ ܢܒܽܘܼܪܽܘܼܢ ܚܰܘ̈ܩܶܐ ܕܣܶܦܪܳܝܽܘܼܬܰܢ ܘܠܳܐ ܢܶܬܬܰܗܡܽܘܿܢ ܣܚ̈ܳܦܶܐ ܘܫܽܘܼܪ̈ܶܐ ܕܡܰܪܕܽܘܼܬܰܢ. ܘܠܰܝܬ ܠܺܝܼ ܢܺܝܼܫܳܐ ܡܶܕܶܡ ܐܰܪܥܳܢܳܝܳܐ ܐܶܠܳܐ ܛܳܒܬܳܐ ܕܢܰܦܫ̈ܳܬܳܐ. ܘܡܰܕܪܟܳܢܽܘܼܬܳܐ ܘܡܶܣܬܰܟܠܳܢܽܘܼܬܐ ܚܕܰܬܳܐ. ܘܡܰܘܠܳܕܳܐ ܬܪܰܝܳܢܳܐ. ܘܥܺܝܼܪܽܘܼܬܳܐ ܦܳܪܽܘܿܫܬܳܐ ܡܶܛܽܠ ܡܰܕܥܳܐ ܚܠܺܝܼܡܳܐ ܘܚܶܟܡܰܬ ܩܽܘܼܫܬܳܐ. ܕܰܡܗܰܝܡܶܢ ܐ̱ܢܳܐ ܕܗܽܘܼ ܢܰܘܚܳܐ ܡܰܕܥܳܢܳܝܳܐ ܘܪܰܘܚܳܐ ܢܰܦܫܳܢܳܝܳܐ ܐܰܓܪܰܐ ܗ̱ܘ ܪܰܒܳܐ ܕܥܰܡ̈ܠܐ ܪ̈ܶܥܝܳܢܳܝܶܐ ܘܰܟܬܝܼܒ̈ܬܳܢܳܝܶܐ. ܘܦܽܘܼܪܥܳܢܰܐ ܗ̱ܘ ܕܫܰܗܪ̈ܶܐ ܣܦܺܝܼܪ̈ܶܐ ܒܙܰܒܢܳܐ ܕܒܽܘܼܝܳܪ̈ܶܐ. ܘܟܰܕ ܪܳܘܰܚ ܘܢܳܐܰܚ ܩܰܘܡܳܐ ܓܰܘܳܝܳܐ܆ ܒܳܣܶܡ ܘܢܳܨܰܚ ܐܳܦ ܦܰܘܫܳܐ ܒܰܪܳܝܳܐ. ܘܰܒܣܽܘܼܟܳܠܐ ܗܳܢܳܐ܆ ܪܶܥܝܳܢܳܐ ܕܢܳܒܰܥ ܘܐܳܬܶܐ ܡܼܶܢ ܗܰܘܢܳܐ ܕܪܽܘܼܚܳܐ܆ ܡܣܰܝܥܳܢܰܐ ܗ̱ܘ ܐܰܝܟ ܥܘܼܕܪܳܢܳܐ ܗܰܘ ܝܰܨܺܝܼܦܳܐ ܕܚܰܝܬܳܐ ܡܰܘܠܕܳܢܺܝܼܬܳܐ..

ܒܶܗ ܒܢܺܝܼܫܳܐ ܗܳܢܳܐ ܘܰܒܢܺܝܼܫ ܦܽܘܼܪܥܳܢ ܡܢܳܬܳܐ ܡܼܶܢ ܚܽܘܼ̈ܒܠܶܐ ܛܰܪ̈ܩܶܐ ܕܡܰܪܕܽܘܼܬܰܢ܆ ܘܰܒܣܰܒܪܳܐ ܕܐܰܘܬܰܪ ܠܓܰܘܳܐ ܘܰܠܫܰܪ̈ܒܳܬܐ ܕܒܳܬܪܰܢ܆ ܒܚܰܕܘܼܬܳܐ ܕܠܶܒܳܐ ܒܪܰܡ ܒܙܰܘܥܳܐ ܥܡܺܝܼܠܳܐ ܟܳܬܶܒ ܐ̱ܢܳܐ ܫܰܪ̈ܒܶܐ ܙܢܳܢ̈ܳܝܶܐ ܫܰܪܝܳܐܝܼܬ ܐܰܝܟ ܕܰܠܕܘܼܪܳܫܳܐ ܘܒܽܘܼܕܳܩܳܐ ܕܰܒܢ̈ܰܘܗܝ ܘܡܰܚ̈ܒܳܢܰܘܗܝ ܕܠܶܫܳܢܳܐ ܣܽܘܼܪܝܳܝܳܐ ܘܰܕܟܽܠܗܽܘܿܢ ܐܰܝܠܶܝܢ ܕܒܳܥܶܝܢ ܕܢܶܩܪܽܘܿܢ ܘܢܶܬܗܰܓܽܘܿܢ ܦܳܪܽܘܿܫܳܐܝܼܬ. ܘܒܶܣܬܪܳܝܘܼܬܐ ܕܟܽܠ «ܡܺܐܡܰܪܬܳܐ» ܕܺܝܼܠܝ ܦܪܺܝܼܫܳܐ ܡܼܶܢ ܕܰܐ̱ܚܪܺܬܳܐ. ܘܛܳܥܢܳܐ ܫܰܪܒܳܐ ܦܪܺܝܼܫܳܐ ܕܰܡܫܰܡܠܐ ܠܰܚܒܰܪܬܳܗܿ. ܘܣܽܘܼܓܳܐܐ ܕܙܰܒܢ̈ܺܝܼܢ ܟܳܬܶܒ ܐ̱ܢܳܐ ܒܪܰܘܒܳܐ ܕܠܺܝܼܚܳܐ ܘܪܶܕܝܳܐ ܫܓܺܝܼܫܳܐ ܕܥܽܘܼ̈ܣܳܩܶܐ ܬܰܪ̈ܥܺܝܼܬܳܢܳܝܶܐ ܘܛܽܘܼܪ̈ܳܦܶܐ ܐܰܬܪ̈ܢܳܝܶܐ.

ܒܣܰܒܪܳܐ ܐܺܝܼܬܰܝ ܕܪ̈ܶܥܝܳܢܶܐ ܕܟܳܬܶܒ ܘܦܳܪܶܣ ܐ̱ܢܳܐ ܢܦܰܝܓܽܘܢ ܠܨܰܗܝܽܘܼܬܳܐ ܘܢܺܐܙܠܽܘܢ ܠܛܳܒܬܳܐ ܕܩܳܪ̈ܘܼܝܶܐ ܡܝܰܩܪ̈ܶܐ. ܗܽܘܼ ܢܺܝܼܫܳܐ ܗܳܢܳܐ ܘܡܶܣܬܰܟܠܳܢܽܘܼܬܳܐ ܗܳܕܶܐ ܠܰܝܬܶܝܗܿ ܐܶܠܳܐ ܡܶܬܓܰܪܓܳܢܽܘܼܬܳܐ ܛܳܒܬܳܐ ܫܘܳܬ ܠܟܳܬܽܘܿܒܳܐ ܘܩܳܪܽܘܿܝܳܐ. ܗܿܘ ܡܳܐ ܕܟܳܬܶܒ ܐ̱ܢܳܐ ܠܰܝܬܰܘܗܝ ܐܶܠܳܐ ܦܽܘܼܢܳܩܳܐ ܘܕܽܘܼܢܳܩܳܐ ܕܐܰܓܽܘܿܢܝ ܗܳܐ ܡܼܶܢ ܫܘܼܪܳܝܳܐ ܕܡܰܪܕܺܝܼܬܝ ܒܗܳܠܶܝܢ ܕܬܶܫܡܶܫܬܳܐ. ܘܰܒܥܳܬܳܐ ܘܰܒܨܳܬܳܐ ܐܺܝܼܬܰܘܗܝ ܕܥܰܡܠܳܐ ܡܦܰܪܕܳܢܳܐ ܕܫܶܢܬܐ. ܘܰܒܪܳܡܳܐ ܕܡܰܪ̈ܢܝܳܬܐ ܕܡܰܘܩ̈ܕܳܢ ܠܶܒܳܐ. ܘܡܰܟܣܳܪܳܐ ܕܕܽܘܼܥܬܳܐ ܕܪܽܘܼܚܳܐ ܘܰܫܚܳܩܳܐ ܕܗܰܘܢܳܐ ܕܠܳܐ ܨܳܒܶܐ ܘܐܳܦܠܳܐ ܒܳܥܶܐ ܕܢܺܚܶܐ ܒܐܰܙܓ̈ܶܝܗܿ ܕܣܶܦܪܳܝܽܘܼܬܳܐ ܐܶܠܳܐ ܒܰܐܘ̈ܳܢܶܐ ܕܐܳܦܕ̈ܢܶܝܗܿ ܒܰܣܺܝܼ̈ܡܶܐ. ܕܪܰܒܰܬ ܣܳܘܰܚ ܘܡܶܬܝܰܐܒ ܐ̱ܢܳܐ ܠܰܦܠܘܼܚܝܳܐ ܘܰܟܪܽܘܼܒܝܳܐ ܕܠܶܫܳܢܳܐ.

ܒܰܕ ܠܶܫܳܢܳܐ ܒܰܝܬܰܐ ܗ̱ܘ ܪܰܒܳܐ ܕܡܰܪܕܽܘܼܬܳܐ. ܘܕܳܡܶܐ ܠܐܦܰܕܢܳܐ ܓܰܐܝܳܐ ܕܣܰܓܺܝ̈ܐܝܢ ܡܶܕܝܳܪ̈ܰܘܗܝ ܘܰܐܘ̈ܳܢܰܘܗܝ. ܘܟܰܕ ܚܳܐܝܢܰܢ ܒܶܗ܆ ܠܐ ܦܰܐܝܐ ܕܰܢܩܰܘܐ ܘܰܢܟܰܬܪ ܒܰܠܚܽܘܿܕ ܒܰܐܘܳܢܳܐ ܗܿܰܘ ܕܰܢܝܼܚܳܐ ܡܶܬܚܫܶܒ ܠܶܢ. ܒܰܕ ܡܶܛܽܠ ܢܽܘܼܦܳܫܳܐ ܘܛܘܼܥܳܡܐ ܡܶܣܬܰܢܩܳܢܳܐ ܙܳܕܶܩ ܕܢܶܬܬܙܺܝܼܥ ܘܢܶܦܽܘܿܩ ܡܼܶܢ ܕܽܘܼܟܬܰܢ ܢܺܝܼܚܬܳܐ. ܘܢܶܣܥܽܘܿܪ ܢܰܘܚܳܐ ܘܦܰܘܚܳܐ ܒܰܣܺܝܼܡܳܐ ܕܟܽܠ ܡܶܕܝܳܪܳܐ ܘܟܽܠ ܩܶܠܝܬܐ ܕܐܳܦܰܕܢܳܐ ܗܳܢܳܐ: ܕܐܺܝܼܬܰܘܗܝ ܒܰܕܡܽܘܼܬ ܣܳܚܰܪܬܐ ܚܣܺܝܼܢܬܳܐ ܘܒܺܝܼܪܬܳܐ ܢܛܺܝܼܪܬܳܐ ܕܠܳܐ ܐܳܒܕܺܝܼܢ ܘܐܳܦܠܳܐ ܒܳܨܪܺܝܼܢ ܣܽܘܼ̈ܟܳܠܐ ܘܚܽܘܼ̈ܟܳܡܶܐ ܕܰܐܘ̈ܢܰܝܗܶܝܢ ܡܪ̈ܰܒܝܳܢܶܐ ܘܰܡܚܰܟܿܡ̈ܢܶܐ. ܘܐܰܟܡܳܐ ܕܝܼܺܕܺܝܼܥܳܐ܆ ܐܶܠܳܐ ܡܶܬܬܰܒܪܺܝܢ܆ ܠܳܐ ܡܰܘܬܰܪ ܐܶܒܳܐ ܘܠܶܒܳܐ ܡܶܬܐܰܟܠܳܢܳܐ ܕܰܛܡܺܝܼܪ ܒܥܽܘܼ̈ܒܰܝܗܽܘܿܢ ܕܓܰܘ̈ܙܶܐ. ܘܶܐܠܐ ܡܶܬܬܰܒܪܺܝܼܢ܆ ܠܳܐ ܡܶܬܩܢܶܐ ܬܘܼܪܣܳܝܳܐ ܕܰܩ̈ܢܳܢܶܐ ܕܺܝܼܠܗܽܘܿܢ. ܗܺܝܼ ܗܳܟܘܳܬ ܠܳܐ ܡܶܬܓܠܶܝܢ ܣܽܘܼ̈ܟܳܠܐ ܩܰܛܺܝܼ̈ܢܶܐ ܕܠܶܫܳܢܳܐ ܣܽܘܼܪܝܳܝܳܐ ܐܶܢ ܠܳܐ ܫܳܒܩܺܝܢܰܢ ܕܽܘܼܟܬܰܢ ܢܺܝܼܚܬܳܐ ܘܬܰܫܘܺܝܬܰܢ ܫܰܚܺܝܼܢܬܳܐ ܠܡܺܐܢܰܩ ܡܼܶܢ ܬܕ̈ܰܝܳܐ ܚܰܠܒܳܢ̈ܳܝܶܐ ܕܚܽܘܼ̈ܟܳܡܰܘܗܝ ܐܰܠܒܳܢ̈ܝܶܐ...!

ܠܰܝܬ ܡܶܠܬܳܐ ܕܠܳܐ ܐܶܬܐܰܡܪܰܬ ܬܚܶܝܬ ܪܩܺܝܼܥܳܐ. ܘܟܰܕ ܟܽܠ ܡܶܕܶܡ ܐܰܡܺܝܼܪ ܘܠܰܝܬ ܡܶܕܶܡ ܚܕܶܬ܆ ܡܰܘܕܰܥ ܐ̱ܢܳܐ ܕܗܿܰܘ ܡܳܐ ܕܟܳܬܶܒ ܘܦܳܪܶܣ ܐ̱ܢܳܐ ܠܰܝܬܰܘܗܝ ܐܶܠܐ ܡܰܥܗܕܳܢܽܘܼܬܳܐ ܘܡܰܝܬܝܳܢܘܼܬܳܐ ܠܒܳܠܐ. ܘܠܳܐ ܣܳܪܰܚ ܙܶܕܩܳܐ ܡܳܪܳܢܳܝܳܐ ܕܩܰܪܝܒܳܐ. ܘܚܳܢܶܐ ܠܢܺܝܼܫܳܐ ܬܪܺܝܼܨܳܐ ܘܩܰܘܡܳܐ ܓܰܘܳܝܳܐ ܘܩܽܘܼܝܳܡܳܐ ܡܕܺܝܼܢܳܝܳܐ ܘܫܽܘܼܘܫܳܛܳܐ ܝܳܬܳܢܳܝܳܐ ܘܰܟܪܽܘܼܒܝܳܐ ܕܒܽܘܼܝܳܪ̈ܐ ܠܶܫ̈ܢܳܝܶܐ. ܘܕܶܢܚܳܐ ܦܰܐܝܳܐ ܕܫܰܦܺܝܼܪܳܐ ܘܢܰܗܺܝܼܪܳܐ ܕܡܶܬܚܰܦܰܛ ܠܰܡܡܰܪܳܩܽܘܼ ܡܰܚܙܺܝܼܬܳܐ ܕܠܶܒܳܐ ܘܡܰܕܥܳܐ.

ܡܶܛܠܗܳܕܶܐ ܡܦܺܝܼܣ ܐ̱ܢܳܐ ܡܶܢ ܩܳܪܽܘܿܝܳܐ ܕܦܽܘܼܪܫܳܢܳܐ ܕܰܢܩܰܘܶܐ ܒܗܺܝܼܠܳܐ ܘܫܰܠܝܳܐ ܘܢܺܝܼܚܳܐ ܒܩܶܪܝܳܢܳܐ. ܘܰܒܥܺܝܼܪܽܘܼܬ ܝܳܬܳܐ ܢܣܺܝܼܡ ܒܳܠܳܐ ܘܚܰܟܺܝܼܡܳܐܝܬ ܢܟܰܬܰܪ ܒܐܘܼܪܰܚ ܣܘܼܟܳܠܐ. ܘܠܳܐ ܢܶܛܥܶܐ: ܪܺܝܼܫܳܢܰܐ ܗ̱ܘ ܒܰܠܚܽܘܿܕ ܕܗܿܰܘ ܡܳܐ ܕܡܳܛܝܳܐ ܝܕܰܥܬܶܗ ܘܚܳܟܼܡܳܐ ܬܰܪܥܺܝܼܬܶܗ. ܘܡܰܨܝܳܐ ܕܢܰܗܡܶܐ ܗܿܰܘ ܡܳܐ ܕܠܳܐ ܫܳܦܪ. ܒܪܰܡ ܚܳܕܶܐ ܐ̱ܢܳܐ ܕܢܶܨܠܐ ܐܰܟܚܰܕ ܐܶܕܢܶܐ ܠܗܿܳܝ ܕܐܳܡܪܳܐ: «ܟܰܪ ܕܐܺܝܼܬ ܢܽܘܼܪܳܐ܆ ܣܽܘܼܢܩܳܢܳܐ ܕܡܰܝ̈ܳܐ ܥܳܠܶܒ ܠܗܿܰܘ ܕܰܡܛܰܠܬܳܐ. ܠܐ ܙܳܠܰܥ ܡܰܝ̈ܳܐ ܬܰܠܡܳܐ ܡܰܠܝܳܐ ܘܰܬܒܺܝܼܪܳܐ..»

ܟܰܕ ܡܟܰܣܶܝܢ ܣܽܘܼ̈ܟܳܠܐ ܒܡ̈ܶܠܐ ܐܰܝܟ ܕܰܒܢܰܚ̈ܬܶܐ܆ ܫܰܦܺܝܼܪ ܗܳܘܶܐ ܕܠܳܐ ܢܪܰܛܶܢ ܘܰܢܒܰܓܶܢ ܟܰܕ ܦܳܓܰܥ ܒܡܰܪܢܺܝܼܬܳܐ ܐܰܘ ܡܰܬܢܺܝܼܬܳܐ ܡܶܕܶܡ ܥܰܛܠܰܬ ܣܽܘܼܟܳܠܐ ܩܶܨܰܬ ܣܽܘܼܠܓܳܣܳܐ ܦܪܺܝܼܫܳܐ ܕܥܽܘܼܬܪܳܐ ܗܰܘܢܳܢܳܝܳܐ ܘܠܶܫܳܢܳܝܳܐ. ܘܠܳܐ ܢܣܰܪܗܶܒ ܘܢܰܪܦܶܐ ܐܺܝܼܕܳܐ. ܐܶܠܳܐ ܢܶܦܽܘܼܩ ܒܰܒܥܳܬ ܣܽܘܼܟܳܠܐ ܠܡܶܒܨܳܐ ܘܰܠܡܶܦܛܰܢ ܗܿܰܘ ܡܳܐ ܕܡܶܬܒܥܶܐ ܠܦܽܘܼܝܳܓܳܐ ܕܡܰܕܥܳܐ ܘܬܽܘܼܪܣܳܝܳܐ ܕܪܽܘܼܚܳܐ ܘܠܶܒܳܐ. ܘܢܶܕܰܥ ܕܐܶܢ ܠܳܐ ܡܶܬܡܰܠܟܼܳܐ ܒܗܺܝܼܠܽܘܼܬܳܐ ܪܶܥܝܳܢܳܝܬܳܐ܆ ܠܳܐ ܢܳܨܰܚ ܘܐܳܦܠܳܐ ܢܳܨܶܦ ܩܳܠ ܨܰܘܬܳܐ ܕܣܽܘܼܟܳܠܐ. ܘܰܩܨܳܨܳܐ «ܬܰܢܘܰܝ» ܩܰܕܡܳܝܳܐ ܕܣܽܘܼܟܳܠܐ ܠܰܝܬܰܘܗܝ ܐܶܠܳܐ ܕܢܶܫܬܰܘܙܰܒ ܡܼܶܢ ܕܺܝܼ̈ܢܶܐ ܩܰܕܡ̈ܶܐ ܗܿܳܢܽܘܢ ܕܣܳܓܶܝܢ ܒܪ̈ܶܥܝܳܢܶܐ ܐܰܡܘܼ̈ܡܳܝܶܐ. ܕܐܳܡܿܰܪ ܒܰܪܥܶܒܪܳܝܳܐ ܒܙܶܢ ܓܘܼܢܳܝܳܐ ܝܳܬܳܢܳܝܐ[8]: «ܠܳܐ ܬܶܣܪܽܘܿܒ܆ ܘܠܳܐ ܬܰܣܒܰܪ ܕܟܿܽܠܡܳܐ ܕܠܳܐ ܝܼܺܕܺܝܼܥ ܠܰܟ ܠܳܐ ܐܺܝܼܬܰܘܗܝ. ܒܰܕ ܗܿܰܘ ܡܳܐ ܕܝܳܕܰܥ ܐܰܢ̱ܬ܆ ܣܰܓܺܝ ܒܨܺܝܼܪ ܡܼܶܢ ܗܿܰܘ ܡܳܐ ܕܠܳܐ ܝܳܕܰܥ ܐܰܢ̱ܬ.»

ܘܰܬܢܳܢ ܒܳܥܶܐ ܐ̱ܢܳܐ ܕܐܰܘܕܰܥ ܕܠܰܡ ܒܰܪܢܳܫܳܐ ܕܢܳܗܰܪ ܘܡܶܬܡܰܕܰܥ ܒܚܽܘܼ̈ܟܳܡܶܐ ܕܩܽܘܼܫܬܳܐ ܚܳܙܶܐ ܥܰܣܩܽܘܼܬܳܐ ܪܰܒܬܳܐ ܕܰܟܬܺܝܼܒܬܳܐ. ܘܝܳܕܰܥ ܕܠܰܝܬܶܝܗܿ ܐܶܠܳܐ ܝܰܠܕܳܐ ܕܚܶܒ̈ܠܐ ܬܰܙܝ̈ܙܶܐ ܘܐܽܘܼܟ̈ܦܳܢܶܐ ܥܰܙܝ̈ܙܶܐ. ܕܒܶܠܥܳܕ̈ܰܝܗܽܘܿܢ ܠܳܐ ܡܶܬܝܰܕܥܳܐ ܗ̱ܘܳܬ ܚܺܐܪܽܘܼܬܳܐ. ܘܐܳܦܠܳܐ ܡܶܬܒܰܕܩܳܐ ܗ̱ܘܳܬ ܟܺܐܢܽܘܼܬܳܐ. ܡܶܟܳܐ ܠܳܐ ܫܳܒܶܩ ܕܰܢܒܽܘܼܬ ܠܘܳܬܶܗ ܛܢܳܢܳܐ ܘܥܰܡܠܳܐ ܕܒܰܪܢܳܫܳܐ ܐܰܝܢܳܐ ܕܗܽܘܼ. ܘܕܺܝܼܠܢܳܐܝܼܬ ܕܗܰܘ ܕܙܳܪܰܥ ܘܦܳܠܰܚ ܒܟܰܪܡܳܐ ܪܰܒܳܐ. ܕܐܺܝܼܩܳܪܳܐ ܘܐܰܓܪܳܐ ܒܚܺܝܼܪܳܐ ܦܳܪܰܥ ܠܥܰܡܠܳܐ ܡܰܘܬܪܳܢܳܐ. ܒܰܕ ܠܐ ܡܰܨܝܳܐ ܕܢܶܬܓܢܶܒ ܐܰܓܪܳܐ ܘܰܛܢܳܢܳܐ ܕܥܳܡܠܳܐ ܘܠܰܐܝܳܐ ܒܥܳܠܡܳܐ ܢܰܗܺܝܼܪܳܐ ܕܩܽܘܼܫܬܳܐ. ܕܰܠܩܘܼܒܠܳܐܝܬ ܝܽܘܼܬܳܪܢܳܐ ܘܦܽܘܼܪܥܳܢܳܐ ܡܶܬܺܝܗܶܒ ܘܡܶܬܩܰܪܰܒ ܠܩܽܘܼܒܠܳܐ ܕܦܽܘܼܠܚܳܢܳܐ ܘܣܽܘܼܥܪܳܢܳܐ.

ܒܪܰܡ ܥܰܡ ܗܳܕܶܐ ܠܰܝܬ ܡܶܕܶܡ ܕܰܓܡܺܝܼܪ. ܘܠܰܝܬ ܡܰܚܫܰܒܬܳܐ ܘܝܕܰܥܬܳܐ ܕܠܰܝܬ ܒܳܗܿ ܒܨܺܝܼܪܽܘܼܬܳܐ ܣܛܰܪ ܡܼܶܢ ܩܽܘܼܫܬܳܐ ܡܢܰܨܚܳܢܳܐ. ܟܰܕ ܠܳܐ ܡܰܒܰܥ ܩܰܢܝܳܐ ܕܺܝܼܠܝ ܡܫܰܕ̈ܠܳܢܝܳܬܳܐ܆ ܠܳܐ ܒܳܥܶܐ ܐ̱ܢܳܐ ܕܐܶܫܰܡܶܫ ܠܪ̈ܶܥܝܳܢܶܐ ܡܚܰܒ̈ܠܳܢܐ ܘܡܰܗܪ̈ܳܢܶܐ܆ ܘܐܶܣܛܽܘܼ̈ܟܣܶܐ ܡܰܪ̈ܥܶܐ ܘܡܶܣ̈ܟܺܢܶܐ. ܡܶܟܳܐ ܣܽܘܼ̈ܟܳܠܐ ܕܥܰܡܠܳܐ ܕܺܝܼܠܝ ܡܰܨܝܳܐ ܕܢܰܦܨܚܽܘܿܢ ܟܰܕ ܒܳܙܥܺܝܼܢ ܐܳܐܰܪ ܟܺܝܼܪܳܐ ܘܰܕܠܝܼܚܳܐ. ܒܪܰܡ ܐܶܢ ܡܰܚܫܺܝܼܢ ܐܰܘ ܡܰܟܡܪܺܝܼܢ ܩܶܨܬ ܦܶܓܥܳܐ ܘܣܽܘܼܩܒܳܠܐ ܡܶܚܕܳܝܳܐ ܕܡܶܣܬܰܝܒܰܪ ܡܼܶܢ ܠܳܐ ܡܶܣܬܰܟܠܳܢܽܘܼܬܳܐ ܡܠܺܝܼܟܬܳܐ܆ ܦܰܐܝܳܐ ܕܢܶܕܰܥ ܠܰܝܬ ܡܶܕܶܡ ܕܗܳܟܰܢܳܐ ܡܥܰܕܰܪ ܘܡܰܘܬܰܪ ܐܰܝܟ ܝܽܘܼܬܪܳܢܳܐ ܕܢܳܒܰܥ ܡܼܶܢ ܪܶܥܝܳܢܳܐ ܕܪܳܡܶܙ ܘܰܡܚܰܘܶܐ ܚܘܼܣܪ̈ܳܢܶܐ ܘܣܽܘܼ̈ܓܦܳܢܶܐ ܒܙܰܒܢܳܐ ܕܒܶܗ ܟܽܠܢܳܫ ܡܩܰܛܪܶܓ ܡܼܶܢ ܥܢ̈ܳܢܶܐ ܚܶܫܘܼ̈ܟܳܬܳܐ ܕܰܠܒܺܝܼ̈ܕܳܢ. ܘܗܳܕܶܐ ܘܳܠܺܝܼܬܳܐ ܗ̱ܝ ܠܟܽܠ ܡܿܰܢ ܕܒܰܠܺܝܼܥ ܒܪܶܚܡܰܬ ܚܽܘܼ̈ܟܳܡܶܐ ܕܩܽܘܼܫܬܳܐ ܪܰܒܳܐ. ܕܟܳܬܒ ܘܐܡܿܪ ܐܢܛܘܢܝ ܒܳܙܰܢ Toni Bozan (1942-2019) ܝܰܕܘܼܥܬܳܢܳܐ ܐܶܢܓܠܺܝܼܫܳܝܳܐ ܕܰܡܡܰܠܠܘܼܬ ܢܰܦܫܳܐ: «ܐܶܢ ܐܰܢ̱ܬ ܝܳܗܶܒ ܐܰܢ̱ܬ ܠܺܝܼ ܣܬܶܪܠܺܝܼܢ܆ ܘܐܶܢܳܐ ܐܶܬܶܠ ܠܟܽܘܿܢ ܚܰܕ܆ ܟܽܠܚܰܕ ܡܶܢܰܢ ܩܳܢܶܐ ܣܬܶܪܠܺܝܼܢ. ܒܪܰܡ ܐܶܢ ܡܩܰܪܒܺܝܼܢ ܐܰܢ̱ܬܽܘܿܢ ܠܺܝܼ ܪܶܥܝܳܢܳܐ܆ ܘܐܶܢܳܐ ܐܶܩܰܪܶܒ ܠܟܽܘܿܢ ܐ̱ܚܪܺܢܳܐ܆ ܟܿܽܠܚܰܕ ܡܶܢܰܢ ܩܳܢܶܐ ܬܪܶܝܢ ܪ̈ܶܥܝܳܢܶܐ ܦܪ̈ܺܝܼܫܶܐ.»

ܘܠܳܐ ܟܰܣܝܳܐ ܡܼܶܢ ܦܳܪ̈ܽܘܿܫܶܐ ܕܠܰܡ ܣܰܟܽܘܼܠܬܳܢܳܐ ܕܒܰܠܺܝܼܥ ܒܪܶܚܡܰܬ ܩܽܘܼܫܬܳܐ ܡܶܬܕܰܪܰܪ ܡܶܛܽܠ ܣܽܘܼܬܳܪܳܐ ܘܢܽܘܼܛܳܪܳܐ ܕܣܽܘܼ̈ܟܳܠܐ ܡܩܰܘ̈ܝܳܢܶܐ ܘܝܰܩܪ̈ܶܐ ܡܝܰܬܪ̈ܶܐ «ܕܪܽܘܼܚܳܐ». ܘܠܳܐ ܡܰܫܶܦ ܟܰܬܦܳܐ ܠܣܽܘܼ̈ܟܳܠܐ ܡܰܪ̈ܥܶܐ ܘܡܶܣ̈ܟܺܢܶܐ ܕܢܺܐܬܽܘܿܢ ܘܢܶܫܬܰܠܛܽܘܿܢ. ܐܶܠܳܐ ܨܳܐܰܪ ܕܽܘܼܡܝܳܐ ܠܥܰܡ̈ܠܐ ܬܥܺܝܼ̈ܫܶܐ ܒܟܰܘܫܶܗ ܫܰܬܺܝܼܩܳܐ ܠܡܶܣܬܰܟܳܠܽܘܼ ܗܳܝ ܕܰܨܪܝܼܪܳܐ ܒܡܶܠܰܬ ܒܪܥܶܒܪܳܝܳܐ: «ܟܰܕ ܢܶܬܕܰܟܶܐ ܡܼܶܢ ܫܥܺܝܼܢܳܐ܆ ܗܳܝܕܶܝܢ ܢܶܡܬܽܘܿܩ ܡܼܶܢ ܡܥܺܝܼܢܳܐ».

ܠܐ ܒܳܥܶܐ ܐ̱ܢܳܐ ܕܐܶܥܽܘܿܠ ܒܰܚܒܺܝܼ̈ܫܳܬܐ ܕܣܽܘܼ̈ܟܳܠܰܘܗܝ ܕܦܶܬܓܳܡܳܐ ܗܳܢܳܐ ܟܰܪܝܳܐ ܘܚܰܠܝܳܐ ܘܡܰܠܝܳܐ. ܐܶܠܐ  ܒܰܠܚܽܘܿܕ ܡܶܣܬܰܦܰܩ ܐ̱ܢܳܐ ܠܡܺܐܡܰܪ: ܗܿܘ ܡܳܐ ܕܰܪܡܺܝܼܙ ܒܶܗ ܩܽܘܼܠܳܝܰܐ ܗ̱ܘ ܕܪܶܥܝܳܢܳܐ ܕܢܳܦܶܩ ܒܰܒܥܳܬ ܫܟܳܚܬܳܐ ܕܣܽܘܼ̈ܟܳܠܐ ܐܰܒܺܝ̈ܕܶܐ ܘܰܚܠܺܝ̈ܨܶܐ «ܕܪܽܘܼܚܳܐ» ܚܢܺܝܼܓܳܐܝܼܬ ܘܡܶܬܚܰܢܢܳܐܝܼܬ ܘܚܰܘܣܳܢܳܐܝܬ. ܘܡܶܛܠܗܳܕܶܐ ܪܰܒܰܬ ܡܶܬܓܰܠܰܠ ܪܳܚܶܡ ܩܽܘܼܫܬܳܐ ܬܰܘܓܳܢܳܐܝܬ ܒܰܝܢܳܬ ܝܰܡܳܐ ܕܪ̈ܶܥܝܳܢܐ ܒܰܐܓܘܿܢܳܐ ܕܩܳܐܡ ܘܕܰܪܳܐ ܕܣܳܕܰܪ... ܘܠܳܐ ܢܳܐܰܚ ܘܐܳܦܠܳܐ ܒܳܗܶܠ ܥܕܰܡܳܐ ܕܢܰܪܓܶܫ ܕܐܺܝܼܬܰܘܗܝ ܡܫܰܡܫܳܢܳܐ ܕܓܽܘܼܥܠܳܢܳܐ ܘܡܶܨܥܳܝܳܐ ܕܗܿܰܘ ܡܳܐ ܕܺܝܼܗܺܝܼܒ ܘܡܰܫܠܰܡ ܠܰܒܛܺܝܼܠܽܘܼܬܶܗ. ܗܳܝܕܶܝܢ ܒܠܶܒܐ ܫܰܦܝܳܐ ܘܰܒܗܰܘܢܳܐ ܒܰܩܝܳܐ ܡܰܓܥܶܠ ܥܰܡܠܶܗ ܘܣܰܒܪܶܗ ܠܰܡܪܰܒܝܳܢܐ ܕܟܽܠ ܟܰܕ ܐܳܡܿܰܪ: «ܠܳܐ ܗܳܟܺܝܠ ܗܿܰܘ ܕܢܳܨܶܒ ܐܺܝܼܬܰܘܗܝ ܡܶܕܶܡ ܘܠܳܐ ܗܿܰܘ ܕܡܰܫܩܶܐ܆ ܐܶܠܳܐ ܐܰܠܗܳܐ ܕܰܡܪܰܒܶܐ. ܡܿܰܢ ܕܢܳܨܶܒ ܕܶܝܢ ܘܡܿܰܢ ܕܡܰܫܩܶܐ ܚܰܕ ܐܶܢܽܘܢ. ܘܐ̱ܢܳܫ ܐܰܝܟ ܥܰܡܠܶܗ ܐܰܓܪܶܗ ܡܩܰܒܶܠ» (ܐ ܩܘܪ̈ܝܢܬܝܐ 3: 7-8).  

ܐܳܦܶܢ ܟܳܠܐ ܘܙܳܓܪ ܪܰܘܒܳܐ ܟܪܺܝܼܟܳܐ ܘܰܦܪܺܝܼܣܳܐ܆ ܐܶܠܐ ܚܰܕ ܡܼܶܢ ܢܺܝܼ̈ܫܶܐ ܪ̈ܺܝܼܫܳܝܶܐ ܕܩܽܘܼܫܬܳܐ ܕܢܶܫܬܰܪܰܪ ܘܢܶܫܬܰܡܠܐ ܒܰܢ ܘܰܒܝܰܕܢ ܚܢܳܢܳܐ ܘܚܰܘܣܳܢܳܐ ܘܫܰܝܢܳܐ ܐܰܠܗܳܝܳܐ. ܥܰܠܗܳܕܶܐ ܒܳܣܡܳܐ ܘܫܳܩܝܳܐ ܪܽܘܼܚܝ ܟܰܕ ܟܳܬܶܒ ܐ̱ܢܳܐ ܡܶܕܶܡ ܕܚܳܫܰܚ ܘܐܳܙܶܠ ܠܢܺܝܼܫܳܐ ܬܪܺܝܼܨܳܐ ܕܩܽܘܼܝܳܡܳܐ ܘܫܽܘܼܘܫܳܛܳܐ ܕܒܰܪܢܳܫܳܐ ܘܓܰܘܳܐ. ܒܪܰܡ ܡܶܬܝܰܐܒ ܐ̱ܢܳܐ ܕܢܶܬܚܠܶܛ ܒܙܰܪܥܳܐ ܛܳܒܳܐ ܕܰܒܕܺܝܼܪ ܘܫܟܺܝܼܚ ܒܥܰܦܪܐ ܕܠܶܒܳܐ ܕܟܽܠܢܳܫ... ܘܢܶܬܚܒܶܟ ܬܰܡܳܢ ܘܢܶܬܦܠܰܚ ܘܢܶܬܬܰܫܩܶܐ: ܟܰܕ ܣܳܐܓ ܬܰܪܥܺܝܼܬܳܐ ܒܚܽܘܼܒܳܐ ܘܐܺܝܼܩܳܪܳܐ ܘܒܰܣܺܝܼܡܽܘܼܬܳܐ ܕܐܢܳܫܳܝܽܘܼܬܳܐ ܘܐܽܘܼܡܬܢܳܝܽܘܼܬܳܐ ܡܥܰܦܩܳܢܺܝܼܬܳܐ. ܕܐܳܡܿܰܪ ܡܰܬܠܐ ܗܶܢܕܘܳܝܳܐ: «ܝܰܬܺܝܼܪ ܦܫܺܝܼܩܳܐ ܕܢܶܣܐܰܢ ܡܣܳܐܢܳܐ ܡܼܶܢ ܗܿܳܝ ܕܰܢܫܰܘܶܐ ܥܳܠܡܳܐ ܒܐܳܡ̈ܶܠܐ.»

ܘܣܳܟܳܐ ܠܡܺܐܡܰܪ: ܚܰܝ̈ܐ ܡܫܰܐܠܽܘܼܬܳܐ ܐܶܢܽܘܢ ܕܐܰܡ̈ܢܶܐ ܛܳܒ̈ܶܐ ܘܣܽܘܼܥܪ̈ܳܢܶܐ ܡܝܰܬܪ̈ܐ. ܐܰܝܟܰܢܳܐ ܗܳܟܺܝܠ ܕܢܶܠܒܰܫ ܠܶܫܳܢܳܐ ܣܽܘܼܟܳܠܐ ܡܥܰܙܝܳܢܐ ܘܢܶܩܢܶܐ ܚܰܝܠܐ ܡܰܥܒܕܳܢܳܐ܆ ܠܐ ܣܳܦܩܳܐ ܕܢܶܗܘܶܐ ܚܰܠܝܳܐ ܘܡܰܠܝܳܐ܆ ܐܶܠܐ ܡܶܬܒܰܥܝܳܐ ܐܳܦ ܕܢܶܡܬܽܘܿܩ ܚܰܠܒܳܐ ܡܬܰܪܣܝܳܢܳܐ ܡܼܶܢ ܚܘܼ̈ܟܳܡܶܐ ܕܩܽܘܼܫܬܳܐ ܘܚܶܟܡܬܳܐ ܘܝܽܘܼܠܦܳܢܳܐ ܒܰܫܒܺܝ̈ܠܶܐ ܦܪ̈ܺܝܼܫܶܐ ܕܣܶܦܪܳܝܽܘܼܬܳܐ.

ܘܐ̱ܚܪܳܝܬ ܩܘܼܒܳܠܛܰܝܒܘܼ ܦܳܪܰܥ ܐ̱ܢܳܐ ܠܩܽܘܼܫܬܳܐ ܪܰܒܳܐ «ܡܳܪܝܳܐ» ܕܢܳܦܰܚ ܚܰܝܠܳܐ ܒܰܡܚ̈ܺܝܼܠܶܐ ܘܰܒܨܺܝܼܪ̈ܶܐ. ܘܪܰܒܰܬ ܡܰܘܕܶܐ ܐ̱ܢܳܐ ܠܛܳܒܽܘܼܬ ܬܰܪܥܺܝܼܬܳܐ ܕܩܳܪ̈ܽܘܿܝܶܐ ܕܦܽܘܼܪܫܳܢܳܐ ܘܰܦܪܺܝܼܫܳܐܝܬ ܠܡܶܣ̈ܬܰܟܠܳܢܶܐ ܘܰܡܓܰܡܪ̈ܢܶܐ ܘܰܡܚܰܦ̈ܛܳܢܐ ܘܰܡܣܰܝ̈ܥܳܢܐ. ܒܣܰܒܪܳܐ ܕܠܳܐ ܢܚܽܘܼܒ ܣܰܒܪܰܢ.

 

ܝܰܘܣܶܦ ܒܶܓܬܰܫ

ܚܘܼܕܪܐ ܕܡܰܪܕܘܼܬܐ ܘܣܶܦܪܳܝܘܼܬܐ ܕܠܫܢܐ ܣܘܼܪܝܝܐ

 

[1]  ܐܰܩܢܳܐ: ܟܺܐܦܳܐ ܗ̱ܝ ܕܡܳܫܚܺܝܼܢ ܘܡܰܥܠܺܝܼܢ ܠܳܗܿ ܠܢܽܘܼܪܳܐ ܘܒܳܚܪܺܝܼܢ ܒܳܗܿ ܕܰܗܒܳܐ ܪܺܝܼܫܳܝܳܐ ܘܫܰܦܺܝܼܪܳܐ ܡܼܶܢ ܙܺܐܦܳܢܳܐ ܘܰܫܟܺܝܼܪܳܐ. Mihenk Taşı / Touchstone

[2]  ܟܶܬܳܐ: ܛܺܝܼܢܳܐ ܐܰܘ ܩܘܼܠܳܥܳܐ ܕܛܺܝܼܢܳܐ

[3]  ܟܳܬܶܒ ܘܐܳܡܿܰܪ ܡܳܪܝ ܐܰܦܪܶܝܡ ܒܫܰܪܒܳܐ ܗܳܢܳܐ: «ܒܥܳܬܳܐ ܘܰܒܨܳܬܐ ܚܳܬܳܗܿ܆ ܒܢ̈ܳܬܳܐ ܐܶܢܽܘܢ ܕܚܺܐܪܘܼܬܳܐ.»

[4] ܐܰܨܪ̈ܶܐ:  Baharatlar / Spices

[5]  ܕܰܘܩܳܐ ܓܰܘܳܝܳܐ: İç Görü / İnsight / İnner Vision

[6] ܣܰܪܒܳܢܳܐ: ܟܶܐܡܰܬ ܩܰܝ̈ܣܶܐ ܕܡܶܬܬܣܺܝܼܡܺܝܼܢ ܬܚܽܘܿܬ ܣܰܘ̈ܟܶܐ ܕܟܰܪܡܳܐ ܐܝܰܟ ܕܠܰܛܥܽܘܼܢܬܳܐ ܕܰܣܓܽܘܼ̈ܠܐ. ܘܰܬܢܳܢ ܩܰܢܝܳܐ ܣܽܘܼܟܳܠܐ ܫܐܺܝܼܠܐ ܗܳܢܳܐ ܕܡܶܬܦܰܫܰܩ   Dayanak / Payanda / Plank / Abuttal

[7] ܩܽܘܼܡܠܳܐ: Küf / Mold

[8]  ܓܘܼܢܳܝܳܐ ܝܳܬܳܢܳܝܐ: Özeleştiri / Self Criticism