ܡܰܕܥܳܐ ܚܠܺܝܼܡܳܐ

ܡܰܕܥܳܐ ܚܠܺܝܼܡܳܐ

 

ܗܰܘܢܳܐ ܚܠܺܝܼܡܳܐ ܘܡܰܕܥܳܐ ܬܪܺܝܼܨܳܐ܆ ܫܽܘܼܘܕܳܥܰܐ ܗ̱ܘ ܩܪܺܝܼܚܳܐ ܕܩܽܘܼܝܳܡܳܐ ܘܪܽܘܼܒܳܝܳܐ ܘܫܘܼܘܫܳܛܳܐ ܬܰܩܢܳܐ. ܘܐܠܘܼܠܳܐ ܚܰܝܠܐ ܗܳܢܳܐ܆ ܠܳܐ ܡܶܫܬܰܟܚܺܝܼܢ ܣܽܘܼ̈ܟܳܠܐ ܕܪܽܘܼܚܳܐ܆ ܘܐܳܦܠܳܐ ܡܶܫܬܰܟܢܳܐ ܥܺܝܼܪܽܘܼܬܳܐ ܒܰܝܢܳܬ ܕܠܽܘܼܚܝܳܐ ܕܰܒܠܺܝܼܠܽܘܼܬܳܐ. ܘܐܠܘܼܠܳܐ ܝܕܰܥܬܳܐ ܗܳܕܶܐ܆ ܠܳܐ ܡܶܫܬܰܦܝܳܐ ܬܰܪܥܺܝܼܬܳܐ. ܘܐܳܦܠܳܐ ܡܶܬܡܰܪܩܳܐ ܡܰܚܙܺܝܼܬܳܗܿ ܒܰܚܢܳܢܳܐ ܘܚܰܘܣܳܢܳܐ ܕܠܶܒܳܐ ܒܰܣܺܝܼܡܳܐ. 

 

ܠܰܝܬ ܡܶܕܶܡ ܕܰܦܫܺܝܼܩ ܘܰܕܠܺܝܼܠ. ܘܝܕܰܥܬܳܐ ܐܰܝܕܳܐ ܕܗܺܝܼ ܠܳܐ ܡܶܬܓܰܫܡܳܐ ܒܰܟܬܺܝܼܒܬܳܐ ܐܶܠܐ ܒܚܽܘܼܒܳܐ ܙܳܩܽܘܼܬܳܐ ܘܰܛܢܳܢܳܐ ܫܓܺܝܼܪܳܐ ܕܐܺܝܼܬܰܘܗܝ ܟܰܣܝܳܐ ܒܢܺܝܼܫܳܐ ܘܥܰܡܠܳܐ ܪܰܒܳܐ..

 

ܠܰܝܬ ܘܳܠܺܝܼܬܳܐ ܕܠܳܐ ܙܶܕܩܳܐ. ܘܐܳܦܠܳܐ ܙܶܕܩܳܐ ܕܠܳܐ ܘܳܠܺܝܼܬܳܐ ܒܥܳܠܡܳܐ ܢܰܗܺܝܼܪܳܐ. ܘܡܶܛܠܗܳܕܶܐ ܪܰܒܰܬ ܥܳܡܶܠ ܐ̱ܢܳܐ. ܘܟܳܬܶܒ ܘܦܳܪܶܣ ܐ̱ܢܳܐ ܒܢܺܝܼܫ ܢܽܘܼܦܳܫܳܐ ܠܶܫܳܢܳܝܳܐ ܘܛܘܼܥܳܡܳܐ ܪܶܥܝܳܢܳܝܳܐ. ܗܺܝܼ ܗܳܕܶܐ ܥܳܒܶܕ ܐ̱ܢܳܐ ܐܰܝܟܰܢܳܐ ܕܠܳܐ ܢܒܽܘܼܪܽܘܼܢ ܚܰܘ̈ܩܶܐ ܕܣܶܦܪܳܝܽܘܼܬܰܢ. ܘܠܰܝܬ ܠܺܝܼ ܢܺܝܼܫܳܐ ܡܶܕܶܡ ܐܰܪܥܳܢܳܝܳܐ ܐܶܠܳܐ ܛܳܒܬܳܐ ܕܢܰܦܫ̈ܳܬܳܐ. ܘܡܰܕܪܟܳܢܽܘܼܬܳܐ. ܘܡܶܣܬܰܟܠܳܢܽܘܼܬܐ ܚܕܰܬܳܐ. ܘܡܰܘܠܳܕܳܐ ܬܪܰܝܳܢܳܐ. ܘܥܺܝܼܪܽܘܼܬܳܐ ܦܳܪܽܘܿܫܬܳܐ... ܡܶܛܽܠ ܡܰܕܥܳܐ ܚܠܺܝܼܡܳܐ.

 

ܠܐ ܟܰܣܝܳܐ ܕܠܰܡ ܢܰܘܚܳܐ ܡܰܕܥܳܢܳܝܳܐ ܘܪܰܘܚܳܐ ܢܰܦܫܳܢܳܝܳܐ ܐܰܓܪܰܐ ܗ̱ܘ ܪܰܒܳܐ ܕܥܰܡ̈ܠܐ ܪ̈ܶܥܝܳܢܳܝܶܐ ܘܰܟܬܝܼܒ̈ܬܳܢܳܝܶܐ. ܘܦܽܘܼܪܥܳܢܰܐ ܗ̱ܘ ܕܫܰܗܪ̈ܶܐ ܣܦܺܝܼܪ̈ܶܐ ܒܙܰܒܢܳܐ ܕܒܽܘܼܝܳܪ̈ܶܐ. ܘܟܰܕ ܪܳܘܰܚ ܘܢܳܐܰܚ ܩܰܘܡܳܐ ܓܰܘܳܝܳܐ܆ ܒܳܣܶܡ ܘܢܳܨܰܚ ܐܳܦ ܦܰܘܫܳܐ ܒܰܪܳܝܳܐ. ܘܰܒܣܽܘܼܟܳܠܐ ܗܳܢܳܐ܆ ܪܶܥܝܳܢܳܐ ܕܢܳܒܰܥ ܘܐܳܬܶܐ ܡܼܶܢ ܗܰܘܢܳܐ ܕܪܽܘܼܚܳܐ܆ ܡܣܰܝܥܳܢܰܐ ܗ̱ܘ ܐܰܝܟ ܥܘܼܕܪܳܢܳܐ ܗܰܘ ܝܰܨܺܝܼܦܳܐ ܕܚܰܝܬܳܐ ܡܰܘܠܕܳܢܺܝܼܬܳܐ..

 

ܒܣܰܒܪܳܐ ܐܺܝܼܬܰܝ ܕܪ̈ܶܥܝܳܢܶܐ ܕܡܶܬܦܰܪܣܺܝܼܢ ܢܦܰܝܓܽܘܢ ܠܨܰܗܝܽܘܼܬܳܐ ܘܢܺܐܙܠܽܘܢ ܠܛܳܒܬܳܐ ܕܩܳܪ̈ܘܼܝܶܐ ܡܝܰܩܪ̈ܶܐ. ܢܺܝܼܫܳܐ ܗܳܢܳܐ ܘܡܶܣܬܰܟܠܳܢܽܘܼܬܳܐ ܗܳܕܶܐ ܠܰܝܬܶܝܗܿ ܐܶܠܳܐ ܡܶܬܓܰܪܓܳܢܽܘܼܬܳܐ ܫܘܳܬ ܠܟܳܬܽܘܿܒܳܐ ܘܩܳܪܽܘܿܝܳܐ.

 

ܡܳܕܶܝܢ ܬܰܘܕܺܝ ܠܛܳܒܽܘܼܬ ܬܰܪܥܺܝܼܬܳܐ ܕܩܳܪ̈ܽܘܿܝܶܐ ܕܦܽܘܼܪܫܳܢܳܐ ܘܰܦܪܺܝܼܫܳܐܝܬ ܠܡܶܣ̈ܬܰܟܠܳܢܶܐ ܘܰܡܓܰܡܪ̈ܢܶܐ....!

 

ܝܘܣܦ ܒܓܬܫ