ܡܳܪܝ ܐܝܣܚܩ ܕܐܢܛܝܘܟ

ܦܽܘܪܫܳܢܳܐ ܕܚܽܘ̈ܫܳܒܶܐ ܕܒܰܨܠܶܡ ܐܰܠܳܗܳܐ.

ܥܰܠ ܟܰܝ̈ܠܶܐ ܘܰܡܢܰܘ̈ܳܬܳܐ: ܘܦܽܘܪ̈ܫܳܢܶܐ ܕܒܰܨܠܶܡ ܐܳܕܳܡ.

ܥܰܠ ܙܰܘ̈ܥܶܐ ܘܥܰܠ ܨܶܒ̈ܝܳܢܶܐ: ܫܰܩܠܰܢܝ ܪܶܥܝܳܢܝ ܕܶܐܡܰܠܶܠ܀

 

ܥܰܠ ܟܽܘ̈ܢܳܝܶܐ ܘܩܶܪ̈ܝܳܢܶܐ: ܕܗܰܕܳܡ̈ܶܐ ܘܰܕܚܽܘ̈ܫܳܒܶܐ.

ܘܥܰܠ ܛܶܟ̈ܣܶܐ ܘܥܰܠ ܐܶܣܟܺܝ̈ܡܶܐ: ܓܰܘܳܝ̈ܶܐ ܐܳܦ ܒܰܪ̈ܳܝܶܐ܀

 

ܡܶܬܩܰܪܝܳܐ ܥܰܝܢܳܐ ܒܦܰܓܪܳܐ: ܐܳܦ ܐܶܕܢܳܐ ܘܦܽܘܡܳܐ ܘܺܐܝܕܳܐ.

ܟܢܺܝܫܽܘܬܗܽܘܢ ܕܶܝܢ ܚܰܕ ܡܶܕܶܡ: ܦܰܓܪܳܐ ܒܰܠܚܽܘܕ ܡܶܬܰܐܡܪܺܝܢ܀

 

ܐܳܦ ܒܗܰܘ ܒܰܪܢܳܫܳܐ ܕܰܠܓܰܘ: ܐܺܝܬ ܟܽܘ̈ܢܳܝܶܐ ܐܳܦ ܪ̈ܶܓܫܶܐ.

ܘܚܽܘ̈ܫܳܒܶܐ ܐܰܝܟ ܗܰܕܳܡ̈ܶܐ: ܕܰܒܗܽܘܢ ܐܳܦ ܗܽܘ ܡܶܬܚܰܫܰܚ܀

 

ܐܺܝܬ ܬܰܪܥܺܝܬܐ ܘܚܽܘܫܳܒܳܐ: ܐܺܝܬ ܒܽܘܝܳܢܳܐ ܘܣܽܘܟܳܠܳܐ.

ܥܰܡ ܡܰܕܥܳܐ ܐܳܦ ܪܶܥܝܳܢܳܐ: ܐܺܝܬ ܨܶܒܝܳܢܳܐ ܘܚܺܐܪܽܘܬܳܐ܀

 

ܕܚܰܕ ܚܰܕ ܡܶܢ ܗܳܠܶܝܢ ܗܳܟܺܝܠ: ܝܕܺܝܥܺܝܢ ܐܶܢܽܘܢ ܥܒܳܕܰܝ̈ܗܽܘܢ.

ܚܰܕ ܡܶܢ ܚܰܕ ܟܽܠܗܽܘܢ ܡܩܰܒܠܺܝܢ: ܘܚܰܕ ܠܚܰܕ ܟܽܠܗܽܘܢ ܥܳܢܶܝܢ܀

 

ܒܰܚܕܳܐ ܨܒܽܘ ܟܽܠܗܽܘܢ ܪܳܗܛܺܝܢ: ܒܛܶܟܣܳܐ ܕܩܳܪܶܐ ܠܟܽܠ ܣܽܘܥܪܳܢ.

ܒܚܰܕ ܥܒܳܕܳܐ ܟܽܠܗܽܘܢ ܠܳܐܶܝܢ: ܕܟܽܠ ܚܰܕ ܚܰܕ ܡܶܢܗܽܘܢ ܒܙܰܒܢܶܗ܀

 

ܐܰܝܟ ܡܳܐܢ̈ܶܐ ܥܰܠ ܚܶܫ̈ܠܳܬܳܐ: ܥܳܕܶܝܢ ܐܶܢܽܘܢ ܒܟܽܠ ܡܶܕܶܡ.

ܕܩܰܕܺܝܡܳܐ ܒܗܽܘܢ ܬܰܪܥܺܝܬܳܐ: ܬܪܰܝܳܢܺܝܬܳܐ ܡܰܚܫܰܒܬܳܐ܀

 

ܒܽܘܝܳܢܳܐ ܐܳܦ ܣܽܘܟܳܠܳܐ: ܘܥܰܡ ܡܰܕܥܳܐ ܐܳܦ ܪܶܥܝܳܢܳܐ.

ܘܝܕܝܥܝܢ ܐܶܢܽܘܢ ܚܰܝ̈ܠܰܝܗܽܘܢ: ܘܰܦܪܺܝܫܺܝܢ ܣܽܘܥܪ̈ܳܢܰܝܗܽܘܢ. ܕܟܽܠܚܰܕ ܗܰܘ ܕܺܝܠܶܗ ܢܶܣܥܽܘܪ܀

 

ܕܬܰܪܥܺܝܬܳܐ ܥܒܳܕܳܗ̇ ܗܳܢܰܘ: ܕܡܶܬܪܰܥܝܳܐ ܕܡܳܢܳܐ ܢܶܗܘܶܐ.

ܕܡܰܚܫܰܒܬܳܐ ܥܒܳܕܳܗ̇ ܗܳܢܰܘ: ܕܶܐܢ ܙܳܕܶܩ ܕܢܶܗܘܶܐ ܐܰܘ ܠܳܐ܀

 

ܒܽܘܝܳܢܳܐ ܥܒܳܕܶܗ ܗܳܢܰܘ: ܕܡܶܕܶܡ ܕܰܗܘܳܐ ܠܳܐ ܢܶܣܬܪܰܚ.

ܣܽܘܟܳܠܳܐ ܗܳܕܶܐ ܢܳܛܰܪ: ܕܰܕܠܳܐ ܡܽܘܡܳܐ ܢܶܫܬܰܟܠܰܠ܀

 

ܨܶܒܝܳܢܳܐ ܥܒܳܕܶܗ ܗܳܢܰܘ: ܕܶܐܢ ܫܶܠܡܰܬ̥ ܕܢܶܗܘܶܐ ܡܶܕܶܡ.

ܡܳܐ ܕܫܰܪܺܝ ܕܢܶܗܘܶܐ ܡܶܕܶܡ: ܗܘ̣ܳܐ ܠܶܗ ܥܒܳܕܳܐ ܫܰܦܺܝܪܳܐ܀

 

ܗܳܕ ܡܶܬ̥ܰܐܡܪܐ ܬܰܪܥܺܝܬܳܐ: ܡܽܘܠܟܳܢܳܐ ܕܢܶܗܘܶܐ ܐܰܘ ܠܳܐ.

ܗܳܕܶܐ ܐܺܝܬܶܝܗ̇ ܡܰܚܫܰܒܬܳܐ: ܡܳܐ ܕܓܶܪܡܰܬ̥ ܕܢܶܗܘܶܐ ܡܶܕܶܡ܀

 

ܗܳܢ ܡܶܬܶܐܡܰܪ ܨܶܒܝܳܢܳܐ: ܟܰܕ ܗܳܘܶܐ ܕܶܝܢ ܢܶܬܟܰܝܰܢ.

ܗܳܢܳܐ ܐܺܝܬܰܘܗܝ ܒܽܘܝܳܢܳܐ: ܘܡܳܢܳܐ ܣܪܺܝܚ ܒܶܗ ܡܳܐ ܕܗܳܘܶܐ܀

 

ܗܳܕܶܐ ܡܚܰܘܶܐ ܣܽܘܟܳܠܳܐ: ܘܶܐܢ ܐܶܬܓܡܰܪ ܡܶܕܶܡ ܕܰܗܘܳܐ.

ܕܡܶܬܪܰܥܶܐ ܒܶܗ ܪܶܥܝܳܢܳܐ: ܘܚܳܕܶܐ ܒܶܗ ܕܰܗܘܳܐ ܫܰܦܺܝܪ܀

 

ܒܶܝܬ ܟܽܠܗܽܘܢ ܚܰܕ ܗ̱ܘ̣ ܥܒܳܕܳܐ: ܘܗܶܢܽܘܢ ܦܳܥܠܺܝܢ ܫܰܘܝܳܐܝܬ.

ܘܒܳܬܰܪ ܒܳܬܰܪ ܗܽܘ ܥܒܳܕܳܐ: ܠܚܰܕ ܚܰܕ ܩܳܪܶܐ ܒܥܶܕܳܢܶܗ܀

 

 

ܐܰܝܟ ܚܶܫ̈ܠܳܬܳܐ ܕܰܡܪ̈ܺܝܩܳܢ: ܒܟܽܠ ܩܽܘܪ̈ܢܳܣܺܝܢ ܘܠܳܐ ܗ̱ܘܳܐ ܒܚܰܕ.

 ܘܰܒܟܽܠ ܡܳܐܢܰܝ̈ ܐܽܘܡܳܢ̈ܶܐ: ܡܶܬܦܰܠ̈ܚܳܢ ܘܟܶܢ ܡܶܬܓܰܡܪ̈ܳܢ܀

 

ܕܺܐܝܬ ܐܶܡܰܬܝ ܕܦܳܠܚܳܐ ܢܽܘܪܳܐ: ܘܺܐܝܬ ܐܶܡܰܬܝ ܕܟܠܒܬܐ ܚܳܫܚܳܐ.

ܘܺܐܝܬ ܐܶܡܰܬܝ ܕܦܳܠܰܚ ܨܶܨ̈ܶܐ: ܘܺܐܝܬ ܕܩܽܘܪ̈ܢܳܣܶܐ ܘܣܰܕܳܢܳܐ܀

 

ܘܥܰܠ ܟܽܠܗܽܘܢ ܥܳܕܝܳܐ ܚܫܠܬܐ: ܐܳܦ ܟܽܠܗܽܘܢ ܥܠܶܝܗ̇ ܗܘ ܥܳܕܶܝܢ.

ܘܗܳܝܕܶܝܢ ܫܳܩܠܳܐ ܫܽܘܠܳܡܳܐ: ܘܬܰܨܒܺܝܬܳܐ ܡܶܢ ܨܶܝܕ ܟܽܠܗܽܘܢ܀

 

ܘܗܳܟܰܢܳܐ ܟܽܠܗܽܘܢ ܗܳܠܶܝܢ: ܐܶܣܟܺܝ̈ܡܶܐ ܕܠܳܟ ܐܶܫܬܰܥܺܝܬ̥.

ܒܚܰܕ ܡܳܐܢܳܐ ܠܳܐܶܝܢ ܟܽܠܗܽܘܢ: ܚܰܕ ܒܳܬܰܪ ܚܰܕ ܥܰܕ ܚܳܬ̥ܶܡ܀

 

ܚܽܘܫܳܒܳܐ ܠܳܐ ܡܶܬܪܰܥܶܐ: ܕܗܳܢܳܐ ܥܒܳܕܳܐ ܕܬܰܪܥܺܝܬܰܐ ܗ̱ܘ.

ܘܠܳܐ ܬܰܪܥܺܝܬܳܐ ܡܶܬܚܰܫܒܳܐ: ܕܗܳܢܳܐ ܥܒܳܕܳܐ ܕܚܽܘܫܳܒܰܐ ܗ̱ܘ܀

 

ܣܽܘܟܳܠܳܐ ܠܰܘ ܨܶܒܝܳܢܰܐ ܗ̱ܘ: ܘܠܳܐ ܨܶܒܝܳܢܳܐ ܣܽܘܟܳܠܳܐ.

ܚܕܳܐ ܗ̱ܝ ܕܢܶܬܪܰܥܶܐ ܒܰܪܢܳܫܳܐ: ܘܰܐ̱ܚܪܺܬܳܐ ܗܳܝ ܕܢܶܬܚܰܫܰܒ܀

 

ܚܕܳܐ ܗܺܝ ܕܪܳܢܶܐ ܘܡܶܣܬܰܟܰܠ: ܘܰܐ̱ܚܪܺܬܳܐ ܗܳܝ ܕܶܐܢ ܢܶܨܒܶܐ.

ܐܺܝܬ ܕܡܶܬܪܰܥܶܐ ܘܠܳܐ ܡܚܰܫܶܒ: ܕܡܶܕܶܡ ܕܠܳܐ ܡܢܳܚ ܐܶܬܪܰܥܺܝ܀

 

ܠܳܐ ܡܚܰܫܶܒ ܕܰܐܝܟܰܢ ܢܶܗܘܶܐ: ܐܳܦܠܳܐ ܕܢܶܗܘܶܐ ܨܳܒܶܐ ܗ̱ܘܳܐ.

ܗܳܢܰܘ ܝܰܚܛܳܐ ܕܬܰܪܥܺܝܬܳܐ: ܕܠܳܐ ܡܪܰܚܦܳܐ ܥܠܰܘܗܝ ܡܰܚܫܰܒܬܳܐ܀

 

 

ܟܽܠ ܪܶܢܝܳܐ ܕܠܰܘ ܒܙܰܒܢܶܗ ܗܽܘ: ܐܰܝܟ ܝܰܚܛܳܐ ܫܳܘܰܚ ܘܕܳܥܶܟ.

ܐܺܝܬ ܕܨܳܒܶܐ ܘܠܳܐ ܡܶܬܒܰܝܰܢ: ܘܰܕܡܶܬܒܰܝܰܢ ܘܠܳܐ ܨܳܒܶܐ܀

 

ܐܺܝܬ ܕܚܳܙܶܐ ܨܒܽܘܬܳܐ ܕܦܰܐܝܳܐ: ܘܰܕܢܶܩܢܶܝܗ̇ ܠܳܐ ܨܳܒܶܐ ܒܳܗ̇.

ܘܺܐܝܬ ܕܪܳܚܶܡ ܡܶܕܶܡ ܕܰܣܢܶܐ: ܨܒܳܐ ܒܶܗ ܘܠܳܐ ܚܙܳܐ ܣܰܢܝܽܘܬܶܗ܀

 

ܐܺܝܬ ܕܺܐܝܬ ܠܶܗ ܚܶܟܡܬܳܐ ܒܰܠܚܽܘܕ: ܘܠܰܝܬ ܠܶܗ ܥܰܡܳܗ̇ ܒܽܘܝܳܢܳܐ.

ܘܺܐܝܬ ܕܺܐܝܬܰܘܗܝ ܣܰܟܽܘܠܬܳܢܳܐ: ܘܠܳܐ ܐܺܝܬ ܠܶܗ ܡܕܰܒܪܳܢܽܘܬܳܐ܀

 

ܘܺܐܝܬ ܕܶܐܬܪܰܥܺܝ ܘܠܳܐ ܚܳܫܶܒ: ܘܺܐܝܬ ܕܚܳܫܶܒ ܠܳܐ ܕܶܝܢ ܨܳܒܶܐ.

ܦܽܘܪܫܳܢܳܐ ܗܰܘ ܕܡܶܬܶܐܡܰܪ: ܕܦܳܪܶܫ ܡܶܕܶܡ ܡܶܢ ܡܶܕܶܡ܀

 

ܕܚܺܐܪܽܘܬܳܐ ܥܒܳܕܳܗ̇ ܗܳܢܰܘ: ܒܶܝܬ ܡܰܘܬܳܐ ܠܚܰܝ̈ܶܐ ܣܺܝܡܳܐ.

ܒܶܝܬ ܛܳܒ̈ܳܬܳܐ ܠܒܺܝ̈ܫܳܬܳܐ: ܒܶܝܬ ܥܰܘܠܳܐ ܠܙܰܕܺܝܩܽܘܬܳܐ܀

 

ܒܬܰܪܥܺܝܬܳܐ ܠܳܐ ܫܰܠܺܝܛܳܐ: ܕܡܶܬܪܰܥܝܳܐ ܟܰܕ ܠܳܐ ܨܳܒܝܳܐ.

 ܨܶܒܝܳܢܳܐ ܕܶܝܢ ܡܶܬܕܢܶܐ ܠܳܗ̇: ܕܰܬܫܰܡܶܫ ܒܶܗ ܣܽܘܥܪ̈ܳܢܶܝܗ̇܀

 

ܠܒܰܪ ܡܶܢ ܬܰܪܥܺܝܬܳܐ ܟܽܠܗܽܘܢ: ܡܫܰܥܒܕܺܝܢ ܐܶܢܽܘܢ ܠܚܺܐܪܽܘܬܳܐ.

ܐܶܢ ܡܶܬܦܰܬܠܺܝܢ ܒܶܢ̈ܝܳܢܶܐ: ܠܰܘ ܬܰܪܥܺܝܬܳܐ ܡܶܬܪܰܫܝܳܐ܀

 

ܒܽܘܝܳܢܳܐ ܕܢ̣ܳܡ ܗܽܘ ܐܰܣܟܶܠ: ܗܽܘ ܡܶܬ̊ܬܕܺܝܢ ܥܰܠ ܕܶܐܬܕܰܡܰܟ.

ܐܶܠܳܐ ܓܡܺܝܪ ܡܶܕܶܡ ܕܰܗܘܳܐ: ܠܰܝܬ ܪܶܫܝܳܢܳܐ ܠܚܽܘ̈ܫܳܒܶܐ܀

 

 

ܣܽܘܟܳܠܳܐ ܦܗܶܐ ܠܟ̥ܳܐ ܘܰܠܟ̥ܳܐ: ܘܰܗܘܳܐ ܠܶܗ ܐܰܬܪܳܐ ܠܡܽܘܡܳܐ.

ܐܶܢ ܡܫܰܡܠܰܝ ܡܶܕܶܡ ܕܰܗܘܳܐ: ܠܰܘ ܨܶܒܝܳܢܳܐ ܡܶܬܩܰܠܰܣ܀

 

ܒܽܘܝܳܢܳܐ ܝܺܨܶܦ ܘܰܢܛܰܪ: ܕܠܳܐ ܢܶܗܘܶܐ ܒܶܗ ܚܽܘܣܪܳܢܳܐ.

ܣܽܘܟܳܠܳܐ ܗܳܕܶܐ ܒܳܥܶܐ: ܕܰܕܠܳܐ ܢܶܟ̥ܝܳܢ ܢܶܫܬܰܡܠܶܐ܀

 

ܒܗܳܠܶܝܢ ܟܽܠܗܽܘܢ ܣܽܘܥܪ̈ܳܢܶܐ: ܠܳܐ ܡܶܬܢܰܨܚܳܐ ܚܺܐܪܽܘܬܳܐ.

ܠܰܘ ܕܺܝܠܳܗ̇ ܗ̱ܘ̣ ܗܳܢ ܥܰܡܠܳܐ: ܕܰܠܪܶܗܛܳܐ ܕܩܽܘܫܬܳܐ ܣܺܝܡܳܐ܀

 

ܒܗܳܠܶܝܢ ܕܰܠܓܰܘ ܡܶܬܪܰܫܝܳܐ: ܐܶܠܳܐ ܡܩܰܕܫܳܐ ܚܽܘ̈ܫܳܒܶܐ.

ܐܶܠܳܐ ܡܕܰܟܝܳܐ ܪ̈ܶܥܝܳܢܶܐ: ܐܶܠܳܐ ܦܳܛܢܳܐ ܐܳܦ ܢܰܦܫܳܐ܀

 

ܐܶܠܳܐ ܡܨܰܒܬܳܐ ܠܗܰܘ ܕܰܠܓܰܘ: ܐܶܠܳܐ ܕܟܶܐ ܗܰܝܟܰܠ ܪܽܘܚܳܐ.

ܐܶܠܳܐ ܥܳܛܰܪ ܒܶܗ ܚܽܘܒܳܐ: ܐܶܠܳܐ ܛܪܺܝܕ ܡܶܢܶܗ ܪܽܘܓܙܳܐ܀

 

ܐܶܠܳܐ ܡܫܰܝܰܢ ܘܰܡܩܰܕܰܫ: ܐܶܠܳܐ ܡܫܰܡܫܺܝܢ ܒܶܗ ܪ̈ܰܚܡܶܐ.

ܐܶܠܳܐ ܙܳܡܰܪ ܒܶܗ ܩܽܘܫܬܳܐ: ܐܶܠܳܐ ܡܰܩܶܢ ܒܶܗ ܫܪܳܪܳܐ܀

 

ܐܶܠܳܐ ܕܒܺܝܚܳܐ ܒܶܗ ܢܰܦܫܳܐ: ܐܶܠܳܐ ܨܠܺܝܒܳܐ ܒܶܗ ܚܶܡܬܳܐ.

ܐܶܠܳܐ ܐܰܡܺܝܢ ܒܶܗ ܫܽܘܒܚܳܐ: ܐܶܠܳܐ ܩܳܐܶܡ ܒܶܗ ܫܰܗܪܳܐ܀

 

ܐܶܠܳܐ ܐܺܝܬ ܒܶܗ ܙܰܗܝܽܘܬ̥ܳܐ: ܐܶܠܳܐ ܢܛܺܝܪ ܡܶܢ ܓܰܢܳܒ̈ܶܐ.

ܐܶܠܳܐ ܚܬ̥ܺܝܡ ܡܶܢ ܢܽܘܟܪ̈ܳܝܶܐ: ܐܶܠܳܐ ܡܠܶܐ ܚܰܝܠܳܐ ܕܪܽܘܚܳܐ܀

 

 

 

ܐܶܠܳܐ ܡܪܰܚܶܦ ܒܶܗ ܫܠܳܡܳܐ: ܐܶܠܳܐ ܐܺܝܬ ܒܰܣܺܝܡܽܘܬܳܐ.

ܐܶܠܳܐ ܛܥܺܝܢ ܡܰܓܪܰܬ̥ ܪܽܘܚܳܐ: ܐܶܠܳܐ ܐܺܝܬ ܒܶܗ ܬܰܘܕܺܝܬܳܐ܀

 

ܐܶܠܳܐ ܐܺܝܬ ܒܶܗ ܛܰܝܒܽܘܬܳܐ: ܐܶܠܳܐ ܐܺܝܬ ܒܶܗ ܟܺܐܢܽܘܬܳܐ.

ܐܶܠܳܐ ܐܺܝܬ ܒܶܗ ܬܪܺܝܨܽܘܬܳܐ: ܐܶܠܳܐ ܐܺܝܬ ܒܶܗ ܡܫܰܝܢܽܘܬܳܐ܀

 

ܗܳܠܶܝܢ ܗ̱ܘ̣ ܟܺܝܬ ܡܶܬܒܰܥܝܳܐ: ܚܺܐܪܽܘܬܳܐ ܕܫܳܪܝܳܐ ܒܐ̱ܢܳܫܳܐ.

ܘܡܶܛܽܠ ܗܳܠܶܝܢ ܡܶܬܪܰܫܝܳܐ: ܐܶܢܗܽܘ ܕܠܳܐ ܗ̈ܘܰܝ ܡܶܣܬܰܥܪ̈ܳܢ܀

 

ܡܶܬܪܰܥܶܝܬ̊ ܕܬܶܒܢܶܐ ܒܰܝܬܳܐ: ܗܳܕ ܡܶܬ̥ܰܐܡܪܳܐ ܬܰܪܥܺܝܬܳܐ.

ܡܩܰܒܠܳܐ ܡܶܢܶܗ ܡܰܚܫܰܒܬܳܐ: ܕܶܐܢ ܘܳܠܶܐ ܕܢܶܗܘܶܐ ܐܰܘ ܠܳܐ܀

 

ܘܶܐܢ ܓܶܪܡܰܬ̥ ܕܢܶܗܘܶܐ ܘܦܶܣܩܰܬ̥: ܗܳܢ ܡܶܬ̥ܶܐܡܰܪ ܨܶܒܝܳܢܳܐ.

ܘܕܰܐܝܟܳܐ ܢܶܗܘܶܐ ܘܰܐܝܟܰܢܳܐ: ܗܳܕ ܡܶܬ̥ܰܐܡܪܳܐ ܝܺܕܰܥܬܳܐ܀

 

ܘܕܰܒܙܰܒܢܶܗ ܢܶܗܘܶܐ ܗܳܕܶܐ: ܡܶܬܩܰܪܝܳܐ ܡܕܰܒܪܳܢܽܘܬܳܐ.

ܡܫܽܘܚܬܳܐ ܝܳܗܶܒ ܒܽܘܝܳܢܳܐ: ܕܰܢܣܺܝܡ ܪܰܘܡܳܐ ܠܰܦܬ̥ܳܝܳܐ܀

 

ܡܶܢ ܡܽܘܡܳܐ ܕܠܳܐ ܢܶܗܘܶܐ ܒܶܗ: ܠܗܳܕܶܐ ܢܳܛܰܪ ܣܽܘܟܳܠܳܐ.

ܗܽܘ ܟܳܐܶܐ ܒܡܰܐܺܝܢܽܘܬܳܐ: ܕܠܳܐ ܢܕܺܝܼܠ ܒܶܗ ܣܽܘܪܚܳܢܳܐ܀

 

ܨܒܽܘܬܳܐ ܡܶܕܶܡ ܐܶܢ ܬܶܐܚܽܘܕ: ܥܰܝܢܳܟ ܚܳܙܝܳܐ ܨܽܘܪ̈ܳܬܳܗ̇.

ܦܽܘܡܳܟ ܒܳܨܶܐ ܐܳܦ ܛܰܥܡܳܗ̇: ܪܺܝܚܳܗ̇ ܒܣܰܘܩܳܟ ܝܳܠܶܦ ܐܰܢ̱ܬ܀

 

 

 

ܒܺܐܝܕܳܟ ܓܶܫܬܳܗ̇ ܡܳܐܶܫ ܐܰܢ̱ܬ: ܒܶܝܬ ܟܽܠܗܽܘܢ ܝܳܕܥܺܝܢ ܠܟܽܠܳܗ̇.

ܘܚܰܕ ܡܶܢܗܽܘܢ ܡܶܕܶܡ ܡܶܢܳܗ̇: ܒܟܽܠ ܡܶܕܶܡ ܪܳܦܶܬ̥ ܗܰܘܢܳܐ܀

 

ܗܳܟܘܳܬ ܪ̈ܶܓܫܶܐ ܓܰܘܳܝ̈ܶܐ: ܒܶܝܬ ܟܽܠܗܽܘܢ ܓܳܡܪܺܝܢ ܡܶܕܶܡ.

ܐܳܦ ܡܶܠܬܳܐ ܝܳܕܥܝܢ ܐܶܢܽܘܢ: ܪ̈ܶܓܫܶܐ ܕܰܒܗܽܘܢ ܐܰܣܺܝܪܳܐ܀

 

ܘܗܰܕܳܡ̈ܶܐ ܐܺܝܬ ܠܳܗ̇ ܕܡܶܢܗܽܘܢ: ܡܶܬܓܰܫܡܳܐ ܒܡܶܕܶܡ ܡܶܕܶܡ.

ܠܶܒܳܐ ܚܰܝܠܐ ܝܳܗܶܒ ܠܳܗ̃: ܡܽܘܚܳܐ ܡܡܰܕܶܟ̥ ܡܰܬܩܶܢ ܠܳܗ̃܀

 

ܦܽܘܡܳܐ ܩܳܠܳܐ ܡܰܠܒܶܫ ܠܳܗ̇: ܒܗܳܠܶܝܢ ܡܶܠܬܳܐ ܡܶܫܬܰܡܫܳܐ.

ܘܺܐܝܬ ܠܳܗ̇ ܐ̱ܚܪ̈ܳܢܶܐ ܘܰܐ̱ܚܪ̈ܳܢܶܐ: ܗܰܕܳܡ̈ܶܐ ܕܰܟܕܺܝܢܺܝܢ ܒܳܗ̇܀

 

ܐܺܝܬ ܠܳܗ̇ ܐܺܝ̈ܕܶܐ ܠܫܽܘܡܳܫܳܐ: ܘܺܐܝܬ ܠܳܗ̇ ܪ̈ܶܓܠܶܐ ܠܗܶܠܰܟܬܳܐ.

ܘܰܒܗܽܘܢ ܪܳܗܛܳܐ ܘܡܶܫܬܰܒܚܳܐ: ܐܰܝܟ ܗܶܢܝܽܘܟܳܐ ܒܡܰܪܟܰܒܬܳܐ܀

 

ܡܳܪܝ ܐܝܣܚܩ ܕܐܢܛܝܘܟ  ( 460 )

 

ܢܽܘܼܗܳܪܳܐ: ܠܩܺܝܼܛ ܡܺܐܡܪܳܐ ܗܳܢܳܐ ܡܶܢ ܟܬܳܒܳܐ ܕ Vat. Sir. 464 Part 1 ܒܝܕ ܡܰܠܦܳܢܳܐ ܥܺܝܼܣܰܐ ܕܶܡܺܝܼܪ ܗܳܢܳܐ ܕܚܳܝܶܐ ܒܐܰܘܣܛܽܘܼܪܝܳܐ. ܬܰܘܕܺܝ ܣܰܓܺܝ ܠܡܰܕܥܶܗ ܦܳܪܽܘܿܫܳܐ ܘܰܛܢܳܢܶܗ ܠܶܫܳܢܳܝܳܐ ܘܥܰܡܠܶܗ ܣܳܦܪܽܘܼܬܳܢܳܝܐ.

 

ܦܳܪܽܘܿܣܳܐ ܝܰܘܣܶܦ ܒܶܓܬܰܫ