25 ܬܶܫܪܺܝܢ ܩܕܺܝܼܡ ܝܰܘܡܳܐ ܕܕܽܘܼܪܳܪܳܐ ܬܺܒܶܝܠܳܝܳܐ ܕܩܳܐܶܡ ܒܰܐܦ̈ܰܝ ܥܢܽܘܼܦܝܳܐ ܕܐܰܢ̱ܬܬܳܐ

25 ܬܶܫܪܺܝܢ ܩܕܺܝܼܡ ܝܰܘܡܳܐ ܕܕܽܘܼܪܳܪܳܐ ܬܺܒܶܝܠܳܝܳܐ ܕܩܳܐܶܡ ܒܰܐܦ̈ܰܝ ܥܢܽܘܼܦܝܳܐ ܕܐܰܢ̱ܬܬܳܐ

 

25 ܬܶܫܪܺܝܢ ܩܕܺܝܼܡ ܝܰܘܡܰܐ ܗ̱ܘ ܬܺܒܶܝܠܳܝܳܐ ܕܕܽܘܼܪܳܪܳܐ ܕܡܶܬܬܩܺܝܼܡ ܒܰܐܦ̈ܰܝ ܥܢܽܘܼܦܝܳܐ ܕܐܰܢ̱ܬܬܳܐ. ܣܺܝܩܽܘܼܡܰܐ ܗ̱ܘ ܕܰܦܪܺܝܼܫ ܠܥܽܘܼܗܕܳܢܳܐ ܕܩܶܛܠܳܐ ܕܰܐܰܚܘ̈ܳܬܳܐ ܬܠܳܬ ܡܼܶܢ ܝܺܩܰܪܬܳܐ ܕܡܺܝܪܰܒܶܠ ܗܳܢܶܝܢ ܕܩܳܡ̈ܝܢ ܒܰܐܦ̈ܰܝ ܛܪܽܘܼܢܘܼܬܳܐ ܕܦܳܠܳܘܿܛܺܝܰܐ ܕܽܘܼܡܺܝܼܢܝܼܟܳܝܬܳܐ. ܘܝܰܘܡܰܐ ܗ̱ܘ ܕܩܳܪܶܐ ܡܶܛܽܠ ܚܽܘܼܝܳܠܐ ܘܐܰܘܝܽܘܼܬܳܐ ܘܦܳܪܘܿܫܽܘܼܬܳܐ ܘܫܰܘܝܽܘܼܬܳܐ ܕܐܰܢܬܬܳܐ ܒܕܽܘܼܪܳܪܳܐ ܗܳܢܳܐ ܕܒܳܥܶܐ ܕܢܶܟܠܶܐ ܘܢܶܙܓܽܘܿܪ ܟܽܠܗܽܘܿܢ ܐܳܕ̈ܫܰܝ ܥܢܽܘܼܦܝܳܐ ܕܗܳܘܶܝܢ ܠܽܘܼܩܒܰܠ ܢܶܫ̈ܶܐ...

 

ܥܢܽܘܼܦܝܳܐ ܓܽܘܼܫܡܳܢܳܝܳܐ

ܥܢܽܘܼܦܝܰܐ ܗ̱ܘ ܣܽܘܼܥܪܳܢܳܝܳܐ ܕܣܳܪܰܚ ܘܢܳܟܶܐ ܝܕܰܥܬܳܢܳܐܝܼܬ ܐܰܝܟܰܢܳܐ ܕܰܢܫܺܝܼܡ ܘܢܶܨܠܽܘܼܦ ܘܢܰܚܣܰܪ ܓܽܘܼܫܡܳܢܳܐܝܼܬ. ܘܚܳܒܶܫ ܡܰܚܘܳܐ ܘܰܕܚܳܝܳܐ ܘܚܢܳܩܳܐ ܘܡܰܘܩܕܳܢܽܘܼܬܳܐ ܘܢܶܓܕܳܐ ܘܫܽܘܼܢܳܩܳܐ ܘܫܰܪܟܳܐ ܕܗܽܘܼ̈ܦܳܟܶܐ ܗܿܳܢܽܘܢ ܕܣܳܪܚܺܝܼܢ ܘܢܳܟܶܝܢ ܘܡܰܚܣܪܺܝܢ ܐܶܢ ܒܙܰܝܢܳܐ ܐܰܘ ܒܡܶܕܶܡ ܐ̱ܚܪܺܝܼܢ. ܠܰܘ ܒܰܠܚܽܘܼܕ ܫܳܒܶܩ ܢܶܟܝ̈ܳܢܶܐ ܒܦܰܓܪܳܐ ܐܶܠܳܐ ܐܳܦ ܦܳܬܰܚ ܐܽܘܼܪܰܚ ܫܽܘܼ̈ܚܢܶܐ ܢܰܦ̈ܫܳܢܳܝܶܐ.

 

ܥܢܽܘܼܦܝܳܐ ܓܶܢܣܳܝܳܐ

ܥܢܽܘܼܦܝܰܐ ܗ̱ܘ ܕܚܳܒܶܫ ܟܽܠܗܽܘܿܢ ܐܳܕ̈ܫܶܐ ܕܰܥܒ̈ܕܶܐ ܓܶܢܣ̈ܳܝܶܐ. ܒܰܕ ܕܳܐܶܫ ܘܫܳܐܶܛ ܨܶܒܝܳܢܳܐ ܚܺܐܪܳܐ ܘܡܶܫܬܰܡܠܶܐ ܒܶܠܥܳܕ ܡܶܬܪܰܥܝܳܢܽܘܼܬܳܐ ܨܶܒܝܳܢܳܝܬܳܐ. ܘܚܳܒܶܫ ܚܟܽܘܼܡܝܳܐ ܦܰܚܙܳܐ ܘܨܰܚܢܽܘܼܬܳܐ ܘܰܫܪܺܝܼܚܽܘܼܬܳܐ ܘܫܽܘܼܥܡܳܠܳܐ ܓܶܢܣܳܝܳܐ ܘܰܡܫܳܫܳܐ ܠܐ ܡܶܨܛܰܒܝܳܢܳܐ ܘܚܽܘ̈ܬܚܳܬܶܐ ܩܳܠܳܢ̈ܳܝܶܐ ܘܫܰܬܺܝܼ̈ܩܶܐ ܘܟܽܠܗܽܘܼܢ ܐܳܕܫ̈ܰܝ ܥܫܽܘܼܡܝܳܐ ܘܰܛܠܽܘܼܡܝܳܐ ܘܰܫܪܽܘܼܚܝܳܐ ܓܶܢܣܳܝܳܐ. ܘܣܳܪܰܚ ܘܢܳܟܶܐ ܒܺܝܼܫܳܐܝܼܬ ܚܽܘܼܠܡܳܢܳܐ ܦܰܓܪܳܢܳܝܳܐ ܘܗܰܘܢܳܢܳܝܳܐ ܘܪܶܓܫܳܢܳܝܳܐ ܕܰܥܠܺܝܼ̈ܒܳܬܳܐ. ܘܡܰܨܝܳܐ ܕܢܶܗܘܶܐ ܥܶܠܰܬ ܫܽܘܼ̈ܚܢܶܐ ܬܟܺܝܼ̈ܒܶܐ ܘܢܰܓܺܝܼܪ̈ܶܐ.

 

ܥܢܽܘܼܦܝܳܐ ܢܰܦܫܳܢܳܝܳܐ ܘܪܶܓܫܳܢܳܝܳܐ

ܐܳܕܫܰܐ ܗ̱ܘ ܥܢܽܘܼܦܝܳܝܳܐ ܕܫܳܚܶܛ ܘܣܳܪܰܚ ܘܢܳܟܶܐ ܫܰܠܡܽܘܼܬܐ ܪܶܓܫܳܢܳܝܬܳܐ ܒܐܽܘܼܪܰܚ ܡܶܠܬܳܐ ܘܗܽܘܼܦܳܟܳܐ ܐܰܘ ܒܡܰܗܡܝܳܢܽܘܼܬܳܐ ܡܶܕܶܡ. ܘܐܳܕܫܳܐ ܗܳܢܳܐ ܕܰܥܢܽܘܼܦܝܳܐ ܚܳܒܶܫ ܙܽܘܼܠܳܠ ܐܝܼܩܳܪܳܐ ܘܰܒܣܽܘܼܪܝܳܐ ܘܫܺܝܼܛܘܼܬܳܐ ܘܰܓܙ̈ܳܡܶܐ ܘܒܽܘܼܠܚܳܕܳܐ ܘܥܽܘܼܩܳܒܳܐ ܣܒܝܼܣܐ ܘܠܽܘܼ̈ܚܳܡܶܐ ܘܒܶܙܚܳܐ ܘܡܽܘܼܝܳܩܳܐ ܘܒܶܣܝܳܢܳܐ ܘܚܰܘܪܳܐ ܫܪܺܝܼܚܳܐ ܘܰܓܗܺܝܼܠܳܐ. ܐܰܘ ܡܶܬܠܰܚܡܳܢܽܘܼܬܳܐ ܘܡܶܬܬܦܺܝܼܪܳܢܽܘܼܬܳܐ ܒܚܰܒ̈ܝܒܶܐ: ܒܢܰܝ̈ܢܳܫܳܐ ܢܶܗܘܽܘܿܢ ܐܰܘ ܚܰܝܘ̈ܬܳܐ. ܘܐܳܕܫܳܐ ܗܳܢܳܐ ܐܳܦܶܢ ܠܳܐ ܫܳܒܶܩ ܫܽܘܼ̈ܚܢܶܐ܆ ܐܶܠܳܐ ܒܡܰܥܒܕܳܢܽܘܼܬܗ ܢܰܓܺܝܼܪܬܳܐ ܡܰܠܒܶܫ ܕܽܘܼ̈ܚܳܠܐ ܘܕܽܘܼܘ̈ܳܕܶܐ ܓܰܘ̈ܳܝܶܐ ܘܩܰܢܺܝܼܛܽܘܼܬ ܪܶܥܝܳܢܳܐ ܘܠܶܒܳܐ ܥܰܡ ܙܘܼܠܳܠܳܐ ܘܐܰܒܺܝܼܕܽܘܼܬ ܐܺܝܼܩܳܪܳܐ ܕܝܳܬܳܐ..

 

ܥܢܽܘܼܦܝܳܐ ܡܳܡܽܘܼܢܳܝܳܐ

ܐܳܕܫܰܐ ܗ̱ܘ ܥܢܽܘܼܦܝܳܝܳܐ ܕܒܺܝܼܫܳܐܝܬ ܡܦܰܪܢܶܣ (ܐܰܘ ܡܦܰܪܰܚ) ܡܰܒܽܘܼ̈ܥܶܐ ܟܶܣ̈ܦܳܢܳܝܶܐ ܐܘ ܡܳܡܽܘ̈ܢܳܝܶܐ. ܘܐܳܕܫܳܐ ܗܳܢܳܐ ܚܳܒܶܫ ܗܽܘܼ̈ܦܳܟܶܐ ܕܐܝܟ ܡܰܟܠܝܳܢܽܘܼܬ ܦܽܘܼܠܚܳܢܳܐ ܘܐܰܚܺܝܼܕܽܘܼܬܳܐ ܕܡܰܥܠܬܳܐ ܘܥܽܘܼܩܳܒܳܐ ܕܺܝܼܙܶܦܬܳܐ ܐܰܘ ܚܽܘܫ̈ܒܳܢܶܐ ܕܒ̈ܳܬܰܝ ܡܰܥܪ̈ܦܶܐ ܘܰܬܟܽܘܼܣܝܳܐ ܕܝܺܕܰܥܬܳܐ ܡܶܬܬܡܺܝܼܫܳܢܺܝܼܬܳܐ. ܘܢܺܝܼܫܳܐ ܠܰܝܬܰܘܗܝ ܐܶܠܳܐ ܕܬܶܬܟܕܶܢ ܐܰܢܬܬܳܐ ܒܥܰܪܝܽܘܼܬܳܐ ܡܳܡܽܘܼܢܳܝܬܳܐ ܐܰܝܟܰܢܳܐ ܕܠܐ ܬܶܦܽܘܿܩ ܡܼܶܢ ܚܰܘܓܳܐ ܕܰܥܢܽܘܼܦܝܳܐ.

 

ܥܢܽܘܼܦܝܳܐ ܕܺܝܼܓܺܝܼܬܰܠܳܝܳܐ

ܥܢܽܘܼܦܝܳܐ ܕܺܝܼܓܺܝܼܬܰܠܳܝܳܐ ܗܿܰܘ ܗ̱ܘܼ ܕܡܶܫܬܰܡܠܶܐ ܒܝܰܕ ܝܽܘܼܕܳܥܳܐ ܫܰܘܬܳܦܳܝܳܐ ܘܬܽܘܼ̈ܠܚܳܡܶܐ ܠܐܶܟ̈ܳܢܳܝܶܐ ܘܰܫܰܪܟܳܐ ܕܓܰܘ̈ܦܶܐ ܕܺܝܼܓܺܝܼ̈ܬܰܠܳܝܶܐ. ܘܐܳܕܫܳܐ ܕܰܥܢܽܘܼܦܝܳܐ ܗܳܢܳܐ ܐܳܦܶܢ ܡܶܫܬܰܡܠܶܐ ܢܰܘܠܳܐܝܼܬ. ܐܶܠܳܐ ܪܰܒܰܬ ܡܰܥܒܶܕ ܒܚ̈ܰܝܶܐ ܫܰܪܺܝܼܪ̈ܶܐ ܕܐܰܢ̱ܬܳܬܳܐ.

 

ܛܽܘܼ̈ܦܣܶܐ ܩܪ̈ܺܝܼܚܶܐ:

ܦܽܘܼܪܳܣ ܦܺܝܼ̈ܕܝܶܐ ܘܨܽܘܼܪ̈ܳܬܳܐ: ܐܰܘܟܺܝܼܬ ܒܽܘܼܕܳܪܳܐ ܘܦܽܘܼܠܳܓܳܐ ܕܨܽܘܼܝܳܪ̈ܶܐ ܕܺܝܼ̈ܠܳܢܳܝܶܐ ܒܢܺܝܼܫ ܓܙܳܡܳܐ ܘܦܽܘܼܪܣܳܝܳܐ.

ܫܪܽܘܼܚܝܳܐ ܢܰܘܠܳܝܳܐ: ܐܰܘܟܺܝܼܬ ܒܽܘܼܕܳܪܳܐ ܘܦܽܘܼܠܳܓܳܐ ܕܡ̈ܶܠܶܐ ܠܽܘܼ̈ܚܳܡܳܝܶܐ ܘܫܺܝܼܛܽܘܼ̈ܬܳܢܳܝܶܐ ܘܣܶܢܶܐܬܶܢ̈ܳܝܶܐ ܒܢܺܝܼܫܳܐ ܥܩܺܝܼܡܳܐ ܕܪܽܘܼܪܳܒܳܐ.

ܓܢܽܘܼܒܝܳܐ ܕܗܺܝܼܝܽܘܬܳܐ: ܐܰܘܟܺܝܼܬ ܟܽܘܼܢܳܫܳܐ ܘܦܽܘܼܪܳܣܳܐ ܕܝ݁ܰܕܥ̈ܳܬܳܐ ܦܰܪ̈ܨܽܘܼܦܳܝܳܬܐ ܒܶܠܥܳܕ ܦܣܳܣܳܐ.

ܒܽܘܼܩܳܪܳܐ ܝܰܬܺܝܼܪܳܐ: ܐܰܘܟܺܝܼܬ ܥܽܘܼܩܳܒܳܐ ܕܚܽܘܼ̈ܫܒܳܢܶܐ ܫܰܘ̈ܬܳܦܳܝܶܐ ܘܫܶܐܠܰܬ ܡܰܪ̈ܙܶܐ[1] ܘܚܽܘܼܫܳܚܳܐ ܓܳܫܽܘܼܫܳܝܳܐ.

  

ܥܢܽܘܼܦܝܳܐ ܕܬܰܫܢܺܝܼܓܳܐ[2]

ܥܢܽܘܼܦܝܳܐ ܕܬܰܫܢܺܝܼܓܳܐ ܐܳܕܫܰܐ ܗ̱ܘ ܕܕܳܢܰܚ ܒܐܶܣܳܪ̈ܶܐ ܪ̈ܶܓܫܳܢܳܝܶܐ ܘܪ̈ܳܘܡܰܢܬܺܝܼܩܳܝܶܐ ܕܰܥܠܰܝܡܽܘܼܬܳܐ. ܥܢܽܘܼܦܝܳܐ ܗܳܢܳܐ ܡܰܨܝܳܐ ܕܢܶܗܘܶܐ ܓܽܘܼܫܡܳܢܳܐܝܼܬ ܘܢܰܦܫܳܢܳܐܝܼܬ ܘܡܳܡܽܘܿܢܳܐܝܼܬ ܘܒܐܽܘܼܪ̈ܚܳܬܐ ܕܺܝܼܓܺܝܼ̈ܬܰܠܳܝܳܬܳܐ ܦܪ̈ܺܝܼܫܳܬܳܐ. ܘܰܥܢܽܘܼܦܝܳܐ ܕܬܰܫܢܺܝܼܓܳܐ ܒܝܰܘ̈ܡܳܬܰܢ ܥܰܠܺܝܼܠ ܗ̱ܽܘܼ ܒܗܰܘ ܕܺܝܼܓܺܝܼܬܰܠܳܝܳܐ. ܘܗܺܝܼ ܗܳܕܶܐ ܣܶܓܝܰܬ ܩܶܨܰܬ  ܣܰܓܺܝܼܐܘܼܬ ܐܶܣܳܪ̈ܶܐ ܕܺܝܼܓܺܝܼ̈ܬܰܠܳܝܶܐ.

 

ܛܽܘܼ̈ܦܣܶܐ ܐܳܕܫ̈ܳܢܳܝܶܐ:

ܢܰܦܫܳܢܳܐܝܼܬ: ܓܙܳܡܳܐ ܘܰܒܣܽܘܼܪܝܳܐ ܘܒܽܘܼܩܝܳܐ ܘܕܽܘܼܝܳܩܳܐ ܘܒܽܘܼܠܚܳܕܳܐ ܘܫܽܘܼܘܚܳܕܳܐ.

ܓܽܘܼܫܡܳܢܳܐܝܼܬ: ܡܰܚܘܳܐ ܘܰܕܚܳܝܳܐ ܘܚܽܘܼܣܪܳܢܳܐ.

ܒܶܣܪܳܢܳܐܝܼܬ: ܩܛܺܝܼܪܳܐ ܐܰܘ ܥܒ̈ܳܕܶܐ ܓܶܢܣ̈ܳܝܶܐ ܠܳܐ ܨܶܒܝ̈ܳܢܳܝܶܐ ܘܠܳܐ ܡܶܬܪ̈ܰܥܝܳܢܶܐ.

ܕܺܝܼܓܺܝܼܬܰܠܐܝܬ: ܥܘܼܩܳܒܳܐ ܘܠܐܶܟ̈ܶܐ ܣܒܺܝܼ̈ܣܶܐ ܘܫܶܐܠܰܬ ܡܰܪܙܳܐ ܘܦܽܘܼܠܳܓܳܐ ܕܚܽܘܼ̈ܫܳܚܶܐ ܕܺܝܼܠܳܢܳܝ̈ܶܐ.

 

 

 

ܥܼܽܘܩܳܒܳܐ ܐܰܡܺܝܼܢܳܐ

ܥܼܽܘܩܳܒܳܐ ܐܰܡܺܝܼܢܳܐ ܡܿܰܢ ܗܽܘܼ̈ܦܳܟܶܐ ܐܶܢܽܘܿܢ ܕܡܶܬܥܰܠܠܝܼܢ ܘܥܳܐܠܺܝܼܢ ܒܕܺܝܼ̈ܠܳܢܳܝܳܬܳܐ ܒܶܠܥܳܕ ܡܰܦܣܳܢܽܘܼܬܳܐ. ܘܡܰܣܓܶܝܢ ܠܕܶܚܠܬܳܐ ܘܙܰܘܥܬܳܐ ܕܡܰܠܝܳܐ ܪ̈ܶܓܫܶܐ ܠܳܐ ܡܶܬܬܰܟ̈ܠܳܢܶܐ. ܘܰܒܝܰܘ̈ܡܳܬܰܢ ܪܰܒܰܬ ܦܪܺܝܼܣ ܗ̱ܽܘ ܥܽܘܼܩܳܒܳܐ ܐܰܡܺܝܼܢܳܐ. ܠܰܘ ܒܰܠܚܽܘܿܕ ܒܥܳܠܡܳܐ ܓܽܘܼܫܡܳܢܳܝܳܐ܆ ܐܶܠܳܐ ܐܳܦ ܒܶܐܫܟܳܪ̈ܶܐ ܕܺܝܼܓ̈ܝܼܬܰܠܳܝܶܐ.

ܬܽܘܼܚܳܡܳܐ: ܥܒܳܕ̈ܶܐ ܐܶܢܽܘܢ ܡܰܠ̈ܙܳܢܶܐ ܕܓܳܙܡܺܝܼܢ ܘܥܳܨܶܝܢ ܘܳܐܠܨܺܝܼܢ ܠܐܶܣܳܪ̈ܶܐ ܒܬܽܘܼܢܳܝܳܐ ܘܥܽܘܼܦܳܦܳܐ ܕܥܽܘܼܩܳܒܳܐ ܘܰܒܥܳܬܳܐ ܕܩܰܪܺܝܼܒܽܘܼܬܳܐ ܒܶܠܥܳܕ ܡܰܦܣܳܢܽܘܼܬܐ.

 

ܛܽܘܼ̈ܦܣܶܐ:

ܥܽܘܼܩܳܒܳܐ ܓܽܘܼܫܡܳܢܳܝܳܐ: ܥܽܘܼܩܳܒܰܐ ܗ̱ܘ ܕܗܳܘܶܐ ܒܦܽܘܼܠܚܳܢܳܐ ܐܰܘ ܥܕܰܡܳܐ ܠܒܰܝܬܳܐ. ܘܣܽܘܼܟܳܝܳܐ ܕܰܩܕܳܡ ܬܰܪܥܳܐ. ܘܫܽܘܼܕܳܪ ܕܳܫܢܳܐ ܠܳܐ ܡܶܬܒܰܥܝ̈ܳܢܶܐ.

ܥܽܘܼܩܳܒܳܐ ܕܺܝܼܓܺܝܼܬܰܠܳܝܳܐ: ܫܽܘܼܕܳܪ ܠܐܶܟ̈ܶܐ ܣܒܺܝܼ̈ܣܶܐ. ܘܦܽܘܼܪܓܳܝܳܐ ܕܙܰܘ̈ܥܶܐ ܢܰܘ̈ܠܳܝܶܐ. ܘܰܩܛܽܘܼܪܝܳܐ ܕܐܶܣܳܪ̈ܶܐ ܒܝܰܕ ܚܽܘܼ̈ܫܒܳܢܶܐ ܙܐܺܦ̈ܳܢܶܐ.

 

 

 

ܢܘܼܗܪܳܐ: ܓܽܘܼܫܡܳܐ ܗܳܢܳܐ ܐܶܬܬܰܥܒܰܪ ܡܼܶܢ ܬܽܘܼܪܟܳܝܳܐ ܒܝܰܕ ܝܰܘܣܶܦ ܒܶܓܬܰܫ ܠܦܽܘܼܬ ܒܥܳܬܰܐ ܕܦܶܪܥܳܐ ܕܠܶܫܳܢܳܐ  ܣܽܘܼܪܝܳܝܳܐ ܘܣܶܦܪܳܝܽܘܼܬܶܗ ܕܒܶܝܬ ܨܰܘܒܳܐ ܕܐܰܪܬܽܘܼܩܠܘܼ: ܡܰܪܕܺܝܢ.

  

 

 

 

[1]  ܡܰܪܙܳܐ: ܚܫܰܠܬܶܗ ܐܰܝܟܰܢܳܐ ܕܢܶܬܶܠ ܣܽܘܼܟܳܠ Şifre / Password.  ܒܰܕ ܣܽܘܼܟܳܠܐ ܗܳܢܳܐ ܠܳܐ ܫܟܺܝܼܚ ܒܰܣܝ̈ܳܡܶܐ ܐܰܒܗ̈ܳܝܶܐ.

[2]  ܬܰܫܢܺܝܼܓܳܐ: ܚܫܰܠܬܶܗ ܐܰܝܟܰܢܳܐ ܕܢܶܬܶܠ ܣܽܘܼܟܳܠ Flört / Flirt.  ܒܰܕ ܣܽܘܼܟܳܠܐ ܗܳܢܳܐ ܠܳܐ ܫܟܺܝܼܚ ܒܰܣܝ̈ܳܡܶܐ ܐܰܒܗ̈ܳܝܶܐ.