ܒܰܪܢܳܫܳܐ ܘܡܰܚܙܺܝܼܬܳܐ

ܒܰܪܢܳܫܳܐ ܓܰܘܳܝܳܐ ܕܳܡܶܐ ܠܡܰܚܙܺܝܼܬܳܐ ܗܿܝ ܕܡܰܗܦܟܳܐ ܘܡܰܥܬܦܳܐ ܨܰܘܒܳܐ ܘܚܰܘܪܳܐ ܘܩܰܘܡܳܐ ܕܒܰܪ ܢܶܩܦܳܐܿ. ܒܰܕ ܟܰܪ ܕܚܳܐܰܪ ܘܨܳܐܶܒ ܘܩܳܐܶܡ ܗܿܰܘ ܗ̱ܽܘܼ ܗܳܦܶܟ ܘܥܳܛܶܦ ܥܠܰܘܗܝ. ܘܟܰܕ ܪܰܒܰܬ ܡܰܨܶܕ ܘܡܰܩܶܬ ܚܰܘܪܑܳܐ ܒܚܽܘܼ̈ܬܚܳܬܶܐ ܕܰܪ̈ܓܺܝܼܓܳܬܳܐ ܘܰܒܨܺܝܼܪ̈ܳܬܳܐ ܘܫܽܘ̈ܕܳܠܶܐ ܒܺܝܼ̈ܫܶܐ ܘܡܰܟܝ̈ܳܢܶܐ܆ ܡܶܬܬܒܳܪܘ ܡܶܬܬܒܰܪ ܘܡܶܬܒܰܕܰܪܘ ܡܶܬܒܰܕܰܪ ܢܽܘܼܗܪܶܗ ܐܠܗܳܝܳܐ. ܘܡܶܟܳܐ ܡܰܚܙܺܝܼܬܳܐ ܗܿܳܝ ܓܰܘܳܝܬܳܐ ܩܳܪܡܳܐ ܐܰܒܩܳܐ ܘܒܰܙܒܰܢ ܡܶܨܛܰܥܠܳܐ ܒܛܺܝܼܢܳܐ. ܘܡܶܬܚܰܒܰܠ ܚܶܙܘܳܗܿ ܘܡܶܫܬܰܚܡܳܐ ܕܡܽܘܼܬܳܗܿ. ܗܳܝܕܶܝܢ ܡܶܫܬܰܘܰܫ ܒܰܪܢܳܫܳܐ ܓܰܘܳܝܳܐ ܘܦܳܗܶܐ ܒܬܰܘܫܳܐ. ܘܪܳܚܶܩ ܡܼܶܢ ܢܰܦܫܶܗ ܚܽܘܼܒܳܢܳܝܬܳܐ ܘܚܰܘܣܳܢܳܝܬܳܐ. ܘܠܳܐ ܡܶܫܟܰܚ ܢܽܘܼܗܪܶܗ ܓܰܘܳܝܰܐ ܩܶܨܰܬ ܐܰܒܩܳܐ ܘܛܺܝܼܢܳܐ. ܘܫܳܪܰܥ ܘܢܳܦܶܠ ܒܰܚܛܺܝܼܬܳܐ. ܘܡܶܟܳܐ ܒܳܥܶܐ ܢܽܘܼܗܪܶܗ ܒܥܳܠܡܳܐ ܒܰܪܳܝܳܐ. ܘܬܰܡܳܢ ܒܰܝܢܳܬ ܕܠܽܘܼ̈ܚܝܶܐ ܐܰܪ̈ܥܳܢܳܝܶܐ ܘܥܰܪ̈ܝܶܐ ܗܽܘܼ̈ܠܳܢܳܝܶܐ ܟܳܪܶܟ ܥܠܰܘܗܝ. ܘܒܳܥܶܐ ܕܢܶܫܟܚܺܝܼܘܗܝ!

ܘܒܰܟܪܽܘܼܟܝܳܐ ܗܳܢܳܐ ܠܶܒܳܐ ܕܳܡܶܐ ܠܟܳܣܳܐ ܕܢܳܛܰܪ ܬܽܘܼܩܦܳܐ ܘܣܽܘܼ̈ܟܳܠܐ ܕܪܽܘܼܚܳܐ. ܐܶܠܳܐ ܒܪܰܡ ܟܰܕ ܡܨܰܥܨܰܥ ܘܠܳܐ ܡܶܬܕܰܟܶܐ ܐܰܟܡܳܐ ܕܘܳܠܝܳܐ܆ ܡܶܫܬܰܚܠܰܦ ܠܟܳܣܳܐ ܪܥܺܝܼܥܳܐ ܕܠܳܐ ܩܳܒܶܐ ܡܶܕܶܡ ܡܬܰܩܦܳܢܳܐ ܩܶܨܰܬ ܬܒܺܝܼܪܽܘܼܬܶܗ ܘܰܪܥܺܝܼܥܽܘܼܬܶܗ ܘܰܨܠܺܝܼܚܽܘܼܬܶܗ. ܘܟܰܕ ܠܳܐ ܪܓܺܝܼܫ ܠܳܐ ܪܳܣܟܳܐ ܒܶܗ ܬܰܘܕܺܝܼܬܳܐ ܘܒܽܘܼܪܟܬܳܐ ܘܩܽܘܼܒܳܠܛܰܝܒܽܘܼܬܳܐ. ܘܫܳܚܠܺܝܼܢ ܘܢܳܛܦܺܝܼܢ ܡܶܢܶܗ ܫܰܝܢܳܐ ܘܰܫܠܳܡܳܐ ܘܪ̈ܰܚܡܶܐ ܘܰܚܢܳܢܳܐ ܘܚܰܘܣܳܢܳܐ. ܡܶܛܠܗܳܕܶܐ ܣܢܺܝܼܩܽܘܼܬܳܐ ܪܰܒܬܳܐ ܠܰܝܬܶܝܗܿ ܐܶܠܳܐ ܕܗܽܘܼ ܒܰܪܢܳܫܳܐ ܢܶܬܒܰܩܶܐ ܒܢܰܦܫܶܗ ܘܢܶܦܪܽܘܿܫ ܘܢܶܕܒܽܘܿܩ ܪ̈ܥܺܝܼܥܳܬܳܐ ܘܰܬܒܺܝܼܪ̈ܳܬܳܐ ܘܰܨܠܺܝܼܚ̈ܳܬܳܐ ܕܟܳܣܳܐ ܕܠܶܒܶܗ ܒܣܽܘܼ̈ܟܳܠܶܐ ܡܰܚ̈ܝܳܢܶܐ ܕܰܡܫܺܝܼܚܳܐ ܗܳܢܳܐ ܕܐܝܼܬܰܘܗܝ ܐܳܣܝܳܐ ܥܳܨܘܿܒܳܐ ܕܡܰܪ̈ܥܶܐ ܘܟܽܘܼܪ̈ܗܳܢܶܐ. ܘܡܰܕܠܳܢܳܐ ܕܐܽܘܼܪܚܳܐ. ܘܡܰܩܠܳܢܐ ܕܡܰܘܒܠܳܐ. ܘܠܳܐ ܒܳܥܶܐ ܕܢܺܐܒܰܕ ܒܰܪܢܳܫܳܐ ܐܶܠܳܐ ܕܢܶܗܦܽܘܿܟ ܠܰܓܒܺܝܼܠܬܶܗ ܩܰܕܡܳܝܬܳܐ ܘܠܰܟܝܳܢܶܗ ܫܰܪܺܝܼܪܳܐ ܚܽܘܼܒܳܢܳܝܳܐ. ܘܠܳܐ ܨܳܒܶܐ ܕܢܶܬܒܽܘܿܪ ܘܢܶܦܠܽܘܿܓ ܡܰܚܙܺܝܼܬܳܐ ܠܰܡ̈ܢܰܘܳܬܳܐ܆ ܐܶܠܳܐ ܕܢܶܡܪܩܺܝܼܗܿ ܘܰܢܕܰܒܩܺܝܼܗܿ ܘܢܰܫܦܪܺܝܼܗܿ. ܘܐܳܦܠܳܐ ܒܳܥܶܐ ܕܢܶܫܕܶܐ ܟܳܣܳܐ܆ ܐܶܠܳܐ ܕܰܢܒܰܕܩܺܝܼܘܗܝ ܘܰܢܚܰܠܠܺܝܼܘܗܝ ܘܰܢܚܰܕܬܺܝܼܘܗܝ. ܕܐܰܡܺܝܼܪܳܐ ܗ̱ܝ: « «ܚܢܰܢ ܕܶܝܢ ܟܽܠܰܢ ܒܰܐܦ̈ܐ ܓܰܠܝ̈ܳܬܳܐ ܬܶܫܒܽܘܼܚܬܶܗ ܕܡܳܪܝܳܐ ܐܰܝܟ ܕܰܒܡܰܚܙܺܝܼܬܐ ܚܳܙܶܝܢܰܢ. ܘܠܳܗܿ ܠܰܕܡܽܘܼܬܳܐ ܡܶܫܬܰܚܠܦܺܝܼܢܰܢ܆ ܘܡܼܶܢ ܫܽܘܼܒܚܳܐ ܠܫܽܘܼܒܚܳܐ܇ ܐܰܝܟ ܕܡܼܶܢ ܡܳܪܝܳܐ ܪܽܘܼܚܳܐ» (2   ܩܽܘܼܪ̈ܝܼܢܬܳܝܶܐ  3: 18).

ܝܘܣܦ ܒܓܬܫ