ܕܶܐܢ ܫܰܪܺܝܪ ܘܡܰܘܬܰܪ ܘܚܳܫܰܚ ܟܬܳܒܳܐ ܘܣܶܦܪܳܐ ܕܶܐܬܟܬܶܒ ܒܥܳܠܡܳܐ.

ܕܶܐܢ ܫܰܪܺܝܪ ܘܡܰܘܬܰܪ ܘܚܳܫܰܚ ܟܬܳܒܳܐ ܘܣܶܦܪܳܐ ܕܶܐܬܟܬܶܒ ܒܥܳܠܡܳܐ.

ܒܪܺܝܟ ܐܰܢ̱ܬ ܡܰܠܦܳܢܰܢ ܚܰܟܺܝܡܳܐ. ܘܰܡܫܰܒܰܚ ܫܡܳܟ ܐܰܠܳܗܳܐ ܛܳܒܳܐ ܘܰܡܪܰܚܡܳܢܳܐ ܘܣܰܓܺܝ ܛܰܝ̈ܒܘܳܬܳܐ. ܡܰܘܕܶܝܢܰܢ ܠܡܳܪܽܘܬܳܟ. ܣܳܓܕܺܝܢܰܢ ܠܰܐܠܳܗܽܘܬ̥ܳܟ. ܡܪܰܡܪܡܺܝܢܰܢ ܠܺܐܝܬܽܘܬܳܟ. ܡܩܰܠܣܺܝܢܰܢ ܠܰܡܪܰܚܡܳܢܽܘܬܳܟ. ܡܰܟܪܙܺܝܢܰܢ ܠܰܫܦܺܝܥܽܘܬ ܚܽܘܒܳܟ. ܘܪܶܚܡܬܳܟ ܕܰܠܘܳܬ ܫܺܝܛܽܘܬܰܢ. ܕܰܟܡܳܐ ܐܰܘܪܶܒܬ̊ ܘܝܰܩܰܪܬ̊ ܠܰܟܝܳܢܰܢ. ܟܡܳܐ ܐܰܥܬܰܪܬ̊ ܡܶܣܟܺܢܽܘܬܰܢ. ܟܡܳܐ ܚܰܟܶܡܬ̊ ܗܶܕܝܽܘܛܽܘܬܰܢ. ܥܕܰܡܳܐ ܠܰܐܝܟܳܐ ܕܰܐܝܟ ܣܳܦܪܳܐ ܡܰܠܶܦ ܛܠܳܝ̈ܶܐ ܘܪܳܕܶܐ ܫܰܒܪ̈ܶܐ ܐܶܬ̊ܬܰܚܬܺܝܬ̊ ܘܶܐܬܒܛܶܠ ܠܳܟ ܥܰܠ ܝܰܨܺܝܦܽܘܬܳܐ ܕܬܰܪܒܺܝܬܰܢ. ܘܒܳܬܰܪ ܕܰܒܪܰܝܬ̊ ܠܰܟܝܳܢܰܢ ܘܰܐܥܬܰܪܬܳܝܗܝ ܒܫܽܘ̈ܘܟܳܢܰܝܟ ܐܰܠܳܗܳܝ̈ܶܐ ܘܡܰܘܗ̈ܒܳܬܳܐ ܠܳܐ ܡܶܬܡܰܣ̈ܟܢܳܢܝܳܬܳܐ ܕܛܰܝܒܽܘܬܳܟ. ܬܽܘܒ ܐܰܠܶܦܬ̊ ܠܰܢ ܣܶܦܪܳܐ ܘܗܶܓܝܳܢܳܐ ܕܒܶܗ ܢܶܬܚܰܟܰܡ. ܘܢܶܩܪܶܐ ܒܕܺܝܰܐܬܝܩܺܝ ܕܰܟܬܰܒܬ̊ ܠܰܢ. ܘܢܶܕܰܥ ܠܰܟܡܳܝܽܘܬܳܐ ܕܥܽܘܬܪܳܐ ܘܓܰܙ̈ܶܐ ܘܝܳܪ̈ܬܘܳܬܳܐ ܕܫܰܟܶܢܬ ܠܰܢ. ܘܠܰܡܕܺܝܢܰܬ̥ ܡܰܠܟܽܘܬܳܐ ܘܰܐܪܥܳܐ ܕܚܰܝ̈ܶܐ ܘܓܰܢܰܬ̥ ܛܽܘ̈ܒܶܐ ܕܰܐܘܪܶܬ̥ܬ̊ ܠܰܢ. ܡܰܢܽܘ ܡܶܫܟܰܚ ܕܰܢܣܰܝܰܟ̥ ܬܶܫܒ̈ܚܳܬܳܟ. ܡܰܢܽܘ ܡܰܘܦܶܐ ܕܢܰܘܕܶܐ ܠܳܟ. ܡܰܢܽܘ ܡܨܶܐ ܕܢܶܬܢܶܐ ܛܰܝ̈ܒܘܳܬܳܟ. ܒܪܺܝܟ ܐܰܢ̱ܬ ܡܳܪܳܐ ܛܳܒܳܐ ܚܰܟܺܝܡ ܒܟܽܠ ܘܡܰܥܬܰܪ ܟܽܠ. ܒܪܺܝܟ ܐܰܢ̱ܬ ܘܰܒܪܺܝܟ ܐܺܝܩܳܪܳܟ. ܘܰܡܒܰܪܰܟ ܘܰܡܫܰܒܰܚ ܫܡܳܟ ܠܥܳܠܰܡ ܥܳܠܡܺܝܢ ܐܰܡܺܝܢ.

ܐܰܟܙܢܳܐ ܕܣܰܡܝܳܐ ܓܠܺܝܙ ܡܶܢ ܢܽܘܗܪܳܐ. ܘܰܒܝܰܕ ܗܳܕܶܐ ܛܠܺܝܡ ܐܳܦ ܡܶܢ ܒܽܘܣܳܡܳܐ ܕܰܒܫܽܘܦܪܳܐ ܕܒܶܪ̈ܝܳܬܳܐ. ܗܳܟܘܳܬ ܐܺܝܬܰܘܗܝ ܗ̱ܘܳܐ ܓܶܢܣܳܐ ܕܰܒܢܰܝ̈ܢܳܫܳܐ ܡܠܺܝ̈ܠܶܐ. ܐܶܠܽܘ ܠܳܐ ܐܶܬܝܰܗܒܰܬ̥ ܠܗܳܢܳܐ ܝܺܕܰܥܬܳܐ ܘܰܫܟܳܚܬܳܐ ܕܣܶܦܪܳܐ ܘܰܟܬܳܒܳܐ. ܫܽܘܘܟܳܢܰܐ ܗ̱ܘ ܪܰܒܐ ܕܠܳܐ ܡܶܬܡܰܠܰܠ. ܘܡܰܘܗܰܒܬܰܐ ܗ̱ܘ ܡܥܰܠܰܝܬܳܐ ܘܡܳܪܳܢܳܝܬܳܐ. ܬܪܶܝܢ ܦܶܕܰܐܓܽܘ̈ܓܶܐ ܘܡܰܠ̈ܦܳܢܶܐ ܐܰܩܺܝܡ ܠܰܢ ܡܳܪܐ ܛܳܒܳܐ ܕܰܒܛܺܝܠ ܠܶܗ ܥܰܠ ܚܰܝܰܝ̈ܢ ܘܨܳܒܶܐ ܒܛܳܒ̈ܳܬܰܢ. ܚܰܕ ܟܝܳܢܳܐ ܡܳܪܳܢܳܝܳܐ. ܘܰܐ̱ܚܪܺܢܳܐ ܡܰܕܥܳܐ ܘܺܝܕܰܥܬܳܐ. ܘܟܰܕ ܐܶܬܒܰܩܺܝ ܡܰܕܥܳܐ ܒܰܟܝܳܢܳܐ܉ ܐܶܬܚܰܟܰܡ ܕܢܶܥܒܶܕ ܠܶܗ ܣܦܰܪ ܥܽܘܗ̈ܕܳܢܶܐ ܘܢܶܪܫܽܘܡ ܒܗܽܘܢ ܣܽܘܥܪ̈ܳܢܶܐ ܘܫܰܪ̈ܒܶܐ ܘܕܽܘܒܳܪ̈ܶܐ ܐܰܠܳܗܳܝ̈ܶܐ. ܘܬܶܗܪ̈ܶܐ ܘܬܶܕܡܪ̈ܳܬܳܐ. ܐܰܝܟ ܐܳܬܘ̈ܳܬܳܐ ܕܰܟܬܺܝܒܬܳܐ ܕܰܒܗܽܘܢ ܢܶܬܗܰܓܶܐ ܟܽܠܶܗ ܓܶܢܣܳܐ ܕܰܡܠܺܝ̈ܠܶܐ ܡܪ̈ܰܟܒܶܐ ܘܢܶܕܰܥ ܘܢܶܬܥܗܰܕ ܘܢܶܫܡܰܥ ܘܢܺܐܠܰܦ ܠܰܐܝܠܶܝܢ ܕܡܶܢ ܥܳܠܰܡ. ܘܢܶܪܫܽܘܡ ܬܽܘܒ ܗܽܘ ܘܢܰܘܕܰܥ ܠܰܕܒܳܬܰܪܟܶܢ ܩܳܝܡܺܝܢ ܥܕܰܡܳܐ ܠܥܳܠܰܡ ܥܳܠܡܺܝܢ܀

ܫܰܪܺܝܪܳܐܝܬ ܕܡܰܘܗܰܒܬܰܐ ܗ̱ܘ ܪܰܒܬܳܐ ܣܶܦܪܳܐ ܘܰܟܬܳܒܳܐ ܠܰܡܠܺܝ̈ܠܶܐ. ܕܒܶܗ ܡܣܰܝ̈ܟܳܢ ܟܽܠܗܶܝܢ ܛܳܒ̈ܳܬܳܐ ܕܶܐܬܺܝܗܶܒ̈ܝ ܠܗܽܘܢ ܡܶܢ ܒܳܪܽܘܝܗܽܘܢ. ܟܰܕ ܐܶܬܒܰܩܺܝ ܘܰܩܪܐ ܡܰܕܥܳܐ ܒܰܟܝܳܢܳܐ ܕܰܗܘܰܝ̈ܳܐ. ܐܶܫܟܰܚ ܠܶܗ ܒܶܝܬ ܓܰܙܳܐ ܠܣܶܦܪܳܐ ܕܢܶܚܡܽܘܠ ܒܶܗ ܣܺܝ̈ܡܳܬܶܗ. ܘܢܶܛܰܪ ܒܶܗ ܓܽܘܥ̈ܠܳܢܘܗܝ. ܚܶܣܢܰܐ ܗ̱ܘ ܬܰܩܺܝܦܳܐ ܘܒܶܝܬ ܓܰܙܳܐ ܡܰܗܝܡܢܳܐ. ܕܟܽܠ ܡܳܐ ܕܬܶܚܡܽܘܠ ܒܶܗ ܢܰܛܪܶܗ ܒܰܙܗܺܝܪܽܘܬܳܐ ܥܕܰܡܳܐ ܠܥܳܠܰܡ. ܘܥܰܡܶܗ ܒܰܐܡܺܝܢܽܘܬܳܐ ܘܰܚܦܺܝܛܽܘܬܳܐ: ܟܽܠ ܥܽܘܬܪܳܐ ܘܳܐܕܫܳܐ ܛܳܒܳܐ ܘܝܰܩܺܝܪܳܐ ܘܡܰܘܬܪܳܢܳܐ ܘܰܡܥܰܕܪܳܢܳܐ ܘܰܫܒܺܝܚܳܐ ܕܶܐܫܟܰܚ ܡܰܕܥܳܐ ܒܰܟܝܳܢܳܐ. ܚܰܡܠܶܗ ܘܢܰܛܪܶܗ ܒܶܝܬ ܓܰܙܳܐ ܕܣܶܦܪܳܐ. ܕܢܶܗܘܶܐ ܠܰܚܫܰܚܬܳܐ ܕܬܽܘܪܣܳܝܳܐ ܪܽܘܚܳܢܳܝܳܐ ܠܕܳܪ̈ܶܐ ܘܫܰܪ̈ܒܳܬܳܐ ܕܡܶܢ ܒܳܬܰܪܟܶܢ. ܘܟܰܕ ܐܶܬ̥ܰܘ ܛܽܘܗ̈ܡܶܐ ܕܥܰܡܡ̈ܶܐ ܘܓܶܢ̈ܣܶܐ ܘܠܶܫܳܢ̈ܶܐ ܕܩܳܡܘ ܒܰܒܪܺܝܬܳܐ ܐܶܫܟܰܚܘ ܥܽܘܬܪܳܐ ܪܰܒܳܐ ܒܶܝܬ ܓܰܙܰܘ̈ܗܝ ܢܛܺܝܪ̈ܶܐ ܕܣܶܦܪܳܐ ܘܰܟܬܳܒܳܐ. ܘܰܥܬܰܪܘ ܡܶܢܶܗ ܥܽܘܬܪܳܐ ܠܳܐ ܡܰܘܦܝܳܢܳܐ ܘܠܳܐ ܡܶܬܚܰܠܨܳܢܳܐ. ܘܝܰܒܶܠܘ ܚܰܕ ܠܚܰܕ. ܘܰܐܥܬܰܪܘ ܚܰܕ ܠܚܰܕ. ܥܕܰܡܳܐ ܕܶܐܫܬܰܪܬܰܚܘ ܟܽܠܗܽܘܢ ܡܠܺܝ̈ܠܶܐ ܡܶܢ ܒܶܝܬ ܓܰܙܳܐ ܕܣܶܦܪܳܐ ܡܶܢ ܐܰܝܠܶܝܢ ܕܰܚܡܰܠ ܒܶܗ ܡܰܕܥܳܐ ܡܶܢ ܐܰܝܠܶܝܢ ܕܶܐܫܟܰܚ ܒܰܟܝܳܢܳܐ. ܒܝܰܕ ܡܶܨܥܳܝܽܘܬܳܐ ܕܺܝܕܰܥܬܳܐ ܘܰܡܠܺܝܠܽܘܬܳܐ. ܐܶܠܽܘ ܠܳܐ ܕܣܶܦܪܳܐ܆ ܣܡܶܐ ܗ̱ܘܳܐ ܓܶܢܣܰܢ ܡܶܢ ܢܽܘܗܪܳܐ ܕܰܫܪܳܪܳܐ. ܘܰܓܠܺܝܙ ܗ̱ܘܳܐ ܡܶܢ ܝܺܕܰܥܬܳܐ ܕܰܐܠܳܗܳܐ. ܘܰܡܢܰܟ̥ܪܰܝ ܗ̱ܘܳܐ ܠܟܽܠܗܶܝܢ ܛܳܒ̈ܳܬܳܐ ܪ̈ܽܘܚܳܢܳܝܳܬܳܐ. ܘܰܐܝܟ ܕܰܒܚܶܫܽܘܟܐ ܪܳܕܶܐ ܗ̱ܘܳܐ ܒܬܰܘܫܳܐ ܘܠܳܐ ܝܳܕܰܥ ܗ̱ܘܳܐ ܡܶܢ ܐܰܝܟܳܐ ܫܰܪܺܝ ܘܠܳܐ ܐܰܝܟܰܢ ܪܳܕܶܐ ܐܳܦܠܳܐ ܕܰܐܝܟܰܢ ܗܳܘܶܐ ܫܽܘܠܳܡܶܗ. ܘܰܐܝܟ ܐܺܝܬܝܳܐ ܕܡܶܢ ܢܰܦܫܶܗ ܡܶܣܬܒܰܪ ܗ̱ܘܳܐ ܠܶܗ. ܗܳܢܳܐ ܟܽܠ. ܐܰܝܟ ܐܰܛܘܡܰܛܘܢ. ܐܶܠܳܐ ܣܶܦܪܳܐ ܗ̣ܘܳܐ ܠܰܢ ܡܰܥܗܕܳܢܳܐ ܘܡܰܠܦܳܢܳܐ ܘܰܡܚܰܟܡܳܢܳܐ ܘܰܡܗܰܕܝܳܢܳܐ ܠܘܳܬ ܝܺܕܰܥܬܳܐ ܕܰܫܪܳܪܳܐ. ܐܰܘܟܺܝܬ ܠܘܳܬ ܗܳܝ ܕܢܶܕܰܥ ܠܰܐܠܳܗܳܐ. ܐܶܠܳܐ ܡܰܣܒܰܪ ܗ̱ܘܳܐ ܟܽܠܢܳܫ ܕܰܐܒܽܘܗܝ ܗܰܘ ܕܰܐܘܠܕܶܗ ܗܽܘ ܐܺܝܬܰܘܗܝ ܐܰܠܳܗܳܐ ܕܥܰܒܕܶܗ. ܘܠܳܐ ܣܳܟ ܝܳܕܰܥ ܗ̱ܘܳܐ ܐ̱ܢܳܫ ܐܰܝܟܰܢ ܐܶܬܒܪܺܝܘ ܘܶܐܬܩܰܝܰܡܘ ܥܳܠ̈ܡܶܐ܉ ܐܳܦܠܳܐ ܕܰܐܝܠܶܝܢ ܓܕܰܫ̈ܝ ܒܥܳܠܡܳܐ. ܘܰܐܝܟܰܢ ܐܶܬܝܰܒܰܠܘ ܕܳܪ̈ܶܐ ܘܰܥܒܰܪܘ ܛܽܘܗ̈ܡܶܐ. ܘܰܐܝܟܰܢ ܩܳܡܘ ܡܰܠ̈ܟܶܐ ܘܫܰܠܺܝ̈ܛܶܐ܇ ܘܰܐܝܟܰܢ ܐܶܬܗܰܝܡܰܢܘ ܬܰܘ̈ܕܝܳܬܳܐ. ܘܳܐܦܠܳܐ ܕܡܳܢܳܐ ܥܬܺܝܕ ܕܢܶܗܘܶܐ. ܘܠܳܐ ܡܶܬܦܰܪܫܺܝܢ ܗ̱ܘܰܘ ܙܰܒ̈ܢܶܐ ܘܥܶܕܳܢ̈ܶܐ܇ ܘܠܳܐ ܡܶܬܝܰܕܥܺܝܢ ܗ̱ܘܰܘ ܫܰܢ̱ܬܳܐ ܘܫܽܘܚ̈ܠܳܦܶܝܗ̇. ܘܰܬܚܽܘ̈ܡܶܐ ܕܝܰܪ̈ܚܶܐ ܘܝܰܘ̈ܡܳܬܳܐ ܕܫܰܒ̈ܶܐ. ܡܰܐܠܽܘܢ ܐܳܦܠܳܐ ܣܳܟ ܡܰܨܝܳܐ ܗ̱ܘܳܬ̥ ܕܰܢܩܽܘܡ ܥܳܠܡܳܐ ܘܢܶܬܝܰܒܰܠ ܡܛܰܟܣܳܐܝܬ ܘܢܶܬܢܛܰܪ ܒܰܟܪܽܘܟ̥ܝܶܗ. ܗܳܠܶܝܢ ܟܽܠܗܶܝܢ ܝܰܕ̈ܥܳܬܳܐ ܘܚܶܟ̈ܡܳܬܳܐ ܒܒܶܝܬ ܓܰܙܶܗ ܕܣܶܦܪܳܐ ܐܶܬܢܛܰܪ̈ܝ ܘܡܶܢܶܗ ܐܶܬܺܝܕܰܥ̈ܝ ܘܶܐܬܝܰܠܰܦ̈ܝ. ܡܶܛܽܠ ܕܰܡܗܰܝܡܢܰܐ ܗ̱ܘ ܫܰܪܺܝܪܳܐ ܕܢܳܛܰܪ ܓܽܘܥ̈ܠܳܢܶܐ ܒܛܰܒ̈ܥܰܝܗܽܘܢ ܘܚܬܡܰܝ̈ܗܽܘܢ. ܘܠܳܐ ܣܳܟ ܟܰܡ ܐܰܘ ܚܰܦܺܝ ܓܽܘܥܠܳܢܳܐ ܕܶܐܫܬܠܶܡ ܠܶܗ. ܐܶܠܳܐ ܟܽܠ ܡܶܕܶܡ ܒܰܩܢܽܘܡܶܗ ܡܗܰܝܡܢܳܐܝܬ ܢܰܛܪܶܗ. ܘܰܐܫܠܡܶܗ ܠܥܰܡܡ̈ܶܐ ܘܛܽܘܗ̈ܡܶܐ ܘܕܳܪ̈ܶܐ ܘܫܰܪ̈ܒܳܬܳܐ. ܣܛܰܪ ܡܶܢ ܚܶܟܡܬܳܐ ܪܽܘܚܳܢܳܝܬܳܐ: ܘܨܶܒܝܳܢܳܐ ܐܰܠܳܗܳܝܳܐ. ܠܳܐ ܣܳܟ ܡܰܨܝܳܐ ܗ̱ܘܳܬ̥ ܕܢܶܬܺܝܕܰܥ ܗܳܢܳܐ ܘܢܶܐܚܽܘܕ ܥܳܠܡܳܐ. ܘܒܶܗ ܢܶܬܕܰܒܰܪ ܘܢܶܬܩܰܝܰܡ ܟܽܠ ܡܶܕܶܡ. ܡܰܠܟܽܘܬܳܐ ܒܶܗ ܡܶܬܢܰܛܪܳܐ ܘܡܶܬܩܰܝܡܳܐ. ܟܳܗܢܽܘܬܳܐ ܘܦܽܘܠܚܳܢ ܐܰܠܳܗܳܝ̈ܳܬܳܐ. ܘܒܶܗ ܡܶܬܚܰܠ̈ܦܳܢ ܘܡܶܬܝܰܕ̈ܥܳܢ ܘܡܶܬܝܰܒ̈ܠܳܢ ܚܶܟ̈ܡܳܬܳܐ ܘܝܽܘܠ̈ܦܳܢܶܐ ܘܝܰܕ̈ܥܳܬܳܐ ܡܶܢܶܗ ܡܶܬ̊ܕܰܪ̈ܫܳܢ. ܬܶܫܒ̈ܚܳܬܳܐ ܘܥܽܘܗ̈ܕܳܢܰܝ ܥܳܠܡܳܐ ܘܩܽܘܝܳܡܶܗ ܘܝܽܘܒܳܠܶܗ ܒܶܗ ܪ̈ܫܺܝܡܳܢ. ܫܪܳܪܳܐ ܡܶܢ ܕܰܓܳܠܽܘܬܳܐ ܒܶܗ ܡܶܬܦܰܪܫܺܝܢ܀

ܡܳܕܶܝܢ ܫܰܪܺܝܪ ܘܣܰܓܺܝ ܫܰܦܺܝܪ ܘܡܰܘܬ̥ܰܪ ܘܰܡܥܰܕܰܪ ܣܶܦܪܳܐ ܘܟܽܠܡܶܕܶܡ ܕܰܪܫܺܝܡ ܒܶܗ ܒܣܳܗܕܽܘܬܳܐ ܘܰܪܡܳܝ ܐܺܝܕܳܐ ܕܰܬܪܶܝܢ ܘܰܬܠܳܬܳܐ ܡܗܰܝܡ̈ܢܶܐ. ܫܰܪܺܝܪ ܘܣܰܓܺܝ ܚܰܬ̊ܺܝܬ̥ ܘܣܳܟ ܠܰܝܬ ܥܠܰܘܗܝ ܦܠܺܝܓܽܘܬܳܐ. ܒܪܺܝܟ ܗ̱ܘ̣ ܕܰܐܠܦܶܗ ܘܝܰܗܒܶܗ ܠܓܶܢܣܳܐ ܕܰܒܢܰܝ̈ܢܳܫܳܐ܀

ܡܰܒܘܿܥܳܐ ܕܟܬܺܝܼܒܬܐ:  https://w3id.org/vhmml/readingRoom/view/125667

ܢܽܘܼܗܳܪܳܐ: ܟܬܺܝܼܒܬܳܐ ܗܳܕܶܐ ܫܟܺܝܼܚܳܐ ܒܰܟܬܳܒܳܐ ܚܰܕ ܕܰܛܥܺܝܼܢ ܫܶܡ «ܥܶܠܬܳܐ ܕܟܽܠ ܥܶܠ̈ܠܳܢ. ܟܬܳܒܳܐ ܓܰܘܳܢܳܝܳܐ ܠܟܽܠ ܥܰܡ̈ܡܺܝܼܢ ܕܰܬܚܶܝܬ ܫܡܰܝܳܐ».  ܘܰܢܛܺܝܼܪ ܒܒܶܝܬ ܐܰܪ̈ܟܶܐ ܕܥܺܕܬܐ ܕܐܰܪܒܥܺܝܢ ܣܳܗ̈ܕܶܐ ܕܡܰܪܕܺܝܢ. ܘܰܢܣܺܝܟ ܒܝܰܕ ܕܰܝܪܳܝܳܐ ܓܰܒܪܐܝܼܠ ܣܒܺܝܼܪܝܼܢܳܝܳܐ ܒܰܫܢܰܬ ܐܰܠܦܳܐ ܘܰܫܒܰܥ̈ܡܳܐܐ ܘܰܬܡܳܢܺܝܢ ܘܚܰܡܶܫ ܕܝܰܘ̈ܢܳܝܶܐ (ܕܡܰܘܠܳܕܳܐ 1474) ܒܥܽܘܼܡܪܳܐ ܕܒܶܝܬ ܡܳܪܝ ܫܶܡܥܽܘܢ ܘܡܳܪܝ ܫܡܽܘܐܝܼܠ ܘܡܳܪܝ ܓܰܒܪܐܝܼܠ ܒܝܰܘ̈ܡܰܝ ܡܳܪܝ ܝܘܼܚܰܢܳܢ ܐܶܦܶܣܩܺܘܼܦܳܐ ܕܺܝܼܠܶܗ ܕܥܽܘܼܡܪܳܐ. 

ܘܰܟܬܺܝܼܒܬܳܐ ܗܳܕܶܐ ܠܩܺܝܛܳܐ ܡܼܶܢ ܐܰܣܳܪܳܐ ܕܢܰܘܠܐ ܕܰܠܥܶܠ ܒܝܰܕ ܡܝܰܩܪܳܐ ܡܰܠܦܳܢܳܐ ܥܺܝܼܣܰܐ ܡܽܘܼܣܰܐ ܕܶܡܺܝܪ ܗܳܢܳܐ ܕܚܳܝܶܐ ܒܐܰܘܣܛܘܪܝܰܐ. ܬܰܘܕܺܝ ܣܰܓܺܝ ܠܐܟܺܝܼܦܘܼܬܶܗ ܘܰܒܛܝܼܠܘܼܬܶܗ ܠܶܫܳܢܳܝܬܐ.

ܦܳܪܘܿܣܳܐ ܝܰܘܣܶܦ ܒܶܓܬܰܫ