ܡܶܠܟ̈ܐ ܕܡܳܪܝ ܐܶܠܺܝܳܐ ܕܰܐܢܒܰܪ

ܡܶܠܟ̈ܐ ܕܡܳܪܝ ܐܶܠܺܝܳܐ ܕܰܐܢܒܰܪ

ܕܳܠܩܳܐ ܢܽܘܪܳܐ ܒܠܰܡܦܺܝܕܳܐ. ܘܥܳܒܕܳܐ ܠܶܗ ܒܰܕܡܽܘܬ ܒܰܪܩܳܐ.

ܘܗܳܟܰܢܳܐ ܗܰܝܡܳܢܽܘܬܳܐ. ܚܳܒܳܐ ܒܠܶܒܳܐ ܘܡܰܢܗܪܳܐ܀

ܥܩܽܘܪ ܪܽܘܓܙܳܐ ܡܶܢ ܪܶܥܝܳܢܳܐ. ܘܚܰܫܳܐ ܕܚܶܡܬ̥ܳܐ ܡܶܢ ܠܶܒܳܐ.

ܕܬܶܗܘܶܐ ܢܰܦܫܳܟ ܩܰܪܺܝܒܳܐ. ܠܰܐܠܳܗܳܐ ܒܟܽܠ ܥܶܕܳܢܳܐ܀

ܥܽܘܬܪܳܐ ܕܢܰܦܫܳܐ ܡܗܰܝܡܰܢܬܳܐ. ܫܽܘܟܳܢܳܐ ܕܡܶܢ ܐܰܠܳܗܳܐ.

ܘܚܶܟܡܬܳܐ ܕܠܶܒܳܐ ܕܰܟܝܳܐ. ܕܶܚܠܰܬ ܡܳܪܝܳܐ ܘܬܰܘܕܺܝܬܳܐ܀

ܢܽܘܗܪܳܐ ܕܡܰܕܥܳܐ ܘܰܕܠܶܒܳܐ. ܥܽܘܗܕܳܢܳܐ ܕܥܳܠܡܳܐ ܚܰܕܬ̥ܳܐ. 

ܘܟܽܠ ܡܳܐ ܕܣܺܝܡ ܠܽܘܩܒܰܠ ܗܳܢܳܐ. ܚܶܫܟܰܐ ܗ̄ܘ ܕܰܐܒܥܰܬ̥ ܛܳܥܝܽܘܬܳܐ܀

ܠܡܶܠܟܳܐ ܕܒܺܝ̈ܫܶܐ ܘܥܰܢ̈ܳܬܶܐ. ܠܳܐ ܬܶܬܕܢܶܐ ܘܠܳܐ ܬܶܬ̥ܪܡܶܐ.

ܕܠܳܐ ܥܰܡܗܽܘܢ ܐܰܝܟ ܒܰܪ ܐܰܡܢܳܐ. ܬܶܬܕܚܶܐ ܠܦܰܚܬܳܐ ܘܓܽܘܡܳܨܳܐ܀

ܛܰܪ ܣܶܦ̈ܘܳܬ̥ܳܟ ܡܶܢ ܦܰܘܕܳܐ. ܘܰܗܘܺܝ ܙܗܺܝܪ ܡܶܢ ܦܽܘܬ̥ܦܳܬ̥ܳܐ.

ܕܠܳܐ ܬܶܬ̥ܟܰܢܶܐ ܗܶܕܝܽܘܛܳܐ. ܐܰܘ ܣܳܪܽܘܚܳܐ ܦܣܺܝܩ ܣܰܒܪܳܐ܀

ܠܳܐ ܡܩܰܘܶܐ ܒܠܶܒܳܐ ܣܰܟܠܳܐ. ܪܽܘܫܡܳܐ ܕܡܶܠܰܬ̥ ܚܶܟܡܬܳܐ. 

ܐܰܟܡܳܐ ܕܳܐܦܠܐ ܥܰܠ ܡܰܝ̈ܳܐ. ܡܩܰܘܝܳܐ ܟܬܺܝܒܬܳܐ ܕܰܕܝܽܘܬܳܐ܀

ܠܰܚܒܰܢܳܢܳܐ ܘܚܶܪܝܳܝܳܐ. ܠܳܐ ܬܰܠܶܦ ܐ̱ܪܳܙ ܚܶܟܡܬܳܐ.

ܡܣܰܪܩܺܝܢ ܠܳܟ ܡܶܢ ܚܶܟܡܬܳܐ. ܘܠܳܐ ܩܳܢܶܝܢ ܗܶܢܽܘܢ ܡܰܕܥܳܐ܀

ܚܙܺܝ ܠܳܐ ܬܶܨܠܶܐ ܫܽܘܪܰܥܬܳܐ. ܠܣܳܢܳܐܐ ܕܢܶܦܶܠ ܡܶܢ ܩܽܘܫܬܳܐ.

ܕܗܰܘ ܐܶܢ ܢܶܬ̊ܕܚܶܐ ܠܰܐܒܕܳܢܳܐ. ܐܰܢ̱ܬ ܠܰܐܒܕܳܢܶܗ ܕܰܐܒܕܳܢܳܐ܀

ܚܙܺܝ ܠܳܐ ܬܰܣܓܶܐ ܦܽܘܢܳܩ̈ܶܐ. ܠܰܒܪܳܟ ܒܽܘܟܪܳܐ ܘܚܰܒܺܝܒܳܐ. 

ܕܶܐܢ ܐܰܣܓܺܝܬ̊ ܠܶܗ ܦܽܘܢܳܩܳܐ. ܐܰܣܓܺܝܬ̊ ܠܶܗ ܡܶܣܟܺܢܽܘܬܳܐ܀

ܐܰܣܓܳܐ ܚܽܘܒܳܐ ܘܡܽܘܟܳܟ̥ܳܐ. ܛܳܒ ܡܶܢ ܥܽܘܬܪܳܐ ܘܡܳܡܽܘܢܳܐ. 

ܘܥܰܡ ܟܽܠ ܒܰܪܢܳܫ ܐܰܘܝܽܘܬܳܐ. ܕܛܳܒܳܐ ܠܳܟ ܡܶܢ ܟܽܠ ܣܺܝܡܬܳܐ܀

ܛܳܒܺܝܢ ܡܰܠ̈ܦܳܢܶܐ ܛܳܒ̈ܶܐ. ܡܶܢ ܐܰܒܳܗ̈ܶܐ ܦܰܓܪ̈ܳܢܶܐ. 

ܕܡܰܩܢܶܝܢ ܩܶܢܝܳܢ̈ܶܐ ܛܳܒ̈ܶܐ. ܠܝܳܠܽܘ̈ܦܶܐ ܡܶܫܬܰܡܥܳܢ̈ܶܐ܀

ܡܰܠ̈ܦܳܢܶܐ ܓܶܝܪ ܙܰܕܺܝ̈ܩܶܐ. ܐܰܒܳܗ̈ܶܐ ܚܫܽܘܒ ܪ̈ܽܘܚܳܢܶܐ. 

ܘܝܳܠܽܘ̈ܦܶܐ ܡܶܬܛܦܺܝ̈ܣܳܢܶܐ. ܒܢ̈ܰܝ ܬܰܪܒܺܝܬܳܐ ܕܩܰܕܺܝ̈ܫܶܐ܀

ܓܶܦ̈ܶܐ ܕܢܰܦܫܳܐ ܩܰܕܺܝܫܬܳܐ. ܕܰܒܗܽܘܢ ܛܳܝܣܳܐ ܠܰܫܡܰܝܳܐ. 

ܚܽܘܒܳܐ ܐܶܢܽܘܢ ܘܰܫܠܳܡܳܐ. ܘܗܰܝܡܳܢܽܘܬܳܐ ܥܰܡ ܣܰܒܪܳܐ܀

ܒܺܝܫܳܐ ܡܚܽܘܬܳܐ ܕܠܶܫܳܢܳܐ. ܡܶܢ ܡܰܚ̈ܘܳܬܳܐ ܕܣܰܦܣܺܝܪܳܐ. 

ܕܰܠܗܳܠܶܝܢ ܡܰܐܣܶܐ ܣܰܡܳܐ. ܘܰܠܗܳܝ ܠܳܐ ܐܺܝܬ ܐܳܣܝܽܘܬܳܐ܀

ܚܣܽܘܟ̥ ܡܰܡܠܠܳܐ ܡܶܛܽܠ ܦܰܘܕܳܐ. ܘܛܰܪ ܛܶܟܣܳܐ ܠܫܶܬܩܳܐ ܩܰܕܡܳܐ.

ܕܢܰܩܺܝܦܳܐ ܠܡܰܡܠܠܳܐ ܬܘܳܬ̥ܳܐ. ܘܚܰܪܬܶܗ ܕܫܶܬܩܳܐ ܝܽܘܬܪܳܢܳܐ܀

ܠܰܝܬ ܬܽܘܩܰܠܬܳܐ ܕܠܳܐ ܩܰܘܡܳܐ. ܐܶܠܳܐ ܕܦܰܘܕܳܐ ܕܠܶܫܳܢܳܐ. 

ܘܠܳܐ ܡܚܽܘܬܳܐ ܕܠܳܐ ܐܳܣܝܽܘܬܳܐ. ܐܶܠܳܐ ܡܰܡܠܠܳܐ ܕܣܶܦ̈ܘܳܬ̥ܳܐ܀

ܒܺܝܫܬܳܐ ܥܦܺܝܦܬܳܐ ܠܒܰܪܢܳܫܳܐ. ܕܢܶܗܘܶܐ ܣܰܟܠܳܐ ܚܒܰܢܳܢܳܐ. 

ܘܶܐܢ ܬܽܘܒ ܢܶܗܘܶܐ ܦܰܟܳܢܳܐ. ܗܳܐ ܒܺܝܫܬܳܐ ܕܠܳܐ ܡܶܬ̊ܬܰܟܣܳܐ܀

ܐܰܠܶܦ ܡܷ̈ܠܶܐ ܠܬܰܠܡܺܝ̈ܕܶܐ. ܘܰܐܢ̱ܬ ܫܰܡܠܳܐ ܒܝܰܕ ܣܽܘܥܪ̈ܳܢܶܐ. 

ܕܰܠܩܽܘܫܬܳܐ ܬܶܗܘܶܐ ܬܚܽܘܡܳܐ. ܘܠܰܡܝܰܬܪܽܘܬܳܐ ܩܳܢܽܘܢܳܐ܀

ܢܽܘܼܗܳܪܳܐ: ܩܛܺܝܼܦ ܣܝܳܡܳܐ ܗܳܢܳܐ ܡܼܶܢ ܟܬܳܒܳܐ ܕܕܽܘܪܳܫܳܐ ܕܡܳܪܝ ܐܠܝܳܐ ܕܐܰܢܒܰܪ ܒܝܰܕ ܡܰܠܦܳܢܳܐ ܥܺܝܼܣܰܐ ܕܶܡܺܝܼܪ ܗܳܢܳܐ ܕܚܳܝܶܐ ܒܐܰܘܣܛܪܝܰܐ. ܬܰܘܕܺܝܼ ܠܥܰܡܠܶܗ ܘܰܒܛܺܝܼܠܘܼܬܶܗ ܠܶܫܳܢܳܝܬܳܐ.