ܡܶܠ̈ܟ݂ܶܐ ܡܰܘܬ݂ܪ̈ܢܶܐ

ܡܶܠ̈ܟ݂ܶܐ ܡܰܘܬ݂ܪ̈ܢܶܐ 

 

ܐܰܒܳܐ ܗܘܺܝ ܠܺܝ ܡܰܠܦܳܢܳܐ: ܒܪܳܐ ܫܰܟܶܢ ܠܺܝ ܝܽܘܠܦܳܢܳܐ.
ܪܽܘܚܳܐ ܕܩܽܘܕܫܳܐ ܡܚܰܟܡܳܢܳܐ: ܚܰܕ ܐܰ‎ܠܳܗܳܐ ܡܪܰܚܡܳܢܳܐ.
ܒܰܪܶܟ ܡܳܪܰܢ ܒܝܰܡܺܝܢܳܟ: ܠܪܰܒܳܐ ܕܡܰܠܶܦ ܦܽܘܩܕܳܢܳܟ.
ܘܰܐܝܢܳܐ ܕܪܳܚܶܡ ܝܽܘܠܦܳܢܳܟ: ܐܰܫܪܳܐ ܒܶܗ ܡܳܪܝ ܨܶܒܝܳܢܳܟ.
ܓܶܕ ܢܰܦܫܳܟ ܐܰܘ ܒܰܪܢܳܫܳܐ: ܡܶܢ ܚܽܘܣܪܳܢܳܐ ܕܰܒܬܰܘܫܳܐ.
ܕܠܳܐ ܬܶܦܶܠ ܒܰܬܘܳܬ݂ ܢܰܦܫܳܐ: ܘܬܶܩܢܶܐ ܚܠܳܦ ܕܰܗܒܳܐ ܢܚܳܫܳܐ.
ܕܰܒܰܪ ܢܰܦܫܳܟ ܐܳܘ ܥܰܦܪܳܐ: ܒܡܶܕܶܡ ܕܰܡܩܰܝܶܡ ܦܰܓܪܳܐ.
ܘܠܳܐ ܬܶܬܝܰܥܰܢ ܥܰܠ ܥܽܘܬܪܳܐ: ܕܠܳܐ ܢܳܚܶܬ݂ ܥܰܡܳܟ ܠܩܰܒܪܳܐ.
ܗܘܺܝ ܙܗܺܝܪ ܡܶܢ ܪܰܘܝܽܘܬ݂ ܚܰܡܪܳܐ: ܕܗܽܘ ܡܒܰܛܶܠ ܨܠܽܘܬܳܐ ܘܫܰܗܪܳܐ.
ܘܰܡܕܰܘܶܕ ܗܰܘܢܳܐ ܡܥܰܠܝܳܐ: ܘܡܰܪܚܶܩ ܡܶܢ ܪܶܚܡܰܬ݂ ܡܳܪܝܳܐ.
ܘܡܶܢ ܪܰܒܽܘܬ݂ ܟܰܪܣܳܐ ܐܰܪܚܶܩ: ܘܩܰܠܺܝܠ ܡܶܢ ܐܽܘܟ݂ܠܳܐ ܣܳܦܶܩ.
ܘܶܐܢ ܒܺܝܫܽܘܬ݂ ܟܰܪܣܳܐ ܬܰܦܶܩ: ܚܶܟܡܰܬ݂ ܡܳܪܝܳܐ ܠܳܐ ܬܥܰܦܶܩ.
ܙܰܡܰܪ ܨܰܠܳܐ ܘܶܐܬ݂ܗܰܓܳܐ: ܘܰܠܪ̈ܓܫܶܐ ܕܦܰܓܪܳܟ݂ ܕܰܟܳܐ.
ܘܥܰܠ ܚܛܳܗܰܝ̈ܟ ܕܰܡܰܥ ܘܰܒܟܺܝ: ܘܚܽܘܣܳܝܳܐ ܡܶܢ ܡܳܪܝܳܐ ܒܥܺܝ.
ܚܰܘܪܳܟ ܒܶܪܝ ܢܶܗܘܶܐ ܟܢܺܝܟܳܐ: ܘܬܰܪܥܺܝܬ݂ܳܟ݂ ܒܛܳܒܬ݂ܳܐ ܚܒܺܝܟܳܐ.
ܘܰܒܠܶܒܳܐ ܗܘܺܝ ܡܰܟܺܝܟܳܐ: ܕܬܶܗܘܶܐ ܡܶܢ ܡܳܪܝܳܐ ܒܪܺܝܟܳܐ.
ܛܰܪ ܦܽܘܡܳܟ ܡܶܢ ܒܽܘܙܳܚ̈ܶܐ: ܘܠܶܫܳܢܳܟ ܡܶܢ ܩܽܘܦܳܚ̈ܶܐ.
ܕܢܶܗܘܽܘܢ ܚܰܝ݂ܰܝ݂̈ܟ ܒܰܢܝܳܚ̈ܶܐ: ܘܰܠܩܶܢܝܳܢܰܝ̈ܟ ܒܝܽܘܬܪ̈ܳܢܶܐ.
ܝܰܩܰܪ ܐܶܢܽܘܢ ܠܰܐܒܳܗܰܝ̈ܟ: ܘܠܰܐܚܰܝ̈ܟ ܘܠܰܒܢܰܝ̈ ܕܽܘܒܳܪ̈ܝܟ.
ܕܢܶܗܘܶܐ ܫܪܳܪܳܐ ܒܶܝܬ ܐܰܝܕܰܝ̈ܟ: ܕܥܰܠ ܐܰܪܥܳܐ ܢܺܐܪܒܽܘܢ ܚܰܝ݂ܰܝ݂̈ܟ.
ܟܠܺܝ ܢܰܦܫܳܟ ܡܶܢ ܥܶܢܝܳܢܳܐ: ܕܢܶܫ̈ܶܐ ܒܺܝ̈ܫܳܬ݂ ܨܶܒܝܳܢܳܐ.
ܕܠܳܐ ܢܶܦܓܰܥ ܒܳܟ ܢܶܟܝܳܢܳܐ: ܘܰܢܒܰܙܰܚ ܒܳܟ ܣܳܛܳܢܳܐ.
ܠܳܐ ܬܶܩܢܶܐ ܕܰܗܒܳܐ ܘܣܺܐܡܳܐ: ܕܚܰܫܳܐ ܘܥܳܩܬ݂ܳܐ ܒܗܽܘܢ ܣܺܝܡܳܐ.
ܩܢܺܝ ܠܳܟ ܝܽܘܠܦܳܢܳܐ ܚܠܺܝܡܳܐ: ܕܬܶܗܘܶܐ ܒܥܳܠܡܳܐ ܒܰܣܺܝܡܳܐ.
ܡܳܢܳܐ ܢܺܐܪܰܬ݂ ܒܰܪܢܳܫܳܐ: ܐܶܢ ܩܳܢܶܐ ܥܳܠܡܳܐ ܬܥܺܝܫܳܐ.
ܘܢܶܚܣܰܪ ܢܰܦܫܶܗ ܚܰܠܳܫܳܐ: ܒܰܫܪܳܪܳܐ ܕܢܶܒܟܶܐ ܒܚܰܫܳܐ.
ܢܶܣܝܽܘܢܳܐ ܐܶܢ ܦܳܓܰܥ ܒܳܟ: ܠܳܐ ܬܶܬܟܶܠ ܥܰܠ ܒܰܪ ܒܶܣܪܳܟ.
ܨܰܠܳܐ ܘܰܒܥܺܝ ܡܶܢ ܡܳܪܳܟ݂: ܕܒܺܐܝܕܶܗ ܐܺܝܬܰܘܗܝ ܦܽܘܪܩܳܢܳܟ.
ܣܰܒ ܠܳܟ ܒܶܝܬ ܓܰܙܳܐ ܫܒܺܝܚܳܐ: ܡܰܠܦܳܢܽܘܬ݂ܶܗ ܕܰܡܫܺܝܚܳܐ.
ܘܰܣܓܽܘܕ ܠܶܗ ܒܠܶܒܳܐ ܦܨܺܝܚܳܐ: ܘܰܗܘܺܝ ܡܰܟܺܝܟܳܐ ܘܢܺܝܚܳܐ.
ܥܰܝܶܕ ܢܰܦܫܳܟ ܒܛܳܒ̈ܳܬ݂ܳܐ: ܘܰܥܩܽܘܪ ܡܶܢܳܟ ܒܺܝ̈ܫܳܬ݂ܳܐ.
ܕܬܶܗܘܶܐ ܝܳܪܬ݂ܳܐ ܕܒܽܘܪ̈ܟܳܬ݂ܳܐ: ܘܪܰܚܺܝܩܳܐ ܡܶܢ ܠܰܘ̈ܛܳܬ݂ܳܐ.
ܦܺܐܪܳܟ ܒܶܪܝ ܢܶܗܘܶܐ ܚܰܠܝܳܐ: ܘܓܰܢܬ݂ܳܟ ܡܶܢ ܛܽܘ̈ܒܶܐ ܡܰܠܝܳܐ.
ܘܰܡܥܺܝܢܳܟ ܫܰܦܝܳܐ ܘܕܰܟܝܳܐ: ܕܢܶܕܠܶܐ ܡܶܢܳܗ̇ ܟܽܠ ܨܰܗܝܳܐ.
ܨܽܘܪܳܝܗܝ ܠܡܰܘܬܳܐ ܩܕܳܡ ܥܰܝ̈ܢܰܝܟ: ܘܠܳܐ ܬܶܬܦܰܪܟܰܠ ܒܰܦܟܳܪ̈ܝܟ.
ܘܶܐܢ ܚܳܙܶܝܬ݁ ܡܰܘܬܳܐ ܚܕܳܪܝܟ: ܗܘܺܝ ܐܰܝܟ ܕܰܒܥܰܪܣܳܐ ܩܕܳܡܰܝܟ.
ܩܪܺܝ ܘܰܥܒܶܕ ܦܽܘܩܕܳܢ ܡܳܪܳܟ: ܘܰܫܕܺܝ ܥܠܰܘܗܝ ܬܽܘܟܠܳܢ ܣܰܒܪܳܟ.
ܘܶܐܢ ܠܳܐ ܬܶܕܰܥ ܩܳܠ ܡܺܐܡܪܳܟ: ܐܰܝܟܰܢ ܡܰܫܰܪ ܠܳܟ ܚܰܒܪܳܟ.
ܪܰܚܶܡ ܥܰܠ ܚܕܳܪ̈ܝ ܬܰܪܥܳܟ: ܘܠܳܐ ܬܰܗܡܶܐ ܒܰܒܢܰܝ̈ ܒܶܣܪܳܟ.
ܕܰܢܨܰܠܽܘܢ ܘܰܢܒܰܪܟܽܘܢܳܟ: ܘܢܺܐܬ݂ܶܐ ܚܰܕ ܒܰܡܳܐܐ ܙܰܪܥܳܟ.
ܫܠܳܡܳܟ ܚܰܘܳܐ ܒܶܗ ܚܽܘܒܳܐ: ܘܰܕܚܽܘܩ ܡܶܢܶܗ ܠܰܩܪܳܒܳܐ.
ܠܶܫܳܢܳܟ ܫܽܘܒܚܳܐ ܘܠܶܒܳܐ: ܩܰܪܶܒ ܒܰܫܦܺܝܥܽܘ ܠܛܳܒܳܐ.
ܬܶܒܪܽܘܟ ܘܬܶܣܓܽܘܕ ܘܰܬܫܰܒܰܚ: ܝܰܩ̈ܕܶܐ ܫܰܠ̈ܡܶܐ ܬܶܬܕܰܒܰܚ.
ܠܰܒܪܳܐ ܡܬܽܘܡܳܝܳܐ ܕܰܕܢܰܚ: ܒܥܳܠܡܰܢ ܘܰܬܪܰܥ ܪ̈ܰܚܡܶܐ ܦܬܰܚ.

 

ܩܕܝܫܐ ܡܪܝ ܐܦܪܝܡ ܣܘܪܝܝܐ ( (306-373