ܡܺܐܡܪܳܐ ܕܡܳܪܝ ܐܰܦܪܶܝܡ: ܡܰܟܺܝܟܽܘܬܳܐ
ܐܰܝܢܳܐ ܕܥܳܐܶܠ ܠܰܐܓܽܘܢܳܐ܆ ܘܨܳܒܶܐ ܕܢܶܣܰܒ ܙܳܟܽܘܬܳܐ.
ܙܰܝܢܳܐ ܙܰܗܝܳܐ ܕܡܽܘܟܳܟܳܐ܆ ܢܶܬܥܰܛܰܦ ܐܰܝܟ ܫܶܪܝܳܢܳܐ܀
ܙܰܝܢܶܗ ܕܒܺܝܫܳܐ ܪܳܡܽܘܬ̥ܳܐ ܗ̱ܝ܆ ܕܒܳܗ̇ ܩܰܛܠܶܗ ܠܰܐܒܽܘܢ ܐܳܕܳܡ.
ܙܰܝܢܶܗ ܕܡܳܪܰܢ ܡܽܘܟܳܟ̥ܰܐ ܗ̱ܘ܆ ܕܗܽܘ ܚܰܫܠܶܗ ܠܽܘܩܒܰܠ ܒܺܝܫܳܐ.
ܒܶܗ ܗܽܘ ܣܰܚܦܶܗ ܠܣܳܛܳܢܳܐ܆ ܡܶܢ ܪܰܘܡܳܐ ܕܰܛܪܽܘܢܽܘܬܶܗ.
ܒܶܗ ܐܶܙܕܰܝܰܢܘ ܬܰܠܡܺܝ̈ܕܶܐ܆ ܘܒܶܗ ܐܶܬܢܰܨܰܚܘ ܫܰܪܺܝܪ̈ܶܐ.
ܘܗܽܘܝܽܘ ܝܳܗܶܒ ܙܳܟܽܘܬܳܐ܆ ܠܩܰܕܡܳܝ̈ܶܐ ܐܳܦ ܠܰܐ̱ܚܪ̈ܳܝܶܐ.
ܒܗܳܢܳܐ ܙܰܝܢܳܐ ܐܶܬܚܰܙܩܘ܆ ܐܳܘ ܬܰܠܡܺܝ̈ܕܶܐ ܕܰܡܫܺܝܚܳܐ.
ܕܒܶܗ ܫܳܩܠܺܝܢ ܐܢ̱ܬܽܘܢ ܙܳܟܽܘܬܳܐ܆ ܘܒܶܗ ܝܳܪܬ̥ܺܝܢ ܐܢ̱ܬܽܘܢ ܡܰܠܟܽܘܬܳܐ.
ܐܰܝܢܳܐ ܕܪܳܚܶܡ ܙܳܟܽܘܬܳܐ܆ ܒܗܳܢܳܐ ܙܰܝܢܳܐ ܢܶܙܕܰܝܰܢ.
ܘܰܐܝܢܳܐ ܕܪܳܐܶܓ ܡܰܠܟܽܘܬܳܐ܆ ܒܗܳܢܳܐ ܬܰܪܥܳܐ ܥܳܐܶܠ ܠܳܗ̇.
ܗܳܕܳܐ ܗ̱ܝ ܐܽܘܪܚܳܐ ܕܡܰܠܟܽܘܬ̥ܳܐ܆ ܗܳܢܰܘ ܬܰܪܥܳܐ ܕܰܫܡܰܝܳܐ.
ܗܳܕܶܐ ܐܺܝܬܶܝܗ̇ ܣܶܒܶܠܬܳܐ܆ ܕܒܳܗ̇ ܣܳܠܶܩ ܐ̱ܢܳܫ ܠܰܫܡܰܝܳܐ.
ܒܳܗ̇ ܐܶܬ̊ܬܰܚܬܺܝ ܐܰܠܳܗܳܐ܆ ܡܶܢ ܪܰܘܡܳܐ ܠܒܶܝܬ ܐܰܪ̈ܥܳܢܶܐ.
ܘܒܳܗ̇ ܣܳܠܩܺܝܢ ܝܰܠ̈ܕܰܘܗܝ ܕܳܐܕܳܡ܆ ܡܶܢ ܥܽܘܼܡܩܳܐ ܠܒܶܝܬ ܥܶܠܳܝ̈ܶܐ܀
ܛܳܒ̈ܳܬܳܐ ܒܳܗ̇ ܡܶܬܩܰܢ̈ܝܳܢ܆ ܘܒܺܝ̈ܫܳܬܳܐ ܒܳܗ̇ ܡܶܙܕܰܟ̈ܝܳܢ.
ܘܒܳܗ̇ ܫܳܦܰܪ ܐ̱ܢܳܫ ܠܰܐܠܳܗܳܐ܆ ܡܶܢ ܕܶܒܚ̈ܶܐ ܘܡܶܢ ܩܽܘܪ̈ܒܳܢܶܐ.
ܒܳܗ̇ ܡܶܬܓܰܡܪܺܝܢ ܙܰܕܺܝ̈ܩܶܐ܆ ܘܒܳܗ̇ ܡܶܬܩܰܒܠܺܝܢ ܬܰܝܳܒ̈ܶܐ.
ܒܳܗ̇ ܡܶܬܚܰܣܶܝܢ ܚܰܛܳܝ̈ܶܐ܆ ܘܒܳܗ̇ ܡܶܙܕܰܕܩܺܝܢ ܬܰܝܳܒ̈ܶܐ.
ܡܥܺܝܢܳܐ ܗ̱ܝ ܓܶܝܪ ܡܰܟܺܝܟܽܘܬܳܐ܆ ܕܡܶܢܳܗ̇ ܪܳܕܶܝܢ ܛܳܒ̈ܳܬܳܐ.
ܐܳܦ ܪܳܡܽܘܬܳܐ ܡܰܒܽܘܥܳܐ ܗ̱ܝ܆ ܕܡܶܢܳܗ̇ ܢܳܒ̈ܥܳܢ ܒܺܝ̈ܫܳܬܳܐ.
ܟܽܠ ܕܰܠܒܺܝܫ ܡܰܟܺܝܟܽܘܬܳܐ܆ ܒܶܗ ܥܳܡܪ̈ܳܢ ܟܽܠ ܛܳܒ̈ܳܬܳܐ.
ܘܰܐܝܢܳܐ ܕܰܠܒܺܝܫ ܪܳܡܽܘܬܳܐ܆ ܒܶܗ ܫܰܪ̈ܝܳܢ ܟܽܠ ܒܺܝ̈ܫܳܬܳܐ.
ܡܰܟܺܝܟܽܘܬܳܐ ܠܚܰܛܳܝ̈ܶܐ܆ ܡܰܣܩܳܐ ܠܗܽܘܢ ܠܰܓܡܺܝܪܽܘܬܳܐ.
ܐܳܦ ܪܳܡܽܘܬܳܐ ܠܰܓܡܺܝܪ̈ܶܐ܆ ܡܰܚܬܳܐ ܠܗܽܘܢ ܠܥܰܡܺܝܩܽܘܬ̥ܳܐ.
ܣܳܛܳܢܳܐ ܡܶܢ ܫܽܘܪܳܝܳܐ܆ ܓܡܺܝܪܳܐ ܗ̱ܘܳܐ ܥܰܡ ܡܰܠܰܐܟ̈ܶܐ.
ܘܰܒܪܳܡܽܘܬܳܐ ܐܶܬ̊ܬܰܚܬܺܝ܆ ܘܰܗܘܳܐ ܪܺܝܫܳܐ ܕܓܺܗܰܢܳܐ.
ܪܰܫܺܝܥ ܗ̱ܘܳܐ ܐܳܦ ܓܰܝܳܣܳܐ܆ ܘܰܡܠܶܐ ܗ̱ܘܳܐ ܟܽܠ ܒܺܝ̈ܫܳܬܳܐ.
ܘܰܒܡܽܘܟܳܟ̥ܶܗ ܐܰܘܕܺܝ ܗ̱ܘܳܐ܆ ܘܰܗܘܳܐ ܪܺܝܫܳܐ ܒܡܰܠܟܽܘܬܳܐ.
ܚܰܛܳܝܳܐ ܐܶܢ ܩܳܢܶܐ ܠܳܗ̇܆ ܠܡܰܟܺܝܟ̥ܽܘܬܳܐ ܡܶܙܕܰܕܰܩ.
ܘܙܰܕܺܝܩܳܐ ܐܶܢ ܠܳܒܶܫ ܠܳܗ̇܆ ܠܪܳܡܽܘܬܳܐ ܗ̣ܘܳܐ ܚܰܝܳܒܳܐ.
ܟܬܳܒܳܐ ܠܚܽܘܒܳܐ ܣܳܐܶܡ ܠܶܗ܆ ܪܺܝܫܳܐ ܕܟܽܠܗܶܝܢ ܛܳܒ̈ܳܬܳܐ.
ܘܡܰܢܽܘ ܕܩܳܢܶܐ ܠܶܗ ܠܚܽܘܒܳܐ܆ ܐܶܠܳܐ ܒܰܠܚܽܘܕ ܡܰܟܺܝܟ̥ܳܐ.
ܐܶܢ ܚܽܘܒܳܐ ܒܳܥܶܝܬ̊ ܕܬܶܩܢܶܐ܆ ܒܡܰܟܺܝܟܽܘܬܳܐ ܩܳܢܶܝܬ̊ ܠܶܗ.
ܐܳܦ ܣܰܒܪܳܐ ܘܗܰܝܡܳܢܽܘܬܳܐ܆ ܒܡܰܟܺܝܼܟܽܘܼܬܳܐ ܡܶܫܬܰܟܚܺܝܢ.
ܨܰܝܳܡ̈ܶܐ ܒܳܗ̇ ܡܶܙܕܰܕܩܺܝܢ܆ ܘܰܒܬܽܘ̈ܠܶܐ ܒܳܗ̇ ܡܶܬܢܰܛܪܺܝܢ.
ܙܶܕܩܴ̈ܬܳܐ ܒܳܗ̇ ܡܶܬܩܰܒ̈ܠܳܢ܆ ܘܩܽܘܪ̈ܒܳܢܶܐ ܒܳܗ̇ ܡܶܬܩܰܪܒܺܝܢ.
ܨܰܝܳܡܳܐ ܕܠܰܘ ܡܰܟܺܝܼܟ̥ܰܐ ܗ̱ܘ܆ ܒܨܰܘܡܶܗ ܡܰܪܓ̥ܶܙ ܠܰܐܠܳܗܳܐ.
ܘܰܒܬܽܘܠܳܐ ܕܠܳܐ ܡܶܬܡܰܟܰܟ̥܆ ܛܳܒܺܝܢ ܡܶܢܶܗ ܙܰܢܳܝ̈ܶܐ.
ܙܶܕܩܴ̈ܬܳܐ ܕܠܳܐ ܡܽܘܟܳܟ̥ܳܐ܆ ܠܳܐ ܡܶܬܩܰܒ̈ܠܳܢ ܒܰܫܡܰܝܳܐ.
ܘܩܽܘܪ̈ܒܳܢܶܐ ܕܠܳܐ ܡܽܘܟܳܟ̥ܳܐ܆ ܠܳܐ ܡܪܰܚܦܳܐ ܥܠܰܝܗܽܘܢ ܪܽܘܚܳܐ.
ܐܰܝܢܳܐ ܕܫܳܗܰܪ ܘܰܡܨܰܠܶܐ܆ ܕܠܳܐ ܡܽܘܟܳܟ̥ܳܐ ܕܰܡܺܝܟ̥ܰܐ ܗ̱ܘ.
ܐܰܝܢܳܐ ܕܡܰܟܺܝܟ̥ ܐܶܢ ܕܰܡܺܝܟ̥܆ ܨܠܽܘܬܶܗ ܦܺܝܪܡܳܐ ܗ̱ܝ ܠܰܐܠܳܗܳܐ.
ܐܰܝܢܳܐ ܕܡܰܟܺܝܟ̥ ܐܶܢ ܚܰܛܳܝܳܐ܆ ܦܫܺܝܩ ܠܶܗ ܕܢܶܗܘܶܐ ܬܰܝܳܒܳܐ.
ܘܰܐܝܢܳܐ ܕܪܳܡ ܐܳܦܶܢ ܙܰܕܺܝܩ܆ ܒܰܥܓ̥ܰܠ ܗܳܘܶܐ ܚܰܛܳܝܳܐ.
ܐܰܝܢܳܐ ܕܰܛܡܺܝܪ ܒܰܚ̈ܛܳܗܶܐ܆ ܐܶܢ ܩܳܢܶܐ ܡܰܟܺܝܼܟܽܘܬܳܐ܆ ܗܺܝ ܡܩܰܪܒܳܐ ܠܶܗ ܠܰܐܠܳܗܳܐ.
ܕܢܳܣܶܒ ܡܶܢܶܗ ܫܽܘܒܩܳܢܳܐ܆ ܘܣܳܗܕܳܐ ܠܡܶܠܰܬ̥ܝ ܙܳܢܺܝܬ̥ܳܐ.
ܕܰܛܡܺܝܪܳܐ ܗ̱ܘܳܬ̥ ܒܰܚ̈ܛܳܗܶܐ܆ ܘܶܐܬܥܰܛܦܰܬ̥ ܡܰܟܺܝܼܟܽܘܬܳܐ.
ܘܰܒܚܰܫܳܐ ܒܥܳܬ̥ ܫܽܘܒܩܳܢܳܐ܆ ܘܰܚܙܳܐ ܡܳܪܰܢ ܡܽܘܟܳܟ̥ܳܗ̇.
ܘܰܐܫܺܝܓ̥ ܨܳܐܬ̥ܳܐ ܕܰܚܛܳܗܶܝ̈ܗ̇܆ ܘܰܟܬܰܒ ܫܡܳܗ̇ ܒܰܣܦܰܪ ܚܰܝ̈ܶܐ.
ܘܢܶܨܚܳܢܳܗ̇ ܒܰܐܪܒܰܥ ܦܶܢ̈ܝܳܢ܆ ܘܰܐܘܪܶܒ ܒܰܐܪܥܳܐ ܕܽܘܟܪܳܢܳܗ̇.
ܘܰܐܣܓܺܝ ܣܰܒܪܳܗ̇ ܒܰܫܡܰܝܳܐ܆ ܘܗܳܠܶܝܢ ܟܽܠܗܶܝܢ ܛܳܒ̈ܳܬܳܐ܆ ܒܡܰܟܺܝܼܟܽܘܬܳܐ ܩܢܳܬ̥ ܐܶܢܶܝܢ.
ܐܰܝܢܳܐ ܕܡܶܬܡܰܟܰܟ̥ ܡܶܬ̊ܬܪܺܝܡ܆ ܐܶܡܰܪ ܡܳܪܰܢ ܒܰܣܒܰܪܬܶܗ.
ܘܰܐܝܢܳܐ ܕܡܶܬ̊ܬܪܺܝܡ ܡܶܬܡܰܟܰܟ̥܆ ܗܽܘ ܦܳܪܽܘܩܰܢ ܐܰܠܶܦ ܠܰܢ.
ܕܰܟܡܳܐ ܢܕ̥ܺܝܕ̥ܳܐ ܪܳܡܽܘܬܳܐ܆ ܡܫܺܝܚܳܐ ܚܰܘܺܝ ܟܰܕ ܐܳܡܰܪ.
ܕܰܐܝܢܳܐ ܕܰܒܠܶܒܶܗ ܪܳܡ ܗ̱ܘ̣܆ ܢܕ̥ܺܝܕ̥ܳܐ ܐܺܝܬܰܘܗܝ ܠܰܐܠܳܗܳܐ.
ܐܳܘ ܕܪܳܚܶܡ ܙܰܕܺܝܩܽܘܬܳܐ܆ ܣܰܓܺܝ ܪܳܚܶܡ ܡܰܟܺܝܼܟܽܘܬܳܐ.
ܕܡܰܟܺܝܼܟܽܘܬܳܐ ܕܠܳܐ ܥܰܡ̈ܠܶܐ܆ ܥܳܒܕܳܐ ܠܐ̱ܢܳܫܳܐ ܙܰܕܺܝ̈ܩܶܐ.
ܐܳܘ ܕܪܳܚܶܡ ܙܰܕܺܝܩܽܘܬܳܐ܆ ܣܢܺܝ ܘܰܐܣܠܳܐ ܪܳܡܽܘܬ̥ ܠܶܒܳܐ.
ܕܰܠܥܰܡ̈ܠܶܐ ܕܙܰܕܺܝܩܽܘܬܳܐ܆ ܗܺܝ ܥܳܒܕܳܐ ܠܗܽܘܢ ܡܰܣ̈ܠܰܝܳܐ.
ܚܰܛܳܝ̈ܶܐ ܓܶܝܪ ܕܶܐܬܡܰܟܰܟ̥ܘ܆ ܕܠܳܐ ܥܰܡ̈ܠܶܐ ܗܘܰܘ ܙܰܕܺܝ̈ܩܶܐ.
ܘܙܰܕܺܝ̈ܩܶܐ ܒܝܰܕ ܪܳܡܽܘܬܳܐ܆ ܐܰܘܒܶܕܘ ܣܽܘܓܳܐܐ ܕܥܰܡ̈ܠܰܝܗܽܘܢ.
ܐܳܘ ܬܰܠܡܺܝ̈ܕܶܐ ܕܰܡܫܺܝܚܳܐ܆ ܚܽܘܪܘ ܒܰܡܫܺܝܚܳܐ ܕܶܐܬܡܰܟܰܟ̥.
ܘܰܐܣܓܰܘ ܘܰܩܢܰܘ ܡܽܘܟܳܟ̥ܳܐ܆ ܕܒܶܗ ܫܳܦܪܺܝܢ ܐܢ̱ܬܽܘܢ ܠܰܐܠܳܗܳܐ.
ܟܽܠ ܕܩܳܢܶܐ ܡܰܟܺܝܼܟܽܘܬܳܐ܆ ܒܳܗ̇ ܩܳܢܶܐ ܐܳܦ ܠܰܡܫܺܝܚܳܐ.
ܘܰܐܝܢܳܐ ܕܩܳܢܶܐ ܪܳܡܽܘܬܳܐ܆ ܒܺܝܫܳܐ ܫܪܶܐ ܒܶܗ ܟܰܣܝܳܐܝܬ̥.
ܟܽܠ ܕܰܠܒܺܝܫ ܡܰܟܺܝܼܟܽܘܬܳܐ܆ ܠܒܺܝܫ ܥܰܡܳܗ̇ ܐܳܦ ܠܰܐܠܳܗܳܐ.
ܘܟܽܠ ܕܰܡܥܰܛܰܦ ܪܳܡܽܘܬܳܐ܆ ܫܺܐܕܳܐ ܟܰܣܝܳܐ ܡܕܰܝܰܪ ܒܶܗ.
ܐܰܝܢܳܐ ܕܪܳܚܶܡ ܡܽܘܟܳܟܳܐ܆ ܦܫܺܝܩ ܠܶܗ ܕܢܶܪܚܰܡ ܠܰܐܠܳܗܳܐ.
ܘܰܐܝܢܳܐ ܕܪܳܚܶܡ ܪܳܡܽܘܬܳܐ܆ ܣܳܢܳܐܐ ܗܳܘܶܐ ܠܰܐܠܳܗܳܐ.
ܐܶܢ ܬܶܙܟ̥ܶܐ ܠܒܺܝܫܳܐ ܨܳܒܶܝܬ̊܆ ܣܰܒ ܙܰܝܢܳܐ ܡܰܟܺܝܼܟܽܘܬܳܐ.
ܘܟܰܕ ܚܳܙܶܐ ܠܳܟ ܣܳܛܳܢܳܐ܆ ܒܙܰܘܥܳܐ ܥܳܪܶܩ ܡܶܢ ܩܽܘܕܡܰܝܟ.
ܘܶܐܢ ܠܡܳܪܳܟ ܨܳܒܶܝܬ̊ ܕܬܶܫܦܰܪ܆ ܠܒܰܫ ܢܰܚ̈ܬܶܐ ܕܡܰܟܺܝܼܟܽܘܬܳܐ.
ܕܟܰܕ ܚܳܙܶܐ ܠܳܟ ܚܳܕܶܐ ܒܳܟ܆ ܘܰܒܡܰܠܟܽܘܬܶܗ ܡܰܘܪܶܒ ܠܳܟ.
ܙܰܝܢܳܐ ܙܰܗܝܳܐ ܡܽܘܟܳܟ̥ܰܐ ܗ̱ܘ܆ ܛܽܘܒ ܠܰܐܝܢܳܐ ܕܡܶܬܓܰܘܰܣ ܒܶܗ.
ܡܰܟܺܝܼܟܽܘܬܳܐ ܠܬܰܡܺܝ̈ܡܶܐ܆ ܡܦܰܠܓܳܐ ܘܝܳܗܒܳܐ ܒܽܘܪ̈ܟܳܬܳܐ.
ܘܝܳܪ̈ܽܘܬܶܐ ܕܰܓܢܽܘܢ ܢܽܘܗܪܳܐ܆ ܥܳܒܕܳܐ ܠܗܽܘܢ ܒܶܝܬ ܡܰܠܟܽܘܬܳܐ.
ܠܗܳܒܺܝܠ ܩܰܪܒܰܬ̥ ܩܽܘܪܒܳܢܳܐ܆ ܘܕܶܒܚܳܐ ܕܰܡܢܺܝܚ ܠܰܐܠܳܗܳܐ.
ܠܰܚܢܽܘܟ̥ ܫܰܢܝܰܬ̥ ܠܰܡܪ̈ܰܘܡܶܐ܆ ܘܠܳܐ ܛܥܶܡ ܗ̱ܘܳܐ ܡܰܘܬܳܐ ܥܕܰܟܺܝܠ.
ܠܢܽܘܚ ܦܰܨܝܰܬ̥ ܡܶܢ ܛܰܘܦܳܢܳܐ܆ ܘܠܳܐ ܛܒܰܥ ܗ̱ܘܳܐ ܒܰܝܢܳܬ̥ ܓܰܠ̈ܠܶܐ.
ܠܡܰܠܟܺܝܙܕܶܩ ܥܶܒܕܰܬ̥ ܟܽܘܡܪܳܐ܆ ܕܰܐܠܳܗܳܐ ܒܡܰܟܺܝܟܽܘܬܶܗ.
ܠܰܐܒܪܳܗܳܡ ܒܡܰܟܺܝܼܟܽܘܬܳܐ܆ ܥܒܰܕܬܶܗ ܪܳܚܡܳܐ ܕܰܐܠܳܗܳܐ.
ܘܰܗܘܳܐ ܪܺܝܫܳܐ ܘܩܰܕܡܳܝܳܐ܆ ܒܰܣܡܳܟ̥ܳܐ ܕܒܶܝܬ ܡܰܠܟܽܘܬܳܐ.
ܠܺܐܝܣܚܳܩ ܦܰܨܝܰܬ̥ ܡܶܢ ܩܶܛܠܳܐ܆ ܠܝܰܥܩܽܘܒ ܐܰܘܪܬ̥ܰܬ̥ ܒܽܘܪ̈ܟܳܬܳܐ.
ܠܝܰܘܣܶܦ ܝܶܗܒܰܬ̥ ܡܰܠܟܽܘܬ̥ܳܐ܆ ܠܡܽܘܫܶܐ ܥܰܛܦܰܬ̥ ܙܰܗܝܽܘܬܳܐ.
ܠܰܐܗܪܽܘܢ ܝܶܗܒܰܬ̥ ܟܳܗܢܽܘܬܳܐ܆ ܘܰܠܝܶܫܽܘܥ ܪܺܝܫܳܢܽܘܬܳܐ.
ܠܓܶܕܥܽܘܢ ܝܶܗܒܰܬ̥ ܙܳܟܽܘܬܳܐ܆ ܘܰܠܢܰܦܬܰܚ ܓܰܢ̱ܒܳܪܽܘܬܳܐ.
ܠܕܰܘܺܝܕ ܝܶܗܒܰܬ̥ ܡܰܠܟܽܘܬܳܐ܆ ܘܰܠܚܶܙܰܩܝܳܐ ܦܽܘܪܩܳܢܳܐ.
ܠܶܐܠܺܝܳܐ ܠܪܰܘܡܳܐ ܥܰܠܝܰܬ̥܆ ܘܠܶܐܠܺܝܫܳܥ ܪܽܘܚܳܐ ܝܶܗܒܰܬ̥.
ܠܰܫܡܽܘܐܝܠ ܩܰܪܢܳܐ ܕܡܶܫܚܳܐ܆ ܘܠܶܐܫܰܥܝܳܐ ܚܶܙ̈ܘܶܐ ܪ̈ܳܡܶܐ.
ܠܝܰܘܢܳܢ ܕܰܠ̣ܝܰܬ̥ ܡܶܢ ܝܰܡܳܐ܆ ܘܰܠܕܳܢܝܐܝܠ ܡܶܢ ܓܽܘܒܳܐ.
ܘܰܠܩܰܕܡܳܝ̈ܶܐ ܘܠܰܐ̱ܚܪ̈ܳܝܶܐ܆ ܗܺܝ ܡܰܟܺܝܼܟܽܘܬܳܐ ܢܰܨܚܰܬ̥.
ܠܗܳܕܶܐ ܡܥܺܝܢܳܐ ܕܒܽܘܪ̈ܟܳܬܳܐ܆ ܐܰܚܽܘܕ ܒܢܰܦܫܳܟ ܬܰܠܡܺܝܕܳܐ.
ܕܡܰܒܥܳܐ ܠܳܟ ܟܽܠ ܛܳܒ̈ܳܬܳܐ܆ ܘܫܳܬ̊ܶܝܬ̊ ܡܶܢܳܗ̇ ܒܽܘܪ̈ܟܳܬܳܐ.
ܘܰܡܩܰܪܒܳܐ ܠܳܟ ܨܶܝܕ ܐܰܠܳܗܳܐ܆ ܘܰܡܚܰܠܛܳܐ ܠܳܟ ܥܰܡ ܥܺܝܪ̈ܶܐ.
ܡܚܰܘܝܳܐ ܠܳܟ ܐ̱ܪ̈ܳܙܶܐ ܟܣܰܝ̈ܳܐ܆ ܘܡܳܠܝܳܐ ܠܳܟ ܟܽܠ ܚܶܟ̈ܡܳܬܳܐ.
ܓܳܠܝܳܐ ܠܳܟ ܥܰܡܺܝ̈ܩܳܬܳܐ܆ ܘܰܡܚܰܘܝܳܐ ܠܳܟ ܟܰܣ̈ܝܳܬܳܐ.
ܘܰܠܪܳܡܽܘܬܳܐ ܕܰܚܬ̥ܺܝܪ̈ܶܐ܆ ܡܰܪܟܢܳܐ ܡܫܰܥܒܕܳܐ ܠܺܐܝܩܳܪܳܟ.
ܠܓܰܘ ܡܶܢܳܟ ܫܰܝܢܳܐ ܙܳܪܥܳܐ܆ ܘܝܰܩܺܝܪ̈ܘܳܬܳܐ ܠܒܰܪ ܡܶܢܳܟ.
ܚܽܘܫܳܒ̈ܶܐ ܫܦܰܝ̈ܳܐ ܒܠܶܒܳܟ܆ ܘܙܰܗܝܽܘܬܳܐ ܥܰܠ ܦܰܪܨܽܘܦܳܟ.
ܪܳܕ̥ܦܳܐ ܚܶܡܬ̥ܳܐ ܡܶܢ ܠܶܒܳܟ܆ ܘܥܳܩܪܳܐ ܪܽܘܓܙܳܐ ܡܶܢ ܢܰܦܫܳܟ.
ܐܰܟܬ̥ܳܐ ܛܢܳܢܳܐ ܘܒܺܝܫܽܘܬܳܐ܆ ܠܪܽܘܚܩܳܐ ܛܳܪܕܳܐ ܡܶܢ ܨܶܐܕܝ̈ܟ.
ܚܽܘܒܳܐ ܘܫܰܝܢܳܐ ܡܳܠܝܳܐ ܠܳܟ܆ ܚܰܕܽܘܬܳܐ ܘܰܦܨܺܝܚܽܘܬܳܐ.
ܚܰܕܽܘܬܳܐ ܠܰܘ ܕܰܐܪ̈ܥܳܢܶܐ܆ ܘܰܦܨܺܝܚܽܘܬܳܐ ܕܫܰܠܺܝ̈ܛܶܐ.
ܐܶܠܳܐ ܚܰܕܽܘܬܳܐ ܕܪܽܘܚܳܐ܆ ܘܰܦܨܺܝܚܽܘܬܳܐ ܕܚܶܟܡܬܳܐ.
ܪܳܚܡܳܐ ܠܟܽܠ ܐ̱ܢܳܫ ܥܳܒܕܳܐ ܠܳܟ܆ ܘܚܰܒܺܝܒܳܐ ܥܰܠ ܐܰܠܳܗܳܐ.
ܥܺܝܪ̈ܶܐ ܚܳܕܶܝܢ ܒܰܚܙܳܬ̥ܳܟ܆ ܘܫܺܐܕ̈ܶܐ ܟܡܺܝܪܺܝܢ ܡܶܢ ܩܽܘܒܠܳܟ.
ܐܳܦ ܚܰܣܳܡ̈ܶܐ ܕܣܳܢܶܝܢ ܠܳܟ܆ ܒܟܶܣܝܳܐ ܬܳܗܪܺܝܢ ܒܰܚܙܳܬ̥ܳܟ.
ܕܰܪܘܶܝܢ ܗܶܢܽܘܢ ܡܶܢ ܪܽܘܓܙܳܐ܆ ܘܰܫܦܶܐ ܠܶܒܳܟ ܘܰܡܫܰܝܰܢ.
ܚܰܝ̈ܶܐ ܕܪܳܡܺܝܢ ܡܶܢ ܗܳܠܶܝܢ܆ ܠܳܐ ܐ̱ܢܳܫ ܚܳܝܶܐ ܒܰܒܪܺܝܬܳܐ.
ܘܰܠܪܰܘܡܳܐ ܕܡܰܟܺܝܼܟܽܘܬܳܐ܆ ܓܡܺܝܪ̈ܶܐ ܒܰܠܚܽܘܕ ܡܳܛܶܝܢ ܠܶܗ.
ܢܺܝܪܳܐ ܢܺܝܚܳܐ ܘܒܰܣܺܝܡܳܐ܆ ܢܺܝܪܳܗ̇ ܗ̱ܘ̣ ܕܡܰܟܺܝܼܟܽܘܬܳܐ.
ܘܰܐܝܢܳܐ ܕܣܳܡܳܗ̇ ܥܰܠ ܨܰܘܪܶܗ܆ ܪܳܡ ܘܰܡܥܰܠܰܝ ܦܽܘܠܚܳܢܶܗ.
ܐܰܪܟܶܢ ܨܰܘܪܳܟ ܬܰܠܡܺܝܕܳܐ܆ ܕܒܳܥܶܐ ܕܢܶܫܦܰܪ ܠܰܐܠܳܗܳܐ.
ܐܶܢ ܣܢܺܝܩ ܐܰܢ̱ܬ ܥܰܠ ܫܽܘܒܩܳܢܳܐ܆ ܕܰܚܛܳܗ̈ܶܐ ܒܶܗ ܡܶܫܟܰܚ ܐܰܢ̱ܬ.
ܘܶܐܢ ܬܶܙܟܶܐ ܠܥܰܘܠܳܐ ܒܳܥܶܝܬ̊܆ ܒܡܰܟܺܝܼܟܽܘܬܳܐ ܙܳܟ̥ܶܐ ܐܰܢ̱ܬ.
ܘܶܐܢ ܬܺܐܪܰܬ̥ ܚܰܝ̈ܶܐ ܨܳܒܶܝܬ̊܆ ܒܡܰܟܺܝܼܟܽܘܬܳܐ ܝܳܪܶܬ̥ ܐܰܢ̱ܬ.
ܘܶܐܢ ܬܶܗܘܶܐ ܪܰܒܳܐ ܒܳܥܶܝܬ̊܆ ܒܳܗ̇ ܝܳܪܶܒ ܐܰܢ̱ܬ ܐܰܝܟ ܕܰܟܬܺܝܒ.
ܐܶܢ ܕܰܟܝܽܘܬܳܐ ܪܳܚܶܡ ܐܰܢ̱ܬ܆ ܒܳܗ̇ ܩܳܢܶܝܬ̊ ܠܶܒܳܐ ܕܰܟܝܳܐ.
ܘܶܐܢ ܪܳܐܓܰܬ̊ ܩܰܕܺܝܫܽܘܬܳܐ܆ ܗܺܝ ܥܳܒܕܳܐ ܠܳܟ ܩܰܕܺܝܫܳܐ.
ܘܶܐܢ ܬܶܗܘܶܐ ܓܡܺܝܪܳܐ ܨܳܒܶܝܬ̊܆ ܗܺܝ ܗ̱ܝ ܐܽܘܪܚܳܐ ܕܰܓܡܺܝܪ̈ܶܐ.
ܘܶܐܢ ܐܺܝܬ ܬܽܘܒ ܪܰܘܡܳܐ ܐ̱ܚܪܺܢܳܐ܆ ܒܡܰܟܺܝܼܟܽܘܬܳܐ ܣܳܠܶܩ ܐܰܢ̱ܬ.
ܗܳܕܳܐ ܗ̱ܝ ܐܽܘܪܚܳܐ ܕܡܰܠܟܽܘܬ̥ܳܐ܆ ܘܗܳܢܰܘ ܬܰܪܥܳܐ ܕܰܫܡܰܝܳܐ.
ܗܳܕܳܐ ܗ̱ܝ ܓܰܢܰܬ̥ ܒܽܘܣܳܡ̈ܶܐ܆ ܘܗܳܕܳܐ ܗ̱ܝ ܥܶܠܬܳܐ ܕܛܳܒ̈ܳܬܳܐ.
ܘܗܳܕܳܐ ܗ̱ܝ ܡܥܺܝܢܳܐ ܕܒܽܘܪ̈ܟܳܬܳܐ܆ ܘܗܳܕܳܐ ܗ̱ܝ ܣܰܒܪܳܐ ܕܠܳܐ ܡܰܒܗܶܬ̥.
ܠܟܽܠ ܐܰܝܢܳܐ ܕܡܶܬܓܰܘܰܣ ܒܳܗ̇܆ ܒܗܰܝܡܳܢܽܘܬܳܐ ܕܰܫܪܳܪܳܐ.
ܒܳܗ̇ ܡܶܬܚܰܣܶܝܢ ܚܰܛܳܝ̈ܶܐ܆ ܘܒܳܗ̇ ܡܶܙܕܰܕܩܺܝܢ ܚܰܝܳܒ̈ܶܐ.
ܒܳܗ̇ ܦܳܢܶܝܢ ܐܳܦ ܛܳܥܰܝ̈ܳܐ܆ ܘܒܳܗ̇ ܡܶܫܬܰܟܚܺܝܢ ܐܰܒܺܝ̈ܕܶܐ.
ܒܳܗ̇ ܙܳܟܶܝܢ ܐܳܦ ܢܰܨܺܝܚ̈ܶܐ܆ ܘܒܳܗ̇ ܡܶܬܟܰܠܠܺܝܢ ܙܰܟܳܝ̈ܶܐ.
ܘܒܳܗ̇ ܡܶܬ̊ܬܢܺܝܚܺܝܢ ܫܰܪܺܝܪ̈ܶܐ܆ ܘܒܳܗ̇ ܡܶܬܓܰܡܪܺܝܢ ܙܰܕܺܝ̈ܩܶܐ.
ܗܺܝ ܟܳܠܝܳܐ ܕܚܰܘ̈ܒܶܐ ܗܳܘܶܝܢ܆ ܘܗܺܝ ܡܫܰܪܝܳܐ ܥܒܳܕ̈ܶܐ ܛܳܒ̈ܶܐ.
ܘܗܺܝ ܡܫܰܠܡܳܐ ܥܰܡ̈ܠܶܐ ܪ̈ܳܡܶܐ܆ ܘܡܰܣܩܳܐ ܠܪܰܘܡܳܐ ܕܰܫܡܰܝܳܐ.
ܘܗܺܝ ܝܳܗܒܳܐ ܨܠܽܘܬܳܐ ܕܟܺܝܬܳܐ܆ ܘܫܰܗܪܳܐ ܕܰܟܝܳܐ ܘܥܺܝܪܽܘܬܳܐ.
ܘܗܺܝ ܩܰܢܝܳܐ ܚܰܫ̈ܶܐ ܘܕܶܡ̈ܥܶܐ܆ ܘܳܐܦ ܦܽܘܪܫܳܢܳܐ ܕܒܳܥ̈ܘܳܬܳܐ.
ܗܺܝ ܡܨܰܠܝܳܐ ܥܰܠ ܚܰܛܳܝ̈ܶܐ܆ ܕܢܶܦܢܽܘܢ ܘܢܶܗܘܽܘܢ ܬܰܝܳܒ̈ܶܐ.
ܗܺܝ ܒܳܥܝܳܐ ܥܰܠ ܬܰܝܳܒ̈ܶܐ܆ ܕܢܶܪܒܽܘܢ ܢܶܗܘܽܘܢ ܙܰܕܺܝ̈ܩܶܐ.
ܘܥܰܠ ܙܰܕܺܝ̈ܩܶܐ ܡܶܬܟܰܫܦܳܐ܆ ܕܰܒܚܽܘܒܳܐ ܓܡܺܝܪܳܐ ܢܶܗܘܽܘܢ.
ܘܰܡܦܺܝܣܳܐ ܐܳܦ ܥܰܠ ܓܡܺܝܪ̈ܶܐ܆ ܕܰܢܩܰܕܽܘܢ ܠܰܟܠܺܝ̈ܠܰܝܗܽܘܢ.
ܪܰܒܳܐ ܗ̱ܝ ܣܰܓܺܝ ܒܰܫܪܳܪܳܐ܆ ܘܰܡܥܰܠܝܳܐ ܡܰܟܺܝܼܟܽܘܬܳܐ.
ܛܽܘܒ ܠܰܐܝܢܳܐ ܕܰܐܣܓܺܝ ܪܰܚܡܳܗ̇܆ ܘܰܪܗܶܛ ܒܳܬܪܳܗ̇ ܘܺܝܪܶܒ ܒܳܗ̇.
ܟܽܠ ܛܳܒ̈ܳܬܳܐ ܫܟܺܝ̈ܚܳܢ ܒܳܗ̇܆ ܘܟܽܠ ܣܰܢ̈ܝܳܬܳܐ ܠܒܰܪ ܡܶܢܳܗ̇.
ܥܽܘܬܪ̈ܶܐ ܘܓܰܙ̈ܶܐ ܪ̈ܽܘܚܳܢܶܐ܆ ܟܽܠܗܽܘܢ ܒܳܗ̇ ܗ̱ܝ ܡܶܫܬܰܟܚܺܝܢ.
ܚܫܽܘܒ ܘܰܡܢܺܝ ܐܶܢ ܡܶܫܟܰܚ ܐܰܢ̱ܬ܆ ܕܗܳܐ ܟܽܠܗܽܘܢ ܒܡܰܟܺܝܼܟܽܘܬܳܐ.
ܘܚܽܘܪ ܒܩܰܕܡܳܝ̈ܶܐ ܘܰܐ̱ܚܪ̈ܳܝܶܐ܆ ܘܰܒܡܶܨܥܳܝ̈ܶܐ ܕܶܐܬܢܰܨܰܚܘ.
ܘܶܐܢ ܗܽܘ ܕܬܶܡܢܶܐ ܡܶܫܟܰܚ ܐܰܢ̱ܬ܆ ܕܒܳܗ̇ ܐܶܬܟܰܠܰܠܘ ܘܶܐܬܢܰܨܰܚܘ.
ܒܗܳܠܶܝܢ ܟܽܠܗܶܝܢ ܐܶܬܟܰܘܢ܆ ܐܳܘ ܬܰܠܡܺܝܕܳܐ ܕܰܡܫܺܝܚܳܐ.
ܘܰܕܚܽܘܩ ܟܽܠܗܶܝܢ ܪ̈ܳܡܳܬܳܐ܆ ܘܰܓܒܺܝ ܠܳܟ ܡܰܟܺܝܼܟܽܘܬܳܐ.
ܘܰܕܫܰܐܶܠܬܳܢܝ ܬܰܠܡܺܝܕܳܐ܆ ܕܶܐܟܬܽܘܒ ܠܳܟ ܥܰܠ ܐܰܓܽܘܢܳܟ.
ܕܒܰܐܝܢܳܐ ܙܰܝܢܳܐ ܙܳܟ̥ܶܐ ܐܰܢ̱ܬ܆ ܠܒܺܝܫܳܐ ܕܚܳܣܶܡ ܒܰܐܓܽܘܢܳܟ.
ܦܶܬܚܶܬ̥ ܬܰܪܥܳܐ ܠܫܶܐܠܴ̈ܬܳܟ܆ ܘܰܚܕܺܝܬ̥ ܣܰܓܺܝ ܒܛܳܒ̈ܳܬܳܟ.
ܕܰܚܙܺܝܬ̥ ܕܰܚܦܺܝܛ ܪܶܥܝܳܢܳܟ܆ ܥܰܠ ܙܳܟܽܘܬܳܐ ܕܰܩܢܽܘܡܳܟ.
ܘܥܶܠܶܬ̥ ܐܶܢܳܐ ܠܒܶܝܬ ܕܺܝܢܳܐ܆ ܕܙܰܟܳܝ̈ܶܐ ܘܶܐܬܒܰܩܺܝܬ̥ ܒܶܗ.
ܕܰܐܝܢܳܐ ܡܶܢ ܡܳܐܢܰܝ̈ ܙܰܝܢܳܐ܆ ܡܙܰܟܶܐ ܠܰܐܝܢܳܐ ܕܠܳܒܶܫ ܠܶܗ.
ܘܰܚܙܺܝܬ̥ ܕܣܰܓܺܝܐܝܢ ܐܶܢܽܘܢ܆ ܡܳܐܢܰܝ̈ ܙܰܝܢܳܐ ܕܰܐܓܽܘܢܳܐ.
ܘܚܰܕ ܚܰܕ ܡܶܢܗܽܘܢ ܒܰܩܪܳܒܳܐ܆ ܪܰܒܳܐ ܗ̱ܝ ܣܰܓܺܝ ܙܳܟܽܘܬܶܗ.
ܩܰܕܡܳܝܳܐ ܨܰܘܡܳܐ ܕܰܟܝܳܐ܆ ܣܰܝܦܳܐ ܕܡܶܡܬ̥ܽܘܡ ܠܳܐ ܩܳܗܶܐ.
ܒܳܬܪܶܗ ܐܺܝܬܶܝܗ̇ ܒܬܽܘܠܽܘܬܳܐ܆ ܘܕܰܟܝܽܘܬܳܐ ܘܩܰܕܺܝܫܽܘܬܳܐ.
ܩܶܫܬܳܐ ܕܓܶܐܪ̈ܶܝܗ̇ ܚܰܪܺܝܩܺܝܢ[1]܆ ܘܰܒܠܶܒܶܗ ܕܒܺܝܫܳܐ ܡܳܚܶܝܢ.
ܒܳܬܰܪ ܗܳܠܶܝܢ ܡܣܰܪܩܽܘܬܳܐ܆ ܕܫܳܝܛܳܐ ܠܟܶܣܦܳܐ ܘܩܶܢܝܳܢ̈ܶܐ.
ܡܓܶܢܳܐ ܕܟܳܠܝܳܐ ܡܶܢ ܠܶܒܳܐ܆ ܓܶܐܪ̈ܶܐ ܫܢܺܝ̈ܢܶܐ ܕܣܳܛܳܢܳܐ.
ܚܙܺܝܬ̥ ܬܽܘܒ ܐܰܝܟ ܣܰܟܪܳܐ ܕܪܽܘܡܚܳܐ܆ ܕܙܳܐܰܥ ܡܶܢܗܽܘܢ ܣܳܛܳܢܳܐ.
ܚܙܺܝܬ̥ ܫܰܗܪܳܐ ܐܰܝܟ ܫܶܪܝܳܢܳܐ܆ ܘܰܨܠܽܘܬܳܐ ܐܰܝܟ ܬܰܠܒܶܫܬܳܐ.
ܘܥܰܡ̈ܠܶܐ ܬܽܘܒ ܕܙܰܕܺܝܩܽܘܬܳܐ܆ ܪܟ̥ܽܘܒܳܐ ܕܩܰܠܺܝܠ ܒܰܩܪܳܒܳܐ.
ܘܟܰܕ ܒܗܳܠܶܝܢ ܡܶܬܒܰܩܶܐ ܗ̱ܘܺܝܬ̥܆ ܕܰܐܝܢܳܐ ܚܰܣܺܝܢ ܡܶܢ ܚܰܒܪܶܗ.
ܚܙܺܝܬ̥ ܫܽܘܪܳܗ̇ ܕܡܰܟܺܝܼܟܽܘܬܳܐ܆ ܕܛܳܒ ܚܰܣܺܝܢ ܝܰܬܺܝܪ ܡܶܢ ܟܽܠ.
ܕܠܳܐ ܡܨܶܐ ܙܰܝܢܳܐ ܬܳܪܰܥ ܠܶܗ܆ ܘܠܳܐ ܒܺܝܫܳܐ ܡܨܶܐ ܥܳܐܶܠ ܠܶܗ.
ܫܶܒܩܶܬ̥ ܗܳܠܶܝܢ ܕܬܰܢܺܝܬ̥ ܠܳܟ܆ ܘܟܶܬܒܶܬ̥ ܠܳܟ ܗܳܢܳܐ ܒܰܠܚܽܘܕ.
ܐܶܢܗܽܘ ܕܬܶܙܟܶܐ ܒܳܥܶܐ ܐܰܢ̱ܬ܆ ܒܰܐܓܽܘܢܳܐ ܕܩܳܐܶܡ ܐܰܢ̱ܬ ܒܶܗ.
ܠܓܰܘ ܫܽܘܪܳܐ ܕܡܰܟܺܝܼܟܽܘܬܳܐ܆ ܥܽܘܠ ܐܶܬܓܰܘܣ ܘܶܐܣܬܰܬܰܪ.
ܠܳܐ ܬܰܪܦܶܐ ܚܶܣܢܳܐ ܗܳܢܳܐ܆ ܕܰܠܡܳܐ ܢܶܫܒܶܝܟ ܣܳܛܳܢܳܐ.
ܘܠܳܐ ܬܶܗܘܶܐ ܬܟܺܝܠ ܥܰܠ ܙܰܝܢܳܟ܆ ܕܠܳܐ ܢܶܡܚܶܝܟ ܒܺܝܫܳܐ ܒܙܰܝܢܶܗ.
ܗܳܢܳܐ ܙܰܝܢܳܐ ܕܫܰܕܪܶܬ̥ ܠܳܟ܆ ܡܶܢ ܒܶܝܬ ܙܰܝܢܳܐ ܕܙܰܟܳܝ̈ܶܐ.
ܕܡܶܢ ܟܽܠܗܽܘܢ ܡܳܐܢܰܝ̈ ܙܰܝܢܳܐ܆ ܚܰܣܺܝܢ ܗ̱ܘ̣ ܠܽܘܩܒܰܠ ܒܺܝܫܳܐ.
ܡܳܪܳܐ ܕܙܰܟܳܝ̈ܶܐ ܚܰܫܠܶܗ܆ ܘܒܶܗ ܐܶܬܢܰܨܰܚܘ ܙܰܟܳܝ̈ܶܐ.
ܘܒܶܗ ܗܽܘ ܙܰܝܢܳܐ ܕܚܳܫܽܘܠܶܗ܆ ܛܽܘܒ ܠܰܐܝܢܳܐ ܕܶܐܬܟܰܬܰܫ ܒܶܗ.
ܡܳܪܰܢ ܕܰܠܒܶܫ ܡܽܘܟܳܟ̥ܳܐ܆ ܡܰܠܶܦ ܠܰܢ ܡܰܟܺܝܼܟܽܘܬܳܐ.
ܢܶܬܶܠ ܠܰܢ ܕܰܒܡܽܘܟܳܟ̥ܶܗ܆ ܢܶܙܟܶܐ ܠܒܺܝܼܫܳܐ ܘܰܠܚܰܝܠܶܗ.
ܕܡܳܪܰܢ ܗ̱ܝ ܡܰܟܺܝܼܟܽܘܬܳܐ܆ ܫܡܰܥ ܘܺܝܠܰܦ ܐܳܘ ܬܰܠܡܺܝܕܳܐ.
ܕܠܳܐ ܬܶܛܥܶܐ ܘܬܰܣܒܰܪ ܕܺܐܝܬܰܝܟ܆ ܡܰܟܺܝܟܳܐ ܟܰܕ ܠܳܐ ܐܺܝܬܰܝܟ.
ܒܫܶܠܝܳܐ ܐܰܚܽܘܕ ܣܶܦ̈ܘܳܬܳܟ܆ ܡܶܢ ܡܰܡܠܠܐ ܕܝܰܬܺܝܪ̈ܳܬܳܐ.
ܘܠܳܐ ܬܺܐܡܰܪ ܡܶܠܬܳܐ ܒܺܝܫܬܳܐ܆ ܠܰܐܝܢܳܐ ܕܣܳܢܶܐ ܘܣܳܩܰܪ ܠܳܟ.
ܫܡܰܥ ܘܰܥܒܶܕ ܠܶܒܳܐ ܛܳܒܳܐ܆ ܠܡܰܢ ܕܩܰܫܺܝܫ ܒܰܫ̈ܢܶܐ ܡܶܢܳܟ.
ܘܰܥܨܺܝ ܟܽܠܫܳܥ ܨܶܒܝܳܢܳܟ܆ ܘܰܥܒܶܕ ܨܶܒܝܳܢܳܐ ܕܰܐܚܰܝ̈ܟ.
ܡܶܢ ܟܰܪܣܳܐ ܒܨܽܘܪ ܡܶܐܟܽܘܠܬܳܐ܆ ܘܡܶܢ ܫܶܢܬܳܐ ܦܣܽܘܩ ܪܰܦܝܽܘܬܳܐ.
ܘܰܗܘܺܝ ܦܳܥܠܳܐ ܟܰܫܺܝܪܳܐ܆ ܒܰܨܠܽܘܬܳܐ ܘܰܒܬܶܫܡܶܫܬܳܐ.
ܘܰܒܗܳܠܶܝܢ ܟܽܠܗܶܝܢ ܝܺܨܰܦ܆ ܘܰܩܢܺܝ ܠܳܟ ܡܰܟܺܝܼܟܽܘܬܳܐ.
ܕܒܳܗ̇ ܡܶܬܚܰܣܶܝܬ̊ ܡܶܢ ܚܰܘ̈ܒܰܝܟ܆ ܘܡܶܬܚܰܣܟܰܬ̊ ܡܶܢ ܒܽܘܨܳܪ̈ܰܝܟ.
ܘܡܶܬܩܰܪܒܰܬ̊ ܨܶܝܕ ܐܰܠܳܗܳܐ܆ ܘܚܳܕܶܐ ܒܳܟ ܘܰܡܩܰܒܶܠ ܠܳܟ.
ܘܗܳܘܶܝܬ̊ ܡܳܐܢܳܐ ܕܺܐܝܩܳܪܳܐ܆ ܠܬܶܫܡܶܫܬܳܐ ܕܡܳܪܝܳܐ ܡܳܪܳܟ.
ܫܽܘܒܚܳܐ ܠܪܳܡܳܐ ܕܶܐܬ̊ܬܰܚܬܺܝ܆ ܘܰܐܠܶܦ ܠܰܢ ܡܰܟܺܝܼܟܽܘܬܳܐ.
ܘܝܰܗܒ ܠܰܢ ܪܽܘܚܶܗ ܕܰܢܡܰܠܶܠ܆ ܥܰܠ ܥܽܘܬܪܳܐ ܕܡܰܟܺܝܼܟܽܘܬܳܐ.
ܒܪܺܝܟ ܐܰܒܳܐ ܕܫܰܠܚܳܟ ܨܶܐܕܰܝܢ܆ ܫܽܘܒܚܳܐ ܠܚܰܝܠܶܗ ܕܰܦܪܰܩ ܠܰܢ.
ܘܰܠܪܽܘܚܩܽܘܕܫܳܐ ܬܰܘܕܺܝܬܳܐ܆ ܕܡܰܠܶܠ ܒܰܢ ܥܰܠ ܡܽܘܟܳܟܳܐ.
ܠܦܽܘܡܳܐ ܕܡܰܠܶܠ ܚܽܘܣܳܝܳܐ܆ ܘܠܺܐܝ̈ܕܶܐ ܕܰܟܬܰܒ̈ܝ ܫܽܘܼܒܩܳܢܳܐ.
ܠܩܳܪ̈ܽܘܝܶܐ ܘܰܠܫܳܡܽܘ̈ܥܶܐ܆ ܚܢܳܢܳܐ ܘܪ̈ܰܚܡܶܐ ܒܶܝܬ ܕܺܝܢܳܐ.
ܠܬܰܠܡܺܝܕܳܐ ܕܰܗܘܳܐ ܥܶܠܬܳܐ܆ ܠܡܺܐܡܪܳܐ ܗܳܢܳܐ ܕܢܶܬܡܰܠܰܠ.
ܢܶܬܶܠ ܡܳܪܰܢ ܙܳܟܽܘܬܳܐ܆ ܘܰܟܠܺܝܠܳܐ ܕܙܰܕܺܝܩܽܘܬܳܐ.
ܘܰܐܝܢܳܐ ܕܩܳܪܶܐ ܘܰܡܨܰܠܶܐ܆ ܥܰܠ ܕܳܘܝܳܐ ܒܨܺܝܪܳܐ ܕܶܐܡܰܪ.
ܨܠܽܘܬܶܗ ܠܪܰܘܡܳܐ ܬܶܬܥܰܠܶܐ܆ ܘܒܶܝܬ ܡܰܠܟܽܘܬܳܐ ܬܶܬܩܰܒܰܠ.
ܠܳܟ ܬܶܫܒܽܘܚܬܳܐ ܐܰܠܳܗܳܐ܆ ܟܡܳܐ ܪܳܚܡܰܬ̊ ܠܰܕܪܳܚܶܡ ܠܳܟ܀
ܢܽܘܼܗܳܪܳܐ: ܠܩܺܝܼܛ ܡܺܐܡܪܳܐ ܗܳܢܳܐ ܡܶܢ ܟܬܳܒܳܐ ܕ Borg. Sir.128 ܒܝܕ ܡܰܠܦܳܢܳܐ ܥܺܝܼܣܰܐ ܕܶܡܺܝܼܪ ܗܳܢܳܐ ܕܚܳܝܶܐ ܒܐܰܘܣܛܽܘܼܪܝܳܐ. ܬܰܘܕܺܝ ܣܰܓܺܝ ܠܡܶܫܬܰܘܬܦܳܢܽܘܼܬܐ ܕܡܰܕܥܶܗ ܦܳܪܽܘܿܫܳܐ ܘܰܛܢܳܢܶܗ ܠܶܫܳܢܳܝܳܐ ܘܥܰܡܠܶܗ ܣܳܦܪܽܘܼܬܳܢܳܝܐ.
ܦܳܪܽܘܿܣܳܐ ܝܰܘܣܶܦ ܒܶܓܬܰܫ
[1] ܚܰܪܺܝܦܺܝܢ
You can also send us an email to karyohliso@gmail.com
Leave a Comment