ܕܡܳܢܳܐ ܐܺܝܬܰܘܗܝ ܫܪܳܪܳܐ. ܘܡܳܢܳܐ ܐܺܝܬܶܝܗ̇ ܕܰܓܳܠܽܘܬܳܐ

ܕܡܳܢܳܐ ܘܳܠܶܐ ܠܒܰܪܢܳܫܳܐ ܠܡܶܕܰܥ ܘܰܕܢܺܐܠܰܦ. ܗܳܢܰܘ ܕܶܝܢ ܕܰܢܥܰܩܶܒ ܚܰܬ̊ܺܝܬ̥ܳܐܝܬ̥ ܥܰܠ ܫܪܳܪܳܐ. ܘܢܶܦܪܫܺܝܘܗܝ ܡܶܢ ܕܰܓܳܠܽܘܬܳܐ. ܘܕܰܐܝܟܰܢ ܡܶܬ̥ܺܝܕܰܥ ܫܪܳܪܳܐ ܚܰܬ̊ܺܝܬ̥ܳܐܝܬ̥. ܕܺܐܝܬܰܘܗܝ ܫܰܦܝܽܘܬ̥ܳܗ̇ ܕܢܰܦܫܳܐ ܕܒܳܗ̇ ܚܳܝܪܳܐ ܒܰܟܝܳܢܳܐ ܚܰܬ̊ܺܝܬ̥ܳܐܝܬ̥. ܘܡܶܫܟܚܳܐ ܠܰܫܪܳܪܳܐ. ܢܺܐܡܰܪ ܗܳܫܳܐ ܕܡܳܢܳܐ ܐܺܝܬܰܘܗܝ ܗܽܘ ܫܪܳܪܳܐ. ܘܡܳܢܳܐ ܐܺܝܬܶܝܗ̇ ܕܰܓܳܠܽܘܬܳܐ.

ܘܳܐܡܪܺܝܢܰܢ: ܕܰܫܪܳܪܳܐ ܐܺܝܬܰܘܗܝ ܡܶܕܶܡ ܕܺܐܝܬܰܘܗܝ. ܘܕܰܓܳܠܽܘܬܳܐ ܐܺܝܬܶܝܗ̇ ܡܶܕܶܡ ܕܠܰܝܬܰܘܗܝ. ܘܰܫܪܳܪܳܐ ܩܳܐܶܡ ܠܢܰܦܫܶܗ. ܘܰܡܫܰܪܰܪ ܗܽܘ ܥܠܰܘܗܝ ܒܗܳܝ ܕܺܐܝܬܰܘܗܝ. ܕܰܓܳܠܽܘܬܳܐ ܕܶܝܢ ܠܳܐ ܩܳܝܡܳܐ ܠܢܰܦܫܳܗ̇ ܒܗܳܝ ܕܠܰܝܬܶܝܗ̇. ܘܰܐܟܙܢܳܐ ܕܚܶܫܟܳܐ ܓܠܺܝܙܽܘܬܶܗ ܕܢܽܘܗܪܳܐ ܐܺܝܬܰܘܗܝ. ܘܒܺܝܫܬܳܐ ܓܠܺܝܙܽܘܬܳܗ̇ ܕܛܳܒܬܳܐ. ܗܳܟܘܳܬ̥ ܘܕܰܓܳܠܽܘܬܳܐ ܓܠܺܝܙܽܘܬ̥ܶܗ ܕܰܫܪܳܪܳܐ. ܘܢܽܘܗܪܳܐ ܘܛܳܒܬܳܐ ܐܺܝܬܰܝܗܽܘܢ. ܚܶܫܟܳܐ ܕܶܝܢ ܘܒܺܝܫܬܳܐ ܠܰܝܬ ܐܶܢܽܘܢ. ܐܶܠܳܐ ܓܠܺܝܙܽܘܬܳܐ ܕܗܳܠܶܝܢ ܡܶܬ̥ܰܐܡܪܺܝܢ. ܫܪܳܪܳܐ ܕܶܝܢ ܝܰܬܺܝܪ ܚܰܝܠܬ̥ܳܢ ܡܶܢ ܗܳܠܶܝܢ. ܒܗܳܝ ܕܺܐܝܬܰܘܗܝ ܐܰܡܺܝܢܳܐܝܬ̥ ܘܩܳܐܶܡ ܠܢܰܦܫܶܗ. ܘܰܐܝܟܳܐ ܕܰܫܪܳܪܳܐ ܐܺܝܬ ܐܰܡܺܝܢܳܐܝܬ̥܆ ܕܰܓܳܠܽܘܬܳܐ ܣܳܟ ܠܳܐ ܡܰܨܝܳܐ ܕܬܶܗܘܶܐ ܐܺܝܬܶܝܗ̇. ܒܗܳܝ ܕܠܰܝܬ ܐܶܡܰܬܝ ܕܠܰܝܬ ܫܪܳܪܳܐ. ܗܳܐ ܐܶܬܚܰܘܝܰܬ̥ ܕܣܳܟ ܟܽܘܠܳܢܳܐܝܬ̥ ܠܰܝܬ ܕܰܓܳܠܽܘܬܳܐ. ܘܫܰܪܺܝܪܳܐ ܐܺܝܬ ܚܰܬ̊ܺܝܬ̥ܳܐܝܬ̥. ܘܗܳܢܰܘ ܕܽܘܡܳܪܳܐ. ܕܰܐܝܟܰܢ ܡܶܕܶܡ ܕܠܰܝܬܰܘܗܝ ܣܳܟ. ܗܳܘܶܐ ܡܶܬ̥ܶܐܡܰܪ ܘܺܐܝܬ ܠܶܗ ܫܡܳܐ. ܗܳܢܳܐ ܕܶܝܢ ܗܳܘܶܐ ܠܘܳܬ ܡܰܢ ܕܰܓܠܺܝܙ ܡܶܢ ܫܪܳܪܳܐ. ܘܶܐܢ ܠܳܐ ܥܳܣܩܳܐ ܗ̱ܘܳܬ̥ ܡܶܠܬܳܐ ܥܰܠ ܫܳܡܽܘ̈ܥܶܐ. ܐܳܡܰܪ ܗ̱ܘܺܝܬ̥ ܕܣܽܘܓܶܐܗ ܕܥܳܠܡܳܐ ܠܒܰܪ ܡܶܢ ܫܪܳܪܳܐ ܐܺܝܬܰܝܗܽܘܢ. ܘܰܕܠܺܝ̈ܠܶܐ ܐܶܢܽܘܢ ܕܶܐܫܟܰܚܘ ܠܰܫܪܳܪܳܐ. ܘܰܐܝܠܶܝܢ ܕܶܐܫܟܰܚܘ ܠܰܫܪܳܪܳܐ ܒܶܗ ܐܶܬܚܰܝܰܕܘ ܘܶܐܬܢܰܗܰܪܘ. ܘܰܐܡܠܶܟܘ ܒܰܐܪܥܳܐ ܘܒܰܫܡܰܝܳܐ. ܘܣܳܟ ܒܥܶܠܕܒܳܒܳܐ ܠܰܝܬ ܠܶܗ. ܘܠܳܐ ܣܰܩܽܘܒܠܳܐ ܘܠܳܐ ܣܳܢܳܐܐ ܘܠܳܐ ܥܽܘܟܳܪܳܐ. ܒܗܳܝ ܕܕܰܓܳܠܽܘܬܳܐ ܠܳܐ ܓܢܰܒܬ̥ܶܗ ܘܠܳܐ ܫܶܠܛܰܬ̥ ܒܶܗ. ܒܗܳܝ ܕܰܒܢܽܘܗܪܰܐ ܗ̱ܘ ܐܰܡܺܝܢܳܐܝܬ̥. ܘܗܳܢܳܐ ܐܶܬ̊ܕܰܡܺܝ ܠܒܳܪܽܘܝܶܗ ܘܫܰܪܰܪ ܠܰܒܪܺܝܬܶܗ ܘܰܠܡܶܠܬܳܐ ܗܳܝ ܕܰܐܡܺܝܪܳܐ. ܕܰܒܨܰܠܡܶܗ ܕܒܳܪܽܘܝܳܐ ܐܺܝܬܰܘܗܝ ܒܰܪܝܳܐ. ܘܗܳܢܳܐ ܐ̱ܪܳܙܳܐ ܪܰܒ ܗ̱ܘ̣. ܘܗܳܫܳܐ ܠܳܐ ܡܰܨܝܳܐ ܕܢܶܬܦܰܫܰܩ. ܒܗܳܝ ܕܫܽܘܪܳܝܶܗ ܕܰܟܬܳܒܳܐ ܕܳܡܶܐ ܠܚܰܠܒܳܐ ܕܝܰܠܽܘ̈ܕܶܐ. ܘܰܟܡܳܐ ܕܡܶܬܥܰܠܰܡ ܝܰܠܽܘܕܳܐ܆ ܐܳܦ ܡܶܐܟ̈ܠܳܬ̥ܶܗ. ܥܕܰܡܳܐ ܕܗܳܘܶܐ ܓܡܺܝܪܳܐ ܒܩܰܘܡܬܳܐ ܡܫܰܡܠܰܝܬܳܐ ܕܟܽܠ ܐܳܕ̈ܫܺܝܢ.

ܕܰܐܝܟܰܢܳܐ ܕܶܝܢ ܡܶܬ̥ܺܝܕܰܥ ܫܪܳܪܳܐ ܐܶܡܰܪܢܰܢ ܘܡܶܬ̥ܶܐܡܰܪ. ܐܰܝܢܳܝܽܘܬ̥ܶܗ ܕܶܝܢ ܕܰܫܪܳܪܳܐ ܠܳܐ ܡܰܨܝܳܐ ܕܡܶܢ ܫܶܡܥܳܐ ܕܡܶܠܬܳܐ ܘܡܶܢ ܩܶܪܝܳܢܳܐ ܕܰܟܬܳܒܳܐ ܢܶܬܺܝܕܰܥ. ܐܶܠܳܐ ܗܽܘ ܗܰܘ ܕܶܐܫܟܚܶܗ ܠܰܫܪܳܪܳܐ ܘܝܰܕܥܶܗ. ܡܶܢ ܗܳܠܶܝܢ ܐܳܬܘ̈ܳܬܳܐ ܡܰܚܶܒ ܘܡܰܐܛܶܒ ܠܟܽܠܗܽܘܢ ܒܢܰܝ̈ܢܳܫܳܐ. ܡܥܰܠܰܝ ܡܶܢ ܚܰܫ̈ܶܐ ܣܢܰܝ̈ܳܐ. ܟܽܠܶܗ ܫܽܘܠܛܳܢܶܗ ܕܗܳܢ ܥܳܠܡܳܐ. ܘܫܽܘܒܚܶܗ ܘܩܢܝܘܬܗ ܐܰܝܟ ܠܐ ܡܕܡ ܚܫܺܝ̈ܒܳܢ ܠܶܗ. ܟܽܠܗܶܝܢ ܟܰܣ̈ܝܳܬܳܐ ܓܰܠ̈ܝܳܢ ܠܶܗ. ܚܰܝܠܳܐ ܘܡܰܥܒܕܳܢܽܘܬܳܐ. ܘܐ̱ܪܳܙܳܐ ܟܰܣܝܳܐ ܕܰܛܡܺܝܪ ܒܟܽܠܡܕܡ ܕܺܐܝܬ ܒܰܐܪܥܳܐ ܝܳܕܰܥ. ܟܽܠܡܕܡ ܡܶܫܬܡܰܥ ܠܨܶܒܝܳܢܶܗ ܘܦܽܘܩܕܳܢܶܗ. ܡܠܺܝ̈ܠܶܐ ܘܰܡܢܰܦ̈ܫܶܐ ܘܠܳܐ ܡܢܰܦ̈ܫܶܐ. ܘܶܐܣܛܽܘܟ̈ܣܶܐ ܘܟܽܠ ܕܡܶܢܗܽܘܢ. ܒܗܳܝ ܕܚܳܙܶܝܢ ܒܶܗ ܨܰܠܡܳܐ ܫܰܪܺܝܪܳܐ ܕܒܳܪܽܘܝܶܗ ܕܰܫܦܶܐ ܘܫܰܦܺܝܪ ܘܠܳܐ ܡܶܫܬܰܚܠܰܦ. ܗܰܘ ܕܶܝܢ ܕܠܳܐ ܡܛܳܐ ܠܗܳܟܰܢ ܘܠܳܐ ܪܓܺܝܫ ܒܗܳܠܶܝܢ܆ ܕܰܓܳܠܽܘܬܳܐ ܢܳܨܝܳܐ ܥܰܡܶܗ. ܘܚܶܫܟܳܐ ܡܥܰܪܙܰܠ ܒܗ ܘܒܝܫܘܬܐ. ܚܰܫ̈ܶܐ ܓܰܢܳܒ̈ܶܐ ܘܓܶܕ̈ܫܳܢܳܝܶܐ ܕܥܰܠ ܟܽܠ ܟܝܳܢܳܐ ܫܰܦܝܳܐ ܘܫܰܦܺܝܪܳܐ. ܡܳܕܶܝܢ ܐܰܚܰܝ̈ ܚܰܒܺܝ̈ܒܶܐ܇ ܕܗܳܠܶܝܢ ܕܗܳܟܰܢܳܐ ܐܺܝܬܰܝܗܶܝܢ. ܘܗܳܢܰܘ ܛܶܟܣܳܐ ܕܰܟܝܳܢܰܢ. ܘܡܶܢ ܗܳܝ ܫܰܦܝܽܘܬ̥ܳܐ ܕܟܺܝܬܳܐ ܘܛܳܒܽܘܬܳܐ ܪܰܒܬܳܐ ܐܺܝܬܰܘܗܝ ܛܽܘܗܡܰܢ. ܘܬܽܘܒ ܡܰܨܝܳܐ ܠܰܢ ܘܰܦܫܺܝܩ ܥܠܰܝܢ ܕܰܠܬܰܡܳܢ ܢܶܬܥܰܠܶܐ ܐܶܢ ܨܳܒܶܝܢܰܢ. ܒܺܝܫܬܳܐ ܗܝ ܒܝܳܬ̥ܳܐ ܘܰܐܒܕܳܢܳܐ ܓܡܺܝܪܳܐ ܐܶܢ ܡܰܗܡܶܝܢܰܢ ܡܶܢ ܛܳܒܬܳܐ ܗܳܕܶܐ ܪܰܒܬܳܐ ܘܠܳܐ ܡܶܣܬܰܝܟܳܢܺܝܬܳܐ ܕܰܫܟܺܝܚܳܐ ܒܰܟܝܳܢܰܢ. ܘܰܠܒܺܝܟ̥ܺܝܢܰܢ ܕܰܓܳܠܽܘܬܳܐ ܓܰܢܳܒܬܳܐ ܕܠܰܝܬܶܝܗ̇ ܣܳܟ ܘܠܳܐ ܫܟܺܝܚܳܐ ܒܰܟܝܳܢܰܢ. ܘܰܒܗܳܠܶܝܢ ܐܶܬܚܰܬܰܡ ܪܺܝܫܳܐ ܗܳܢܳܐ ܕܰܬܠܳܬܳܐ ܒܝܰܕ ܐܰܠܳܗܳܐ ܕܰܡܚܰܟܶܡ܀

ܡܰܒܘܿܥܳܐ ܕܟܬܺܝܼܒܬܐ:  Go to link.

ܢܽܘܼܗܳܪܳܐ: ܟܬܺܝܼܒܬܳܐ ܗܳܕܶܐ ܫܟܺܝܼܚܳܐ ܒܰܟܬܳܒܳܐ ܚܰܕ ܕܰܛܥܺܝܼܢ ܫܶܡ «ܥܶܠܬܳܐ ܕܟܽܠ ܥܶܠ̈ܠܳܢ. ܟܬܳܒܳܐ ܓܰܘܳܢܳܝܳܐ ܠܟܽܠ ܥܰܡ̈ܡܺܝܼܢ ܕܰܬܚܶܝܬ ܫܡܰܝܳܐ».  ܘܰܢܛܺܝܼܪ ܒܒܶܝܬ ܐܰܪ̈ܟܶܐ ܕܥܺܕܬܐ ܕܐܰܪܒܥܺܝܢ ܣܳܗ̈ܕܶܐ ܕܡܰܪܕܺܝܢ. ܘܰܢܣܺܝܟ ܒܝܰܕ ܕܰܝܪܳܝܳܐ ܓܰܒܪܐܝܼܠ ܣܒܺܝܼܪܝܼܢܳܝܳܐ ܒܰܫܢܰܬ ܐܰܠܦܳܐ ܘܰܫܒܰܥ̈ܡܳܐܐ ܘܰܬܡܳܢܺܝܢ ܘܚܰܡܶܫ ܕܝܰܘ̈ܢܳܝܶܐ (ܕܡܰܘܠܳܕܳܐ 1474) ܒܥܽܘܼܡܪܳܐ ܕܒܶܝܬ ܡܳܪܝ ܫܶܡܥܽܘܢ ܘܡܳܪܝ ܫܡܽܘܐܝܼܠ ܘܡܳܪܝ ܓܰܒܪܐܝܼܠ ܒܝܰܘ̈ܡܰܝ ܡܳܪܝ ܝܘܼܚܰܢܳܢ ܐܶܦܶܣܩܺܘܼܦܳܐ ܕܺܝܼܠܶܗ ܕܥܽܘܼܡܪܳܐ. 

ܘܰܟܬܺܝܼܒܬܳܐ ܗܳܕܶܐ ܠܩܺܝܛܳܐ ܡܼܶܢ ܐܰܣܳܪܳܐ ܕܢܰܘܠܐ ܕܰܠܥܶܠ ܒܝܰܕ ܡܝܰܩܪܳܐ ܡܰܠܦܳܢܳܐ ܥܺܝܼܣܰܐ ܡܽܘܼܣܰܐ ܕܶܡܺܝܪ ܗܳܢܳܐ ܕܚܳܝܶܐ ܒܐܰܘܣܛܘܪܝܰܐ. ܬܰܘܕܺܝ ܣܰܓܺܝ ܠܐܟܺܝܼܦܘܼܬܶܗ ܘܰܒܛܝܼܠܘܼܬܶܗ ܠܶܫܳܢܳܝܬܐ.

ܦܳܪܘܿܣܳܐ ܝܰܘܣܶܦ ܒܶܓܬܰܫ