ܢܽܘܼܗܪܳܐ ܦܰܐܝܳܐ ܡܿܰܢ ܬܘܼܩܦܰܐ ܗ̱ܘ ܕܫܰܬܺܝܼܩ ܘܥܰܫܺܝܼܢ. ܘܒܰܪܢܳܫܳܐ ܢܰܗܺܝܼܪܳܐ ܗܿܰܘ ܗ̱ܘܼ ܕܕܰܠܺܝܼܩ ܒܢܽܘܼܗܪܳܐ ܠܐ ܡܶܣܬܰܕܩܳܢܳܐ ܕܰܫܪܳܪܳܐ ܪܰܒܳܐ. ܘܗܿܰܘ ܗ̱ܘܼ ܕܡܶܬܚܰܦܰܛ ܠܰܡܫܰܘܫܳܛܘܼ ܢܰܦܫܶܗ ܒܚܶܟܡܰܬ ܕܶܠܩܶܐ ܕܺܝܼܕܰܥܬܳܐ ܘܝܽܘܼܠܦܳܢܳܐ. ܘܡܶܢܶܗ ܘܠܶܗ ܝܳܨܦ ܘܦܳܠܰܚ ܘܟܳܪܶܒ ܘܬܳܢܶܐ ܠܡܰܢܗܳܪܘ ܚܶܫܘܼ̈ܟܳܬܐ ܡܶܛܽܠ ܥܠܰܠܬܳܐ ܛܳܒܬܳܐ ܟܰܕ ܠܳܚܶܫ ܫܰܝܢܳܐ ܒܗܺܝܼܠܐ ܘܦܳܪܶܣ ܒܣܳܡܳܐ ܘܬܽܘܼܟܠܳܢܳܐ. ܥܕܰܡܳܐ ܠܗܳܝ ܕܢܰܪܓܶܫ ܒܰܪܢܳܫܳܐ ܥܰܡܶܗ ܘܒܺܐܝܼܬܽܘܼܬܶܗ ܒܢܰܘܚܳܐ ܡܢܺܝܼܚܳܢܳܐ ܐܰܝܟ ܗܿܰܘ ܕܒܰܝܬܶܗ. ܘܢܳܬܦܳܐ ܚܰܘܪܳܐ ܐܽܘܼܪܚܳܐ ܕܒܳܗܿ ܦܳܪܶܣ ܢܰܗܺܝܼܪܳܐ ܢܽܘܼܗܪܶܗ ܒܶܠܥܳܕ ܣܘܼܟܳܝܳܐ ܘܚܽܘܒܳܐ ܩܨܺܝܼܨܳܐ ܘܐܶܢܳܢܳܝܳܐ. ܒܰܕ ܠܰܝܬ ܠܶܗ ܢܺܝܼܫܳܐ ܡܶܕܶܡ ܟܰܣܝܳܐ ܣܛܰܪ ܡܼܶܢ ܗܿܳܝ ܕܢܶܬܒܰܣܰܡ ܒܐܺܝܼܬܘܼܬܶܗ ܘܢܰܥܬܪ ܠܝܳܪܬܽܘܼܬܶܗ ܟܰܕ ܡܶܬܬܰܓܰܪ ܟܰܟܪ̈ܰܘܗܝ ܠܡܰܘܬܳܪܽܘܼ ܒܗܶܝܢ ܠܐܰܚܪ̈ܳܢܶܐ ܘܠܐܢܳܫܽܘܼܬܳܐ.
ܘܡܶܫܬܰܚܠܰܦ ܕܽܘܼܡܝܳܐ ܕܒܰܪܢܳܫܳܐ ܟܰܕ ܝܳܪܶܒ ܘܙܳܥܰܪ ܘܪܳܘܰܚ ܘܥܳܐܶܩ ܘܡܶܬܦܰܬܰܟ ܠܦܽܘܼܬ ܚܰܝܠܳܐ ܕܩܳܛܶܦ ܡܼܶܢ ܬܽܘܼܩܦܳܐ ܕܰܫܪܳܪܳܐ ܕܢܽܘܼܗܪܳܐ ܪܰܒܳܐ. ܘܰܒܣܽܘܼܟܳܠܐ ܗܳܢܳܐ ܠܰܝܬ ܐ̱ܢܳܫ ܕܕܳܡܶܐ ܠܐܚܪܺܢܳܐ. ܡܶܛܠܗܳܕܶܐ ܠܳܐ ܡܶܬܦܪܶܫ ܗܳܢܳܐ ܡܼܶܢ ܗܿܰܘ ܐܶܠܳܐ ܒܪܰܒܽܘܼܬ ܢܽܘܼܗܪܳܐ ܕܣܽܘܼܟܳܠܳܐ ܘܒܽܘܼܝܳܢܳܐ ܘܙܰܘ̈ܥܶܐ ܘܗܘܼ̈ܦܳܟܶܐ ܘܰܥܝ̈ܳܕܶܐ ܘܰܠܒܽܘܼܟܝܳܐ ܕܩܽܘܼܫܬܳܐ ܘܟܺܐܢܽܘܼܬܳܐ. ܘܠܳܐ ܡܶܬܝܕܰܥ ܗܳܢܳܐ ܡܼܶܢ ܗܿܰܘ ܐܶܠܐ ܒܫܽܘܼܦܪܳܐ ܕܨܶܡ̈ܚܶܐ ܟܢܺܝܼ̈ܟܶܐ ܘܡܰܟܺܝܼ̈ܟܶܐ ܕܕܺܝܼܠܳܝ̈ܳܬܐ ܡܝܰܩ̈ܢܳܢܝܳܬܐ ܕܰܠܒܝܼܫܳܐ ܒܛܺܝܼܠܽܘܼܬܗ ܡܰܘܬܪܳܢܺܝܼܬܐ ܕܢܰܗܺܝܼܪܳܐ. ܘܡܶܟܳܐ ܐܺܝܼܬ ܡܿܰܢ ܕܢܰܗܺܝܼܪ ܒܰܕܡܽܘܼܬ ܫܶܡܫܳܐ. ܐܰܟܡܰܢ ܕܢܽܘܼܗܪܳܐ ܙܠܺܝܼܚܳܐ ܥܛܺܝܼܦ ܥܳܠܡܶܗ ܓܰܘܳܝܳܐ. ܘܗܽܘܼ ܗܳܢܳܐ ܠܳܐ ܡܰܨܝܳܐ ܕܢܶܬܬܰܚܡ ܘܢܶܬܬܣܺܝܼܡ ܒܪ̈ܶܥܝܳܢܶܐ ܩܒܺܝܼ̈ܥܶܐ ܘܐܰܡܽܘܼ̈ܡܶܐ ܕܪ̈ܺܝܼܫܶܐ ܕܕܽܘܼܟܬܳܐ ܘܐܰܬܪܳܐ. ܕܨܳܡܰܚ ܓܶܝܪ ܢܽܘܼܗܪܶܗ ܦܰܐܝܳܐ ܒܪܽܘܼܚܳܐ ܕܪܶܥܝܳܢܶܗ ܘܥܶܢܝܳܢܶܗ ܘܰܒܪܽܘܼܚܳܐ ܕܕܽܘܼܒܳܪ̈ܰܘܗܝ ܒܰܙܢܳܐ ܠܳܐ ܥܝܳܕܳܝܳܐ. ܘܗܰܢܺܝ ܘܒܰܣܺܝܼܡ ܝܰܬܒܳܐ ܘܰܣܘܳܕܳܐ ܥܰܡܶܗ ܥܕܰܡܳܐ ܠܗܳܝ ܕܢܶܫܒܽܘܿܩ ܕܢܰܪܓܶܫ ܒܰܪܢܳܫܳܐ ܒܚܰܡܺܝܼܡܽܘܼܬܳܐ ܡܶܚܕܳܝܬܳܐ ܒܰܕܡܽܘܼܬ ܚܰܡܺܝܼܡܽܘܼܬܳܐ ܕܫܶܡܫܳܐ ܗܿܳܝ ܕܕܳܢܚܳܐ ܡܶܢܫܶܠܝ ܒܥܰܪܝܳܐ ܕܣܰܬܘܳܐ ܩܰܪܝܼܪܳܐ. ܘܚܰܢܺܝܼܢܳܐܝܬ ܡܰܢܗܰܪ ܘܡܰܚܶܡ ܠܪܽܘܼܚܳܐ ܕܡܶܬܩܰܪܒܳܢܳܐ ܘܡܶܬܥܰܢܝܳܢܳܐ. ܘܗܺܝܼ ܗܳܕܶܐ ܝܰܬܺܝܼܪ ܡܰܥܒܕܳܢܝܳܐ ܡܼܶܢ ܩܽܘܼܒܠܳܠܐ ܦܰܐܝܳܐ ܘܓܽܘܼ̈ܚܟܶܐ ܚܘܺܝܼ̈ܚܶܐ.
ܘܒܰܪܢܳܫܳܐ ܕܰܠܒܺܝܼܫ ܕܺܝܼܠܳܝ̈ܳܬܐ ܗܳܠܶܝܢ ܟܢܺܝܼܟܳܐܝܬ ܘܫܰܬܝܼܩܳܐܝܬ -ܒܳܗܿ ܒܰܕܡܽܘܼܬܳܐ ܕܫܳܡܪܳܝܳܐ ܛܳܒܳܐ- ܪܳܗܶܛ ܠܐܝܳܠܐ ܘܣܽܘܼܝܳܥܳܐ ܕܐܰܝܢܳܐ ܕܰܣܢܺܝܼܩ ܘܰܠܟܰܪ ܕܩܳܪܝܳܐ ܣܢܺܝܼܩܘܼܬܳܐ ܒܶܠܥܳܕ ܦܘܼܪܫܳܢܳܐ ܕܓܶܢܣܳܐ ܘܛܽܘܼܗܡܳܐ. ܘܦܳܪܶܣ ܢܽܘܼܗܪܳܐ ܒܛܶܠ̈ܳܠܐ ܚܶܫܘܼ̈ܟܶܐ ܕܪܽܘܼܚܳܐ ܘܡܰܕܥܳܐ. ܘܰܒܙܰܒܢܳܐ ܕܚܶܫܘܿܟܳܐ ܕܛܳܥܝܘܼܬܳܐ ܡܰܥܗܶܕ ܘܡܰܝܬܶܐ ܠܒܳܠܐ ܝܽܘܼܬܪܳܢܳܐ ܘܛܳܒܬܳܐ ܕܝܰܩܪ̈ܶܐ (Değerler / Vaules) ܡܝܰܬܪ̈ܶܐ ܕܡܰܪܕܘܼܬܳܐ ܘܬܰܪܒܺܝܼܬܳܐ. ܘܕܰܟܒܰܪ ܕܶܝܢ ܟܝܳܢܳܐܝܼܬ ܦܳܫܶܛ ܘܦܳܪܶܣ ܢܘܼܗܪܳܐ ܒܶܠܥܳܕ ܛܢܳܢܳܐ ܦܪܺܝܼܫܳܐ ܕܪܳܗܶܛ ܒܳܬܰܪ ܨܰܡܽܘܼܚܬܳܢܽܘܼܬܳܐ. ܒܰܕ ܢܘܼܗܪܳܐ ܐܘܼܣܺܝܰܐ ܐܺܝܬܰܘܗܝ ܕܰܡܝܰܬܪܽܘܼܬܶܗ ܡܳܪܰܬ ܦܽܘܼܪ̈ܫܳܢܶܐܿ ܥܛܺܝܼܦܰܬ ܡܫܰܐܠܘܼܬܳܐ ܪܰܒܬܳܐ..
ܘܒܰܪܢܳܫܳܐ ܗܿܘ ܐܰܝܢܳܐ ܕܐܺܝܼܬ ܠܶܗ ܕܺܝܼܠܳܝ̈ܳܬܐ ܗܳܠܶܝܢ ܢܰܗܺܝܼܪܳܐ ܡܶܬܚܫܶܒ. ܕܝܳܕܰܥ ܕܐܺܝܬܰܘܗܝ ܪܽܘܼܚܳܐ ܕܰܠܒܺܝܼܫ ܦܰܓܪܳܐ. ܘܝܳܕܰܥ ܕܐܺܝܬܝܰܐ ܗ̱ܘ ܪܘܼܚܳܢܳܐ ܕܡܶܬܕܰܪܰܓ ܒܕܰܪ̈ܓܶܐ ܠܳܐ ܡܶܬܡܰܫ̈ܚܳܢܶܐ ܕܫܽܘܼܡܠܳܝܳܐ ܘܡܶܬܢܰܦܰܩ ܒܪ̈ܰܘܡܶܐ ܠܳܐ ܡܶܣܬܰܝܟܳܢ̈ܶܐ ܕܣܽܘܼܠܳܩܳܐ ܗܰܘܢܳܢܳܝܳܐ: ܒܺܝܼܕܰܥܬܳܐ ܘܶܚܟܡܬܳܐ ܕܚܰܝ̈ܐ ܪܶܚܡܰܬ ܐ̱ܢܳܫܳܐܝܼܬ. ܘܠܐ ܚܳܕܐ ܘܐܳܦܠܳܐ ܢܳܨܰܚ ܐܠܐ ܒܰܥܒ̈ܳܕܶܐ ܬܪ̈ܺܝܼܨܶܐ ܕܢܰܗܺܝܼܪܽܘܼܬܳܐ ܘܕܽܘܼܒܳܪ̈ܶܐ ܡܝܰܬܪ̈ܶܐ ܕܫܰܪܺܝܼܪܽܘܼܬܳܐ.
ܡܳܕܶܝܢ ܓܶܕ ܢܶܨܠܐ ܐܶܕܢܳܐ ܠܗܰܘ ܡܳܐ ܕܫܰܦܺܝܼܪܳܐܝܬ ܐܳܡܪܺܝܼܢ ܘܡܰܠܝܳܐܝܼܬ ܟܳܬܒܺܝܼܢ ܝܰܕܘܼ̈ܥܬܳܢܶܐ ܢܰܗܺܝܼܪ̈ܶܐ ܩܰܕܡ̈ܳܝܶܐ ܕܺܝܼܠܰܢ ܒܫܰܪܒܳܐ ܕܟܺܝܼܪܳܐ: «ܟܽܠ ܕܰܡܗܰܠܶܟ ܒܢܽܘܗܪܳܐ ܠܳܐ ܛܳܥܶܐ ܘܠܳܐ ܡܶܬܬܘܰܗ. ܐܶܠܳܐ ܝܳܕܰܥ ܐܰܝܟܰܢܳܐ ܡܗܰܠܶܟ ܘܠܳܐܝܟܳܐ ܐܳܙܶܠ. ܘܡܳܛܶܐ ܠܰܐܝܟܳܐ ܕܨܳܒܶܐ. ܘܡܶܫܬܰܡܠܶܐ ܢܺܝܫܳܐ ܕܣܺܝܡ ܒܪܶܥܝܳܢܶܗ. ܡܩܰܒܶܠ ܣܽܘܟܳܝܶܗ ܘܗܳܘܶܐ ܠܶܗ ܫܽܘܠܳܡܳܐ ܛܳܒܳܐ ܠܣܽܘܥܪܳܢܶܗ. ܘܚܰܪܬܳܐ ܫܰܦܺܝܪܬܳܐ ܠܟܽܠܶܗ ܕܽܘܒܳܪܶܗ. ܡܰܢ ܕܶܝܢ ܕܪܳܕܶܐ ܒܚܶܫܽܘܟܳܐ ܠܳܐ ܝܳܕܰܥ ܐܰܝܟܰܢܳܐ ܡܗܰܠܶܟ. ܘܠܳܐ ܠܰܐܝܟܳܐ ܐܳܙܶܠ. ܘܠܳܐ ܢܳܣܒܳܐ ܫܽܘܠܳܡܳܐ ܛܳܒܳܐ ܡܰܪܕܺܝܬܶܗ. ܐܶܠܳܐ ܛܳܥܶܐ ܒܬܰܘܫܳܐ. ܘܠܰܐܒܕܳܢܳܐ ܫܳܪܟܳܐ ܚܰܪܬܶܗ.»
ܝܘܣܦ ܒܓܬܫ
You can also send us an email to karyohliso@gmail.com
Leave a Comment