ܡܒܰܪܰܟ ܘܰܡܫܰܒܰܚ ܘܰܡܪܰܡܪܰܡ ܫܡܳܐ ܣܓܺܝܕܳܐ ܘܰܕܚܺܝܠܳܐ ܘܩܰܕܺܝܫܳܐ ܕܡܳܪܳܐ ܥܳܒܽܘܕܳܐ ܘܒܳܪܽܘܝܳܐ ܕܟܽܠܗܶܝܢ ܡܶܬܝܰܕ̈ܥܳܢܝܳܬܳܐ ܘܠܳܐ ܡܶܬܚܰܙ̈ܝܳܢܝܳܬܳܐ. ܘܰܕܡܶܬܪ̈ܰܓܫܳܢܝܳܬܳܐ ܘܡܶܬܚܰܙ̈ܝܳܢܝܳܬܳܐ. ܗܰܘ ܕܺܐܝܬܰܘܗܝ ܐܺܝܬ̥ܝܳܐ ܡܬܽܘܡܳܝܳܐ. ܕܠܰܝܬ ܠܶܗ ܫܽܘܪܳܝܳܐ ܘܠܳܐ ܗܳܘܶܐ ܠܶܗ ܫܽܘܠܳܡܳܐ. ܗܰܘ ܕܠܳܐ ܡܶܬܕܪܶܟ ܡܶܢ ܟܽܠܗܽܘܢ ܥܒܺܝ̈ܕܶܐ. ܫܡܰܝܳܢ̈ܶܐ ܘܰܐܪ̈ܥܳܢܶܐ. ܡܶܬܝܰܕ̈ܥܳܢܶܐ ܘܡܶܬܪ̈ܰܓܫܳܢܶܐ. ܘܠܳܐ ܡܶܬܥܰܩܰܒ ܘܠܳܐ ܡܶܬܦܰܫܰܩ ܘܠܳܐ ܡܶܣܬܰܝܟ̥ܳܐ ܡܶܠܬܳܐ ܕܰܥܠܰܘܗܝ. ܘܗܰܘ ܕܺܐܝܬܰܘܗܝ ܐܺܝܬ̥ܝܳܐ ܡܬܽܘܡܳܝܳܐ ܘܩܰܕܺܝܡ ܠܟܽܠ. ܘܠܰܝܬ ܗ̱ܘܳܐ ܩܕܳܡܰܘܗܝ ܡܰܢ ܕܰܢܣܺܝܡ ܫܡܳܐ. ܐܰܟܡܳܐ ܕܗܽܘ ܒ̣ܪܳܐ ܒܶܪ̈ܝܳܬܳܐ. ܘܰܠܟܽܠܗܽܘܢ ܣܳܡ ܟܽܘ̈ܢܳܝܶܐ ܘܰܫܡܳܗ̈ܶܐ. ܕܰܒܗܽܘܢ ܐܰܘܕܰܥ ܐܶܢܽܘܢ ܘܦܰܪܶܫ ܐܶܢܽܘܢ ܠܟܽܠ ܚܰܕ ܒܰܫܡܳܗܰܝ̈ܗܽܘܢ ܘܟܽܘ̈ܢܳܝܰܝܗܽܘܢ ܘܰܟܝܳܢܰܝ̈ܗܽܘܢ ܘܰܩܢܽܘ̈ܡܰܝܗܽܘܢ ܘܛܶܟ̈ܣܰܝܗܽܘܢ ܘܕܺܝܠܳܝ̈ܳܬܗܽܘܢ ܘܦܽܘܠܚܳܢܗܽܘܢ. ܐܰܝܟܰܢ ܡܳܕܶܝܢ ܡܰܨܝܳܐ ܕܢܶܬܺܝܕܰܥ ܠܶܗ ܫܡܳܐ ܘܢܶܬܬܣܺܝܡ ܠܶܗ ܟܽܘܢܳܝܳܐ ܡܶܢ ܒܶܪ̈ܝܳܬܶܗ ܕܠܳܐ ܡܰܕܪ̈ܟܳܢ ܠܶܗ. ܐܳܦܠܳܐ ܡܰܨܝܳܐ ܠܗܽܘܢ ܕܰܢܥܰܩܒܽܘܢܳܝܗܝ ܘܰܢܦܰܫܩܽܘܢܳܝܗܝ ܘܰܢܡܰܠܠܽܘܢ ܥܰܠ ܐܺܝܬܽܘܬܶܗ ܡܬܽܘܡܳܝܬܳܐ ܘܠܳܐ ܡܶܬܗܰܘܢܳܢܳܝܬܳܐ. ܘܰܢܣܺܝܡܽܘܢ ܠܶܗ ܫܡܳܐ ܘܟܽܘܢܳܝܳܐ. ܐܶܠܳܐ ܐܶܢ ܗܽܘ. ܕܗܽܘ ܢܣܺܝܡ ܠܶܗ ܠܢܰܦܫܶܗ ܫܡܳܐ ܘܢܰܘܕܰܥ ܠܶܗ ܟܽܘܢܳܝܳܐ. ܘܶܐܠܳܐ ܐ̱ܚܪܺܝܢ ܡܶܢ ܒܶܪ̈ܝܳܬܶܗ. ܠܳܐ ܡܨܶܐ ܐܳܦܠܳܐ ܡܰܕܪܶܟ. ܐܰܘ ܝܳܕܰܥ ܕܰܐܝܟܰܢ ܢܣܺܝܡ ܠܶܗ ܫܡܳܐ. ܘܟܽܠܗܽܘܢ ܫܡܳܗ̈ܶܐ ܕܰܩܪܰܐܘܽܘܗܝ ܘܣܳܡܘ ܠܶܗ ܥܰܡܡ̈ܶܐ ܕܰܐܪܥܳܐ. ܡܶܢ ܡܰܝܬܝܽܘܬ̥ ܫܡܳܗ̈ܶܐ ܘܰܥܝܳܕ̈ܶܐ. ܘܛܶܟ̈ܣܰܝ ܥܳܠܡܳܐ ܩܪܰܐܘܽܘܗܝ ܘܣܳܡܘ ܠܶܗ ܡܳܪܝܳܐ܆ ܐܰܘܟܺܝܬ ܡܳܪܳܐ ܕܰܩܪܰܐܘܽܘܗܝ. ܡܶܢ ܫܡܳܐ ܕܡܳܪܽܘܬܳܐ ܐܺܝܬܰܘܗܝ. ܟܽܠ ܡܰܢ ܕܺܐܝܬܰܘܗܝ ܡܳܪܳܐ ܠܥܳܠܡܳܐ. ܐܰܘ ܠܩܶܢܝܳܢܳܐ. ܐܰܘ ܠܰܐܬܪܳܐ ܘܰܠܫܰܪܟܳܐ ܕܰܐܝܟ ܗܳܠܶܝܢ. ܡܳܪܝܶܗ ܐܺܝܬܰܘܗܝ ܐܰܘܟܺܝܬ ܡܳܪܶܗ. ܐܰܠܳܗܳܐ ܕܶܝܢ ܗܳܟܘܳܬ̥ ܡܶܢ ܫܡܳܐ ܕܰܐܠܳܗܳܐ ܕܟܰܢܶܫܘ ܥܰܡܡ̈ܶܐ ܡܶܢ ܫܽܘܪܳܝܳܐ ܠܟܽܠ ܕܶܐܬܚܰܘܺܝ ܢܰܨܺܝܚܳܐ ܒܥܳܠܡܳܐ. ܐܰܘ ܒܰܚܠܺܝܨܽܘܬܳܐ ܐܰܘ ܒܓܰܢ̱ܒܳܪܽܘܬܳܐ. ܐܰܘ ܒܰܢܒܺܝܽܘܬܳܐ. ܐܰܘ ܒܚܶܟܡܬܳܐ ܘܡܶܠܬܳܐ ܪܕܺܝܬܳܐ ܒܡܰܠܦܳܢܽܘܬܳܐ. ܐܰܘ ܒܣܳܥܽܘܪܽܘܬ̥ ܚܰܝ̈ܠܶܐ ܘܬܶܕܡܪ̈ܳܬܳܐ. ܐܰܘ ܒܙܳܟܽܘܬܳܐ ܕܰܩܪ̈ܳܒܶܐ ܘܰܐܬܠܺܝܣܽܘܬܳܐ ܕܟܰܫܺܝܪ̈ܶܐ. ܐܰܘ ܒܥܳܢܘܳܝܽܘܬܳܐ. ܘܰܥܡܽܘܪܝܳܐ ܠܚܽܘܕܳܝܳܐ ܕܰܒܛܽܘܪ̈ܶܐ ܘܡܰܕܒܪ̈ܶܐ ܘܰܒܚܽܘܪ̈ܒܶܐ ܓܠܺܝ̈ܙܰܝ ܡܶܢ ܐ̱ܢܳܫܽܘܬܳܐ. ܐܰܘ ܒܰܢܙܺܝܪܽܘܬܳܐ. ܘܨܰܘ̈ܡܶܐ ܘܫܰܗܪ̈ܶܐ ܘܩܰܘ̈ܡܶܐ ܘܰܨܠܰܘܴ̈ܬܳܐ ܕܰܩܕܳܡ ܥܳܒܽܘܕܳܐ ܘܰܡܦܰܪܢܣܳܢܳܐ ܕܟܽܠ. ܐܰܘ ܒܰܠܒܺܝܒܽܘܬܳܐ ܘܠܳܐ ܡܶܫܬܰܚܠܦܳܢܽܘܬܳܐ ܕܡܶܢ ܬܰܘܕܺܝܬܳܐ ܐܰܒܳܗܳܝܬܳܐ ܘܰܣܒܺܝܠܽܘܬ ܫܶܢ̈ܕܶܐ ܘܽܐܘܠ̈ܨܳܢܶܐ ܣܰܓܺܝ̈ܶܐܐ ܕܥܰܠ ܗܳܟܰܢ ܥܕܰܡܳܐ ܠܶܗ ܠܡܰܘܬܳܐ ܥܰܙܺܝܙܳܐ. ܕܟܽܠܡܰܢ ܕܒܰܚܕܳܐ ܡܶܢ ܗܳܠܶܝܢ ܘܕܰܐܝܟ ܗܳܠܶܝܢ ܐܶܬܢܰܨܰܚ ܘܰܥܒܰܪ ܡܶܢ ܥܳܠܡܳܐ. ܩܰܠܣܽܘܗܝ ܘܫܰܒܚܽܘܗܝ ܒܢܰܝ̈ܢܳܫܳܐ ܕܰܒܙܰܒܢܶܗ ܘܫܰܡܗܽܘܗܝ ܐܰܠܳܗܳܐ ܦܠܳܢ. ܘܰܗܘܰܘ ܡܰܝܬܶܝܢ ܥܽܘܗܕܳܢܶܗ ܐܰܡܺܝܢܳܐܝܬ̥ ܘܳܐܦ ܡܰܣܩܺܝܢ ܠܶܗ ܨܽܘܪܬܳܐ ܐܰܘ ܡܩܺܝܡܺܝܢ ܨܰܠܡܳܐ ܒܰܕܡܽܘܬ̥ܶܗ ܠܺܐܝܩܳܪܶܗ. ܘܥܳܒܕܺܝܢ ܠܶܗ ܕܽܘܟܪܳܢܳܐ. ܘܬܳܢܶܝܢ ܢܶܨܚܳܢܶܗ. ܘܰܡܝܰܩܪܺܝܢ ܨܽܘܪܬܶܗ ܐܰܘ ܨܰܠܡܶܗ. ܐܰܟܡܳܐ ܕܳܐܦ ܝܰܘܡܳܢ ܟܽܠ ܡܰܢ ܕܰܡܚܰܘܶܐ ܢܶܨܚܳܢܳܐ ܐܰܝܢܳܐ ܕܗܽܘ. ܡܫܰܡܗܺܝܢ ܠܶܗ ܩܰܕܺܝܫܳܐ. ܐܰܘ ܣܳܗܕܳܐ ܫܰܪܺܝܪܳܐ. ܗܳܟܘܳܬ ܐܳܦ ܗܳܠܶܝܢ ܩܰܕܡܳܝ̈ܶܐ ܡܫܰܡܗܺܝܢ ܗ̱ܘܰܘ ܐܰܠܳܗܳܐ. ܘܰܠܗܰܘ ܕܣܰܓܺܝ ܢܶܨܚܳܢ̈ܶܐ ܗܳܘܶܐ ܗ̱ܘܳܐ. ܐܰܘ ܪܺܝܫܳܐ ܘܩܰܕܡܳܝܳܐ ܕܰܐ̱ܚܪ̈ܳܢܶܐ ܘܥܶܠܬܳܐ ܘܰܡܓܰܪܓ̥ܳܢܳܐ ܘܰܡܚܰܦܛܳܢܳܐ ܕܥܰܠ ܢܶܨܚܳܢ̈ܶܐ܉ ܡܳܪܶܐ ܐܰܠܳܗ̈ܶܐ ܡܟܰܢܶܝܢ ܗ̱ܘܰܘ ܠܶܗ. ܘܡܶܢ ܗܳܢܳܐ ܥܝܳܕܳܐ ܩܳܪܶܝܢ ܗ̱ܘܰܘ ܠܥܳܒܽܘܕܳܐ ܐܰܠܳܗܳܐ. ܘܰܐܝܠܶܝܢ ܕܚܰܬ̊ܺܝܬ̥ܳܐܝܬ̥ ܩܳܪܶܝܢ ܗ̱ܘܰܘ ܐܰܠܳܗܳܐ ܕܰܐܠܳܗ̈ܶܐ ܐܰܘܟܺܝܬ ܐܰܠܳܗ ܐܰܠܳܗܺܝ̈ܢ ܡܫܰܡܗܺܝܢ ܗ̱ܘܰܘ ܠܶܗ. ܗܳܟܘܳܬ ܘܰܠܚܰܝ̈ܠܶܐ ܕܰܒܡܰܘܙܰܠܬܳܐ ܐܰܘ ܟܺܝܬ ܠܢܰܗܺܝܪ̈ܶܐ ܪܰܘܪ̈ܒܶܐ ܕܒܰܫܡܰܝܳܐ. ܕܰܐܝܟ ܗܳܠܶܝܢ ܫܰܒܥܳܐ ܛܳܥܰܝ̈ܳܐ ܕܺܐܝܬܰܝܗܽܘܢ ܫܶܡܫܳܐ ܘܣܰܗܪܳܐ ܘܟܐܘܢ ܘܒܝܠ ܘܢܪܝܓ ܘܒܶܠܰܬܺܝ ܘܢܳܒܘ. ܐܰܠܳܗ̈ܶܐ ܡܟܰܢܶܝܢ ܗ̱ܘܰܘ ܠܗܽܘܢ. ܘܳܐܦ ܨܰܠ̈ܡܶܐ ܘܨܽܘܪ̈ܳܬܳܐ ܡܩܺܝܡܺܝܢ ܗ̱ܘܰܘ ܠܗܽܘܢ. ܥܰܡ ܨܠܰܘܴ̈ܬܳܐ ܘܒܳܥ̈ܘܳܬܳܐ. ܘܡܶܢ ܕܰܐܝܟ ܗܳܠܶܝܢ ܐܶܬܥܰܝܰܕܘ ܠܡܶܩܪܳܐ ܐܰܠܳܗܳܐ ܠܗܰܘ ܥܳܒܽܘܕܳܐ ܘܒܳܪܽܘܝܳܐ. ܐ̱ܚܪ̈ܳܢܶܐ ܥܶܠܬܳܐ ܩܰܕܡܳܝܬܳܐ ܩܳܪܶܝܢ ܗ̱ܘܰܘ ܠܶܗ ܘܥܶܠܰܬ̥ ܟܽܠ ܥܶܠ̈ܠܳܢ. ܐ̱ܚܪ̈ܳܢܶܐ ܐܰܠܳܗܳܐ ܓܢܺܝܙܳܐ. ܐ̱ܚܪ̈ܳܢܶܐ ܗܘ̣ܪܡܙܕ. ܐ̱ܚܪ̈ܳܢܶܐ ܐܺܝܬ̥ܝܳܐ ܡܬܽܘܡܳܝܳܐ ܡܶܢ ܐܺܝܬ̥ܽܘܬ̥ܶܗ ܘܰܡܬܽܘܡܳܝܽܘܬܶܗ. ܐ̱ܚܪ̈ܳܢܶܐ ܒܳܪܽܘܝܳܐ ܡܶܢ ܒܳܪܽܘܝܽܘܬܶܗ ܘܥܳܒܽܘܕܳܐ ܡܶܢ ܥܳܒܽܘܕܽܘܬ̥ܶܗ. ܘܛܳܒܳܐ ܡܶܢ ܡܰܐܛܶܒܳܢܽܘܬܶܗ ܘܥܰܬܺܝܪܐ ܡܶܢ ܫܦܺܝܥܽܘܬ̥ܶܗ. ܘܚܰܟܺܝܡܳܐ ܡܶܢ ܚܰܟܺܝܡܽܘܬ ܣܳܥܽܘܪ̈ܘܳܬ̥ܶܗ ܘܰܡܪܰܚܡܳܢܳܐ ܡܶܢ ܡܪܰܚܡܳܢܽܘܬܶܗ. ܗܳܟܘܳܬ ܘܫܰܪܟܳܐ ܕܰܫܡܳܗ̈ܶܐ ܕܰܡܟܰܢܶܝܢ ܠܶܗ. ܡܶܢ ܕܺܝܠܳܝ̈ܳܬܳܐ ܕܰܚܙܰܘ ܘܺܝܠܶܦܘ ܕܺܐܝܬ ܒܶܗ. ܕܰܐܝܟ ܢܳܛܽܘܪܳܐ ܘܥܺܝܪܳܐ. ܘܰܡܣܰܬܪܳܢܳܐ ܘܰܡܪܰܚܦܳܢܳܐ ܘܰܡܦܰܪܢܣܳܢܳܐ. ܘܰܡܕܰܒܪܳܢܳܐ ܘܚܰܝܳܐ ܘܚܰܝܽܘܣܬܳܢܳܐ. ܘܢܰܓܺܝܪ ܪܽܘܚܳܐ. ܘܰܡܨܶܐ ܟܽܠ ܘܡܳܪܶܐ ܟܽܠ. ܘܰܐܚܺܝܕ ܟܽܠ. ܘܚܰܝܠܬܳܢ ܒܟܽܠ. ܘܚܰܟܺܝܡ ܒܟܽܠ. ܘܝܳܕܰܥ ܟܽܠ. ܘܛܽܘܒܬ̥ܳܢ ܒܟܽܠ. ܘܰܡܫܰܒܚܳܐ. ܘܰܣܓܺܝܕܳܐ. ܘܩܳܕܺܝܫܳܐ. ܘܟܺܐܢܳܐ. ܘܕܰܝܳܢܳܐ. ܘܡܰܚܝܳܢܳܐ. ܘܡܬܟܝܢܐ. ܘܰܡܬܰܪܣܝܳܢܳܐ. ܘܰܡܚܰܟܡܳܢܳܐ. ܘܰܡܗܰܕܝܳܢܳܐ. ܘܢܽܘܗܪܳܐ ܫܰܪܺܝܪܳܐ. ܘܢܽܘܪܳܐ ܐܳܟܶܠܬܳܐ ܘܠܳܐ ܗܽܘܠܳܢܳܝܬܳܐ. ܘܰܩܪܰܒܬܳܢܳܐ ܘܥܰܙܺܝܙܳܐ. ܘܓܰܢ̱ܒܳܪ ܚܰܝܠܳܐ. ܘܬܰܩܺܝܦܳܐ. ܘܓܰܐܝܳܐ. ܘܰܡܫܰܩܠܳܐ. ܘܪܳܡܳܐ ܘܫܰܠܺܝܛܳܐ. ܘܡܰܠܟܳܐ ܘܰܡܠܶܟ̥ ܡܰܠ̈ܟܶܐ. ܘܡܳܪܶܐ ܡܳܪ̈ܰܘܳܬܳܐ. ܘܰܨܒܰܐܘܽܬ̥. ܘܰܐܠܽܘܗܺܝܡ. ܘܰܐܕܽܘܢܰܝ. ܘܶܐܝܠܫܕܝ. ܥܰܡ ܫܰܪܟܳܐ ܕܰܫܡܳܗ̈ܶܐ ܐ̱ܚܪ̈ܳܢܶܐ ܘܟܽܘ̈ܢܳܝܶܐ ܕܩܳܪܶܝܢ ܗ̱ܘܰܘ ܠܶܗ ܒܗܽܘܢ ܥܰܡܡ̈ܶܐ ܟܽܠܗܽܘܢ ܕܰܐܪܥܳܐ. ܟܽܠ ܚܰܕ ܒܠܶܫܳܢܶܗ. ܘܰܒܗܰܘ ܡܶܕܶܡ ܕܰܡܝܰܩܰܪ ܘܡܳܪܳܢܳܝ ܘܪܰܒ ܠܘܳܬܗܽܘܢ. ܘܗܳܠܶܝܢ ܟܽܠܗܽܘܢ ܫܡܳܗ̈ܶܐ ܡܶܢ ܥܝܳܕ̈ܶܐ ܘܛܶܟ̈ܣܶܐ ܘܣܽܘܥܪ̈ܳܢܶܐ ܕܰܒܥܳܠܡܰܢ ܐܶܬܬܣܺܝܡܘ ܘܶܐܫܬܰܡܰܗܘ ܥܰܠ ܗܰܘ ܡܳܪܳܐ ܘܒܳܪܽܘܝܳܐ. ܕܠܰܝܬ ܫܡܳܐ ܠܺܐܝܬܽܘܬܶܗ. ܘܠܳܐ ܟܽܘܢܳܝܳܐ ܠܰܡܬܽܘܡܳܝܽܘܬܶܗ. ܡܶܛܽܠ ܕܰܠܥܶܠ ܡܶܢ ܗܳܠܶܝܢ ܐܺܝܬܰܘܗܝ܆ ܗܰܘ ܠܳܐ ܡܶܬܕܰܪܟܳܢܳܐ ܘܠܳܐ ܡܶܬܥܰܩܒܳܢܳܐ ܘܠܳܐ ܡܶܣܬܰܝܟ̥ܳܢܳܐ. ܘܰܠܥܶܠ ܡܶܢ ܛܳܒܽܘܬܳܐ. ܘܡܶܢ ܡܪܰܚܡܳܢܽܘܬܳܐ ܘܡܶܢ ܩܰܕܺܝܫܽܘܬܳܐ. ܕܠܶܗ ܣܳܓܶܕ ܘܡܰܘܕܶܐ ܘܰܡܫܰܒܰܚ. ܟܽܠ ܫܶܡ ܕܡܶܫܬܰܡܰܗ ܒܰܐܪܥܳܐ ܘܒܰܫܡܰܝܳܐ. ܘܠܶܗ ܡܰܘܪܶܒ ܘܰܡܩܰܠܶܣ ܘܰܡܒܰܪܶܟ̥ ܟܽܠ ܠܶܫܳܢ ܕܪ̈ܽܘܚܳܢܶܐ ܘܰܕܦܰܓܪ̈ܳܢܶܐ. ܘܡܶܫܬܰܒܰܚ ܬܽܘܒ ܘܡܶܬܝܰܕܥܳܐ ܪܰܒܽܘܬܶܗ ܘܡܳܪܽܘܬܶܗ ܘܥܳܒܽܘܕܽܘܬܶܗ ܘܚܶܟܡܬܶܗ ܡܶܢ ܟܽܠܗܶܝܢ ܒܶܪ̈ܝܳܬܳܐ ܕܚܰܐܝ̈ܳܢ ܘܡܶܬܬܙܺܝ̈ܥܳܢ ܘܪ̈ܳܚܫܳܢ ܘܪ̈ܳܓܽܘܫܳܢ ܘܡܶܬܚܰܙ̈ܝܳܢ ܘܡܶܬܝܰܕ̈ܥܳܢ. ܡܳܕܶܝܢ [ܡܰܢܽܘ] ܡܨܶܐ ܕܢܶܕܰܥ ܚܰܬ̊ܺܝܬ̥ܳܐܝܬ̥ ܫܡܶܗ. ܐܰܘ ܡܰܢܽܘ ܡܨܶܐ ܘܝܳܕܰܥ ܕܰܢܣܰܝܶܟ̥ ܠܶܗ ܫܡܳܐ ܠܗܰܘ ܐܺܝܬܝܳܐ ܡܬܽܘܡܳܝܳܐ ܘܠܳܐ ܡܶܬܕܰܪܟܳܢܳܐ. ܐܰܘ ܡܶܢ ܐܰܝܟܳܐ ܐܺܝܬ ܠܰܢ ܚܢܰܢ ܕܰܢܪܰܟܶܒ ܘܢܰܘܕܰܥ ܫܡܶܗ ܒܡܶܠܬܳܐ ܕܺܝܠܰܢ ܡܪܰܟܰܒܬܳܐ ܕܡܶܢ ܡܶܠܬܳܐ ܘܩܳܠܳܐ ܕܡܶܬܢܦܰܚ ܡܶܢ ܐܳܐܰܪ ܗܳܢܳܐ. ܠܗܰܘ ܦܫܺܝܛܳܐ ܘܠܳܐ ܡܪܰܟܒܳܐ ܘܰܡܙܺܝܥ ܠܟܽܠ. ܘܗܽܘ ܡܶܢ ܐ̱ܚܪܺܝܢ ܠܳܐ ܡܶܬܬܙܺܝܥ. ܠܥܶܠ ܡܶܢ ܡܶܠܬܳܐ ܐܺܝܬܰܘܗܝ. ܒܗܳܝ ܕܠܳܐ ܡܣܰܝܶܟ̥ ܠܶܗ ܡܺܐܡܪܳܐ. ܘܠܳܐ ܡܰܕܪܶܟ ܠܶܗ ܗܰܘܢܳܐ. ܠܳܐ ܒܳܨܶܐ ܠܶܗ ܚܽܘܫܳܒܳܐ. ܠܳܐ ܡܳܐܶܫ ܠܶܗ ܪܶܥܝܳܢܳܐ. ܠܳܐ ܡܶܬܥܰܩܰܒ. ܠܳܐ ܡܶܣܬܰܝܰܟ̥. ܠܳܐ ܡܶܬ̥ܶܐܡܰܪ. ܒܗܳܝ ܕܰܠܥܶܠ ܡܶܢ ܟܽܠ ܙܰܘܥܳܐ ܘܚܽܘܫܳܒܳܐ ܘܰܪܦܶܬܳܐ ܕܪܶܥܝܳܢܳܐ ܘܡܰܕܪܟܳܢܽܘܬܳܐ ܕܗܰܘܢܳܐ ܐܺܝܬܰܘܗܝ. ܠܥܶܠ ܡܶܢ ܟܽܠ. ܠܬܰܚܬ ܡܶܢ ܟܽܠ. ܠܗܰܠ ܡܶܢ ܟܽܠ. ܠܟܳܐ ܡܶܢ ܟܽܠ. ܠܓܰܘ ܡܶܢ ܟܽܠ. ܠܒܰܪ ܡܶܢ ܟܽܠ. ܘܗܽܘ ܐܺܝܬܰܘܗܝ ܟܽܠ. ܘܡܶܢܶܗ ܟܽܠ. ܘܒܶܗ ܟܽܠ. ܒܗܳܝ ܕܡܶܢܶܗ ܫܰܪܺܝ ܟܽܠ. ܘܒܶܗ ܩܳܐܶܡ ܟܽܠ. ܘܠܶܗ ܗܳܦܶܟ ܟܽܠ. ܫܽܘܒܚܳܐ ܠܶܗ ܥܰܠ ܕܺܝ̈ܢܰܘܗܝ ܠܳܐ ܡܶܬܕܰܪ̈ܟܳܢܶܐ. ܫܽܘܒܚܳܐ ܠܶܗ ܥܰܠ ܪܰܒܽܘܬ̥ ܡܰܘܗ̈ܒܳܬܶܗ. ܫܽܘܒܚܳܐ ܠܶܗ ܥܰܠ ܣܰܓܺܝܐܘܬ ܛܰܝܒܽܘܬܶܗ. ܗܰܘ ܠܳܐ ܡܶܬܕܰܪܟܳܢܳܐ ܘܠܳܐ ܡܶܣܬܰܝܟ̥ܳܢܳܐ ܘܠܳܐ ܡܶܬܗܰܘܢܳܢܳܐ. ܒ̣ܪܳܝܗܝ ܠܒܰܪ ܐ̱ܢܳܫܐ ܒܨܰܠܡܶܗ. ܘܒܶܗ ܚܰܘܺܝ ܠܰܕܡܽܘܬ̥ܶܗ. ܗܳܢܰܘ ܕܶܝܢ ܒܗܰܘܢܳܐ ܗܳܢܳܐ ܕܺܐܝܬ ܠܰܢ ܠܳܐ ܡܶܬܠܰܒܟ̥ܢܳܐ ܘܠܳܐ ܡܶܬܥܰܪܝܳܢܳܐ ܘܠܳܐ ܡܶܣܬܰܝܟ̥ܳܢܳܐ. ܘܺܐܝܬܰܝܢ ܫܰܠܺܝ̈ܛܰܝ ܒܝܳܬ̥ܰܢ. ܒܗܳܝ ܕܺܐܝܬ ܠܰܢ ܚܺܐܪܽܘܬܳܐ ܠܡܶܥܒܰܕ ܨܶܒܝܳܢܰܢ ܐܰܟܘܳܬܶܗ ܘܒܰܕܡܽܘܬ̥ܶܗ. ܘܥܰܠ ܗܳܠܶܝܢ ܒܡܺܐܡܪ̈ܶܐ ܐ̱ܚܪ̈ܳܢܶܐ ܕܰܩܕܳܡܰܝܢ ܡܚܰܘܶܝܢܰܢ ܦܰܬ̥ܝܳܐܝܬ̥ ܘܝܰܬܺܝܪܐܝܬ ܒܝܰܕ ܐܰܠܳܗܳܐ ܕܰܡܚܰܝܶܠ.
ܡܳܕܶܝܢ ܗܳܟܺܝܠ ܐܰܝ̇ܕܳܐ ܚܰܬ̊ܺܝܬ̥ܳܐ ܕܢܶܥܒܶܕ. ܘܰܐܝܟܰܢ ܢܶܩܪܶܐ ܘܰܢܫܰܡܰܗ ܠܒܳܪܽܘܝܰܢ ܘܥܳܒܽܘܕܰܢ. ܒܰܐܝܠܶܝܢ ܫܡܳܗ̈ܶܐ ܢܶܩܪܶܝܘܗܝ. ܒܰܐܝܠܶܝܢ ܟܽܘ̈ܢܳܝܶܐ ܢܨܰܠܶܐ ܘܢܶܒܥܶܐ ܡܶܢܶܗ. ܘܢܶܬܟܰܫܰܦ ܠܶܗ. ܐܰܝܟܰܢܳܐ ܢܫܰܒܚܺܝܘܗܝ ܘܰܢܒܰܪܟܺܝܘܗܝ ܘܰܢܪܰܡܪܶܡ ܠܰܫܡܶܗ. ܕܗܳܐ ܠܥܶܠ ܡܶܢ ܟܽܠ ܡܶܠܬܳܐ ܕܰܡܠܰܓ̥ܠܶܓ̥ ܠܶܫܳܢܳܐ ܐܺܝܬܰܘܗܝ. ܘܰܠܥܶܠ ܡܶܢ ܟܽܠ ܙܰܘܥܳܐ ܕܪܳܦܶܬ̥ ܒܬܰܪܥܺܝܬܳܐ. ܘܰܠܓܰܘ ܡܶܢ ܟܽܠ ܚܽܘܫܳܒܳܐ ܕܡܰܘܠܶܕ ܗܰܘܢܳܐ. ܗܳܝ ܕܶܝܢ ܕܚܰܬ̊ܺܝܬ̥ܳܐ ܘܙܳܕܩܳܐ ܠܰܢ ܕܢܺܐܡܰܪ ܘܰܢܫܰܡܰܗ ܠܗܰܘ ܠܳܐ ܡܶܬܕܰܪܟܳܢܳܐ. ܗܳܕܶܐ ܐܺܝܬܶܝܗ̇ ܒܰܠܚܽܘܕ. ܗܳܢܰܘ ܕܶܝܢ ܗܰܘ ܕܺܐܝܬܰܘܗܝ ܐܰܡܺܝܢܳܐܝܬ̥. ܟܶܐܡܰܬ̥ ܗܽܘ ܐܺܝܬܰܘܗܝ ܗ̱ܘܳܐ ܡܶܢ ܒܪܺܝܫܺܝܬ. ܠܰܘ ܕܰܗܘܳܐ ܡܶܢ ܒܪܺܝܫܺܝܬ̥. ܐܶܠܳܐ ܕܺܐܝܬܰܘܗܝ ܗ̱ܘܳܐ ܟܰܕ ܠܰܝܬ ܠܶܗ ܪܺܝܫܺܝܬܳܐ ܣܛܰܪ ܡܶܢ ܝܳܬ̥ܶܗ. ܘܗܽܘ ܟܰܕ ܗܽܘ ܐܺܝܬܰܘܗܝ ܐܰܡܺܝܢܳܐܝܬ̥ ܒܟܽܠ ܙܒܰܢ ܕܠܳܐ ܫܽܘܚܠܳܦ. ܘܗܽܘ ܬܽܘܒ ܟܰܕ ܗܽܘ ܐܺܝܬܰܘܗܝ ܠܥܳܠ̈ܡܰܝ ܥܳܠܡܺܝܢ ܕܠܳܐ ܣܽܘܦ ܘܰܕܠܳܐ ܫܽܘܠܳܡ܀
ܡܰܠܰܐܟ̈ܶܐ ܕܶܝܢ ܘܰܒܢܰܝ̈ܢܳܫܳܐ. ܐܺܝܬ ܗ̱ܘܳܐ ܐܶܡܰܬܝ ܕܠܳܐ ܐܺܝܬܰܝܗܘܢ ܗ̱ܘܰܘ. ܘܺܐܝܬܰܝܗܽܘܢ ܬܚܶܝܬ ܫܽܘܚܠܳܦܳܐ. ܘܡܶܫܬܰܚܠ̈ܦܳܢܶܐ. ܡܶܢ ܡܰܠܱܐܟ̈ܶܐ ܢܰܗܺܝܪ̈ܶܐ ܐܶܫܬܰܚܠܰܦܘ ܒܰܙܒܰܢ ܘܰܗܘܰܘ ܕܰܝ̈ܘܶܐ ܚܶܫܽܘ̈ܟܶܐ. ܘܰܒ̈ܢܰܝ ܐ̱ܢܳܫܳܐ ܒܰܙܒܰܢ ܗܳܘܶܝܢ ܛܳܒ̈ܶܐ. ܘܒܰܙܒܰܢ ܟܺܐܢ̈ܶܐ ܘܒܰܙܒܰܢ ܥܰܘܴ̈ܠܶܐ. ܘܒܶܪ̈ܝܳܬܳܐ ܬܽܘܒ ܐ̱ܚܪ̈ܳܢܝܳܬܳܐ ܕܡܶܢ ܐܶܣܛܽܘܟ̈ܣܶܐ. ܐܺܝܬ ܐܶܡܰܬܝ ܕܠܳܐ ܐܺܝܬܰܝܗܽܘܢ ܗ̱ܘܰܘ. ܘܗܳܘܶܐ ܬܽܘܒ ܐܶܡܰܬܝ ܕܥܳܒܪܺܝܢ ܘܠܳܐ ܐܺܝܬܰܝܗܽܘܢ. ܥܳܒܽܘܕܳܐ ܕܶܝܢ ܘܒܳܪܽܘܝܳܐ ܐܺܝܬ̥ܝܳܐ ܡܬܽܘܡܳܝܳܐ ܐܺܝܬܰܘܗܝ ܗ̱ܘܳܐ ܘܺܐܝܬܰܘܗܝ ܐܰܡܺܝܢܳܐܝܬ̥. ܘܗܽܘ ܢܶܗܘܶܐ ܐܺܝܬܰܘܗܝ ܠܥܳܠܰܡ ܥܳܠܡܺܝܢ܀
ܗܳܢܰܘ ܫܡܳܐ ܫܰܪܺܝܪܳܐ ܘܚܰܬ̊ܺܝܬ̥ܳܐ ܕܡܰܨܝܳܐ ܠܰܢ ܕܰܢܫܰܡܰܗ ܠܗܰܘ ܠܳܐ ܡܶܬܕܰܪܟܳܢܳܐ ܘܠܳܐ ܡܶܣܬܰܝܟ̥ܳܢܳܐ. ܘܕܰܠܥܶܠ ܡܶܢ ܟܽܠ ܫܡܳܐ ܘܟܽܘܢܳܝܳܐ ܕܡܶܫܬܰܡܰܗ ܒܰܫܡܰܝܳܐ ܘܒܰܐܪܥܳܐ. ܘܶܐܡܰܬܝ ܕܶܝܢ ܕܰܒܢܺܝܫܳܐ ܕܰܨܠܽܘܬܳܐ ܢܩܰܪܶܒ ܠܶܗ ܬܶܫܒܽܘܚܬܳܐ ܘܬܰܘܕܺܝܬܳܐ ܘܣܶܓܕܬܳܐ. ܒܒܳܥܽܘܬܳܐ ܘܬܰܟܫܶܦܬܳܐ ܘܰܦܝܳܣܳܐ. ܒܰܐܝܢܳܐ ܕܗܽܘ ܫܡܳܐ ܕܰܬܫܰܡܗܺܝܘܗܝ. ܡܩܰܒܶܠ ܨܠܽܘܬ̥ܳܟ. ܐܶܡܰܬܝ ܕܰܒܢܺܝܫܳܐ ܬܪܺܝܨܳܐ ܘܡܽܘܟܳܟ̥ܳܐ ܘܗܰܝܡܳܢܽܘܬܳܐ ܫܦܺܝܬ̥ܳܐ. ܘܰܦܫܺܝܛܽܘܬܳܐ ܬܰܡܺܝܡܬܳܐ ܡܩܰܪܶܒ ܐܰܢ̱ܬ ܨܠܽܘܬ̥ܳܟ ܡܶܢ ܠܶܒܳܐ ܕܰܟܝܳܐ ܘܢܰܦܫܳܐ ܬܪܺܝܨܬܳܐ. ܟܰܕ ܣܳܟ ܠܳܐ ܡܶܬܪܰܢܶܐ ܐܰܢ̱ܬ ܥܠܰܘܗܝ ܕܡܽܘܬ̥ܳܐ ܘܨܰܠܡܳܐ ܡܪܰܟܒܳܐ. ܘܳܐܦܠܳܐ ܡܶܬܗܰܓܰܓ ܐܰܢ̱ܬ ܠܶܗ ܐܰܝܟ ܨܽܘܪܬܳܐ ܡܶܕܶܡ. ܐܰܘ ܕܡܽܘܬ̥ܳܐ ܕܡܶܢ ܗܳܠܶܝܢ ܕܡܶܬܚܰܙ̈ܝܳܢ. ܠܳܐ ܕܰܫܡܰܝܳܐ ܘܠܳܐ ܕܰܪܩܺܝܥܳܐ ܘܠܳܐ ܕܳܐܐܰܪ. ܘܠܳܐ ܕܫܶܡܫܳܐ ܐܰܘ ܣܰܗܪܳܐ ܐܰܘ ܟܰܘܟ̈ܒܶܐ. ܘܠܳܐ ܕܢܽܘܗܪܳܐ ܗܳܢܳܐ ܡܶܬܚܰܙܝܳܢܳܐ. ܘܠܳܐ ܕܢܽܘܪܳܐ ܗܳܕܶܐ ܗܽܘܠܳܢܳܝܬܳܐ. ܐܰܘ ܕܪܽܘܚܳܐ ܗܳܕܶܐ ܓܽܘܫܡܳܢܳܝܬܳܐ. ܘܠܳܐ ܕܝܰܡܳܐ ܘܠܳܐ ܕܝܰܒܫܳܐ. ܘܠܳܐ ܣܳܟ ܕܚܰܕ ܡܶܕܶܡ ܬܶܬܪܰܢܶܐ. ܐܰܘ ܬܶܬܚܰܫܰܒ ܥܠܰܘܗܝ. ܥܰܠ ܦܫܺܝܛܳܐ ܘܠܳܐ ܡܪܰܟܒܳܐ. ܘܰܕܠܳܐ ܢܳܦܶܠ ܬܚܶܝܬ ܚܽܘܫܳܒܳܐ. ܐܰܘ ܡܶܬܕܰܪܟܳܢܽܘܬܳܐ. ܐܰܘ ܡܶܬܗܰܘܢܳܢܽܘܬܳܐ. ܗܰܘ ܓܶܝܪ ܕܰܒ̣ܪܳܐ ܟܽܠ ܕܡܶܬܚܰܙ̈ܝܳܢ ܘܰܕܠܳܐ ܡܶܬܚܰܙ̈ܝܳܢ. ܘܟܽܠ ܡ̃ܠܶܐ̣ ܡܶܢܶܗ. ܘܗܽܘ ܠܳܐ ܡܶܬܥܪܶܐ ܘܠܳܐ ܡܶܣܬܰܝܰܟ̥. ܘܶܐܠܽܘ ܐܺܝܬ ܗ̱ܘܳܐ ܐܰܝܟ ܗܳܕܶܐ ܒܪܺܝܬܳܐ ܐܳܠܶܦ ܐܰܠ̈ܦܺܝܢ ܘܪܶܒܽܘ ܪ̈ܶܒܘܳܢ ܒܶܪ̈ܝܳܬܳܐ. ܘܥܳܠ̈ܡܶܐ ܐ̱ܚܪ̈ܳܢܶܐ. ܠܳܐ ܣܳܟ ܡܣܰܝܟ̥ܺܝܢ ܗ̱ܘܰܘ ܠܶܗ ܐܰܘ ܡܶܬܥܪܶܐ ܗ̱ܘܳܐ ܡܶܢܗܽܘܢ܉ ܘܰܒܟܽܠ ܕܽܘܟ ܟܽܠܶܗ ܐܺܝܬܰܘܗܝ ܕܠܳܐ ܫܽܘܢܳܝ ܘܰܕܠܳܐ ܫܽܘܚܠܳܦ ܘܰܕܠܳܐ ܙܽܘܥܙܳܥ. ܐܰܝܟܰܢ ܡܰܨܝܳܐ ܕܢܶܬܗܰܓܰܓ ܠܶܗ ܕܡܽܘܬ̥ܳܐ ܐܰܘ ܨܽܘܪܬܳܐ ܐܰܘ ܣܳܟ ܡܶܕܶܡ ܕܡܰܕܪܟܳܐ ܠܶܗ ܡܰܚܫܰܒܬܳܐ. ܡܰܕܢܰܚ ܕܶܝܢ ܘܡܰܢܗܰܪ ܠܪܶܥܝܳܢܳܐ ܕܗܰܘ̈ܢܶܐ ܫܦܰܝ̈ܳܐ ܘܠܶܒܰܘܴ̈ܬܳܐ ܕܟܰܝ̈ܳܐ. ܠܦܽܘܬ ܫܰܦܝܽܘܬܗܽܘܢ ܘܕܰܟܝܽܘܬܗܽܘܢ ܘܰܡܪܺܝܩܽܘܬܗܽܘܢ ܘܰܨܠܺܝܠܽܘܬ̥ܗܽܘܢ ܘܡܶܣܬܰܟܠܺܝܢ ܗܳܠܶܝܢ ܘܡܶܬܢܰܗܪܺܝܢ ܒܗܰܘ̈ܢܰܝܗܽܘܢ. ܒܙܰܘ̈ܥܶܐ ܩܰܛܺܝ̈ܢܶܐ ܘܚܽܘ̈ܫܳܒܶܐ ܪ̈ܽܘܚܳܢܳܝܶܐ. ܘܡܶܕܶܡ ܕܠܳܐ ܡܶܬܡܰܠܰܠ ܒܦܽܘܡܳܐ ܕܒܶܣܪܳܐ. ܐܳܦܠܳܐ ܡܶܬܦܰܫܰܩ ܒܠܶܫܳܢܳܐ ܓܫܺܝܡܳܐ. ܐܰܘ ܡܶܬ̊ܬܰܪܓܰܡ ܒܩܳܠܳܐ ܡܪܰܟܒܳܐ. ܘܥܰܠ ܗܳܠܶܝܢ ܬܽܘܒ ܢܰܗܺܝܪܳܐܝܬ̥ ܐܰܝܟܳܐ ܕܘܳܠܶܐ ܡܚܰܘܶܝܢܰܢ ܐܰܝܟ ܕܝܳܗܒܳܐ ܛܰܝܒܽܘܬܶܗ܀
ܐܺܝܬ ܬܽܘܒ ܬܠܳܬܳܐ ܟܽܘ̈ܢܳܝܶܐ ܕܠܳܚܡܺܝܢ ܕܢܶܬܟܰܢܶܐ ܒܗܽܘܢ. ܗܰܘ ܕܺܐܝܬܰܘܗܝ ܠܥܶܠ ܡܶܢ ܟܽܠ ܫܶܡ ܘܟܽܘܢܳܝ. ܐܶܠܳܐ ܡܶܢ ܣܳܥܽܘܪܽܘܬܶܗ ܕܰܠܘܳܬ ܒܶܪ̈ܝܳܬܶܗ. ܝܺܠܶܦܢܰܢ ܕܰܒܗܽܘܢ ܢܟܰܢܝܘܗܝ ܘܰܢܫܰܡܺܝܘܗܝ. ܕܗܶܢܽܘܢ ܗܳܠܶܝܢ ܬܠܳܬܳܐ ܫܡܳܗܺܝ̈ܢ. ܚܳܒܫܺܝܢ ܘܰܡܣܰܝܟ̥ܺܝܢ ܠܟܽܠ ܫܡܳܐ ܘܟܽܘܢܳܝܳܐ ܕܶܐܫܬܰܡܰܗ ܒܶܗ. ܐܺܝܬܰܝܗܽܘܢ ܕܶܝܢ ܗܳܠܶܝܢ. ܛܳܒܳܐ ܘܥܰܬܺܝܪܳܐ ܘܚܰܟܺܝܡܳܐ. ܒܗܳܠܶܝܢ ܬܠܳܬܳܐ ܟܽܘ̈ܢܳܝܺܝܢ. ܡܣܰܝܟ̥ܺܝܢ ܟܽܠܗܽܘܢ ܫܡܳܗܺܝ̈ܢ ܕܰܐܕܟܰܪܢܰܢ ܡܶܢ ܠܥܶܠ. ܘܰܕܠܳܐ ܐܰܕܟܰܪܢܰܢ ܒܰܟܬܳܒܳܐ ܗܳܢܳܐ. ܘܠܳܚܡܺܝܢ ܠܶܗ ܡܳܪܳܢܳܐܝܬ̥. ܡܶܛܽܘܠ ܕܗܽܘ ܐܺܝܬܰܘܗܝ ܓܡܺܝܪܳܐ ܘܰܡܫܰܡܠܝܳܐ ܘܫܰܪܺܝܪܳܐ ܒܟܽܠܗܽܘܢ. ܛܳܒܰܐ ܗ̱ܘ ܓܶܝܪ ܘܡܰܒܽܘܥܳܐ ܕܟܽܠ ܛܳܒ̈ܳܢ. ܗܰܘ ܕܡܶܢ ܛܳܒܽܘܬܶܗ ܒܰܠܚܽܘܕ ܐܰܝܬܺܝ ܗܳܠܶܝܢ ܟܽܠܗܶܝܢ ܠܰܗܘܳܝܳܐ. ܕܡܶܬܚܰܙ̈ܝܳܢ ܘܰܕܠܳܐ ܡܶܬܚܰܙ̈ܝܳܢ. ܟܰܕ ܠܰܝܬ ܡܰܢ ܕܒܳܥܶܐ ܡܶܢܶܗ ܐܰܘ ܐܰܦܺܝܣܶܗ. ܐܰܘ ܐܶܡܰܪ ܠܶܗ. ܡܶܛܽܠ ܕܠܰܝܬ ܗ̱ܘܳܐ ܟܝܳܢܳܐ ܐ̱ܚܪܺܢܳܐ ܐܰܘ ܐܽܘܣܺܝܰܐ ܐ̱ܚܪܺܬܳܐ ܕܰܩܕܳܡܰܘܗܝ ܐܰܘ ܥܰܡܶܗ. ܕܬܶܒܥܶܐ ܡܶܢܶܗ. ܐܶܠܳܐ ܒܗܳܝ ܕܺܐܝܬܰܘܗܝ ܛܳܒܳܐ ܒܰܟܝܳܢܶܗ ܘܟܽܠܳܗ̇ ܛܳܒܽܘܬܳܐ ܡܰܐܠܽܘܢ ܕܶܝܢ ܘܰܠܥܶܠ ܡܶܢ ܟܽܠ ܛܳܒܽܘܬܳܐ܇ ܒܛܰܝܒܽܘܬܶܗ ܥܒܰܕ ܗܳܠܶܝܢ ܟܽܠܗܶܝܢ ܘܰܐܝܬܺܝ ܠܰܗܘܳܝܳܐ. ܘܒܳܬܰܪ ܕܰܒ̣ܪܳܐ ܘܰܐܬܩܶܢ ܐܶܢܶܝܢ܇ ܠܳܐ ܫܒܰܩ ܐܶܢܶܝܢ ܫܚܺܝܡܳܐܝܬ̥ ܐܶܠܳܐ ܐܰܘܪܶܒ ܘܝܰܩܰܪ ܐܶܢܽܘܢ. ܘܰܐܛܶܒ ܠܗܽܘܢ ܘܰܐܥܬܰܪ ܐܶܢܽܘܢ ܒܟܽܠ ܛܽܘܒܺܝ̈ܢ. ܘܰܐܡܺܝܢܳܐܝܬ̥ ܕܠܳܐ ܫܰܠܘܳܐ ܡܰܐܛܶܒ ܠܗܽܘܢ. ܒܗܳܝ ܕܰܒܛܺܝܠ ܠܶܗ ܥܠܰܝܗܽܘܢ ܘܰܡܦܰܪܢܶܣ ܠܗܽܘܢ ܘܰܡܕܰܒܰܪ ܘܰܡܢܰܛܰܪ ܘܰܡܫܰܘܙܶܒ. ܡܳܕܶܝܢ ܗܽܘ ܒܰܠܚܽܘܕܰܘܗܝ ܐܺܝܬܰܘܗܝ ܛܳܒܳܐ ܡܳܪܳܢܳܐܝܬ̥ ܕܠܳܐ ܣܳܟ ܡܶܫܬܰܚܠܰܦ ܡܶܢ ܛܳܒܽܘܬܶܗ. ܒܗܳܝ ܕܰܟܝܳܢܳܐܝܬ̥ ܐܺܝܬܰܘܗܝ ܛܳܒܳܐ ܘܡܰܐܛܒܳܢܳܐ. ܥܰܬܺܝܪܳܐ ܕܶܝܢ ܐܺܝܬܰܘܗܝ ܗܳܟܘܳܬ̥ ܡܳܪܳܢܳܐܝܬ̥ ܘܡܰܒܽܘܥܳܐ ܕܟܽܠ ܥܽܘܬܪ̈ܺܝܢ ܘܝܳܗܽܘܒܐ ܘܰܡܫܰܟܢܳܢܳܐ. ܘܡܥܬܪܢܐ ܓܡܝܪܐ ܕܰܐܥܬܰܪ ܘܡܰܥܬܰܪ ܠܟܽܠ. ܘܗܽܘ ܠܳܐ ܡܶܬܒܰܨܰܪ ܐܰܘ ܣܳܟ ܚܳܣܰܪ. ܘܝܰܬܺܝܪ ܡܶܢ ܝܰܨܺܝܦܽܘܬܳܐ ܕܢܳܣܽܘ̈ܒܶܐ ܠܡܶܫܩܰܠ. ܝܳܨܶܦ ܗܽܘ ܘܨܳܒܶܐ ܘܰܪܓܺܝܓ ܠܡܶܬܰܠ. ܗܽܘ ܐܰܥܬܰܪ ܠܡܰܠܰܐܟ̈ܶܐ ܒܫܽܘܟܳܢܳܐ. ܘܠܰܫܡܰܝܳܐ ܒܢܰܗܺܝܪ̈ܶܐ. ܘܰܠܡܰܘܙܰܠܬܳܐ ܒܚܰܝ̈ܠܰܘܳܬܳܐ. ܘܠܳܐܐܰܪ ܒܰܥܢܳܢ̈ܶܐ. ܘܰܠܟܽܠܶܗ ܪܩܺܝܥܳܐ ܒܫܽܘܚ̈ܠܳܦܶܐ ܘܓܶܢ̈ܣܶܐ ܕܛܰܝܪܳܐ ܘܦܳܪܰܚܬܳܐ. ܠܰܐܪܥܳܐ ܒܺܐܝ̈ܠܳܢܶܐ ܘܥܶܣ̈ܒܶܐ ܘܝܳܥ̈ܝܳܬܳܐ. ܠܡܰܪ̈ܓܶܐ ܒܗܰܒܳܒ̈ܶܐ ܘܙܰܗܪ̈ܶܐ ܘܫܽܘ̈ܫܰܢܶܐ. ܠܛܽܘܪ̈ܶܐ ܒܰܐܪ̈ܙܶܐ ܘܫܰܪ̈ܘܰܝܢܶܐ. ܘܡܰܒܽܘ̈ܥܶܐ ܘܥܰܝ̈ܢܳܬܳܐ. ܠܦܰܩ̈ܥܳܬܳܐ ܒܢܰܗܪ̈ܰܘܳܬܳܐ ܘܫܶܦ̈ܥܶܐ. ܠܰܬܗܽܘܡ̈ܶܐ ܒܩܶܒ̈ܝܳܬܳܐ ܘܝܰܡܡ̈ܶܐ ܠܳܐ ܡܶܬܥܰܒܪ̈ܳܢܶܐ. ܠܝܰܡܡ̈ܶܐ ܬܽܘܒ ܘܰܠܢܰܗܪ̈ܰܘܳܬܳܐ ܒܪ̈ܰܚܫܳܐ ܠܳܐ ܡܶܣܬܰܝܟ̥ܳܢܳܐ. ܕܢܽܘ̈ܢܶܐ ܘܩܰܝ̈ܛܶܐ ܘܬܰܢܺܝ̈ܢܶܐ. ܠܝܰܒܫܬܳܐ ܬܽܘܒ ܒܚܰܝܽܘܬܳܐ ܘܰܒܥܺܝܪܳܐ ܘܪ̈ܰܟܫܳܐ ܘܒܰܩܪ̈ܳܐ ܘܥܳܢ̈ܳܐ[1] ܘܪ̈ܰܡܟܳܐ ܘܰܫܝܳܪ̈ܳܬܐ ܕܟܽܠ ܓܶܢ̈ܣܺܝܢ. ܐܰܦܶܩ ܬܽܘܒ ܡܶܢܐ ܐܰܪܥܳܐ ܟܝܳܢ̈ܶܐ ܝܰܩܺܝܪ̈ܳܬܳܐ ܠܰܚܫܰܚܬܳܐ ܕܰܒܢܰܝ̈ܢܳܫܳܐ ܘܩܽܘܝܳܡ ܥܳܠܡܳܐ. ܕܰܐܝܟ ܡܷ̈ܛܐܠܐܣ ܐܰܘܟܺܝܬ ܢܦܩ̈ܐ ܘܚܶܦܪ̈ܶܐ ܕܕܰܗܒܳܐ ܘܣܺܐܡܳܐ. ܘܳܢܟܳܐ[2] ܘܰܢܚܳܫܳܐ ܘܰܐܒܳܪܳܐ ܘܦܰܪܙܠܳܐ. ܥܰܡ ܐܳܕ̈ܫܶܐ ܐ̱ܚܪ̈ܳܢܶܐ ܕܠܳܐ ܡܶܢܝܳܢܳܐ. ܥܰܡ ܛܳܒ̈ܥܶܐ ܛܳܒ̈ܶܐ ܘܟܺܐܦܱ̈ܝ ܫܽܘܒܚܳܐ. ܘܒܶܪ̈ܽܘܠܶܐ ܘܝܽܘ̈ܩܰܢܬܶܐ. ܘܰܙܡܰܪ̈ܓܕܶܐ ܘܩܪ̈ܩܕܢܐ ܘܣܦܝ̈ܠܐ ܘܫܦܗ ܘܣܰܪܕܽܘܢ ܥܰܡ ܫܰܪܟܳܐ ܕܺܝܕܺܝܥܺܝܢ ܘܰܫܟܺܝܚܺܝܢ. ܐܰܣܶܩ ܬܽܘܒ ܡܶܢ ܝܰܡܳܐ ܡܰܪ̈ܓܳܢܝܳܬܳܐ ܛܳܒ̈ܳܬܳܐ ܘܝܰܩܺܝܪ̈ܳܬ̥ ܕܡܰܝ̈ܳܐ ܥܰܡ ܫܰܪܟܳܐ ܕܰܚܠܺܝ̈ܙܽܘܢܶܐ ܘܰܐܪ̈ܓܘܳܢܶܐ ܘܨܽܘܒܥ̈ܐ ܫܰܦܺܝܪ̈ܶܐ. ܐܰܥܬܰܪ ܬܽܘܒ ܠܰܒܢܰܝ̈ܢܳܫܳܐ ܘܰܠܪ̈ܰܟܫܳܐ ܘܰܒܥܺܝܪܳܐ. ܒܚܰܝܠܳܐ ܘܓܰܢ̱ܒܳܪܽܘܬܳܐ ܘܰܠܒܺܝܒܽܘܬܳܐ ܘܰܡܚܰܡܣܢܳܢܽܘܬܳܐ. ܥܳܡ ܪܶܒܽܘ ܪ̈ܶܒܘܳܢ ܫܰܪ̈ܒܶܐ ܘܣܳܥܽܘܪ̈ܘܳܬܳܐ ܡܝܰܩܪ̈ܳܬܳܐ ܘܝܰܩܺܝܪ̈ܳܬܳܐ ܕܰܐܥܬܰܪ ܠܥܳܠܡܳܐ ܡܶܬܝܰܕܥܳܢܳܐ ܘܡܶܬܚܰܙܝܳܢܳܐ. ܟܰܕ ܠܰܝܬ ܕܰܐܦܺܝܣܶܗ ܘܰܒܥܳܐ ܡܶܢܶܗ. ܘܗܳܢܰܘ ܥܰܬܺܝܪܳܐ ܡܳܪܳܢܳܝܳܐ ܕܰܐܥܬܰܪ ܠܟܽܠ ܫܦܺܝܥܳܐܝܬ ܘܡܰܠܝܳܐܝܬ̥ ܘܰܓܡܺܝܪܳܐܝܬ̥. ܘܗܽܘ ܣܳܟ ܠܳܐ ܚܣܰܪ ܐܰܘ ܚܳܣܰܪ ܐܰܘ ܡܶܬܒܰܨܰܪ ܡܶܢ ܥܰܬܺܝܪܽܘܬܶܗ ܡܫܰܡܠܰܝܬܳܐ. ܚܰܟܺܝܡܳܐ ܐܰܘܟܺܝܬ ܚܰܟܺܝܡ ܒܟܽܠ ܡܶܬ̥ܶܐܡܰܪ ܘܺܐܝܬܰܘܗܝ. ܒܗܳܝ ܕܗܽܘ ܐܺܝܬܰܘܗܝ ܚܰܟܺܝܡܳܐ ܡܫܰܡܠܝܳܐ ܘܡܳܪܳܢܳܝܳܐ ܘܰܓܡܺܝܪ ܒܚܶܟܡܬܳܐ ܟܝܳܢܳܝܬܳܐ. ܡܶܛܽܠ ܕܡܶܢܶܗ ܢܳܒ̈ܥܳܢ ܟܽܠ ܚܶܟ̈ܡܳܢ ܘܡܶܬܝܰܗ̈ܒܳܢ ܟܽܠ ܝܰܕ̈ܥܳܢ. ܘܡܰܢܽܘ ܡܨܶܐ ܕܰܢܣܰܝܰܟ̥ ܐܰܘ ܕܢܰܕܪܶܟ ܚܶܟܡܬܶܗ ܡܰܠܝܰܬ̥ ܟܽܠ ܦܽܘܪ̈ܫܳܢ. ܘܺܝܕܰܥܬܶܗ ܚܳܟܡܰܬ̥ ܟܽܠ ܣܽܘܥܪܳܢ. ܘܟܽܠ ܡܶܠܺܝ̈ܢ ܘܟܽܠ ܚܽܘ̈ܫܳܒܺܝܢ. ܕܰܗܘܰܘ ܘܗܳܘܶܝܢ ܓܰܠܝܳܐܝܬ ܘܟܰܣܝܳܐܝܬ. ܘܰܒܗܽܘܢ ܒܬܰܘܳܢ̈ܶܐ ܟܣܰܝ̈ܳܐ ܘܥܰܡܺܝ̈ܩܶܐ ܕܠܶܒܰܘܴ̈ܬܳܐ ܘܗܰܘ̈ܢܶܐ ܕܟܽܠܗܽܘܢ ܡܠܺܝ̈ܠܶܐ ܐܰܝܟ ܗܰܘ ܕܡܶܢ ܟܰܕܽܘ ܗܘܰܘ ܘܶܐܫܬܰܡܠܺܝܘ. ܐܰܝܟ ܕܰܥܬܺܝܕܺܝܢ ܕܢܶܗܘܽܘܢ. ܐܰܘ ܢܶܬܬܙܺܝܥܽܘܢ ܒܗܰܘܢܳܐ ܘܡܰܚܫܰܒܬܳܐ. ܩܰܕܶܡ ܝܺܕܰܥ ܐܶܢܽܘܢ ܩܕܳܡ ܬܰܪ̈ܡܝܳܬܶܗ ܕܥܳܠܡܳܐ. ܘܗܽܘ ܝܰܗܒ ܘܫܰܟܶܢ ܪܽܘܚܳܐ ܕܚܶܟܡܬܳܐ ܘܡܰܕܥܳܐ ܘܣܽܘܟܳܠܳܐ ܘܺܝܕܰܥܬܳܐ ܘܕܰܡܩܰܕܡܽܘܬ̥ ܒܽܘ̈ܕܳܩܶܐ ܕܰܥܬܺܝ̈ܕܳܬܳܐ ܠܡܰܠܰܐܟ̈ܶܐ ܘܠܰܒܢܰܝ̈ܢܳܫܳܐ ܒܚܶܟܡܬܳܐ ܪܰܒܬܳܐ ܘܰܬܗܺܝܪܬܳܐ. ܘܠܳܐ ܣܳܟ ܡܶܬܕܰܪܟܳܢܺܝܬܳܐ ܠܰܥܒܺܝ̈ܕܶܐ. ܒ̣ܪܳܐ ܘܰܐܩܺܝܡ ܠܚܰܝ̈ܠܰܘܳܬܳܐ ܫܡܰܝܳܢ̈ܶܐ. ܘܛܰܟܶܣ ܠܬܶܓܡܰܝ̈ܗܽܘܢ ܘܰܠܓܽܘ̈ܕܰܝܗܽܘܢ ܘܰܠܟܶܢ̈ܫܰܝܗܽܘܢ ܘܰܠܦܽܘܠܚܳܢܗܽܘܢ ܘܬܶܫܡܶܫܬܗܽܘܢ. ܘܰܡܬ̥ܰܚ ܠܰܫܡܰܝܳܐ ܘܰܐܟܪܶܟ̥ ܠܡܰܘܙܰܠܬܳܐ ܘܰܣܕܰܪ ܠܢܰܗܺܝܪ̈ܶܐ ܘܬܰܚܶܡ ܡܰܪܕܺܝܬܗܽܘܢ ܘܙܰܘ̈ܥܰܝܗܽܘܢ ܘܡܶܬܟܰܪܟܳܢܽܘܬܗܽܘܢ. ܘܟܽܠܶܗ ܢܳܡܽܘܣܗܽܘܢ. ܘܰܐܫܶܒ ܠܳܐܐܰܪ ܗܳܢܳܐ ܠܣܰܘܩܳܐ ܕܟܽܠ ܕܚܰܝ ܘܡܶܬ̊ܬܙܺܝܥ. ܘܰܠܩܽܘܝܳܡ ܒܪܺܝܬܳܐ ܘܰܡܛܰܟܣܽܘܬ̥ ܥܢܳܢ̈ܶܐ ܘܡܶܛܪ̈ܶܐ ܘܰܪ̈ܣܺܝܣܶܐ ܘܬܰܚܡܶܗ ܒܫܽܘܚ̈ܠܳܦܶܐ ܬܗܺܝܪ̈ܶܐ ܠܰܢܛܺܝܪܽܘܬܳܐ ܘܬܰܪܒܺܝܬܳܐ ܘܫܰܦܺܝܪܽܘܬ̥ ܩܽܘܝܳܡܳܐ ܘܡܰܪܕܺܝܬܳܐ ܕܥܳܠܡܳܐ. ܒܚܶܟܡܬܳܐ ܪܰܒܬܳܐ ܘܠܳܐ ܡܶܬܕܰܪܟܳܢܺܝܬܳܐ. ܛܰܟܶܣ ܙܰܒ̈ܢܶܐ ܘܰܫܢܰܝ̈ܳܐ ܘܝܰܪ̈ܚܶܐ ܘܫܰܒ̈ܶܐ ܘܺܐܝܡܳܡ̈ܶܐ ܘܠܰܝ̈ܠܰܘܳܬܳܐ ܘܫܳܥ̈ܶܐ ܘܥܶܕܳܢ̈ܶܐ. ܘܰܒ̣ܪܳܐ ܘܬܰܩܶܢ ܒ̈ܢܰܝ ܐ̱ܢܳܫܳܐ ܘܰܒܥܺܝܪܳܐ ܘܚܰܝ̈ܘܳܬܳܐ ܘܦܳܪ̈ܚܳܬܳܐ ܘܪ̈ܰܚܫܳܐ ܘܫܰܪܟܳܐ ܕܓܶܢ̈ܣܶܐ ܕܟܽܠ ܕܚܰܝ ܘܪܳܚܶܫ ܘܡܶܬܬܙܺܝܥ ܒܕܺܝܠܳܝܴ̈ܬܗܽܘܢ ܘܳܐܕܫܰܝ̈ܗܽܘܢ ܘܰܩܢܽܘ̈ܡܰܝܗܽܘܢ ܘܓܰܘ̈ܢܰܝܗܽܘܢ ܘܰܡܦܰܬܟܽܘܬܗܽܘܢ ܘܨܽܘܪܬܗܽܘܢ ܘܰܥܝܳܕܗܽܘܢ ܘܣܳܥܽܘܪ̈ܘܳܬܗܽܘܢ ܘܬܶܫܡ̈ܫܳܬܗܽܘܢ ܘܡܰܦܪܝܳܢܽܘܬܗܽܘܢ ܘܬܰܘܠ̈ܕܳܬܗܽܘܢ ܘܬܽܘܪܣܳܝܗܽܘܢ ܘܬܰܪܒܺܝܬܗܽܘܢ ܘܰܚܠܺܝܛܽܘܬܗܽܘܢ ܘܰܦܪܺܝܫܽܘܬܗܽܘܢ ܘܟܶܢ̈ܫܰܝܗܽܘܢ ܘܰܡܒܰܕܪܽܘܬܗܽܘܢ ܥܰܡ ܣܰܓܺܝ̈ܐܬܳܐ ܕܒܰܟܝܳܢܗܽܘܢ ܘܰܒܕܺܝܠܳܝ̈ܳܬܗܽܘܢ. ܒܚܶܟܡܬܳܐ ܬܗܺܝܪܬܳܐ ܪܩܰܥ ܠܰܐܪܥܳܐ ܘܰܐܪܘܰܚ ܦܰܩ̈ܥܳܬܳܐ ܘܥܰܠܺܝ ܛܽܘܪ̈ܶܐ. ܘܰܐܣܶܩ ܪ̈ܳܡܳܬܳܐ ܘܨܰܒܶܬ̥ ܐܶܢܶܝܢ ܒܺܐܝ̈ܠܳܢܶܐ ܘܝܳܥ̈ܝܳܬܳܐ ܘܥܶܣ̈ܒܶܐ ܘܦܰܩ̈ܚܶܐ ܘܗܰܒܳܒ̈ܶܐ ܡܦܰܬܟ̈ܶܐ ܕܟܽܠ ܓܢܶܣ ܕܡܰܬܗܪܺܝܢ ܠܚܰܙܳܝ̈ܶܐ ܒܫܽܘܚܠܳܦ ܓܰܘ̈ܢܰܝܗܽܘܢ ܘܪܺܝܚܗܽܘܢ ܘܛܰܥ̈ܡܳܬܗܽܘܢ. ܥܰܡ ܫܰܪܟܳܐ ܕܡܰܥܒ̈ܕܳܢܘܳܬܗܽܘܢ. ܟܰܕ ܐܰܪܥܳܐ ܕܢܰܦܩܺܝܢ ܡܶܢܳܗ̇ ܚܰܕ ܗ̱ܘ̣ ܟܝܳܢܳܗ̇. ܘܠܳܐ ܓܰܘܢܳܐ ܐܺܝܬ ܠܳܗ̇ ܘܠܳܐ ܛܰܥܡܳܐ ܘܠܳܐ ܪܺܝܚܳܐ. ܐܶܬܒܰܝܢ ܬܽܘܒ ܒܩܶܒ̈ܝܳܬܳܐ ܕܫܶܛܚ̈ܶܐ ܚܰܟܺܝܡ ܒܟܽܠ ܘܶܐܬܗܰܘܢܰܢ ܘܰܠܪܰܒܽܘܬܗܽܘܢ ܘܰܠܪܳܡܽܘܬܗܽܘܢ ܘܰܡܥܰܪܡܽܘܬܗܽܘܢ ܘܶܐܬܕܰܡܪ ܐܰܝܟܰܢܳܐ ܚܒܺܝܫܳܐ ܗܳܝ ܟܽܠܳܗ̇ ܡܶܬܬܙܺܝܥܳܢܽܘܬܗܽܘܢ ܘܰܙܩܺܝܦܽܘܬ̥ ܓܰܠ̈ܠܰܝܗܽܘܢ ܘܡܰܚ̈ܫܽܘܠܰܝܗܽܘܢ. ܠܓܰܘ ܡܶܢ ܬܚܽܘܡܳܐ ܕܚܳܠܳܐ ܪܰܦܝܳܐ ܘܰܒܕܺܝܪܳܐ. ܐܶܬܚܰܫܒ ܬܽܘܒ ܠܣܰܓܺܝܐܘܬ ܓܶܢ̈ܣܶܐ ܘܳܐܕܫ̈ܶܐ ܕܢܽܘ̈ܢܶܐ ܘܪ̈ܰܚܫܳܐ ܣܰܓܺܝܐܐ ܕܒܰܬܗܽܘ̈ܡܰܝܗܽܘܢ. ܥܰܡ ܡܰܪ̈ܓܳܢܝܳܬܳܐ ܫܒܺܝ̈ܚܳܬܳܐ ܘܟܺܐܦܱ̈ܝ ܫܽܘܒܚܳܐ ܕܰܒܥܽܘܡܩܰܝ̈ܗܽܘܢ. ܘܡܳܢܳܐ ܐܰܣܓܶܐ ܘܺܐܡܰܪ ܥܰܠ ܚܶܟܡܬܳܐ ܡܰܠܝܰܬ̥ ܦܽܘܪ̈ܫܳܢܶܐ. ܘܠܳܐ ܡܶܬܥܰܩܒܳܢܺܝܬܳܐ. ܕܠܳܐ ܡܰܨܝܳܐ ܠܡܰܠܰܐܟ̈ܶܐ ܘܠܰܒ̈ܢܰܝ ܐ̱ܢܳܫܳܐ ܟܽܠܗܽܘܢ ܕܢܶܒܨܽܘܢ ܘܢܰܕܪܟܽܘܢ ܒܶܨܪܳܐ ܙܥܽܘܪܳܐ ܡܶܢ ܬܗܽܘܡܳܐ ܪܰܒܳܐ ܘܥܽܘܡܩܳܐ ܠܳܐ ܡܶܬܡܰܫܚܳܢܳܐ ܕܚܶܟܡܬܳܐ ܘܺܝܕܰܥܬܳܐ ܕܗܰܘ ܚܰܟܺܝܡ ܒܟܽܠ ܒܰܠܚܽܘܕܰܘܗܝ. ܘܰܫܒܽܘܩ ܣܰܓܺܝ̈ܐܬܐ ܘܠܳܐ ܡܶܣܬܰܝ̈ܟܳܢܝܬܳܐ ܕܰܐܩܺܝܡ ܘܰܥܒܰܕ ܘܛܰܟܶܣ ܥܳܒܽܘܕܳܐ ܚܰܟܺܝܡܳܐ ܒܺܝܕܰܥܬܶܗ ܠܳܐ ܡܶܬܕܰܪܟܳܢܺܝܬܳܐ. ܘܰܗܦܽܘܟ ܠܘܳܬ ܢܰܦܫܳܟ ܘܶܐܬܒܰܩܳܐ ܐܰܢ̱ܬ ܒܳܟ ܘܶܐܬܒܰܝܢ ܒܰܒܪܺܝܬܳܟ ܘܰܬܗܰܪ ܘܶܐܬܕܰܡܪ ܐܰܢ̱ܬ ܒܳܟ. ܐܰܝܟܰܢ ܒܳܟ ܡܣܰܝ̈ܟ̥ܳܢ ܟܽܠܗܶܝܢ ܒܶܪ̈ܝܳܬܳܐ ܕܡܶܬܝܰܕ̈ܥܳܢܶܐ ܘܡܶܬܪ̈ܰܓܫܳܢܶܐ. ܕܰܡܠܺܝ̈ܠܶܐ ܘܠܳܐ ܡܠܺܝ̈ܠܶܐ. ܕܪ̈ܳܓܽܘܫܶܐ ܘܠܳܐ ܪ̈ܳܓܽܘܫܶܐ. ܘܗܳܝ ܕܪܰܒܳܐ ܡܶܢ ܟܽܠܗܶܝܢ ܘܝܰܬܺܝܪ ܬܡܺܝܗܳܐ ܘܰܠܕܽܘܡܳܪܳܐ ܫܳܘܝܳܐ. ܕܰܥܒܺܝܕ ܐܰܢ̱ܬ ܒܨܰܠܡܶܗ ܘܰܕܡܽܘܬ̥ܶܗ ܕܥܳܒܽܘܕܳܟ. ܘܺܐܝܬ̥ܰܝܟ ܐܰܣܳܪܳܐ ܘܰܡܟܰܢܫܳܢܳܐ ܘܳܐܚܽܘܕܳܐ ܕܟܽܠܗܶܝܢ ܒܶܪ̈ܝܳܬܳܐ ܘܰܕܒܳܪܽܘܝܳܐ. ܘܶܐܠܽܘ ܪܶܒܽܘ ܫܢܺܝ̈ܢ ܚܳܝܶܐ ܗܘܰܝܬ ܒܥܳܠܡܳܐ ܠܳܐ ܣܳܦܶܩ ܐܰܢ̱ܬ ܘܠܳܐ ܡܣܰܝܶܟ̥ ܐܰܢ̱ܬ ܕܬܺܐܠܰܦ ܠܚܶܟܡܬܳܐ ܪܰܒܬܳܐ ܕܩܽܘܝܳܡܳܟ ܘܰܒܪܺܝܬܳܟ ܕܺܝܠܳܟ. ܡܳܕܶܝܢ ܥܰܠ ܒܳܪܽܘܝܳܟ ܘܫܰܪܟܳܐ ܕܒܶܪ̈ܝܳܬܶܗ ܘܐ̱ܪ̈ܳܙܶܐ ܪܰܘܪ̈ܒܶܐ ܘܚܶܟ̈ܡܳܬܳܐ ܬܗܺܝܪ̈ܳܬܳܐ ܕܰܛܡܺܝܪ̈ܳܢ ܒܰܟ̈ܝܳܢܶܐ ܘܰܗ̈ܘܰܝܳܐ. ܐܰܝܟܰܢܳܐ ܡܨܶܐ ܐܰܢ̱ܬ ܠܡܰܕܪܳܟܽܘ ܐܰܘ ܠܰܡܣܰܝܳܟܽܘ ܝܺܕܰܥܬܳܐ ܕܰܥܠܰܝܗܶܝܢ. ܐܶܬܚܰܫܒ ܐܰܢ̱ܬ ܥܰܠ ܝܳܬ̥ܳܟ. ܐܰܝܟܰܢ ܡܚܰܝܕܳܐ ܢܰܦܫܳܟ ܪܽܘܚܳܢܳܝܬܳܐ ܘܢܰܗܺܝܪܬܳܐ ܘܩܰܛܺܝܢܬܳܐ ܘܰܡܩܰܒܠܳܢܺܝܬܳܐ ܕܗܰܘܢܳܐ ܘܕܺܝܕܰܥܬܳܐ. ܥܰܡ ܦܰܓܪܳܟ ܗܳܢܳܐ ܥܰܒܝܳܐ ܘܰܓܫܺܝܡܳܐ ܘܝܰܩܺܝܪܳܐ ܘܰܡܪܰܟܒܳܐ ܘܶܐܣܛܽܘܟܣܳܝܳܐ. ܘܶܐܠܽܘ ܐܰܝܟ ܕܶܐܡܪܶܬ̥ ܪܶܒܽܘ ܫܢܰܝ̈ܳܐ ܚܳܝܶܐ ܗܘܰܝܬ ܠܳܐ ܣܳܦܶܩ ܗ̱ܘܰܝܬ ܕܬܺܐܠܰܦ ܥܰܠ ܟܝܳܢܳܗ̇ ܕܢܰܦܫܳܟ. ܘܰܐܝܟܰܢܳܝܽܘܬܳܗ̇ ܘܰܕܡܶܢ ܐܰܝܟܳܐ ܗ̱ܝ. ܘܡܳܢܳܝܽܘܬ̥ܳܗ̇ ܘܽܐܘܣܺܝܰܐ ܕܺܝܠܳܗ̇ ܘܪ̈ܶܓܫܶܝܗ̇ ܘܕܺܝܠܳܝ̈ܳܬܳܗ̇ ܘܡܰܥܒ̈ܕܳܢܘܳܬܳܗ̇. ܘܰܐܝܟܰܢ ܫܰܪܝܳܐ ܒܦܰܓܪܳܐ ܘܰܡܚܰܝܕܳܐ ܩܰܛܺܝܢܽܘܬܳܗ̇ ܒܥܰܒܝܽܘܬܶܗ. ܐܳܦܠܳܐ ܬܽܘܒ ܥܠܰܘܗܝ ܕܦܰܓܪܳܐ ܡܨܶܐ ܐܰܢ̱ܬ ܠܡܰܕܪܳܟܽܘ ܟܝܳܢܶܗ ܘܩܽܘܝܳܡܶܗ ܕܰܒܓܰܒܪܳܐ ܘܰܙܥܽܘܪܽܘܬܶܗ ܕܒܰܐܢ̱ܬܬܳܐ. ܘܪܽܘܟܳܒ ܨܽܘܪ̈ܳܬܶܗ ܕܰܒܟܰܪܣܳܐ. ܘܰܩܒܺܝܥܽܘܬ̥ ܗܰܕܳܡܰܘ̈ܗܝ ܓܰܘܳܝ̈ܶܐ ܘܒܰܪ̈ܳܝܶܐ. ܘܰܡܛܰܟܣܽܘܬ̥ ܪ̈ܶܓܫܰܘܗܝ ܘܕܺܝܠܳܝ̈ܳܬܗܽܘܢ ܘܡܰܥܒ̈ܕܳܢܘܳܬܗܽܘܢ ܘܰܟܝܳܢܰܝ̈ܗܽܘܢ ܘܣܳܥܽܘܪ̈ܘܳܬܗܽܘܢ. ܘܰܐܝܟܰܢ ܡܩܰܒܶܠ ܬܽܘܪܣܳܝܳܐ ܘܰܦܫܳܪܳܐ ܘܬܰܪܒܺܝܬܳܐ. ܘܰܐܝܟܰܢ ܐܺܝܬܰܝܗܽܘܢ ܟܽܘ̈ܡܘ ܐܰܘܟܺܝܬ ܚܶܠ̈ܛܶܐ ܒܒܶܣܪܳܐ ܘܰܒܓܰܪ̈ܡܶܐ ܘܰܒܘܰܪ̈ܺܝܕܶܐ. ܘܫܶܪ̈ܝܳܢܶܐ ܘܡܶܫܟܳܐ ܘܣܰܥܪܳܐ ܘܛܶܦܪ̈ܶܐ. ܘܰܐܝܟܰܢ ܪܳܗܶܛ ܚܰܝܠܳܐ ܕܡܶܐܟܽܘܠܬܳܐ ܘܫܶܩܝܳܐ ܒܟܽܠܶܗ ܓܽܘܫܡܳܐ ܡܶܢ ܣܰܥܪܳܐ ܘܰܥܕܰܡܳܐ ܠܛܶܦܪ̈ܶܐ. ܘܰܐܝܟܰܢ ܡܰܥܒܶܕ ܚܰܝܠܳܐ ܕܣܰܡܡܳܢ̈ܶܐ ܘܚܰܝܠܳܐ ܕܥܶܩܳܪ̈ܶܐ ܒܟܽܘ̈ܡܽܘ ܘܰܒܡܽܘܙܳܓܶܗ ܕܓܽܘܫܡܳܐ ܘܰܟܝܳܢܶܗ. ܥܰܡ ܣܰܓܺܝ̈ܐܬܐ ܕܳܐܦܠܳܐ ܫܡܳܗܰܝ̈ܗܽܘܢ ܡܣܰܝܟ̥ܺܝܢܰܢ ܕܢܺܐܡܰܪ. ܗܳܟܘܳܬ̥ ܘܰܒܓܽܘܫ̈ܡܶܐ ܟܽܠܗܽܘܢ ܕܚܰܝ̈ܘܳܬܳܐ ܐ̱ܚܪ̈ܳܢܶܐ. ܘܰܒܟܽܠܗܽܘܢ ܟܝܳܢ̈ܶܐ ܘܰܗܘܱ̈ܝܳܐ ܕܒܰܐܪܥܳܐ. ܘܰܒܝܰܡܡ̈ܶܐ ܘܢܰܗܪ̈ܰܘܳܬܳܐ ܘܒܳܐܐܰܪ ܘܒܰܪܩܺܝܥܳܐ ܘܰܒܡܰܘܙܰܠܬܳܐ ܘܒܰܫܡܰܝܳܐ. ܘܰܠܥܶܠ ܡܶܢ ܫܡܰܝܳܐ ܕܡܶܬܚܰܙ̈ܝܳܢ ܘܒܰܐܬܪ̈ܰܘܳܬܳܐ ܕܡܰܠܰܐܟ̈ܶܐ ܘܫܰܪܟܳܐ ܕܚܰܝ̈ܠܰܘܳܬܳܐ ܥܶܠܳܝ̈ܶܐ ܫܰܪܺܝܪܳܐܝܬ̥ ܠܳܐ ܡܶܣܬܰܝܟ̥ܳܐ ܘܠܳܐ ܡܶܬܕܰܪܟܳܐ ܚܶܟܡܬܳܐ ܪܰܒܬܳܐ ܕܗܰܘ ܚܰܟܺܝܡ ܒܟܽܠ ܒܰܠܚܽܘܕܰܘܗܝ܀
ܗܳܢܰܘ ܚܰܟܺܝܡܳܐ ܘܰܓܡܺܝܪܳܐ ܘܰܡܫܰܡܠܝܳܐ ܘܠܶܗ ܙܳܕܶܩ ܕܰܢܟܰܢܶܐ ܘܰܢܫܰܡܰܗ ܚܰܟܺܝܡܳܐ ܒܰܠܚܽܘܕܰܘܗܝ. ܡܳܕܶܝܢ ܐܶܫܬܰܪܪܰܬ̥ ܕܗܽܘܝܽܘ ܚܰܟܺܝܡܳܐ ܡܳܪܳܢܳܝܳܐ ܕܠܰܝܬ ܣܳܟܳܐ ܠܣܽܘܟܳܠܳܐ ܕܺܝܕܰܥܬܶܗ. ܒܗܳܠܶܝܢ ܡܶܟܺܝܠ ܡܶܬܺܝܕܰܥ ܘܡܶܬܟܰܢܶܐ ܘܡܶܫܬܰܡܰܗ ܗܰܘ ܠܳܐ ܡܶܬܕܰܪܟܳܢܳܐ. ܗܳܢܰܘ ܕܶܝܢ܉ ܗܰܘ ܕܺܐܝܬܰܘܗܝ ܛܳܒܳܐ ܘܥܰܬܺܝܪܳܐ ܘܚܰܟܺܝܡܳܐ ܓܡܺܝܪܳܐܝܬ̥ ܘܰܡܫܰܡܠܝܳܐܝܬ̥. ܘܠܶܗ ܬܶܫܒܽܘܚܬܳܐ ܠܥܳܠܡܺܝܢ ܐܰܡܺܝܢ. ܘܰܒܗܳܠܶܝܢ ܫܠܶܡ ܒܝܰܕ ܐܰܠܳܗܳܐ ܕܚܰܝܶܠ܀
ܡܰܒܘܿܥܳܐ ܕܟܬܺܝܼܒܬܐ: https://w3id.org/vhmml/readingRoom/view/125667
ܢܽܘܼܗܳܪܳܐ: ܟܬܺܝܼܒܬܳܐ ܗܳܕܶܐ ܫܟܺܝܼܚܳܐ ܒܰܟܬܳܒܳܐ ܚܰܕ ܕܰܛܥܺܝܼܢ ܫܶܡ «ܥܶܠܬܳܐ ܕܟܽܠ ܥܶܠ̈ܠܳܢ. ܟܬܳܒܳܐ ܓܰܘܳܢܳܝܳܐ ܠܟܽܠ ܥܰܡ̈ܡܺܝܼܢ ܕܰܬܚܶܝܬ ܫܡܰܝܳܐ». ܘܰܢܛܺܝܼܪ ܒܒܶܝܬ ܐܰܪ̈ܟܶܐ ܕܥܺܕܬܐ ܕܐܰܪܒܥܺܝܢ ܣܳܗ̈ܕܶܐ ܕܡܰܪܕܺܝܢ. ܘܰܢܣܺܝܟ ܒܝܰܕ ܕܰܝܪܳܝܳܐ ܓܰܒܪܐܝܼܠ ܣܒܺܝܼܪܝܼܢܳܝܳܐ ܒܰܫܢܰܬ ܐܰܠܦܳܐ ܘܰܫܒܰܥ̈ܡܳܐܐ ܘܰܬܡܳܢܺܝܢ ܘܚܰܡܶܫ ܕܝܰܘ̈ܢܳܝܶܐ (ܕܡܰܘܠܳܕܳܐ 1474) ܒܥܽܘܼܡܪܳܐ ܕܒܶܝܬ ܡܳܪܝ ܫܶܡܥܽܘܢ ܘܡܳܪܝ ܫܡܽܘܐܝܼܠ ܘܡܳܪܝ ܓܰܒܪܐܝܼܠ ܒܝܰܘ̈ܡܰܝ ܡܳܪܝ ܝܘܼܚܰܢܳܢ ܐܶܦܶܣܩܺܘܼܦܳܐ ܕܺܝܼܠܶܗ ܕܥܽܘܼܡܪܳܐ.
ܘܰܟܬܺܝܼܒܬܳܐ ܗܳܕܶܐ ܠܩܺܝܛܳܐ ܡܼܶܢ ܐܰܣܳܪܳܐ ܕܢܰܘܠܐ ܕܰܠܥܶܠ ܒܝܰܕ ܡܝܰܩܪܳܐ ܡܰܠܦܳܢܳܐ ܥܺܝܼܣܰܐ ܡܽܘܼܣܰܐ ܕܶܡܺܝܪ ܗܳܢܳܐ ܕܚܳܝܶܐ ܒܐܰܘܣܛܘܪܝܰܐ. ܬܰܘܕܺܝ ܣܰܓܺܝ ܠܐܟܺܝܼܦܘܼܬܶܗ ܘܰܒܛܝܼܠܘܼܬܶܗ ܠܶܫܳܢܳܝܬܐ.
ܦܳܪܘܿܣܳܐ ܝܰܘܣܶܦ ܒܶܓܬܰܫ
You can also send us an email to karyohliso@gmail.com
Leave a Comment