ܦܶܬܓ̈ܳܡܶܐ ܡܓܰ̈ܒܰܝܳܐ

ܦܶܬܓ̈ܳܡܶܐ ܡܓܰ̈ܒܰܝܳܐ

ܕܳܠܩܳܐ ܢܽܘܪܳܐ ܒܠܰܡܦܺܝܕܳܐ: ܘܥܳܒܕܳܐ ܠܶܗ ܒܰܕܡܽܘܬ ܒܰܪܩܳܐ.

ܘܗܳܟܰܢܳܐ ܗܰܝܡܳܢܽܘܬܐ: ܚܳܒܳܐ ܒܠܶܒܳܐ ܘܡܰܢܗܪܳܐ܀

ܐܰܣܓܳܐ ܚܽܘܒܳܐ ܘܡܽܘܟܳܟܳܐ: ܛܳܒ ܡܶܢ ܥܽܘܬܪܳܐ ܘܡܳܡܽܘܢܳܐ.

ܘܥܰܡ ܟܽܠ ܒܰܪܢܳܫ ܐܰܘܝܽܘܬܐ: ܕܛܳܒܳܐ ܠܳܟ ܛܳܒ ܡܶܢ ܣܺܝܡܬܳܐ܀

ܛܳܒܺܝܢ ܡܰܠ̈ܦܳܢܶܐ ܛܳܒ̈ܶܐ: ܡܶܢ ܐܰܒܳܗ̈ܶܐ ܦܰܓܪ̈ܳܢܶܐ.

ܕܡܰܩܢܺܝܢ ܩܶܢ̈ܝܳܢܶܐ ܛܳܒ̈ܶܐ: ܠܝܳܠܽܘܦ̈ܶܐ ܡܶܫ̈ܬܰܡܥܳܢܶܐ܀

ܡܰܠ̈ܦܳܢܶܐ ܓܶܝܪ ܙܰܕܝ̈ܩܶܐ: ܐܰܒܳܗ̈ܶܐ ܚܫܽܘܒ ܪ̈ܽܘܚܳܢܶܐ.

ܘܝܳܠܽܘܦ̈ܶܐ ܡܶܬܛܦܺܝ̈ܣܳܢܶܐ: ܒܢܰܝ̈ ܬܰܪܒܺܝܬܳܐ ܕܩܰܕܺܝ̈ܫܶܐ܀

ܓܶܦ̈ܶܐ ܕܢܰܦܫܳܐ ܩܰܕܺܝܫܬܳܐ: ܕܰܒܗܽܘܢ ܛܳܝܣܳܐ ܠܰܫܡܰܝܳܐ.

ܚܽܘܒܳܐ ܐܶܢܽܘܢ ܘܰܫܠܳܡܳܐ: ܘܗܰܝܡܳܢܽܘܬܐ ܥܰܡ ܣܰܒܪܳܐ܀

ܒܺܝܫܳܐ ܡܚܽܘܬܐ ܕܠܶܫܳܢܳܐ: ܡܶܢ ܡܰܚ̈ܘܳܬܐ ܕܣܰܦܣܶܪܳܐ.

ܕܰܠܗܳܠܶܝܢ ܡܰܐܣܶܐ ܣܰܡܳܐ: ܘܰܠܗܳܝ ܠܐ ܐܝܬ ܐܳܣܝܽܘܬܐ܀

ܚܣܽܘܟ̥ ܡܰܡܠܠܐ ܡܶܛܽܠ ܦܰܘܕܳܐ: ܘܛܰܪ ܛܶܟܣܳܐ ܠܫܶܬܩܳܐ ܒܩܰܕܡܳܐ.

ܕܢܰܩܺܝܦܳܐ ܠܡܰܡܠܠܐ ܬܘܳܬܐ: ܘܚܰܪܬܶܗ ܕܫܶܬܩܳܐ ܝܽܘܬܪܳܢܳܐ܀

ܠܰܝܬ ܬܽܘܩܠܬܐ ܕܠܐ ܩܰܘܡܳܐ: ܐܶܠܐ ܦܰܘܕܳܐ ܕܠܶܫܳܢܳܐ.

ܘܠܐ ܡܚܽܘܬܐ ܕܠܐ ܐܳܣܝܽܘܬܐ: ܐܶܠܐ ܡܰܡܠܠܐ ܕܣܶܦ̈ܘܳܬܐ܀

ܒܺܝܫܬܳܐ ܥܦܺܝܦܬܳܐ ܠܒܰܪ ܐ̱ܢܳܫܳܐ: ܕܢܶܗܘܶܐ ܣܰܟܠܳܐ ܚܒܰܢܳܢܳܐ.

ܘܶܐܢ ܬܽܘܒ ܢܶܗܘܶܐ ܦܰܟܳܢܳܐ: ܗܳܐ ܒܺܝܫܬܳܐ ܕܠܐ ܡܶܬܬܰܟܣܳܐ܀

ܐܰ‌ܠܶܦ ܡܷ̈ܠܶܐ ܠܬܰܠ̈ܡܺܝܕܶܐ: ܘܰܐܢ̱ܬ ܫܰܡܠܳܐ ܒܝܰܕ ܣܽܘܥܪ̈ܳܢܶܐ.

ܕܰܠܩܽܘܫܬܳܐ ܬܶܗܘܶܐ ܬܚܽܘܡܳܐ: ܘܠܰܡܝܰܬܪܽܘܬܐ ܩܳܢܽܘܢܳܐ.

ܡܪܝ ܐܠܝܐ ܕܐܢܒܪ (922)