ܫܘܼܒܳܚܳܐ ܕܒܰܪܢܳܫܐ

ܫܘܼܒܳܚܳܐ ܕܒܰܪܢܳܫܐ

«ܕܠܐ ܗ̱ܘܳܐ ܒܠܰܚܡܳܐ ܒܰܠܚܘܕ ܚܳܝܐ ܒܰܪܢܳܫܳܐ܆ ܐܠܐ ܒܟܠ ܡܶܠܐ ܕܢܳܦܩܳܐ ܡܼܢ ܦܘܼܡܳܐ ܕܐܠܗܐ»

  (ܡܬܝ 4: 4)

 ܫܘܼܒܳܚܳܐ ( reçete, prescription ) ܕܒܰܪܢܳܫܐ ܡܿܢ ܬܠܝܐ ܗ̱ܘ ܒܡܶܫܬܰܟܚܳܢܘܼܬܐ ܕܫܘܼܒܚܳܐ ܓܰܘܳܝܐ. ܘܰܟܕ ܟܪܝܟ ܗ̱ܘ ܒܡܰܪܝܼܪܘܼܬܐ ܘܚܰܠܝܘܼܬܐ܆ ܡܶܣܬܢܳܩܘ ܡܶܣܬܢܶܩ ܠܨܦ̈ܬܐ ܣܓܝ̈ܐܐ: ܕܐܝܟ ܠܒܝܼܒܘܼܬܐ ܘܰܛܢܢܐ ܡܛܰܟܣܐ ܘܐܰܡܝܼܢܐ ܘܚܘܼܡܣܢܐ ܘܥܘܼܙܳܝܐ ܘܫܰܪܝܪܘܼܬܐ ܘܰܬܪܝܼܨܘܬܐ ܘܟܐܢܘܼܬܐ ܘܩܘܼܫܬܐ ܘܚܘܒܐ ܘܐܝܩܪܐ ܘܬܘܼܟܠܢܐ ܝܳܬܢܳܝܐ.... ܘܠܐ ܡܶܫܬܟܰܚ ܐܠܐ ܐܢ ܒܰܪܘܝܼܚܘܼܬ ܬܰܪܥܝܬܐ ܘܝܘܼܠܦܳܢܐ ܚܠܝܼܡܐ. ܒܪܡ ܡܚܝܼܠܘܼܬܐ ܘܰܒܨܝܼܪܘܼܬܐ ܡܬܚܙܝܐ ܒܡܶܨ̈ܥܳܝܘܗܝ ܩܶܨܰܬ ܡܓܰܙܝܘܼܬܐ ܕܣܘܼ̈ܟܳܠܝܳܬܐ ܘܐܝܬܝ̈ܩܳܝܳܬܐ.

 ܒܰܩܛܝܼܪ ܡܼܢ ܫܘܼܘ̈ܫܳܛܐ ܘܛܘܼܘܳܪ̈ܐ ܕܦܳܪܣܝܼܢ ܟܶܢܦ̈ܝܗܘܢ܆ ܠܐ ܢܝܼܚܘܼܬܐ ܫܟܝܼܚܳܐ ܒܛܰܝܘܼܦܘܼܬܐ ܟܪܝܼܟܬܐ. ܘܣܢܝܼܩܘܬܐ ܩܳܪܝܐ ܠܫܘܼܚܠܳܦ ܛܰܝܘܼܦܘܼܬܐ ܕܠܰܚܡܳܐ ܠܥܰܡܝܼܩܘܼܬܐ ܕܡܶܠܬܐ ܗܿܝ ܕܒܗܿ ܒܳܣܡܝܼܢ ܘܥܳܬܪܝܼܢ ܚܝ̈ܐ. ܒܕ ܢܘܼܦܳܫܳܐ ܘܒܘܼܣܳܡܳܐ ܘܢܰܘܚܳܐ ܠܘ ܒܰܠܚܘܼܕ ܡܼܢ ܠܰܚܡܳܐ ܡܶܫܬܰܪܬܰܚ. ܐܠܐ ܐܦ ܡܼܢ ܝܰܡܝܢ̈ܝܳܬܐ ܕܡܶܠܬܐ. ܘܒܰܪܚܘܼܩܝܳܐ ܕܡܼܢ ܓܘܼܪ̈ܳܓܶܐ ܘܚܘܼ̈ܬܚܳܬܐ ܣܡܺܝ̈ܡܶܐ ܕܐܶܢܳܢܳܝܘܼܬܐ ܣܳܚܘܿܦܬܐ.

 ܡܳܕܝܢ ܪ̈ܒܐ ܘܰܙܥܘܪ̈ܐ ܟܠܢ ܫܘܳܬ ܙܕܩ ܕܢܬܚܰܦܰܛ ܒܫܘܼܡܠܳܝܐ ܕܬܰܪܒܝܼܬܐ ܕܠܰܚܡܳܐ ܘܡܶܠܬܐ. ܐܝܟܢܐ ܕܢܶܫܟܰܚ ܫܘܼܒܳܚܰܢ ܪܝܼܫܳܝܐ. ܘܢܶܫܬܰܘܙܒ ܡܼܢ ܝܘܼܩܪܐ ܘܰܢܗܳܓܐ ܥܣܝܼ̈ܣܶܐ ܡܥܰܘ̈ܟܢܐ ܕܡܰܪܕܝܼܬܢ.

 ܚܝ̈ܐ ܡܿܢ ܣܝܼܡܬܐ ܐܢܘܢ ܪܒܬܐ ܕܡܫܬܰܟܢܝܢ ܡܼܢ ܐܠܗܐ. ܘܰܫܟܽܘܼܚܝܳܐ ܕܣܝܼܡܬܐ ܗܕܐ ܠܐ ܡܶܫܬܰܡܠܐ ܐܠܐ ܒܡܶܣܬܰܟܠܳܢܘܼܬܐ ܕܥܳܠܡܐ ܓܰܘܳܝܐ ܕܒܪܢܫܐ. ܘܗܠܝܢ ܕܡܦܣܝܼܢ ܒܡܶܣܬܰܟܠܢܘܼܬܐ ܗܕܐ ܣܝܼܡܝܼܢ ܒܠܶܒܐ ܕܣܝܼܡܬܐ ܗܕܐ. ܘܚܕܘܬܗܘܢ ܠܐ ܡܫܬܰܡܠܝܳܐ ܐܠܐ ܕܢܩܘܡܘܢ ܒܡܘܼܙܳܪ̈ܐ ܬܰܪ̈ܥܝܼܬܳܢܳܝܐ ܡܛܠ ܐܝܩܪܐ ܘܚܘܼܒܐ ܘܛܘܼܘܪܐ ܘܒܘܼܣܳܡܐ ܕܓܰܘܳܐ. ܘܟܕ ܠܐ ܡܬܬܰܟܠܝܢ ܥܠ ܫܰܒܪܘܼܬ ܝܕܥܬܗܘܢ܆ ܠܐ ܢܳܦܩܝܢ ܡܼܢ ܫܒܝܼܠܐ ܕܚܘܒܐ ܫܪܝܪܐ. ܗܿܘ ܐܝܟܐ ܕܡܫܬܟܰܚ ܠܐ ܝܳܗܒ ܐܬܪܐ ܠܕܶܚܠܬܐ ܘܩܢܛܐ. ܘܠܐ ܒܳܥܝܢ ܕܢܣܛܘܢ ܡܼܢ ܫܪܪܐ ܕܟܰܝ̈ܠܐ ܓܰܘ̈ܢܳܝܐ. ܘܠܐ ܨܒܝܢ ܕܢܥܠܘܢ ܒܓܝܓܠܐ ܥܕܝܼܠܬܐ ܕܫܰܦܘܼܪܬܢܘܼܬܐ ܘܫܘܼܒܚܐ ܣܪܝܼܩܐ. ܘܡܢܣܝܢ ܕܢܥܘܕܘܢ ܙܝܙ̈ܢܐ ܡܼܢ ܚܩܠܐ ܕܒܪܢܫܐ ܕܝܠܗܘܢ ܓܰܘܝܐ. ܘܒܓ̈ܦܐ ܣܚܝܼ̈ܚܬܐ ܕܡܠܬܐ ܛܳܝܣܝܢ ܒܪ̈ܥܝܳܢܝܗܘܢ ܗܪܟܐ ܘܬܡܢ. ܘܰܡܦܰܬܫܝܼܢ ܐܳܕܫ̈ܐ ܪ̈ܝܫܳܝܐ ܘܫܳܩܠܝܼܢ ܡܢܗܘܢ ܗܿܘ ܕܛܒ ܘܚܳܫܚ ܠܩܘܼܝܳܡܐ ܘܬܘܼܩܳܢܐ. ܘܡܬܦܪܢܣܝܼܢ ܠܦܘܬ ܢܡܘܿܣܐ ܕܡܶܠܬܐ. ܕܚܳܟܡܝܼܢ ܓܝܪ ܗܿܘ ܕܠܰܚܡܳܐ ܦܰܟܝܗ ܘܰܡܓܝܓ ܘܰܡܬܰܚܰܡ. ܘܡܗܝܡܢܝܢ.

ܚܝܠܐ ܕܒܰܪܢܫܐ ܚܒܝܼܨ ܘܪܒܝܼܨ ܒܪܘܚܐ ܕܬܪܥܝܬܗ. ܗܿܝ ܕܟܕ ܡܫܬܰܒܠܐ ܡܼܢ ܚܟܡܬܐ ܕܪܚܡܬܐ ܘܚܰܘܣܳܢܐ܆ ܡܫܬܰܓܢܝܳܐ ܠܢܘܼܗܪܐ ܕܡܫܰܚܠܦ ܡܰܪܝܼܪ̈ܬܐ ܘܥܰܣܩ̈ܬܐ ܠܗܶܢܝܳܢܐ ܩܢܘܼܡܳܝܐ ܘܓܰܘܢܳܝܐ. ܘܗܝܡܢܘܬܐ ܘܣܒܪܐ ܘܚܘܒܐ ܕܒܪܢܫܐ ܡܫܒ̈ܠܢܐ ܘܡܥܕܪ̈ܢܐ ܗܿܘܝܢ ܠܗ ܒܗܠܝܢ ܕܡܶܠܬܐ ܘܠܰܚܡܐ.

 ܬܪܝܢ ܚܝ̈ܠܐ ܢܳܒܥܝܢ ܡܼܢ ܪܘܼܚܐ ܕܒܪܢܫܐ ܗܿܘ ܕܡܦܳܣ ܒܫܘܼܒܳܚܶܗ: ܩܕܡܝܐ ܡܿܢ ܚܘܒܐ ܗ̱ܘ ܘܢܘܗܪܐ ܕܢܳܣܒ ܡܼܢ ܪܘܚܐ (ܐܠܗܐ). ܘܦܳܪܣ ܘܡܳܙܓ ܠܗ ܒܠܰܚ̈ܡܳܢܳܝܬܐ ܠܦܘܬ ܣܳܦܩܘܼܬܗ ܒܶܠܥܕ ܕܠܘܼܚܝܐ. ܘܬܪܝܢܐ ܕܝܢ ܗܘܼ ܟܕ ܗ̱ܘ ܚܝܠܐ ܗ̱ܘ ܕܦܳܪܣ ܘܡܳܙܓ ܠܗ ܒܠܰܚ̈ܡܳܢܳܝܬܐ ܒܰܕܠܘܼܚܝܐ ܣܡܝܼܡܐ ܕܝܰܨܪ̈ܐ ܒܝܼ̈ܫܐ ܕܐܢܢܳܝܘܼܬܐ ܗܿܝ ܕܐܝܬܝܗܿ ܐܡܗܿ ܕܒܝܼܫ̈ܬܐ ܡܚܰܒ̈ܠܢܝܳܬܐ. 

 ܐܠܐ ܓܘܼܪܓܳܐ ܘܠܘܼܒܒܐ ܕܢܳܒܥ ܡܼܢ ܪ̈ܓܫܐ ܡܒܰܢ̈ܝܢܐ ܐܝܟ ܐܩܣܝܓܢ ܐܝܬܘܗܝ ܠܒܪܢܫܐ ܕܡܬܚܰܦܛ ܕܢܦܪܘܿܣ ܡܘܼܙܳܓܐ ܒܰܣܝܼܡܳܐ ܕܚܘܼܒܐ ܘܢܘܼܗܪܐ ܒܗܝܼܟܕܗܝܼܝܘܼܬܐ ܢܣܝܼܒܬܐ. ܘܒܪܢܫܐ ܗܢܐ «ܠܐ ܪܢܐ ܒܗܳܝ ܕܡܘܢ ܡܨܐ ܕܢܶܣܰܒ. ܐܠܐ ܒܗܳܝ ܕܡܘܢ ܡܨܐ ܕܢܶܬܶܠ». ܕܝܕܥ ܐܝܟ ܕܒܣܘܓܐܐ ܚ̈ܝܐ ܡܬܬܟܝܼܢܝܼܢ ܡܼܢ ܗܿܘ ܡܐ ܕܡܬܩܰܪܒ ܘܡܬܝܗܒ ܠܐ̱ܚܪ̈ܢܐ. ܘܪܳܢܐ ܥܰܡܝܩܐܝܬ ܒܗܿܝ ܕܐܡܪܐ:  ܡܰܓܢ ܢܣܝܒ ܠܝ. ܡܟܐ ܐܦ ܐܢܐ ܫܦܝܥܐܝܬ ܙܕܩ ܠܝ ܠܡܬܠ. ܘܟܕ ܡܬܚܰܦܛ ܠܡܣܬܟܠܘ ܗܠܝܢ ܕܰܟܣܶܝܢ ܒܥܘܒܐ ܕܣܘܟܠܐ ܗܢܐ܆ ܡܚܕܐ ܪܳܓܫ ܕܠܡ ܠܐ ܡܨܝܐ ܕܢܩܢܐ ܚܝܠܐ ܠܘܩܒܠ ܩܛܪ̈ܐ ܘܒܘܼ̈ܠܒܳܠܐ ܐܢܗܘ ܕܠܐ ܢܰܬܩܢ ܢܦܫܗ ܘܡܕܥܗ ܒܗܠܝܢ ܕܡܠܬܐ. ܘܗܝ ܗܕܐ ܠܐ ܡܫܬܪܪܐ ܥܕܡܐ ܕܗܝܼ ܪܘܼܚܐ ܗܳܘܝܳܐ ܡܣܰܘܣܝܳܢܝܼܬܐ ܕܦܓܪܐ ܘܝܰܨܪ̈ܘܗܝ.

ܘܗܕܐ ܐܝܬܝܗܿ ܐܘܪܚܐ ܪܝܼܫܳܝܬܐ ܕܢܳܩܠܐ ܒܪܢܫܐ ܠܘܬ ܫܒܝܼ̈ܠܐ ܟܣ̈ܝܐ ܕܫܘܼܒܳܚܳܐ ܪܒܐ. ܘܡܟܐ ܝܳܥܝܐ ܘܝܳܪܒܐ ܦܪܘܫܘܬܐ. ܗܿܝ ܕܫܳܒܩܐ ܕܢܚܫܘܒ ܗܘ ܠܗ ܗܕܡܐ ܦܪܝܼܫܐ ܒܓܘܼܫܡܳܐ ܕܐ̱ܢܳܫܘܼܬܐ ܒܰܕܡܘܼܬ ܐܝܠܳܢܐ ܘܦܐܪܐ. ܐܠܘܠܐ ܐܝܠܢܐ ܠܝܬ ܦܐܪܐ. ܘܐܠܘܠܐ ܦܐܪܐ ܠܐ ܡܫܬܰܡܠܐ ܐܝܠܢܐ. ܐܠܐ ܗܘܼ ܦܐܪܐ܆ ܟܕ ܡܬܚܫܒ ܐܘ ܚܳܫܒ ܢܦܫܗ ܒܠܚܘܕ ܦܐܪܐ܆ ܘܠܐ ܪܓܫ ܒܐ̱ܚܝܳܢܘܼܬܗ ܟܣܝܼܬܐ ܕܥܡ ܐܝܠܢܐ܆ ܗܝܕܝܟ ܡܫܰܪܐ ܕܢܥܕܘܠ ܢܦܫܗ ܟܕ ܐܡܿܪ: «ܦܰܩܚܐ ܐܝܼܬܰܝ ܗ̱ܘܝܬ. ܘܰܗܘܝܬ ܙܰܪܥܐ ܘܗܰܒܒܐ. ܘܐܫܬܰܪܢܩܶܬ ܘܐܶܬܡܠܝܼܬ ܘܐܬܡܗܺܝܬ. ܒܪܰܡ ܠܚܰܪܬܐ ܗܘܝܬ ܡܐܟܘܠܬܐ ܠܐ̱ܚܪ̈ܢܐ ܣܪܝܼܩܳܐܝܬ.»

 ܚܘܫܒܐ ܗܢܐ ܡܕܰܘܕܢܐ ܓܳܪܦ ܠܰܫܚܘܼܩܝܐ ܘܡܥܝܼܣ̈ܬܐ. ܒܕ ܗܘܼ ܒܪܢܫܐ܆ ܒܐܝܢܐ ܕܰܪܓܐ ܕܢܗܘܐ܆ ܟܕ ܠܐ ܪܳܓܫ ܕܐܝܬܘܗܝ ܗܕܡܐ ܦܪܝܼܫܐ ܘܚܰܝܐ ܒܓܘܼܫܡܐ ܕܒܗ ܡܫܰܡܫ܆ ܠܐ ܡܬܒܰܣܰܡ ܒܣܘܼܟܠܐ ܛܥܝܼܡܐ ܕܐܝܬܘܬܗ. ܘܠܐ ܡܨܝܐ ܕܢܡܛܐ ܠܛܰܥܡܐ ܗܢܐ ܗܢܝܐܐ ܐܠܐ ܒܦܳܪܘܿܫܘܼܬܐ ܪܥܝܳܢܝܬܐ ܕܒܗܿ ܚܳܙܐ ܢܦܫܗ ܡܢܳܬܐ ܒܟܘܠܐ ܕܐܝܠܢܐ. ܘܗܟܢ ܡܬܒܰܣܡ ܘܪܳܘܙ ܥܕܡܐ ܠܗܿܝ ܕܢܬܠܰܣܛܰܪ ܡܼܢ ܥܕܠܳܝܐ ܢܦܫܳܢܝܐ.

 ܐܝܠܢܐ ܘܦܐܪܐ ܟܝܢܐܝܬ ܡܫܰܡܫܝܢ ܘܡܬܪܣܝܢ ܚܕ̈ܕܐ. ܘܗܢܐ ܚܝܠܐ ܟܝܳܢܝܐ ܩܒܝܼܥ ܗ̱ܘ ܒܟܠܢܫ. ܐܠܐ ܩܪܝܡ ܗ̱ܘ ܒܰܫܥܝܼܢܐ ܕܝܰܨܪ̈ܐ ܕܐܢܢܳܝܘܬܐ. ܘܟܕ ܡܬܢܰܩܕ ܫܥܝܼܢܐ܆ ܪܘܼܚܐ ܕܫܘܼܥܠܳܝܐ ܥܳܪܩܐ ܘܫܳܒܩܐ ܕܘܟܬܗܿ ܠܪܘܚܐ ܕܫܘܼܡܠܳܝܐ ܨܒܝܳܢܝܐ. ܘܟܠܡܢ  ܕܡܫܡܠܐ ܘܳܠܝܼܬܗ ܒܣܘܼܟܳܠܐ ܗܢܐ ܟܝܳܢܳܝܐ ܒܐܘܼܪܚܐ ܛܒܬܐ ܩܐܡ. ܥܳܬܪ ܘܡܰܥܬܰܪ. ܡܥܰܕܪ ܘܡܶܬܥܰܕܪ. ܡܫܰܡܠܐ ܘܡܶܫܬܰܡܠܐ. ܐܠܐ ܗܿܘ ܕܠܐ ܩܳܢܐ ܪܘܼܚܐ ܗܕܐ܆ ܒܐܘܪܚܐ ܫܢܝܼܙܬܐ ܩܐܡ ܡܕܰܠܩܒܳܢܝܼܬܐ ܕܟܝܢܐ. ܘܦܳܝܫܐ ܐܘܪܚܗ ܙܠܝܼܡܬܐ ܒܰܥܩܘ̈ܠܝܗܿ ܣܒܝ̈ܣܝܗܿ ܥܕܡܐ ܕܢܬܬܥܝܪ ܪܘܚܢܐܝܬ ܒܰܙܩܘ̈ܬܐ ܕܡܠܬܐ ܗܿܝ ܕܡܢܼ ܒܪܝܫܝܬ ܫܘܼܪܳܝܐ ܛܒܐ ܘܫܘܒܳܚܐ ܡܢܰܦܨܳܢܐ ܫܰܟܢܰܬ ܠܒܪܢܫܐ.

ܐܝܟ ܕܐܰܡܝܼܪܳܐ: «ܗܝܼ ܘܰܪܕܐ ܠܘ ܡܛܠ ܕܡܬܚܰܒܒܳܐ ܝܳܗܒܳܐ ܪܝܼܚܳܐ ܒܰܣܝܼܡܳܐ. ܐܠܐ ܡܛܠ ܪܝܼܚܳܐ ܒܰܣܝܼܡܳܐ ܕܰܡܦܝܼܚܳܐ ܡܬܚܰܒܒܳܐ ܘܡܶܬܢܰܨܪܐ».

ܢܘܗܪܐ: ܣܘܼܟܳܠܐ ܕܒܪܬ ܩܠ «ܫܘܼܒܳܚܐ ܐܘ ܫܘܼܒܰܚܬܐ»  ܠܐ ܕܪܝܼܫ ܘܰܚܫܝܼܫ ܐܠܐ ܒܰܣܝ̈ܡܐ ܐܒܗ̈ܝܐ. ܘܐܝܬܝܗܿ ܘܰܪܩܘܼܢܐ ܕܥܠܝܗܿ ܟܳܬܒ ܐܣܝܐ ܫܡ ܣܡܡ̈ܢܐ ܕܡܰܪܥܳܐ ܘܰܟܪܝܗܐ. ܒܠܫܢܐ ܬܘܪܟܝܐ ܡܿܢ reçete ܘܒܐܢܓܠܝܫܝܐ prescription ܡܬܩܰܪܝܐ.. 

ܝܰܘܣܶܦ ܒܶܓܬܰܫ