ܐܢܐ

ܐܢܐ

ܟܰܕ ܪܳܬܶܡ ܐܰܢ̱ܬ «ܐܶܢܳܐ» ܐ̱ܡܰܪ ܒܠܶܒܳܟ: «ܡܳܪܝ ܗܘܺܝ ܠܺܝܼ ܠܡܺܐܢܳܐ ܒܐܘܼܪܚܳܐ ܕܡܰܘܒܠܐ ܠܘܳܬ ܫܘ̈ܢܳܩܶܐ ܕܐܶܢܳܐ. ܘܰܡܫܰܒܠܳܢܝ ܒܐܘܼܪܚܳܐ ܕܡܰܘܒܠܐ ܠܘܳܬ ܛܘܼܒܬܳܢܽܘܼܬܳܟ.» ܐܳܦܶܢ ܠܐ ܩܪܺܝܼܚܳܐ܆ ܒܪܰܡ ܒܓܰܘ ܒܰܪܬܩܳܠܐ ܗܳܕܐ ܟܰܣܝܳܐ ܪܘܼܚܳܐ ܕܰܒܢܳܬܩ̈ܠܐ ܐ̱ܚܪ̈ܳܢܝܳܬܐ. ܘܟܰܕ ܓܳܠܶܐ ܐ̱ܢܬ ܐ̱ܪܳܙܳܐ ܗܳܢܳܐ܆ ܪܝܼܚܳܐ ܒܰܣܝܼܡܳܐ ܦܳܐܚ ܡܼܢ ܦܘܼܡܳܟ. ܘܠܶܫܳܢܟ ܗܳܘܶܐ ܚܰܠܝܳܐ. ܘܒܰܪܬܩܳܠܐ ܕܐܳܬܝܳܐ ܥܰܡܶܗ (ܕܐ̱ܪܳܙܳܐ)܆ ܣܳܓܝܳܐ ܘܥܳܬܪܳܐ ܒܫܘܼܦܪܳܐ ܕܚܰܝ̈ܐ. ܒܪܰܡ ܟܰܕ ܢܳܛܪܰܬ ܠܶܗ (ܠܐܪܙܐ)܆ ܦܘܼܡܳܟ ܓܳܣܶܐ ܒܝܼ̈ܫܳܬܐ. ܘܠܶܫܳܢܟ ܚܰܫ̈ܶܐ. ܕܒܰܪܬܩܳܠܐ ܕܐܳܬܝܳܐ ܥܰܡܶܗ (ܕܐ̱ܪܳܙܳܐ) ܡܓܺܝܼܚܳܐ ܘܫܳܦܟܳܐ ܪܶܗܠܐ ܕܡܰܘܬܐ. 

ܐܳܘ ܥܳܡܘܿܪ̈ܐ ܪ̈ܚܺܝܡܶܐ. «ܐܶܢܳܐ» ܒܰܪܬܩܠܐ ܗ̱ܝ ܡܰܦܪܝܳܢܝܼܬܐ. ܡܶܛܠܗܳܕܐ ܛܰܪ ܠܩܶܨܡܳܐ ܕܚܰܝܠܗܿ. ܘܢܰܣܰܘ ܕܬܶܗܘܽܘܢ ܥܘܼܫܢܐ ܕܰܡܥܰܫܶܢ ܠܪ̈ܰܒܳܢܶܐ ܪ̈ܕܰܝܳܐ. ܕܥܘܼܫܢܳܐ ܗܳܢܳܐ ܢܳܛܰܪ ܠܟܽܘܢ ܡܼܶܢ ܩܪܳܒܳܐ ܐܰܝܟܰܢܳܐ ܕܬܶܥܡܪܘܢ ܒܫܰܝܢܳܐ. ܘܡܼܢ ܚܶܫܟܳܐ ܕܬܶܬܥܰܠܘܢ ܒܓܰܘܶܗ ܕܢܘܼܗܪܳܐ.

«ܐܶܢܳܐ» ܕܡܶܬܚܰܫܚ ܐܰܢ̱ܬ ܠܰܝܬܰܘܗܝ ܐܠܐ ܢܰܦܫܳܐ ܫܰܬܝܼܩܬܳܐ ܗܳܝ ܕܐܬܓܰܫܡܰܬ ܒܣܘܼ̈ܟܳܠܐ ܕܦܰܓܪܳܐ. ܘܗܽܘܼܝܽܘܼ ܕܡܰܫܡܰܥ ܠܐ ܡܶܫܬܰܡܥܳܢܳܐ ܕܰܒܓܰܘܳܟ. ܘܓܳܠܰܚ ܩܕܳܡ ܥܰܝ̈ܢܶܐ ܠܐ ܡܶܬܚܰܙܝܳܢܳܐ. ܘܒܶܗ ܡܬܚܙܶܐ ܠܐ ܡܶܬܚܰܙܝܳܢܐ. ܘܡܶܫܬܡܰܥ ܠܐ ܡܶܫܬܰܡܥܳܢܳܐ. ܘܰܣܟܺܝܪ ܗ̱ܘ ܥܕܰܡܳܐ ܠܗܳܝ ܕܥܰܝܢܰܝ̈ܟ ܘܐܶܕܢܰܝ̈ܟ ܠܐ ܢܶܚ̈ܙܝܳܢ ܘܢܶܫܡ̈ܥܰܢ ܐܳܦܠܐ ܡܶܕܶܡ. 

ܘܟܰܕ ܪܳܢܶܐ ܐܰܢ̱ܬ ܒܗܳܠܶܝܢ ܕ«ܐܶܢܳܐ» ܒܳܪܶܐ ܐܰܢ̱ܬ ܝܰܡܳܐ ܕܚܘ̈ܫܳܒܶܐ ܒܓܰܘ ܗܰܘܢܳܟ ܡܶܬܡܰܚܫܠܳܢܳܐ. ܘܝܰܡܳܐ ܗܳܢܳܐ ܪܳܢܘܿܝܰܐ ܗ̱ܘ ܘܐܳܦ ܡܰܪܢܺܝܼܬܐ. ܘܠܰܝܬܰܘܗܝ ܐܶܠܐ ܒܪܺܝܼܬܐ ܕ«ܐܶܢܐ» ܕܺܝܼܠܳܟ. ܘܐܶܢܗܽܘ ܕܐܝܼܬ ܠܳܟ ܡܰܪ̈ܢܝܳܬܐ ܕܕܳܒ̈ܨܳܢ ܘܩܳܦ̈ܚܳܢ ܒܕܡܘܬ ܓܶܦܳܪ̈ܶܐ܆ ܕܰܥܘ ܕ«ܐܶܢܳܐ» ܕܰܒܓܰܘܳܟ ܬܰܩܶܢ ܐܶܢܶܝܢ ܒܰܡܚܰܛܐ ܘܰܦܪܳܓܶܠܐ. 

ܘܒܳܥܶܐ ܐ̱ܢܳܐ ܕܶܬܕܥ. ܟܽܠ ܡܶܕܶܡ ܕܡܶܬܬܰܩܰܢ ܡܰܨܝܳܐ ܐܳܦ ܕܢܶܬܬܰܘܒܰܕ. 

ܘܬܳܪܥܺ ܐ̱ܰܢܬ ܝܰܪܕܳܐ ܕܪ̈ܶܓܫܶܐ ܒܠܶܒܳܟ ܟܕ ܪܳܓܶܫ ܐܰܢ̱ܬ ܒܶܗ «ܒܐܶܢܳܐ». ܘܝܰܪܕܐ ܗܳܢܳܐ ܒܰܪܝܐ ܗ̱ܘ. ܘܒܶܗ ܒܥܶܕܳܢܳܐ ܪܰܓܘܼܫܬܳܢܳܐ ܗ̱ܘ ܘܡܶܬܪܰܓܫܳܢܳܐ. ܘܐܶܢܗܘܼ ܕܐܺܝܼܬ ܒܠܶܒܳܟ ܘܰܪ̈ܕܶܐ ܕܒܰܪܳܐ܆ ܠܐ ܬܶܛܥܶܐ «ܐܶܢܳܐ» ܕܰܒܓܰܘܳܟ ܐܰܫܘܰܚ ܘܐܰܫܩܺܝ ܠܥܶܩܳܪ̈ܰܝܗܽܘܢ. 

ܘܒܳܥܶܐ ܐ̱ܢܳܐ ܕܶܬܕܰܥ. ܥܶܩܳܪܳܐ ܕܫܳܘܰܚ܆ ܡܰܨܝܳܐ ܕܢܶܬܥܰܩܪܘܢ ܫܶܪ̈ܫܰܘܗܝ. 

ܒܝܰܕ «ܐܶܢܳܐ» ܡܿܢ ܡܰܩܶܦ ܐܰܢ̱ܬ ܟܽܘܼܟܺܝܬܐ ܥܰܫܝܼܢܬܳܐ ܒܪܶܕܝܳܐ ܕܒܢ̈ܬܩ̈ܠܐ. ܗܳܝ ܕܟܽܠ ܚܕܳܐ ܡܶܢܗܶܝܢ ܪܶܡܙܳܐ ܐܝܼܬܶܝܗܿ ܕܡܶܕܶܡ. ܘܪܶܡܙܳܐ ܕܥܳܠܡܳܐ ܦܪܺܝܼܫܳܐ. ܘܟܠ ܒܰܪܝܳܐ ܡܢܳܬܐ ܐܝܼܬܰܘܗܝ ܡܶܢ ܥܳܠܡܳܐ ܗܰܘܝܳܐ ܕ«ܐܶܢܳܐ». ܘܒܶܗ ܒܥܶܕܳܢܳܐ ܗܰܘܝܐ ܗ̱ܘ ܘܐܳܦ ܡܶܬܗܰܘܝܳܢܳܐ. ܘܐܶܢܗܘܼ ܕܐܺܝܼܬ ܫܪܰܓܪ̈ܳܓܝܳܬܐ ܒܥܳܠܡܳܐ ܗܳܢܳܐ܆ ܕܰܥ ܕ«ܐܶܢܳܐ» ܕܺܝܼܠܳܟ ܐܰܝܬܺܝܼ ܘܣܳܡ ܐܶܢܶܝܢ ܬܰܡܳܢ.

ܘܒܳܥܶܐ ܐ̱ܢܳܐ ܕܶܬܕܰܥ. ܡܰܗܘܝܳܢܳܐ܆ ܟܰܕ ܨܳܒܶܐ ܡܰܨܝܳܐ ܐܳܦ ܕܠܐ ܢܰܗܘܶܐ. 

ܡܶܬܗܰܘܝܳܢܳܐ ܗܽܘܼܝܘܼ ܐܳܦ ܡܰܗܘܝܳܢܳܐ. ܐܰܪܰܐ ܡܨܶܐ ܐ̱ܢܳܫ ܕܢܶܗܘܶܐ ܝܰܬܺܝܼܪ ܡܼܶܢ ܗܿܰܘ ܡܳܐ ܕܐܺܝܼܬܰܘܗܝ؟ ܐܰܘ ܒܨܺܝܼܪ ܡܼܶܢ ܗܰܘ ܡܳܐ ܕܐܺܝܼܬܰܘܗܝ؟ ܗܘ̈ܰܝܳܐ ܠܐ ܒܨܺܝܪܺܝܢ ܘܐܳܦܠܐ ܝܰܬܺܝܼܪܺܝܢ. 

«ܐܶܢܳܐ» ܡܰܒܽܘܼܥܰܐ ܗ̱ܘ ܫܶܪܫܳܢܳܝܳܐ ܕܡܰܪܕܶܐ ܠܟܽܠ. ܒܪܰܡ ܡܰܪܕܝܳܢܘܼܬܶܗ ܗܳܦܟܳܐ ܥܠܰܘܗܝ. ܕܡܰܪܕܝܳܢܐ ܗܽܘܼܝܽܘܼ ܡܰܒܘܼܥܳܐ.

ܘ«ܐܶܢܳܐ» ܚܘܼܛܪܐ ܗ̱ܘ ܕܩܶܨܡܳܐ. ܘܚܘܼܛܪܳܐ ܗܳܢܳܐ ܠܐ ܡܢܰܦܶܫ ܐܶܠܐ ܠܗܰܘ ܡܳܐ ܕܛܳܥܶܢ ܩܳܨܘܿܡܳܐ ܒܓܰܘܶܗ. ܠܐ ܡܢܰܦܶܫ ܠܗܰܘ ܡܳܐ ܕܠܰܝܬܰܘܗܝ. ܘܩܳܨܘܿܡܳܐ ܘܣܘܼܥܪ̈ܳܢܰܘܗܝ ܚܰܕ ܐܶܢܽܘܢ.

«ܐܶܢܳܐ» ܕܺܝܼܠܳܟ ܠܰܝܬܰܘܗܝ ܐܠܐ ܒܦܶܚܡܳܐ ܕܡܰܕܥܳܟ. ܘܥܳܠܡܳܟ ܒܦܶܚܡܳܐ ܕ«ܐܶܢܳܐ» ܕܺܝܼܠܳܟ. ܘܥܳܠܡܳܟ ܗܳܘܶܐ ܐܰܟܘܳܬܗ ܕ«ܐܶܢܳܐ» ܕܝܼܺܠܳܟ ܟܰܕ ܗܘܼ «ܐܶܢܳܐ» ܗܳܘܶܐ ܩܪܺܝܼܚܳܐ ܘܡܶܬܒܰܝܢܳܢܳܐ. ܘܡ̈ܠܐ ܘܢܺܝܼ̈ܫܶܐ ܕܺܝܼܠܳܟ ܠܐ ܗܳܘܶܝܢ ܩܶܢܳܐ ܕܰܥܘܺܝܼܪ̈ܳܬܐ ܘܚܰܫ̈ܢܳܝܳܬܐ. ܒܪܰܡ ܐܶܢܗܽܘ ܕܠܐ ܩܪܺܝܼܚ ܘܥܰܛܠܐ ܗ̱ܘ «ܐܶܢܳܐ» ܕܺܝܼܠܳܟ ܡܼܶܢ ܟܺܝܼܬ ܣܽܘܼܟܳܠܐ܆ ܡܶܠܰܝ̈ܟ ܗܳܘ̈ܝܳܢ ܩܶܛܪܳܐ. ܘܢܝܼܫ̈ܰܝܟ ܠܡܺܐܢ̈ܶܐ ܕܫܘܼܢܳܩܳܐ.

ܬܳܩܶܢ ܘܥܳܫܶܢ ܥܳܠܡܳܟ ܟܰܕ «ܐܶܢܳܐ» ܗܳܘܶܐ ܬܰܩܢܳܐ ܘܥܰܫܺܝܼܢܳܐ܆ ܘܡܶܬܚܰܝܰܠ ܐܰܢ̱ܬ ܝܰܬܺܝܼܪ ܡܼܶܢ ܙܰܒܢܳܐ. ܘܗܳܘܐ ܐܰܢ̱ܬ ܥܳܠܡܺܝܼܢܳܝܐ ܐܰܝܟ ܗܳܢܳܐ ܟܽܠ. ܒܪܡ «ܐܶܢܳܐ» ܟܰܕ ܗܳܘܶܐ ܡܶܫܬܰܚܠܦܳܢܳܐ ܘܥܳܒܘܿܪܳܐ܆ ܐܳܦ ܥܳܠܡܼܳܟ ܗܳܘܶܐ ܡܶܫܬܰܚܠܦܳܢܳܐ ܘܥܳܒܘܿܪܳܐ. ܘܗܳܝܕܶܝܟ ܠܐ ܡܰܨܝܳܐ ܕܬܶܗܘܶܐ ܡܶܕܶܡ ܐܶܠܐ ܬܶܢܳܢܳܐ ܕܡܶܬܢܦܰܚ ܡܼܶܢ ܫܶܡܫܳܐ ܒܶܨܪܳܐܝܬ. 

ܟܰܕ «ܐܶܢܳܐ» ܗܳܘܶܐ ܙܰܘܓܳܢܳܝܳܐ܆ ܥܳܠܡܳܟ ܗܳܘܐ ܐܳܦܰܙܓܳܐ. ܘܗܳܟܰܢ ܡܰܨܝܳܐ ܕܰܬܩܽܘܼܡ ܒܫܰܝܢܳܐ ܡܬܘܼܡܳܝܳܐ ܥܰܡ ܒܢ̈ܰܝ ܡܰܠܟܽܘܼܬܐ ܘܥܰܡ ܐܰܓܝܼܪ̈ܶܐ ܕܥܳܠܡܳܐ. ܐܶܠܐ ܟܰܕ ܣܳܓܶܐ «ܐܶܢܳܐ» ܡܶܢܝܳܢܐܝܼܬ ܐܳܦ ܥܳܠܡܳܟ ܗܳܘܶܐ ܐܰܟܘܳܬܶܗ. ܘܗܳܝܕܶܝܟ ܡܫܰܪܶܐ ܐܰܢ̱ܬ ܒܐܰܓܘܿܢܳܐ ܐܰܡܺܝܼܢܳܐ «ܕܠܐ ܫܳܠܶܡ» ܥܰܡ ܢܰܦܫܳܟ ܘܥܰܡ ܚܰܝܠܐ ܕܡܺܝܼܪܳܐ ܕܰܐܠܗܳܐ. 

ܘ«ܐܶܢܳܐ» ܗܳܘܐ ܩܶܢܛܪܽܘܢ ܕܚܰܝ̈ܰܝܟ ܘܡܰܘܫܶܛ ܘܝܳܗܶܒ ܠܳܟ ܟܽܠ ܡܳܐ ܕܐܰܣܺܝܼܪ ܒܥܳܠܡܳܐ ܕܺܝܼܠܳܟ ܟܘܼܠܳܢܳܝܳܐ. ܘܡܶܕ̈ܡܶܐ ܕܝܳܗܶܒ ܠܳܟ ܡܶܬܚܰܒܟܺܝܼܢ ܒܕܽܘܼܟܬܐ ܐܘ ܒܢܽܘܼܩܰܕܬܳܐ ܚܕܳܐ. ܘܬܳܩܶܢ ܥܳܠܡܳܟ ܐܶܢ ܕܽܘܼܟܬܐ ܗܿܳܝ ܬܰܩܢܬܐ ܗ̱ܝ. ܘܡܶܟܳܐ ܠܐ ܡܶܫܬܟܰܚ ܚܰܝܠܐ ܠܥܶܠ ܐܰܘ ܠܬܰܚܬ ܕܰܢܙܺܝܼܥܳܟ ܠܐ ܠܝܰܡܝܼܢܳܐ ܘܐܳܦܠܐ ܠܣܶܡܳܠܐ. ܐܶܠܐ ܒܪܰܡ ܗܿܳܝ ܕܽܘܼܟܬܐ ܐܶܢܗܽܘ ܕܡܶܫܬܰܚܠܦܳܢܝܼܬܐ ܗ̱ܝ܆ ܐܳܦ ܥܳܠܡܳܟ ܡܶܫܬܰܚܠܰܦ. ܘܗܳܘܶܐ ܐܰܢ̱ܬܽ ܛܰܪܦܳܐ ܠܐ ܚܣܺܝܼܢܳܐ. ܕܕܳܪܝܳܐ ܠܶܗ ܪܘܼܚܳܐ ܩܫܺܝܼܬܐ ܠܟܳܐ ܘܰܠܟܳܐ..

ܡܶܟܳܐ ܟܰܕ ܬܳܩܶܢ ܥܳܠܡܳܟ܆ ܩܳܐܡ ܒܓܰܘܳܗܿ ܕܰܒܠܺܝܼܠܽܘܼܬܐ. ܘܟܰܕ ܩܪܺܝܼܚ܆ ܩܳܐܡ ܒܓܰܘܳܗܿ ܕܠܐ ܝܼܕܺܝܼܥܘܼܬܳܐ. ܘܟܰܕ ܩܒܺܝܼܥ ܘܰܡܫܰܪܰܪ܆ ܩܳܐܡ ܒܓܰܘܳܗܿ ܕܡܶܫܬܰܚܠܦܳܢܘܼܬܐ. ܐܺܝܼܢ: ܥܳܠܡܳܟ ܩܳܐܡ ܒܓܰܘܳܗ ܕܙܰܘܓܳܢܳܝܘܼܬܐ «ܟܐܡܰܬ ܬܪܰܝܳܢܘܼܬܐ».

ܥܳܠܡܳܟ ܠܰܝܬܰܘܗܝ ܐܶܠܐ ܗܿܰܘ ܕܰܡܫܰܚܠܶܦ ܕܰܪ̈ܓܽܘܼܫܝܳܬܐ ܠܩܰܒܪܐ. ܘܩܰܒܪ̈ܶܐ ܠܕܰܪܓܽܘܼܫܳܬܐ. ܘܒܶܗ ܐܝܼܡ̈ܡܶܐ ܒܳܠܥܺܝܼܢ ܠܰܝܠܰܘ̈ܳܬܐ. ܘܠܰܝ̈ܠܘܳܬܐ ܓܳܣܶܝܼܢ ܝܰܘ̈ܡܳܬܐ. ܘܫܰܝܢܳܐ ܣܳܕܰܪ ܩܪܳܒܳܐ. ܘܰܩܪܳܒܳܐ ܡܶܫܬܰܠܰܛ ܒܫܰܝܢܳܐ. ܘܒܽܘܼܪ̈ܣܳܡܶܐ ܡܶܬܡܰܙܓܺܝܼܢ ܒܕܶܡ̈ܥܶܐ ܚܢܝܼ̈ܓܳܬܐ. ܘܕܶܡ̈ܥܶܐ ܡܳܪܩܺܝܼܢ ܠܒܽܘܼܪ̈ܣܳܡܶܐ.

ܠܐ ܫܳܠܡܺܝܼܢ ܒܶܗ ܚܶܒ̈ܠܐ ܕܝܰܠܕܳܐ ܒܥܳܠܡܳܟ. ܒܕ ܥܳܠܡܰܐ ܗ̱ܘ ܕܨܰܪ̈ܳܕܶܐ ܘܰܡܚ̈ܘܼܠܐ. ܘܒܗ ܚܰܝܬܳܐ ܗܳܘܝܳܐ ܡܰܘܬܐ. ܘܨܰܪ̈ܕܶܐ ܘܰܡܚܽܘܼ̈ܠܐ ܕܳܡ̈ܝܳܝܶܐ ܐܶܢܽܘܢ. ܘܐܰܢ̱ܬܽ ܫܓܺܝܼܡ ܐܰܢ̱ܬ ܒܰܨܪܳܕܳܐ ܕܗܰܘ ܡܳܐ ܕܠܐ ܡܨܛܪܶܕ ܘܒܰܢܚܳܠܐ ܕܗܿܰܘ ܡܳܐ ܕܠܐ ܡܶܬܢܚܶܠ. ܘܰܦܠܺܝܼܓ ܥܳܠܡܳܟ ܥܰܠ ܝܳܬܶܗ. ܐܰܟܡܳܐ ܕܰܦܠܺܝܼܓ «ܐܶܢܳܐ» ܕܰܒܓܰܘܳܟ ܠܥܳܠܡܳܐ ܕܰܣܝ̈ܳܓܶܐ ܘܰܬܝ̈ܳܟܶܐ. ܘ«ܐܶܢܳܐ» ܕܰܒܓܰܘܳܟ ܚܰܕ ܗ̱ܘ ܡܼܶܢ ܟܶܠܝ̈ܢܶܐ ܕܙܳܓܪܺܝܢ: ܕܕܳܚܶܩ ܠܢܘܼܟܪ̈ܳܝܐ. ܘܰܡܩܰܒܶܠ ܠܩܰܪ̈ܝܼܒܶܐ. 

ܠܩܺܝܼܛ ܘܡܰܥܒܰܪ ܠܣܘܼܪܝܳܝܳܐ ܒܝܰܕ ܝܰܘܣܶܦ ܒܶܓܬܰܫ