ܥܰܠܗܳܝ ܕܡܳܢܰܘ ܟܝܳܢܶܗ ܕܒܰܪ ܐܢܫܐ

ܥܰܠܗܳܝ ܕܡܳܢܰܘ ܟܝܳܢܶܗ ܕܒܰܪ ܐܢܫܐ

ܥܰܠܗܳܝ ܕܡܳܢܰܘ ܟܝܳܢܶܗ ܕܒܰܪ ܐ̱ܢܳܫܐ؟

ܡܶܛܽܠ ܕܣܰܓܺܝ ܪܰܒ ܘܰܫܒܺܝܚ ܘܰܬܡܺܝܗ ܥܳܒܽܘܕܳܐ ܚܰܟܺܝܡ ܒܟܽܠ. ܘܠܳܐ ܡܶܬܕܪܶܟ ܠܗܰܘ̈ܢܶܐ ܥܒܺܝ̈ܕܶܐ ܘܠܳܐ ܡܶܬܡܰܫܰܚ ܘܠܳܐ ܡܶܣܬܰܝܰܟ̥. ܘܠܰܝܬ ܠܰܟܝܳܢ̈ܶܐ ܪ̈ܒܝܐ[1] ܕܰܢܩܽܘܡܽܘܢ ܥܰܠ ܝܺܕܥܬܳܐ ܕܰܥܠܰܘܗܝ܉ ܗܳܟܰܢܳܐ ܐܳܦ ܟܽܠܳܗ̇ ܒܪܺܝܬܶܗ ܪܰܒܳܐ ܘܰܫܒܺܝܚܳܐ ܘܰܬܡܺܝܗܳܐ ܘܠܳܐ ܡܶܬܕܰܪܟܳܐ. ܒܗܳܝ ܕܺܐܝܬ ܒܳܗ̇ ܦܽܘܪ̈ܫܳܢܶܐ ܣܰܓܺܝ̈ܶܐܐ ܘܫܽܘܚ̈ܠܳܦܶܐ ܘܓܶܢ̈ܣܶܐ ܘܳܐܕ̈ܫܶܐ ܘܰܩܢܽܘ̈ܡܶܐ ܕܠܳܐ ܡܶܣܬܰܝܟ̥ܺܝܢ ܐܰܘ ܡܶܬܕܰܪܟܺܝܢ. ܡܰܢܽܘ ܡܶܢ ܒܢܰܝ̈ܢܳܫܳܐ ܥܒܰܝ̈ܳܐ ܘܗܽܘܠܳܢܳܝ̈ܶܐ ܡܢܰܬܥܱ̈ܝ ܥܰܡ ܒܶܣܪܳܐ ܟܢܳܬܗܽܘܢ. ܘܪ̈ܳܫܦܰܝ ܒܰܐܪܥܳܐ ܐܶܡܗܽܘܢ܇ ܕܰܡܨܶܐ ܕܢܰܕܪܶܟ ܘܢܰܘܕܰܥ ܘܢܺܐܠܰܦ ܥܰܠ ܒܶܪ̈ܝܳܬܳܐ ܬܗܺܝܪ̈ܳܬܳܐ ܘܠܳܐ ܡܶܬܕܰܪ̈ܟܳܢܝܬܐ ܘܡܰܠ̈ܝܳܬ̥ ܚܶܟܡܬܳܐ ܪܰܒܬܳܐ ܕܰܒ̣ܪܳܐ ܘܰܐܬܩܶܢ ܒܳܪܽܘܝܳܐ ܚܰܟܺܝܡܳܐ. ܐܶܠܳܐ ܕܢܶܗܘܶܐ ܡܰܢ ܕܰܐܪܚܶܩ ܡܶܢ ܕܠܽܘܚܝܶܗ ܕܥܳܠܡܳܐ. ܘܰܐܒܥܶܕ ܘܶܐܙܰܠ ܫܟܶܢ ܘܰܫܪܳܐ ܒܫܶܠܝܳܐ. ܘܰܫܬܶܩ ܘܶܐܬܟܰܢܰܫ ܒܗܰܘܢܳܐ ܘܚܽܘܫܳܒܳܐ܇ ܘܕܰܝܶܒ ܦܰܓܪܶܗ ܒܥܳܢܘܳܝܽܘܬܳܐ. ܘܶܐܬܩܰܛܰܢ ܘܶܐܨܛܰܠܰܠ ܒܗܰܘܢܳܐ ܘܒܺܝܕܰܥܬܳܐ: ܘܕܰܟܺܝ ܠܶܒܶܗ ܘܰܡܪܰܩ ܡܶܢ ܟܽܠ ܚܰܫܳܐ ܘܨܳܐܝܽܘܬܳܐ. ܘܶܐܬܗܰܓܺܝ ܙܰܒܢܳܐ ܣܰܓܺܝܳܐܐ ܒܰܟܝܳܢܳܐ ܘܶܐܬܒܰܩܺܝ ܒܗܰܘܢܳܐ. ܘܶܐܬܚܰܫܰܒ ܥܰܠ ܒܳܪܽܘܝܳܐ. ܘܒܶܗ ܒܰܠܚܽܘܕܰܘܗܝ ܐܶܬܪܢܺܝ ܘܰܗܪܰܓ ܥܕܰܡܳܐ ܕܡܶܢܶܗ ܐܶܬܢܰܗܰܪ ܒܗܰܘܢܳܐ ܘܒܺܝܕܰܥܬܳܐ ܘܶܐܬܚܰܟܰܡ ܘܰܐܕܪܶܟ ܠܰܟܝܳܢܳܐ ܕܟܽܠܗܶܝܢ ܒܶܪ̈ܝܳܬܳܐ. ܘܳܐܦ ܠܶܗ ܠܒܳܪܽܘܝܳܐ ܡܶܢܗܶܝܢ ܕܒܶܪ̈ܝܳܬܶܗ ܡܶܫܟܰܚ ܕܢܶܕܰܥ. ܐܰܝܟ ܕܡܰܨܝܳܐ ܠܒܰܪ ܐ̱ܢܳܫܳܐ ܕܢܶܕܰܥ ܠܰܐܠܳܗܳܐ. ܘܟܰܕ ܗܳܠܶܝܢ ܟܽܠܗܶܝܢ ܝܳܠܶܦ ܘܡܶܬܚܰܟܰܡ ܘܝܳܕܰܥ܉ ܗܳܝܕܶܝܢ ܡܰܨܝܳܐ ܠܶܗ ܠܒܰܪ ܐ̱ܢܳܫܳܐ ܕܢܶܕܰܥ ܗܽܘ ܠܶܗ ܘܢܶܬܒܰܩܶܐ ܒܝܳܬ̥ܶܗ. ܘܰܕܡܳܢܰܘ ܟܝܳܢܶܗ. ܘܡܶܢ ܐܰܝܟܰܘ ܫܽܘܪܳܝܶܗ. ܘܠܰܐܝܟܳܐ ܚܳܐܰܪ ܫܽܘܠܳܡܶܗ. ܣܛܰܪ ܡܶܢ ܗܳܟܰܢ ܟܽܠ ܕܺܝܠܶܦ ܘܺܝܕܰܥ ܡܶܕܶܡ܉ ܣܰܓܺܝ ܒܨܺܝܪܳܐ ܝܺܕܰܥܬܶܗ ܡܶܢ ܝܺܕܰܥܬܳܐ ܕܫܰܪܺܝܪܳܐ ܘܚܰܬܺܝܬܳܐܝܬ ܕܰܟܝܳܢܳܐ. ܘܗܳܫܳܐ ܡܶܛܽܠ ܠܳܐ ܡܫܰܡܠܳܝܽܘܬܰܢ ܩܰܠܺܝܠ ܡܶܢ ܣܰܓܺܝ ܐܳܡܪܺܝܢܰܢ ܩܕܳܡ ܠܳܐ ܡܫܰܡ̈ܠܰܝܳܐ ܕܰܐܟܘܳܬܰܢ ܐܰܝܟܰܢܳܐ ܕܠܳܐ ܟܽܠ ܟܽܠܶܗ ܢܶܬܓܠܶܙ ܡܶܢ ܝܺܕܰܥܬܳܐ ܕܰܫܪܳܪܳܐ. ܘܰܒܝܰܕ ܗܳܢܳܐ ܩܰܠܺܝܠ ܕܰܡܚܰܘܶܝܢܰܢ܆ ܐܰܘ ܗܳܪܓܺܝܢܰܢ ܘܡܶܬܒܰܝܢܺܝܢܰܢ ܘܣܳܟ ܠܳܐ ܡܰܐܡܢܺܝܢܰܢ: ܗܽܘ ܫܪܳܪܳܐ ܡܶܢܶܗ ܘܒܶܗ ܓܠܳܐ ܠܰܢ ܚܰܬܺܝܬܽܘܬܶܗ. ܘܳܐܡܪܺܝܢܰܢ ܕܰܟܝܳܢܶܗ ܕܒܰܪ ܐ̱ܢܳܫܳܐ ܐܺܝܬܰܘܗܝ ܡܶܕܶܡ ܥܦܺܝܦܳܐ ܚܰܝܽܘܬܳܐ ܡܪܰܟܰܒܬܳܐ. ܡܶܢ ܪܽܘܚܳܢܳܝܽܘܬܳܐ ܘܡܶܢ ܗܽܘܠܳܢܳܝܽܘܬܳܐ. ܡܶܢ ܪܽܘܚܳܢܳܝܽܘܬܳܐ ܡܰܢ: ܢܰܦܫܳܐ ܚܰܝܬܳܐ ܘܰܡܠܺܝܠܬܳܐ ܘܝܰܕܽܘܥܬܳܢܺܝܬܳܐ ܒܰܪܬ̥ ܟܝܳܢܳܐ ܕܪ̈ܽܘܚܳܢܶܐ. ܘܺܐܝܬ ܠܳܗ̇ ܬܪܶܝܢ ܚܰܝ̈ܠܶܐ. ܚܰܝܳܐ ܘܰܡܠܺܝܠܳܐ. ܕܢܰܗܺܝܪܳܐ ܘܫܰܦܝܳܐ ܒܰܟܝܳܢܳܗ̇. ܘܰܟܡܳܐ ܕܬܶܬܗܰܓܶܐ ܒܺܝܕܰܥܬܳܐ ܬܶܫܬܰܘܫܰܛ ܘܬܶܬܚܰܟܰܡ ܘܬܶܬܥܰܠܶܐ. ܘܣܳܟ ܠܰܝܬ ܣܳܟܳܐ ܘܠܳܐ ܬܚܽܘܡܳܐ ܠܺܝܕܰܥܬܳܐ ܕܡܶܫܟܚܳܐ ܕܰܬܩܰܒܶܠ. ܡܶܛܽܠ ܕܠܺܝܕܰܥܬܳܐ ܕܰܫܪܳܪܳܐ ܠܰܝܬ ܣܳܟܳܐ. ܘܢܰܦܫܳܐ ܡܠܺܝܠܬܳܐ ܠܰܝܬ ܠܳܗ̇ ܟܳܠܺܝܬܳܐ ܡܶܢ ܕܰܬܩܰܒܶܠ ܝܺܕܰܥܬܳܐ ܘܬܶܫܬܰܘܫܰܛ ܒܳܗ̇ ܒܥܳܠܡܳܐ ܗܳܢܳܐ ܐܳܦ ܒܗܰܘ ܕܰܥܬܺܝܕ. ܗܳܟܰܢ ܘܰܠܥܳܠܡܺܝܢ ܕܠܳܐ ܫܽܘܠܳܡ. ܘܰܟܡܳܐ ܕܬܶܬܥܰܠܶܐ ܘܬܶܫܬܰܘܫܰܛ ܒܺܝܕܰܥܬܳܐ܆ ܬܶܬܒܰܣܰܡ ܘܬܶܬܗܰܢܶܐ ܒܽܘܣܳܡܳܐ ܘܗܰܢܺܝܐܘܬܐ ܕܠܰܝܬ ܠܗܽܘܢ ܦܶܚܡܳܐ ܘܠܳܐ ܡܶܬܡܰܠܠܺܝܢ. ܘܶܐܢ ܚܰܕ ܗܘܳܐ ܛܶܟܣܳܐ ܕܺܝܕܰܥܬܳܐ ܕܰܫܪܳܪܳܐ܆ ܘܺܐܝܬ ܗ̱ܘܳܐ ܠܶܗ ܣܳܟܳܐ ܘܫܽܘܠܳܡܳܐ܉ ܥܰܡ ܗܳܝ ܕܡܰܕܪܶܟ ܗ̱ܘܳܐ ܠܶܗ ܐ̱ܢܳܫ ܘܰܡܟܰܬܰܪ ܗ̱ܘܳܐ ܒܶܗ ܙܰܒܢܳܐ ܡܡܰܫܚܳܐ ܣܳܒܰܥ ܗ̱ܘܳܐ ܡܶܢܶܗ ܘܗܳܘܶܐ ܐܰܝܟ ܥܝܳܕܳܐ ܘܰܟܝܳܢܳܐ ܩܒܺܝܥܳܐ ܘܠܳܐ ܡܫܰܢܝܳܢܳܐ. ܘܠܳܐ ܡܶܬܒܰܣܰܡ ܗ̱ܘܳܐ ܒܶܗ ܐܰܝܟ ܗܰܘ ܚܰܕܬܳܐ ܘܰܕܟܽܠܥܶܕܳܢ ܚܕܶܬ̥ ܦܳܓܰܥ ܒܶܗ. ܐܰܟܡܳܐ ܕܰܒܣܰܓܺܝ̈ܐܬܐ ܟܝܳܢ̈ܝܬܐ ܘܓܶܕܫܳܢܳܝ̈ܬܐ ܗܳܐ ܡܢܰܣܶܝܢܰܢ[2] ܒܥܳܠܡܳܐ ܗܳܢܳܐ. ܘܰܒܗܳܝ ܕܚܰܕ ܗ̱ܘ̣ ܡܫܰܡܠܝܳܐ ܘܠܳܐ ܚܰܣܺܝܪܳܐ ܒܰܠܚܽܘܕܰܘܗܝ. ܘܟܽܠܗܽܘܢ ܒܪ̈ܰܝܳܐ ܡܠܺܝ̈ܠܶܐ ܘܝܰܕܽܘ̈ܥܬܳܢܶܐ ܒܶܗ ܣܳܠܩܺܝܢ ܘܡܶܬܥܰܠܶܝܢ ܘܡܶܬܚܰܟܡܺܝܢ. ܘܰܠܣܳܟܳܐ ܕܰܓܡܺܝܪܽܘܬܶܗ ܘܫܽܘܡܠܳܝܶܗ. ܠܳܐ ܡܰܨܝܳܐ ܕܢܰܕܪܟܽܘܢ ܘܢܶܡܛܽܘܢ. ܘܡܶܢ ܗܽܘܠܳܢܳܝܽܘܬܳܐ ܕܶܝܢ ܐܺܝܬ ܠܒܰܪ ܐ̱ܢܳܫܳܐ ܦܰܓܪܳܐ ܡܪܰܟܒܳܐ ܡܶܢ ܐܰܪܒܥܐ ܐܶܣܛܽܘܟ̈ܣܐ. ܚܰܝܽܘܬܳܐ ܡܫܰܡܠܰܝܬܳܐ. ܒܰܪܬ̥ ܟܝܳܢܳܐ ܕܟܽܠܗܶܝܢ ܚܰܝ̈ܘܳܬܳܐ ܡܢܰܦ̈ܫܳܬܳܐ. ܕܺܐܝܬ ܠܶܗ ܢܰܦܫܳܐ ܕܡܳܢܳܝܬܳܐ ܡܩܺܝܡܳܢܺܝܬܶܗ ܕܦܰܓܪܳܐ. ܐܰܝܟ ܫܰܪܟܳܐ ܕܚܰܝ̈ܘܳܬܳܐ. ܘܺܐܝܬ ܠܳܗ̇ ܐܳܦ ܠܳܗ̇ ܬܪܶܝܢ ܚܰܝ̈ܠܶܐ. ܪܶܓܬܳܢܳܝܬܳܐ ܘܚܶܡܬܳܢܳܝܬܳܐ[3]. ܘܺܐܝܬ ܠܶܗ ܠܦܰܓܪܳܐ ܕܺܝܠܳܝܴ̈ܬܶܗ. ܗܳܢܰܘ ܕܶܝܢ ܝܰܩܺܝܪܽܘܬܳܐ. ܘܬܽܘܪܣܳܝܳܐ. ܘܬܰܪܒܺܝܬܳܐ. ܘܓܶܕܫ̈ܶܐ ܘܫܽܘܚ̈ܠܳܦܶܐ ܕܫܰܪܟܳܐ. ܘܺܐܝܬ ܠܰܬܪ̈ܰܝܗܽܘܢ ܐܰܟܚܕܳܐ ܗܳܢܰܘ ܕܶܝܢ ܠܢܰܦܫܳܐ ܡܠܺܝܠܬܳܐ ܘܝܰܕܽܘܥܬܢܳܝܬܐ. ܘܰܠܦܰܓܪܳܐ ܚܰܝܽܘܬܳܢܳܝܳܐ ܣܽܘܠܘܓܝܣܡܘܣ. ܗܳܢܰܘ ܕܶܝܢ ܟܽܘܢܳܫ ܚܽܘ̈ܫܳܒܶܐ ܘܗܶܪ̈ܓܶܐ ܘܡܰܪ̈ܢܝܳܬܳܐ. ܗܳܠܶܝܢ ܕܠܰܝܬ ܐܶܢܶܝܢ ܠܚܰܕ ܡܶܢܗܽܘܢ ܒܶܠܥܳܕ ܡܶܢ ܚܰܒܪܶܗ. ܡܶܛܽܠ ܕܢܰܦܫܳܐ ܡܠܺܝܠܬܳܐ ܢܰܗܺܝܪܬܳܐ ܗ̱ܝ ܘܰܫܦܺܝܬܳܐ ܒܰܟܝܳܢܳܗ̇ ܘܰܡܫܰܡܠܰܝܬܳܐ. ܐܰܝܟ ܛܶܟܣܳܐ ܕܰܟܝܳܢܳܐ ܕܚܰܝ̈ܠܰܘܳܬܐ ܪ̈ܽܘܚܳܢܶܐ. ܘܠܳܐ ܣܢܺܝܩܳܐ ܕܬܶܬܪܢܶܐ ܘܬܶܬܚܰܫܰܒ ܘܰܬܣܰܩܶܡ ܚܽܘܫܳܒ̈ܶܐ ܐܰܝܢܳܐ ܛܳܒ ܘܰܐܝܢܳܐ ܒܺܝܫ. ܘܰܐܝܢܳܐ ܠܳܚܶܡ ܘܰܐܝܢܳܐ ܠܳܐ. ܘܬܶܓܒܶܐ ܐܰܝܠܶܝܢ ܕܪܳܓܳܐ ܘܨܳܒܝܳܐ. ܘܬܰܣܠܶܐ ܐܰܝܠܶܝܢ ܕܣܳܢܝܳܐ. ܠܰܝܬ ܗܳܠܶܝܢ ܒܰܟܝܳܢܳܐ ܕܪ̈ܽܘܚܳܢܶܐ. ܘܥܰܠܗܳܝ ܗܰܘ ܪܺܝܫ ܒܺܝܫܬܳܐ ܥܰܡ ܗܳܝ ܕܶܐܬܚܰܫܰܒ ܡܫܰܩܠܳܐܝܬ ܢܦܰܠ ܡܶܢ ܪܰܘܡܳܐ ܕܺܐܝܩܳܪܶܗ. ܘܶܐܠܽܘ ܐܺܝܬ ܗ̱ܘܳܐ ܠܶܗ ܒܰܟܝܳܢܶܗ ܣܽܘܠܽܘܓܝܣܡܘܣ ܡܬܪܢܝ ܗ̱ܘܳܐ ܠܶܗ ܘܰܡܟܰܢܶܫ ܗ̱ܘܳܐ ܠܶܗ ܚܽܘ̈ܫܳܒܶܐ. ܘܰܡܣܰܩܶܡ ܗ̱ܘܳܐ ܠܶܗ ܘܓܳܒܶܐ ܗ̱ܘܳܐ ܠܶܗ ܐܰܝܠܶܝܢ ܕܠܳܚܡܺܝܢ ܘܚܰܬܺܝܬ̥ܺܝܢ ܡܶܢ ܡܣܰܓ̈ܦܳܢܶܐ ܕܠܳܐ ܠܳܚܡܺܝܢ܉ ܘܠܳܐ ܢܰܦܺܝܠ ܗ̱ܘܳܐ ܠܶܗ ܡܰܦܽܘܠܬܳܐ ܗܳܝ ܪܰܒܬܳܐ. ܐܶܠܳܐ ܠܰܝܬ ܒܰܟܝܳܢܳܐ ܕܪ̈ܽܘܚܳܢܶܐ ܟܽܘܢܳܫ ܚܽܘ̈ܫܳܒܶܐ ܡܦܰܬܟ̈ܶܐ. ܡܶܛܽܠ ܕܰܡܫܰܡ̈ܠܰܝܳܐ ܒ̣ܪܳܐ ܐܶܢܽܘܢ ܒܳܪܽܘܝܳܐ. ܕܩܰܪܺܝܒܺܝܢ ܒܕܳܡܝܽܘܬܳܐ ܠܰܟܝܳܢܶܗ ܘܠܳܐ ܕܠܺܝܠܺܝܢ ܠܡܰܦܽܘܠܬܳܐ. ܘܶܐܢ ܓܳܕܫܳܐ ܠܗܽܘܢ ܡܰܦܽܘܠܬܳܐ ܠܰܝܬ ܠܗܽܘܢ ܩܝܳܡܬܳܐ܉ ܡܶܛܽܠ ܡܶܬܚܳܐ ܣܰܓܺܝܳܐܐ ܘܰܡܥܰܠܝܽܘܬܳܐ ܕܪܰܘܡܳܐ ܕܩܳܝܡܺܝܢ ܒܶܗ܀

ܘܥܰܠܗܳܝ ܒ̣ܪܳܝܗܝ ܐܰܠܳܗܳܐ ܠܒܰܪ ܐ̱ܢܳܫܳܐ ܡܪܰܟܒܳܐ ܘܰܕܢܶܗܘܶܐ ܐܺܝܬ ܠܶܗ ܣܽܘܠܽܘܓܝܣܡܘܣ ܘܰܢܟܰܢܶܫ ܚܽܘܫܳܒ̈ܶܐ ܘܰܢܒܰܚܶܢ ܐܶܢܽܘܢ. ܘܢܶܓܒܶܐ ܡܥܰܕܪ̈ܳܢܶܐ ܘܢܰܣܠܶܐ ܡܣܰܓ̈ܦܳܢܶܐ. ܘܕܶܐܢ ܡܶܫܬܰܩܰܠ ܡܶܛܽܠ ܟܝܳܢܳܐ ܡܥܰܠܝܳܐ ܕܢܰܦܫܳܐ ܡܠܺܝܠܬܳܐ. ܟܰܕ ܢܶܬܒܰܩܶܐ ܒܰܟܝܳܢܳܐ ܕܦܰܓܪܳܐ ܥܰܒܝܳܐ ܘܨܳܐܐ ܘܝܰܩܺܝܪܳܐ ܘܚܰܫܳܢܳܝܳܐ܉ ܢܶܬܡܰܟܰܟ̥ ܘܢܶܬ̊ܬܰܚܬܶܐ ܘܰܢܫܽܘܛ ܗܽܘ ܠܶܗ. ܘܠܳܐ ܢܺܐܒܰܕ ܘܢܶܣܬܰܚܶܦ ܒܚܰܫܳܐ ܕܰܡܫܰܩܠܽܘܬܳܐ ܘܪܳܡܽܘܬܳܐ. ܘܶܐܡܰܬܝ ܬܽܘܒ ܕܣܰܓܺܝ ܢܶܬ̊ܬܫܺܝܛ ܒܥܰܝ̈ܢܰܝ ܢܰܦܫܶܗ ܡܶܛܽܠ ܫܟܺܝܪܽܘܬܶܗ ܘܣܰܪܝܽܘܬܶܗ ܕܦܰܓܪܳܐ ܘܟܽܘܪ̈ܗܳܢܰܘܗܝ ܘܣܰܢܝܽܘܬ ܚܰܫܰܘ̈ܗܝ. ܢܶܬܒܰܝܰܐܐ ܬܽܘܒ ܘܢܶܬܬܪܺܝܡ ܒܣܰܒܪܶܗ. ܟܰܕ ܡܶܬܒܰܩܶܐ ܒܰܟܝܳܢܳܐ ܫܒܺܝܚܳܐ ܕܢܰܦܫܳܐ ܫܦܺܝܬܳܐ ܘܢܰܗܺܝܪܬܳܐ. ܒܳܪܝܰܬ̥ ܫܰܪ̈ܒܶܐ ܘܣܽܘܥܪ̈ܳܢܶܐ. ܘܰܡܒܰܕܩܰܬ̥ ܚܱ̈ܕܬ̥ܳܬ̥ܳܐ ܘܡܰܒܥܰܬ̥ ܝܽܘܠ̈ܦܳܢܶܐ. ܘܡܶܫܟܚܰܬ̥ ܐܽܘܡܳܢ̈ܘܳܬܳܐ. ܘܦܽܘܪ̈ܣܶܐ ܕܠܳܐ ܝܺܠܦܬ ܐܶܢܶܝܢ ܡܶܢ ܐ̱ܚܪܺܝܢ. ܘܠܳܐ ܢܶܦܣܽܘܩ ܣܰܒܪܳܐ ܘܢܺܐܒܰܕ ܒܥܳܩܬܳܐ. ܘܰܐܟܡܳܐ ܕܢܳܦܶܠ ܒܝܰܕ ܦܰܓܪܳܐ ܐܺܝܬ ܠܶܗ ܕܰܢܩܽܘܡ ܒܝܰܕ ܢܰܦܫܳܐ. ܘܶܐܢ ܢܶܦܶܠ ܒܟܽܘܪܗܳܢܳܐ ܢܰܦܫܳܢܳܝܳܐ. ܡܽܘܟܳܟܶܗ ܘܚܰܫܳܢܳܝܽܘܬܶܗ ܕܦܰܓܪܳܐ ܡܰܐܣܶܐ ܠܶܗ. ܗܳܕܐ ܗ̱ܝ ܥܶܠܬܳܐ ܪܰܒܬܳܐ ܕܚܶܟܡܬܳܐ ܐܰܠܳܗܳܝܬܳܐ ܕܰܒ̣ܪܳܬ̥ ܘܬܰܩܢܰܬ̥ ܠܚܰܝܽܘܬܳܐ ܗܳܕܶܐ ܡܪܰܟܰܒܬܳܐ ܘܰܩܪܳܬ̥ܗ ܒܰܪ ܐ̱ܢܳܫܳܐ ܘܫܰܡܰܗܬܶܗ ܨܰܠܡܳܗ̇ ܘܰܕܡܽܘܬ̥ܳܗ̇. ܡܶܛܽܠ ܚܺܐܪܽܘܬܳܐ ܘܫܰܠܺܝܛܽܘܬ ܒܝܳܬ̥ܳܐ ܘܨܶܒܝܳܢܳܐ. ܘܬܽܘܒ ܐܳܡܪܺܝܢܰܢ ܐ̱ܪܳܙܳܐ ܐ̱ܚܪܺܢܳܐ ܟܰܣܝܳܐ. ܡܶܛܽܠ ܕܩܰܕܶܡ ܝܺܕܰܥ ܒܳܪܽܘܝܳܐ ܚܰܟܺܝܡܳܐ ܘܰܡܫܰܡܠܝܳܐ. ܕܰܥܬܺܝܕܳܐ ܒܪܺܝܬܳܐ ܡܪܰܟܰܒܬܳܐ ܗܽܘܠܳܢܳܝܬܳܐ ܕܬܶܫܬܰܥܒܰܕ ܠܰܣܪܺܝܩܽܘܬܳܐ ܘܬܶܦܠܽܘܚ ܠܒܶܪ̈ܝܳܬܳܐ ܟܢܰܘܴ̈ܬ̥ܳܗ̇. ܘܰܬܣܺܝܡ ܘܰܬܫܰܡܰܗ ܠܗܽܘܢ ܫܡܳܗ̈ܶܐ ܐܰܫܺܝܠܳܐ ܕܰܐܠܳܗܳܐ ܡܫܰܒܚܳܐ. ܘܳܐܦ ܬܶܣܒܪ ܥܠܰܝܗܽܘܢ ܐܰܠܳܗ̈ܶܐ ܘܒܳܪ̈ܽܘܝܶܐ ܘܥܳܒܽܘ̈ܕܶܐ ܒܝܰܕ ܛܽܘܥܝܰܝ ܕܰܥܬܺܝܕܳܐ ܕܬܶܓܕܰܫ ܠܳܗ̇. ܘܳܐܠܨܳܐ ܠܶܗ ܕܢܶܬܓܠܶܐ ܘܰܢܚܰܘܶܐ ܢܰܦܫܶܗ ܠܰܒܪܺܝܬܶܗ. ܘܢܰܐܠܦܝܗ̇ ܘܰܢܚܰܟܡܺܝܗ̇ ܥܰܠ ܐܺܝܬܽܘܬܶܗ ܡܬܽܘܡܳܝܬܳܐ. ܘܡܳܪܽܘܬܶܗ ܘܰܐܠܳܗܽܘܬܶܗ ܘܰܚܕܳܢܳܝܽܘܬܶܗ ܘܰܢܫܰܪܪܺܝܗ̇ ܥܰܠ ܗܳܠܶܝܢ ܚܰܬܺܝܬܳܐܝܬ ܘܰܡܦܺܝܣܳܢܳܐܝܬ ܕܠܳܐ ܦܽܘܠܳܓ ܘܰܕܠܳܐ ܫܽܘܚܠܳܦ. ܘܰܕܗܺܝ ܒܪܺܝܬܳܐ ܡܪܰܟܰܒܬܳܐ ܘܰܡܥܰܪܙܰܠܬܳܐ ܥܰܡ ܗܽܘ̈ܠܶܐ. ܘܠܳܐ ܡܰܨܝܳܐ ܗ̱ܘܳܬ̥ ܕܬܶܚܙܶܝܘܗܝ ܘܬܬܥܢܐ ܥܡܗ ܕܒܳܪܽܘܝܳܐ ܘܬܶܩܢܶܐ ܦܝܳܣܳܐ ܘܬܶܫܬܰܪܰܪ ܥܠܰܘܗܝ ܐܶܢ ܐܳܦ ܗܽܘ ܠܳܐ ܡܶܬܪܰܟܰܒ ܘܡܶܬܥܰܪܙܰܠ ܡܰܐܠܽܘܢ ܘܡܶܬܚܰܠܰܛ ܒܳܗ̇ ܒܗܽܘܠܳܢܳܝܽܘܬܳܐ. ܡܶܛܽܠ ܗܳܕܶܐ ܒܶܗ ܒܨܰܠܡܳܐ ܘܰܕܡܽܘܬ̥ܳܐ ܘܨܽܘܪܬܳܐ ܘܗܰܘܢܳܐ ܘܝܽܘܩܢܳܐ ܕܰܥܬܺܝܕ ܗ̱ܳܐ ܕܢܶܬܓܠܶܐ ܘܢܶܬܚܙܶܐ ܠܒܶܪ̈ܝܳܬܶܗ. ܩܰܕܶܡ ܒ̣ܪܳܝܗܝ ܘܬܰܩܢܶܗ ܠܒܰܪ ܐ̱ܢܳܫܳܐ. ܡܶܛܽܠ ܗܳܕܶܐ ܩܪܳܝܗܝ ܨܰܠܡܶܗ ܘܰܕܡܽܘܬ̥ܶܗ. ܐܰܝܟ ܕܰܥܬܺܝܕܺܝܢܰܢ ܕܰܢܚܰܘܶܐ ܝܰܬܺܝܪ ܢܰܗܺܝܪܳܐܝܬ. ܥܰܠ ܚܰܬܺܝܬܽܘܬܳܐ ܕܗܳܠܶܝܢ ܡܶܢ ܠܬܰܚܬ ܥܰܡ ܐܰܠܳܗܳܐ ܕܰܡܗܰܕܶܐ ܘܰܡܚܰܟܶܡ܀

ܣܳܡ ܬܽܘܒ ܒܰܟܝܳܢܶܗ ܕܒܰܪ ܐ̱ܢܳܫܳܐ ܕܚܰܝܠܳܐ ܡܠܺܝܠܳܐ ܕܢܰܦܫܳܐ ܡܕܰܒܪܳܢܺܝܬܶܗ ܕܚܰܝܽܘܬܳܐ. ܬܫܰܥܒܶܕ ܐܶܢܽܘܢ ܠܚܰܝ̈ܠܶܐ ܕܢܰܦܫܳܐ ܕܡܳܢܳܝܬܳܐ ܘܗܽܘܠܳܢܳܝܬܳܐ ܕܺܐܝܬܰܝܗܽܘܢ ܚܶܡܬܳܐ ܘܪܶܓܬܳܐ. ܘܬܶܬܚܰܫܰܚ ܒܗܽܘܢ ܡܠܺܝܠܳܐܝܬ ܘܝܰܕܽܘܥܬܢܐܝܬ. ܗܳܢܰܘ ܕܶܝܢ ܚܰܝܠܬܳܢܳܐܝܬ ܘܢܰܟܦܳܐܝܬ. ܘܠܳܐ ܬܶܫܒܽܘܩ ܐܶܢܽܘܢ ܕܢܶܬܬܙܺܝܥܽܘܢ ܒܥܺܝܪܳܐܝܬ ܘܠܳܐ ܡܠܺܝܠܳܐܝܬ ܐܰܝܟ ܫܰܪܟܳܐ ܕܚܰܝ̈ܘܳܬܳܐ ܠܳܐ ܡܠܺܝ̈ܠܳܬܳܐ ܕܡܶܬܚܰܫܚܺܝܢ ܒܗܳܠܶܝܢ ܬܪܶܝܢ ܚܰܝ̈ܠܶܐ ܡܰܪܳܚܳܐܝܬ ܘܰܫܪܺܝܚܳܐܝܬ. ܐܰܝܟ ܕܳܐܦ ܬܳܒܰܥ ܟܝܳܢܗܽܘܢ ܡܶܛܽܠ ܢܛܺܝܪܽܘܬܶܗ ܘܩܽܘܝܳܡܶܗ. ܒܰܪ ܐ̱ܢܳܫܳܐ ܕܶܝܢ ܡܪܰܟܒܳܐ ܡܠܺܝܠܳܐ ܠܰܘ ܗܳܟܰܢ ܐܶܬܒܪܺܝ ܘܶܐܬܩܰܝܰܡ. ܕܢܶܬܚܰܫܚ ܒܗܽܘܢ ܒܥܺܝܪܳܐܝܬ. ܐܶܠܳܐ ܡܠܺܝܠܳܐܝܬ ܐܰܝܟ ܕܶܐܡܰܪܢܰܢ. ܡܶܛܽܠ ܢܛܺܝܪܽܘܬܳܐ ܘܫܰܦܺܝܪܽܘܬ ܩܽܘܝܳܡܳܐ ܕܰܟܝܳܢܶܗ ܡܠܺܝܠܳܐ: ܐܺܝܬܰܘܗܝ ܕܶܝܢ ܗܽܘ ܩܽܘܝܳܡܳܐ ܫܰܦܺܝܪܳܐ ܕܒܰܪ ܐ̱ܢܳܫܳܐ ܡܠܺܝܠܳܐ܉ ܕܢܶܬܓܡܰܪ ܘܢܶܫܬܰܡܠܶܐ ܒܟܺܐܢܽܘܬܳܐ. ܟܺܐܢܽܘܬܳܐ ܕܶܝܢ ܐܺܝܬܶܝܗ̇ ܫܽܘܡܠܳܝܶܗ ܕܒܰܪ ܐ̱ܢܳܫܳܐ ܘܺܝܕܰܥܬܶܗ ܕܰܫܪܳܪܳܐ. ܘܦܳܪܽܘܫܽܘܬܳܐ ܕܰܐܠܳܗܳܝ̈ܳܬܳܐ. ܡܳܪ̈ܳܢܳܝܳܬܳܐ ܘܕܰܟܝܳܢܳܝ̈ܳܬܳܐ ܕܒܶܪ̈ܝܳܬܳܐ. ܕܰܡܦܰܠܶܓ ܘܝܳܗܶܒ ܠܟܽܠܚܰܕ ܐܰܝܟ ܗܳܠܶܝܢ ܕܡܶܬ̊ܬܚܺܝ̈ܒܳܢ ܠܶܗ. ܗܳܢܰܘ ܕܶܝܢ ܠܰܐܠܳܗܳܐ ܬܶܫܒܽܘܚܬܳܐ ܘܣܶܓܕܬܳܐ ܘܬܰܘܕܺܝܬܳܐ ܠܚܰܕ ܟܝܳܢܳܐ ܕܰܚܕܳܐ ܐܺܝܬܽܘܬܳܐ ܐܰܠܳܗܳܝܬܳܐ ܘܡܳܪܳܢܳܝܬܳܐ. ܘܰܠܒܶܪ̈ܝܳܬܳܐ ܕܢܶܬܒܰܩܶܐ ܒܗܶܝܢ ܘܢܶܕܰܥ ܐܶܢܶܝܢ ܐܰܝܟ ܕܺܐܝܬܰܝܗܶܝܢ ܘܰܐܝܟ ܟܝܳܢܗܶܝܢ: ܘܢܰܕܪܶܟ ܠܚܰܝܠܳܐ ܪܰܒܳܐ ܘܐ̱ܪܳܙܳܐ ܕܰܛܡܺܝܪ ܒܫܽܘܚܠܳܦܗܶܝܢ. ܘܰܕܡܶܢ ܗܳܠܶܝܢ ܢܶܕܥܺܝܘܗܝ ܠܚܰܝܠܶܗ ܪܰܒܳܐ ܕܥܳܒܽܘܕܳܐ ܚܰܟܺܝܡܳܐ. ܐ̱ܚܪ̈ܳܢܶܐ ܕܶܝܢ ܡܰܢ ܒܢܰܝ̈ܢܳܫܳܐ ܕܶܐܬܪܕܺܝܘ ܒܦܺܝܠܠܝܣܦܘܬܐ ܘܕܽܘܪܳܫܳܐ ܕܝܽܘܠ̈ܦܳܢܶܐ. ܬܠܳܬܳܐ ܚܰܝ̈ܠܶܐ ܫܰܡܰܗܘ ܥܰܠ ܢܰܦܫܳܐ ܡܠܺܝܠܬܳܐ. ܝܰܕܽܘܥܬܳܢܽܘܬܳܐ ܐܰܘܟܺܝܬ ܡܶܬܚܰܫܒܳܢܽܘܬܳܐ ܕܗܺܝ ܗܺܝ ܡܠܺܝܠܽܘܬܳܐ܇ ܘܚܶܡܬܳܐ ܘܪܶܓܬܳܐ. ܘܠܳܐ ܫܰܪܺܝܪܺܝܢ ܐܳܦܠܳܐ ܚܰܬܺܝܬܳܐ ܝܺܕܰܥܬܳܐ ܗܳܕܶܐ. ܒܶܠܥܳܕ ܦܰܓܪܳܐ ܠܰܝܬ ܠܢܰܦܫܳܐ ܚܶܡܬܳܐ ܘܪܶܓܬܳܐ ܒܰܟܝܢܰܝܗܶܝܢ[4]. ܢܰܦܫܳܐ ܕܶܝܢ ܠܳܗ̇ ܕܺܝܠܳܢܳܐܝܬ ܘܡܳܪܳܢܳܐܝܬ ܬܪܶܝܢ ܚܰܝ̈ܠܶܐ ܐܺܝܬ. ܚܰܝܳܐ ܘܰܡܠܺܝܠܳܐ. ܘܡܶܬܦܰܠܓܺܝܢ ܠܰܐ̱ܚܪ̈ܳܢܝܳܬܳܐ. ܗܰܘ ܚܰܝܳܐ. ܕܺܐܝܬܶܝܗ̇ ܢܰܦܫܳܐ ܚܰܝ̈ܶܐ ܒܰܩܢܽܘܡܳܗ̇ ܫܦܺܝܬܳܐ ܢܰܗܺܝܪܬܳܐ. ܘܗܰܘ ܡܠܺܝܠܳܐ ܡܶܬܦܰܠܰܓ ܠܚܰܡܫܳܐ ܪ̈ܶܓܫܶܐ ܪ̈ܽܘܚܳܢܳܝܶܐ. ܗܰܘܢܳܐ. ܘܡܰܕܥܳܐ. ܘܣܽܘܟܳܠܳܐ. ܘܒܽܘܝܳܢܳܐ. ܘܦܳܪܽܘܫܽܘܬܳܐ. ܘܺܐܝܬ ܠܚܰܝܽܘܬܳܐ ܦܰܓܪܳܢܳܝܬܳܐ ܬܪܶܝܢ ܚܰܝ̈ܠܶܐ ܪܶܓܬܳܐ ܘܚܶܡܬܳܐ. ܘܣܺܝܡܺܝܢ ܒܰܡܨܰܥܬܳܐ. ܕܶܐܢ ܝܰܕܽܘܥܬܳܢܽܘܬܳܐ ܬܕܒܪ ܐܶܢܽܘܢ ܡܠܺܝܠܳܐܝܬ܉ ܢܶܫܬܰܡܠܶܐ ܒܰܪ ܐ̱ܢܳܫܳܐ ܒܟܺܐܢܽܘܬܐ. ܘܶܐܢ ܗܽܘ ܦܰܓܪܳܐ ܐܰܝܟ ܕܺܝܠܳܝܴ̈ܬܶܗ ܢܶܬܚܰܫܰܚ ܒܗܽܘܢ ܒܥܺܝܪܳܐܝܬ. ܐܺܝܬܰܘܗܝ ܗܰܘ ܒܰܪ ܐ̱ܢܳܫܳܐ ܚܰܝܽܘܬܳܐ ܒܥܺܝܪܳܝܬܳܐ܉ ܘܠܰܘ ܡܠܺܝܠܬܳܐ. ܐܰܝܟ ܕܰܐܡܺܝܪ ܥܠܰܘܗܝ ܒܕܽܘܟ. ܕܒܰܪ ܐ̱ܢܳܫܳܐ ܕܒܺܐܝܩܳܪܳܐ ܗܳܢܳܐ ܕܰܟܝܳܢܶܗ ܡܠܺܝܠܳܐ ܘܫܰܦܺܝܪܳܐ ܠܳܐ ܐܶܬܒܰܝܰܢ. ܗܳܢܰܘ ܕܶܝܢ ܠܳܐ ܐܶܬܕܒܪ ܬܰܩܢܳܐܝܬ ܘܰܡܠܺܝܠܳܐܝܬ ܐܰܝܟ ܕܬܳܒܰܥ ܛܶܟܣܳܐ ܕܰܟܝܳܢܶܗ܉ ܐܶܫܬܠܶܡ ܠܰܒܥܺܝܪܳܐ ܘܶܐܬܕܰܡܺܝ ܠܚܰܝܽܘܬܳܐ܀

ܬܠܳܬܳܐ ܙܢܰܝ̈ܳܐ ܡܶܬܺܝܕܰܥ ܒܰܪ ܐ̱ܢܳܫܳܐ. ܪܽܘܚܳܐ ܐܰܘܟܺܝܬ ܗܰܘܢܳܐ ܚܰܝܳܐ ܘܰܡܠܺܝܠܳܐ. ܘܢܰܦܫܳܐ ܚܽܝܽܘܬܢܝܬܐ ܡܰܚܝܳܢܺܝܬܶܗ ܘܰܡܩܺܝܡܳܢܺܝܬܶܗ ܕܦܰܓܪܳܐ. ܐܰܝܟ ܫܰܪܟܳܐ ܕܟܽܠܗܶܝܢ ܚܰܝ̈ܘܳܬܳܐ. ܘܡܶܬܩܰܪܝܳܐ ܢܰܦܫܳܐ ܕܡܳܢܳܝܬܳܐ. ܗܳܢܰܘ ܕܶܝܢ ܩܰܛܺܝܢܽܘܬܶܗ ܘܫܰܦܝܽܘܬܶܗ ܕܦܰܓܪܳܐ. ܘܗܽܘ ܦܰܓܪܳܐ. ܘܰܬܠܳܬ ܐܶܢܶܝܢ ܡܽܘܫ̈ܚܳܬܶܗ ܕܒܰܪ ܐ̱ܢܳܫܳܐ. ܦܰܓܪܳܢܳܝܽܘܬܳܐ ܘܢܰܦܫܳܢܳܝܽܘܬܳܐ ܘܪܽܘܚܳܢܳܝܽܘܬܳܐ. ܘܙܳܕܶܩ ܠܶܗ ܕܢܶܬܕܒܪ ܒܗܶܝܢ ܬܰܩܢܳܐܝܬ ܘܟܺܐܢܳܐܝܬ. ܘܡܶܢ ܚܕܳܐ ܠܰܚܕܳܐ ܢܶܬܥܰܠܶܐ ܘܢܶܫܬܰܘܫܰܛ ܥܕܰܡܳܐ ܕܢܶܣܰܩ ܘܢܶܡܛܶܐ ܠܕܰܪܓܳܐ ܡܥܰܠܝܳܐ ܕܪܽܘܚܳܢܳܝܽܘܬܳܐ. ܘܥܰܠ ܗܳܠܶܝܢ ܥܬܺܝܕܺܝܢܰܢ ܕܰܢܡܰܠܶܠ ܝܰܬܺܝܪ ܢܰܗܺܝܪܳܐܝܬ ܒܥܶܕܳܢܗܶܝܢ ܘܰܒܕܽܘܟܬܗܶܝܢ ܒܡܳܪܝܳܐ ܕܰܡܗܰܕܶܐ.

ܕܰܐܝܟܰܢ ܕܶܝܢ ܡܚܰܝܕܳܐ ܪܽܘܚܳܢܳܝܽܘܬܐ ܕܢܰܦܫܳܐ ܡܠܺܝܠܬܳܐ ܘܝܰܕܽܘܥܬܢܝܬܐ ܠܗܽܘܠܳܢܳܝܽܘܬܳܐ ܘܥܰܒܝܽܘܬܳܐ ܕܦܰܓܪܳܐ. ܝܰܩܺܝܪܳܐ ܙܳܕܶܩ ܠܰܢ ܕܰܢܥܰܩܶܒ ܘܢܺܐܠܰܦ. ܕܰܐܝܟܰܢ ܡܰܨܝܳܐ ܕܡܶܕܶܡ ܩܰܛܺܝܢܳܐ ܘܪܽܘܚܳܢܳܝܳܐ: ܢܶܬܚܰܝܰܕ ܘܢܶܬܠܰܚܰܡ ܥܰܡ ܡܶܕܶܡ ܥܰܒܝܳܐ ܘܓܽܘܫܡܳܢܳܝܳܐ ܕܢܽܘܟܪܳܝ ܠܰܟܝܳܢܶܗ ܘܺܐܝܬܰܘܗܝ ܣܰܩܽܘܒܠܶܗ ܣܓܺܝܕ ܘܰܡܫܰܒܰܚ ܥܳܒܽܘܕܳܐ ܚܰܟܺܝܡܳܐ ܘܒܳܪܽܘܝܳܐ ܬܡܺܝܗܳܐ ܕܟܽܠܗܶܝܢ ܒܶܪ̈ܝܳܬܶܗ ܬܶܡܗܳܐ ܘܕܽܘܡܳܪܳܐ ܐܶܢܶܝܢ ܪܰܒܳܐ. ܐܰܝܟܰܢ ܠܰܚܶܡ ܟܝܳܢ̈ܶܐ ܣܰܩܽܘܒ̈ܠܳܝܶܐ ܘܚܰܝܶܕ ܐܶܢܽܘܢ ܘܰܐܩܺܝܡ ܘܰܐܬܩܶܢ ܪܶܡܙܶܗ ܫܒܺܝܚܳܐ ܠܟܽܠܗܶܝܢ ܒܶܪ̈ܝܳܬܳܐ ܫܰܦܺܝܪ̈ܳܬܳܐ ܘܰܡܫܰܚ̈ܠܦܳܬܳܐ. ܐܰܟܙܢܳܐ ܕܚܳܫܽܘ̈ܠܳܝܶܐ ܕܚܳܫܠܺܝܢ ܘܰܡܩܺܝܡܺܝܢ ܡܶܢ ܓܽܘܫܡ̈ܶܐ ܕܕܰܗܒܳܐ ܘܰܕܣܺܐܡܳܐ ܘܕܰܢܚܳܫܳܐ ܘܦܰܪܙܠܳܐ ܘܫܰܪܟܳܐ ܕܓܽܘܫܡ̈ܶܐ ܗܳܠܶܝܢ ܚܕܳܐ ܨܒܽܘܬܳܐ ܡܶܕܶܡ ܫܒܺܝܚܬܳܐ ܕܽܐܘܡܳܢܽܘܬܳܐ. ܘܰܡܠܰܚܡܺܝܢ ܘܰܡܚܰܝܕܺܝܢ ܠܳܐܕܼ̈ܫܶܐ ܥܰܡ ܚ̈ܕܳܕܶܐ ܒܡܶܨܥܳܝܽܘܬܳܐ ܕܬܽܘܩܳܢܳܐ ܐ̱ܚܪܺܢܳܐ ܗܰܘ ܕܡܶܬܩܪܶܐ ܠܘܳܬܗܽܘܢ ܩܽܘܠܳܐ. ܗܳܢܰܘ ܕܝܢ ܕܽܘܒܳܩܳܐ. ܘܰܒܠܶܫܳܢܳܐ ܐܰܪܰܒܝܳܐ ܠܚܶܡ. ܘܰܒܗܳܢܳܐ ܡܠܰܚܡܺܝܢ ܠܳܐܕ̈ܫܶܐ ܥܰܡ ܚ̈ܕܳܕܶܐ. ܘܰܡܩܺܝܡܺܝܢ ܨܒܽܘܬܳܐ ܐܰܘ ܨܰܠܡܳܐ ܫܒܺܝܚܳܐ ܒܽܐܘܡܳܢܽܘܬܗܽܘܢ ܡܠܺܝܠܬܳܐ ܝܺܗܺܝܒܰܬ̥ ܡܶܢ ܐܰܠܳܗܳܐ. ܗܳܟܘܳܬ ܗܰܘ ܒܳܪܽܘܝܳܐ ܚܰܟܺܝܡܳܐ ܘܽܐܘܡܳܢܳܐ ܡܗܺܝܪܳܐ ܕܬܺܒܝܠ. ܒ̣ܪܳܐ ܘܰܥܒܰܕ ܟܝܳܢ̈ܶܐ ܡܫܰܚ̈ܠܦܶܐ. ܘܬܽܘܒ ܠܰܚܶܡ ܐܶܢܽܘܢ ܘܚܰܝܶܕ ܐܶܢܽܘܢ ܠܰܚ̈ܕܳܕܶܐ ܒܡܶܨܥܳܝܽܘܬܳܐ ܕܽܐܘܡܳܢܽܘܬܶܗ ܬܗܺܝܪܬܳܐ. ܘܰܐܬܩܶܢ ܘܰܐܩܺܝܡ ܡܶܢܗܽܘܢ ܟܝܳܢ̈ܶܐ ܐ̱ܚܪ̈ܳܢܶܐ ܡܪ̈ܰܟܒܶܐ. ܬܗܺܝܪ̈ܶܐ ܘܡܰܠ̈ܝܰܝ ܚܶܟܡܬܳܐ ܪܰܒܬܳܐ. ܗܳܟܘܳܬ ܐܳܦ ܠܒܰܪ ܐ̱ܢܳܫܳܐ ܡܰܠܟܳܐ ܘܡܳܪܳܐ ܕܡܶܛܽܠܳܬܶܗ ܟܽܠ ܒܶܪ̈ܝܳܬܳܐ ܡܶܬܚܰܙ̈ܝܳܢܝܳܬܳܐ. ܡܶܛܽܠ ܕܰܒ̣ܪܳܝܗܝ ܘܥܰܒܕܶܗ ܡܪܰܟܒܳܐ. ܠܰܚܶܡ ܘܚܰܝܶܕ ܩܰܕܡܳܐܝܬ ܠܰܟܝܳܢܳܗ̇ ܩܰܛܺܝܢܳܐ ܘܪܽܘܚܳܢܳܝܳܐ ܕܢܰܦܫܳܐ ܡܠܺܝܠܬܳܐ ܥܰܡ ܩܰܛܺܝܢܽܘܬܳܗ̇ ܕܢܰܦܫܳܐ ܕܡܳܢܳܝܬܳܐ ܡܰܚܝܳܢܺܝܬܶܗ ܕܦܰܓܪܳܐ ܕܩܰܠܺܝܠ ܩܰܪܺܝܒ ܠܶܗ ܘܠܳܚܶܡ ܠܩܰܛܺܝܢܽܘܬܶܗ. ܘܰܒܝܰܕ ܡܶܨܥܳܝܽܘܬܳܐ ܕܩܰܛܝܢܽܘܬ̥ܳܗ̇ ܕܢܰܦܫܳܐ ܕܡܳܢܳܝܬܳܐ ܕܰܗ̣ܘܳܬ̥ ܐܰܝܟ ܕܽܘܒܳܩܳܐ ܐܰܘܟܺܝܬ ܠܚܶܐܡ ܕܚܳܫܽܘܠܳܝܳܐ. ܐܶܬܚܰܝܕܰܬ̥ ܢܰܦܫܳܐ ܩܰܛܺܝܢܬܳܐ ܡܠܺܝܠܬܳܐ ܠܥܰܒܝܽܘܬܶܗ ܕܦܰܓܪܳܐ ܗܽܘܠܳܢܳܝܳܐ. ܘܰܗܘܳܬ̥ ܡܰܥܒܕܳܐ ܒܶܗ ܕܺܝܠܳܝܴ̈ܬܳܗ̇ ܪ̈ܽܘܚܳܢܳܝܶܐ. ܗܳܢܰܘ ܕܶܝܢ ܐܶܬܚܰܝܰܕܘ ܚܰܡܫܳܐ ܪ̈ܶܓܫܶܐ ܪ̈ܽܘܚܳܢܳܝܶܐ ܠܚܰܡܫܳܐ ܪ̈ܶܓܫܶܐ ܓܽܘܫܡܳܢܳܝ̈ܶܐ. ܘܰܫܪܳܐ ܗܰܘܢܳܐ ܒܡܽܘܚܳܐ. ܦܳܪܽܘܫܽܘܬܳܐ ܒܰܚܙܳܬ̥ܳܐ. ܣܽܘܟܳܠܳܐ ܒܫܶܡܥܳܐ. ܒܽܘܝܳܢܳܐ ܒܣܰܘܩܳܐ. ܡܰܕܥܳܐ ܒܠܶܒܳܐ. ܘܳܐܦ 

ܗܳܠܶܝܢ ܬܪܶܝܢ ܚܰܝ̈ܠܶܐ ܚܰܝܽܘ̈ܬܳܢܳܝܶܐ. ܚܶܡܬܳܐ ܒܟܰܒܕ̥ܳܐ. ܪܶܓܬܳܐ ܒܟܽܠܶܗ ܦܰܓܪܳܐ. ܚܽܘܫܳܒܳܐ ܒܟܽܘܠ̈ܝܳܬܳܐ. ܥܰܡ ܡܽܘ̈ܙܳܓܶܐ ܐ̱ܚܪ̈ܳܢܶܐ ܬܗܺܝܪ̈ܶܐ ܘܡܰܠ̈ܝܰܝ ܕܽܘܡܳܪܳܐ. ܕܰܟܝܳܢܳܐ ܕܢܰܦܫܳܐ ܘܕܰܟܝܳܢܳܐ ܕܦܰܓܪܳܐ ܥܰܡ ܕܺܝܠܳܝܴ̈ܬܳܐ ܘܡܰܥܒ̈ܕܳܢܘܳܬܳܐ. ܘܣܰܓܺܝܐܘܬ ܫܽܘܚ̈ܠܳܦܶܐ ܬܗܺܝܪ̈ܶܐ. ܕܶܐܢ ܨܳܒܶܝܢܰܢ ܕܰܢܡܰܠܶܠ ܥܰܠ ܟܝܳܢܳܗ̇ ܕܢܰܦܫܳܐ ܘܚܰܝ̈ܠܶܝܗ̇ ܘܫܰܪܟܳܐ ܕܕܺܝܠܳܝܴ̈ܬܳܗ̃ ܘܡܰܥܒ̈ܕܳܢܘܳܬܳܗ̇. ܗܳܟܘܳܬ ܘܥܰܠ ܟܝܳܢܶܗ ܕܦܰܓܪܳܐ ܘܡܽܘ̈ܙܳܓܰܘܗܝ ܘܗܰܕܳܡܰܘ̈ܗܝ ܓܰܘܳܝ̈ܶܐ ܘܒܰܪ̈ܳܝܶܐ: ܘܪ̈ܶܓܫܰܘܗܝ ܘܕܺܝܠܳܝܴ̈ܬܶܗ. ܘܫܶܪ̈ܝܳܢܰܘܗܝ ܘܟܽܘܪ̈ܗܳܢܰܘܗܝ ܘܟܺܐܒܰܘ̈ܗܝ ܘܚܰܫܰܘ̈ܗܝ ܘܫܰܪܟܳܐ ܕܡܰܥܒ̈ܕܳܢܘܳܬܶܗ ܣܰܓܺܝ̈ܐܬܐ ܘܰܡܫܰܚ̈ܠܦܳܬܳܐ: ܠܳܐ ܡܶܣܬܰܝ̈ܟܳܢ ܗܳܠܶܝܢ ܒܰܟ̈ܬܳܒܶܐ ܘܡܺܐܡܪ̈ܶܐ ܣܰܓܺܝ̈ܶܐܐ. ܘܗܳܐ ܢܰܣܺܝܘ ܘܡܰܠܶܠܘ ܩܰܠܺܝܠ ܡܶܢܗܽܘܢ ܡܰܢ ܥܰܠ ܪܽܘܟܳܒܶܗ ܕܒܰܪ ܐ̱ܢܳܫܳܐ. ܘܡܶܢܗܽܘܢ ܥܰܠ ܟܝܳܢܳܗ̇ ܕܢܰܦܫܳܐ ܘܕܺܝܠܳܝܴ̈ܬ̥ܳܗ̇ ܘܰܣܛܰܪ. ܘܡܶܢܗܽܘܢ ܥܰܠ ܟܺܐܒܰܘ̈ܗܝ ܕܦܰܓܪܳܐ ܘܟܽܘܪ̈ܗܳܢܰܘܗܝ ܘܚܽܘܠ̈ܡܳܢܰܘܗܝ. ܐܰܝܟ ܗܳܢܽܘܢ ܒ̈ܢܰܝ ܐܳܣܰܘܴ̈ܬܳܐ ܕܰܪܕܰܘ ܒܳܬܰܪ ܕܒܶܝܬ ܐܝܦܘܩܪܐܛܝܣ ܘܓܰܠܝܢܘܣ ܘܰܕܫܰܪܟܳܐ. ܘܰܐܝܟ ܗܶܪܡܺܝܣ ܘܦ̊ܶܬܰܐܓܽܘܪܳܣ ܘܰܐܓܐܬܕܡܘܢ ܘܦܠܐܛܘܢ ܘܐܪܝܣܛܘܛܠܝܣ ܘܰܟܢܰܘܴ̈ܬܗܽܘܢ. ܕܡܰܠܶܠܘ ܣܰܓܺܝ̈ܶܐܬܐ ܥܰܠ ܢܰܦܫܳܐ ܘܰܟܝܳܢܳܐ ܘܰܗܘܱ̈ܝܳܐ܉ ܘܠܳܐ ܐܶܫܟܰܚܘ ܠܰܡܣܰܝܳܟܽܘ. ܡܶܛܽܠ ܕܠܳܐ ܡܶܫܟܰܚ ܟܝܳܢܳܐ ܕܒܰܪ ܐ̱ܢܳܫܳܐ ܠܡܶܕܰܥ ܗܳܠܶܝܢ ܚܰܬܺܝܬܳܐܝܬ ܩܕܳܡ ܚܽܘܕܳܬ̥ܳܐ. ܘܡܶܛܽܠ ܗܳܟܰܢ ܬܡܺܝܗ ܘܰܫܒܺܝܚ ܥܳܒܽܘܕܳܐ ܚܰܟܺܝܡܳܐ܀

ܡܰܒܘܿܥܳܐ ܕܟܬܺܝܼܒܬܐ:  https://w3id.org/vhmml/readingRoom/view/125667

ܢܽܘܼܗܳܪܳܐ: ܟܬܺܝܼܒܬܳܐ ܗܳܕܶܐ ܫܟܺܝܼܚܳܐ ܒܰܟܬܳܒܳܐ ܚܰܕ ܕܰܛܥܺܝܼܢ ܫܶܡ «ܥܶܠܬܳܐ ܕܟܽܠ ܥܶܠ̈ܠܳܢ. ܟܬܳܒܳܐ ܓܰܘܳܢܳܝܳܐ ܠܟܽܠ ܥܰܡ̈ܡܺܝܼܢ ܕܰܬܚܶܝܬ ܫܡܰܝܳܐ».  ܘܰܢܛܺܝܼܪ ܒܒܶܝܬ ܐܰܪ̈ܟܶܐ ܕܥܺܕܬܐ ܕܐܰܪܒܥܺܝܢ ܣܳܗ̈ܕܶܐ ܕܡܰܪܕܺܝܢ. ܘܰܢܣܺܝܟ ܒܝܰܕ ܕܰܝܪܳܝܳܐ ܓܰܒܪܐܝܼܠ ܣܒܺܝܼܪܝܼܢܳܝܳܐ ܒܰܫܢܰܬ ܐܰܠܦܳܐ ܘܰܫܒܰܥ̈ܡܳܐܐ ܘܰܬܡܳܢܺܝܢ ܘܚܰܡܶܫ ܕܝܰܘ̈ܢܳܝܶܐ 1474) 

ܘܰܟܬܺܝܼܒܬܳܐ ܗܳܕܶܐ ܠܩܺܝܛܳܐ ܡܼܶܢ ܐܰܣܳܪܳܐ ܕܢܰܘܠܐ ܕܰܠܥܶܠ ܒܝܰܕ ܡܝܰܩܪܳܐ ܡܰܠܦܳܢܳܐ ܥܺܝܼܣܰܐ ܡܽܘܼܣܰܐ ܕܶܡܺܝܪ ܗܳܢܳܐ ܕܚܳܝܶܐ ܒܐܰܘܣܛܘܪܝܰܐ. ܬܰܘܕܺܝ ܣܰܓܺܝ ܠܐܟܺܝܼܦܘܼܬܶܗ ܘܰܒܛܝܼܠܘܼܬܶܗ ܠܶܫܳܢܳܝܬܐ.

ܦܳܪܘܿܣܳܐ ܝܰܘܣܶܦ ܒܶܓܬܰܫ