Syriac Reflections - Karyo Hliso
Yusuf Begtas:

Syriac Reflections

Read Syriac, Turkish and English Reflections

ܩܰܕܡܳܝܰܬ ܙܕܩ ܕܬܕܥ ܐܢܬ ܠܟ ܐܝܟܢܐ ܕܬܕܥ ܠܐܠܗܐ.

ܡܪܝ ܐܢܛܘܢܝܘܣ (251-356)

ܟܬܒ̈ܐ ܣܝܼܡܝܼܢ ܐܝܟ ܡܰܚܙܝܬܐ.

ܕܫܰܦܝܐ ܥܰܝܢܗ ܨܰܠܡܐ ܕܩܘܼܫܬܐ ܚܳܙܐ ܬܡܢ.

ܢܘܼܗܪܐ ܦܐܐ ܠܥܝ̈ܢܐ. ܘܩܘܼܫܬܐ ܠܬܰܪܥܝܼܬܐ.

ܢܘܼܗܪܐ ܓܒܝܼ ܠܥܰܝܢܟ. ܟܬܒ̈ܐ ܠܬܰܪܥܝܼܬܳܟ.

ܟܠ ܝܘܡ ܕܠܐ ܩܳܪܐ ܐܢ̱ܬ. ܡܼܢ ܟܬܒ̈ܐ ܠܐ ܝܳܬܪ ܐܢܬ.

ܕܰܥ ܕܡܼܢ ܫܐܕ̈ܐ ܡܙܕܟܐ ܐܢ̱ܬ. ܘܥܡ ܒܰܛܝ̈ܠܐ ܡܬܡܢܐ ܐܢ̱ܬ.

ܠܐ ܗ̱ܘܐ ܒܰܠܒܘܼܫ ܡ̈ܠܐ ܢܚܘܪ ܐ̱ܢܫ ܐܠܐ ܒܚܺܝܠ ܡ̈ܠܐ.

ܠܐ ܗ̱ܘܐ ܒܣܰܡ̈ܡܳܢܘܗܝ ܕܐܣܝܐ ܢܚܘܪ ܣܰܟܠܐ ܐܠܐ ܒܥܘܕܪ̈ܢܘܗܝ.

ܡܪܝ ܐܦܪܝܡ ܣܘܪܝܝܐ (303-370)

ܠܡܳܢܳܐ ܒܰܥܒ̈ܕܐ ܙܠܝܼ̈ܡܐ ܕܐ̱ܚܪ̈ܳܢܐ ܡܬܒܰܩܐ ܐܢ̱ܬ܆

ܘܰܒܗܰܘ ܡܐ ܕܦܳܩܕ ܠܟ ܐܠܗܐ ܡܰܗܡܐ ܐܢ̱ܬ...

ܥܠܡܐ ܡܿܢ ܣܶܦܪܐ ܗ̱ܘ ܬܗܝܼܪܐ. ܘܗܠܝܢ ܕܠܐ ܡܬܦܰܪܫܝܼܢ ܣܟ ܡܼܢ ܒܳܬܝ̈ܗܘܢ ܠܐ ܩܳܪܝܢ ܐܠܐ ܛܰܪܦܐ ܚܕ ܡܼܢ ܗܳܢܐ ܣܶܦܪܐ.

ܡܪܝ ܐܓܘܣܛܝܢܘܣ (354-430)

ܗܿܘ ܕܕܳܐܢ ܢܦܫܗ ܠܐ ܣܦܝܼܩ ܕܢܕܘܢ ܠܐܚܪ̈ܢܐ.

ܪܥܝܳܢܝ ܒܰܐܦ̈ܝ ܠܐ ܢܳܣܒ. ܘܨܶܒܝܳܢܝ ܒܳܬܪ ܠܐ ܥܳܢܐ.

ܠܐ ܦܪܝܼܫ ܐܰܝܢܐ ܕܠܒܪܗ ܒܬܰܪܣܝܼܬܐ ܕܕܶܒܫܳܐ ܩܳܛܠ ܡܼܢ ܗܿܘ ܕܩܳܛܠ ܒܣܰܟܝܢܐ.

ܡܪܝ ܐܝܣܚܩ ܕܢܝܢܘܐ (640-700)

«ܢܘܗܪܐ ܦܐܐ ܠܥ̈ܝܢܐ܆ ܘܩܘܼܫܬܐ ܠܬܪܥܝܬܐ. ܢܘܗܪܐ ܓܒܝ ܠܥܰܝܢܳܟ. ܟܬܳܒ̈ܐ ܠܬܰܪܥܝܬܳܟ.»

«ܟܠ ܝܘܡ ܕܠܐ ܩܳܪܐ ܐܢ̱ܬ܆ ܡܼܢ ܟܬܒ̈ܐ ܠܐ ܝܳܬܪ ܐܢ̱ܬ. ܕܰܥ ܕܡܼܢ ܫܐܕ̈ܐ ܡܶܙܕܟܐ ܐܢ̱ܬ. ܘܥܡ ܒܰܛܝܼ̈ܠܐ ܡܬܡܢܐ ܐܢ̱ܬ.»

«ܠܐ ܗ̱ܘܐ ܒܰܠܒܘܫ ܡ̈ܠܐ ܢܚܘܪ ܐ̱ܢܫ ܐܠܐ ܒܚܺܝܠ ܡ̈ܠܐ. ܠܐ ܗ̱ܘܐ ܒܣܰܡ̈ܡܢܰܘܗܝ ܕܐܣܝܐ ܢܚܘܪ ܣܰܟܠܐ ܐܠܐ ܒܥܘܕܪ̈ܢܰܘܗܝ.»

ܩܕܝܫܐ ܡܪܝ ܐܦܪܝܡ ܣܘܪܝܝܐ (303 - 3 (37

«ܠܡܢܐ ܒܰܥܒ̈ܕܐ ܙܠܝ̈ܡܐ ܕܐܚܪ̈ܢܐ ܡܶܬܒܰܩܐ ܐ̱ܢܬ܆ ܘܒܗܿܘ ܡܐ ܕܦܳܩܕ ܠܟ ܐܠܗܐ ܡܰܗܡܐ ܐܢ̱ܬ.»

«ܥܠܡܐ ܡܿܢ ܣܶܦܪܐ ܗ̱ܘ ܬܗܝܼܪܐ. ܘܗܠܝܢ ܕܠܐ ܡܬܦܰܪܫܝܼܢ ܣܟ ܡܼܢ ܒܳܬܝ̈ܗܘܢ ܠܐ ܩܳܪܝܢ ܐܠܐ ܐܢ ܛܪܦܐ ܚܕ ܡܼܢ ܗܢܐ ܣܶܦܪܐ».

ܩܕܝܫܐ ܡܪܝ ܐܘܓܘܣܛܝܢܘܣ (354 - 430)

«ܐܝܢܐ ܕܐ̱ܪ̈ܙܝ ܪܘܼܚܐ ܟܳܬܒ܆ ܟܕ ܪܘܚܐ ܠܗ ܠܐ ܡܰܟܬܒ܆ ܢܚܳܫܐ ܗܘ ܕܙܐܡ ܐܘ ܨܨܠܐ ܕܝܳܗܒ ܩܠܐ܆ ܟܕ ܪܘܚܐ ܒܦܬܓ̈ܡܘܗܝ ܚܰܠܝܘܬܗ ܠܐ ܚܳܠܛ. ܡܰܢ ܕܝܢ ܕܠܐܪ̈ܙܝ ܪܘܼܚܐ ܡܢ ܪܘܚܐ ܝܳܠܦ܆ ܡܢ ܡܠ̈ܘܗܝ ܟܠ ܒܘܼܣܳܡ ܩܳܢܝܢ ܫܡ̈ܘܥܘܗܝ. ܘܒܪܬ ܩܠܗ ܡܢ ܠܒܗܘܢ ܟܠ ܚܰܫ̈ܝܢ ܥܳܩܪܐ».

«ܠܝܬ ܡܕܡ ܕܗܟܢܐ ܣܳܦܩ ܠܰܡܫܰܢܳܝܘ ܥܝ̈ܳܕܐ ܙܰܠܝܼ̈ܠܐ ܡܼܢ ܢܦܫܐ܆ ܘܠܡܬܟܣܘ ܠܥܘܗ̈ܕܳܢܐ ܡܙܝܼ̈ܥܳܢܐ ܡܩܝܼ̈ܡܰܝ ܫܠܗܒ̈ܝܬܐ ܫܓܝܪ̈ܬܐ ܒܓܘܼ̈ܫܡܐ܆ ܐܝܟ ܒܰܠܝܼܥܘܬܐ ܕܒܪܚܡܬ ܝܘܠܦܢܐ ܘܦܶܗܝܐ ܕܒܬܪ ܥܘ̈ܡܩܐ ܕܣܘ̈ܟܳܠܝܗܘܢ ܕܦܬܓ̈ܡܐ ܕܟܬܒ̈ܐ.»

ܡܪܝ ܓܪܝܓܘܪܝܣ ܝܘܚܢܢ ܒܪܥܒܪܝܐ ܡܦܪܝܢܐ ܕܡܕܢܚܐ (1226 – 1286)

ܡܶܠܬܐ ܩܫܝܼܬܐ ܐܝܟ ܠܘܼܟܳܝܬܳܐ ܒܠܶܒܐ ܡܬܩܰܒܥܐ. ܘܡܠܬܐ ܕܠܐ ܒܙܰܒܢܗܿ ܡܬܐܡܪܐ ܠܝܬܝܗܿ ܐܠܐ ܐܢ ܙܰܗܪܐ.

ܡܬܠܐ ܐܒܗܝܐ

ܠܐ ܬܶܕܚܰܠ ܡܼܢ ܕܝܢܐ ܕܰܒܢܰܝ̈ܢܳܫܐ ܐܢ ܬܐܪܬܟ ܕܰܟܝܐ ܘܡܼܢ ܥܰܘܠܐ ܒܰܩܝܐ.

ܡܬܠܐ ܐܒܗܝܐ

ܢܚܛܘܦ ܚܢܢ ܠܢ ܘܰܠܓܰܘ ܡܶܢܢ ܢܶܬܓܰܘܐ ܕܢܶܫܟܰܚ ܡܰܠܟܘܼܰܬܢ ܕܰܡܛܰܫܝܐ ܒܠܶܒܰܢ ܟܐܡܰܬ ܕܢܚܙܐ ܠܐܠܗܢ.

ܡܪܝ ܓܪܝܓܘܪܝܘܣ ܝܘܚܢܢ ܒܪܥܒܪܝܐ (1226-1286)

ܣܰܡܝܘܼܬ ܥܰܝܢܐ ܛܒ ܡܼܢ ܣܰܡܝܘܬ ܠܒܐ. ܡܛܠ ܣܰܡܝܘܬ ܥܝܢܐ ܡܫܰܒܠܐ ܠܐܘܪܚܐ ܕܚ̈ܝܐ ܘܣܰܡܝܘܬ ܠܒܐ ܐܙܠܐ ܒܐܘܪܚܐ ܥܡܝܼܩܬܐ.

ܐܚܝܩܪ ܡܳܠܘܟܐ ܕܣܢܚܪܝܒ ܡܠܟܐ

ܟܕ ܡܶܬܢܰܚܡ ܒܝ ܡܫܝܼܚܐ܆ ܐܦ ܐܢܐ ܡܬܢܰܚܡ ܐܢܐ ܒܟ. ܘܐܢܬ ܒܝܼ ܘܒܐ̱ܚܪ̈ܢܐ.

ܫܘܼܡܠܳܝܐ܆ ܡܰܒܘܼܥܐ ܗ̱ܘ ܕܗܶܢ̈ܝܳܢܐ ܘܦܶܓ̈ܝܳܢܐ.

ܫܘܼܥܠܳܝܐ܆ ܡܰܒܘܼܥܐ ܗ̱ܘ ܕܫܘܼ̈ܢܳܩܐ ܘܕܘܼ̈ܢܳܩܐ.

ܠܐ ܒܳܐܬ ܠܘܬ ܫܘܼܡܠܳܝܐ ܐܝܼܩܳܪܐ ܘܐܰܓܪܐ ܕܥܳܡܠܳܐ ܘܠܰܐܝܳܐ.

ܐܝܢܐ ܕܡܶܬܪܰܘܪܰܒ ܒܬܰܚܬܘܼܪܳܐ܆ ܠܐ ܡܶܫܬܰܘܙܰܒ ܡܢ ܬܰܟܬܘܼܫܳܐ.

ܝܰܘܣܦ ܒܶܓܬܰܫ

ܟܕ ܫܐܠܘܗܝ ܠܝܫܘܥ ܡܼܢ ܦܪ̈ܝܫܐ: ܐܡܬܝ ܐܳܬܝܐ ܡܠܟܘܬܗ ܕܐܠܗܐ؟ ܥܢܐ ܘܐܡܪ ܠܗܘܢ. ܠܐ ܐܳܬܝܐ ܡܰܠܟܘܼܬܗ ܕܐܠܗܐ ܒܰܢܛܘܪ̈ܬܐ. ܘܠܐ ܐܡܪܝܢ. ܗܐ ܗܼܳܪܟܐ ܗ̱ܝ. ܘܗܐ ܗܳܪ ܬܰܡܢ ܗ̱ܝ. ܗܐ ܓܝܪ ܡܠܟܘܬܗ ܕܐܠܗܐ ܠܓܘ ܡܢܟܘܢ ܗ̱ܝ.

ܠܘܩܐ 17: 20-21

ܡܰܠܟܘܼܬܗ ܓܝܪ ܕܐܠܗܐ܆ ܠܐ ܗ̱ܘܬ ܡܐܟܠܐ ܘܡܰܫܬܝܐ. ܐܠܐ ܟܺܐܢܘܼܬܐ ܘܰܫܠܳܡܐ. ܘܚܰܕܘܬܐ ܒܪܘܚܐ ܕܩܘܕܫܐ.

ܦܘܠܘܣ ܫܠܝܚܐ (ܪ̈ܗܘܡܝܐ: 14: 17)

ܐܠܗܐ ܝܗܒ ܠܟ ܠܫܢܐ ܒܠܚܘܕ ܠܬܪܝܢ:

ܕܰܬܫܰܒܚܝܘܗܝ ܒܗ. ܘܰܬܒܰܢܐ ܒܗ ܠܐܚܘܟ....

ܠܡܳܢܳܐ ܒܰܥܒ̈ܕܐ ܙܠܝܼ̈ܡܐ ܕܐ̱ܚܪ̈ܳܢܐ ܡܬܒܰܩܐ ܐܢ̱ܬ܆

ܘܰܒܗܰܘ ܡܐ ܕܦܳܩܕ ܠܟ ܐܠܗܐ ܡܰܗܡܐ ܐܢ̱ܬ...

ܥܠܡܐ ܡܿܢ ܣܶܦܪܐ ܗ̱ܘ ܬܗܝܼܪܐ. ܘܗܠܝܢ ܕܠܐ ܡܬܦܰܪܫܝܼܢ ܣܟ ܡܼܢ ܒܳܬܝ̈ܗܘܢ ܠܐ ܩܳܪܝܢ ܐܠܐ ܛܰܪܦܐ ܚܕ ܡܼܢ ܗܳܢܐ ܣܶܦܪܐ.

ܪ̈ܘܼܚܳܬܢ ܒܰܪ̈ܝܢ ܠܰܡܫܰܒܳܚܘ ܠܡܪܝܐ ܘܠܡܶܬܒܰܣܳܡܘ ܥܡܗ ܘܰܒܠܒܐ ܡܿܢ ܕܟܠ ܒܪܢܫܐ ܒܰܪܝܐ ܫܟܝܼܚ ܗܘܼ ܣܦܝܼܩܘܼܬܐ. ܘܗܘ ܒܪܢܫܐ ܐܢ ܠܐ ܡܶܨܛܰܝܒ ܠܡܶܬܒܰܣܡܘ ܥܡ ܡܪܝܐ܆ ܠܐ ܡܬܡܰܠܝܐ ܣܦܝܼܩܘܬܐ ܗܕܐ ܒܡܶܕܡ ܐ̱ܚܪܝܢ. ܘܐܳܦܠܐ ܡܶܫܟܰܚ ܛܰܥܡܐ ܗܰܢܝܐܐ ܡܩܰܘܝܢܐ ܒܡܕܡ ܐ̱ܚܪܝܢ.

ܐܘ ܐܚ̈ܝ ܠܐ ܘܳܠܝܐ ܕܢܶܣܰܒ ܫܶܕܬܐ ܕܪܳܥܝܐ ܕܢܦ̈ܫܳܬܐ ܒܪܘܼܚܐ ܕܫܘܼܒܗܳܪܐ ܘܰܒܪܶܓܰܬ ܡܫܰܠܛܘܼܬܐ. ܐܠܐ ܒܪܘܚܐ ܕܪܘܼܚܳܦܐ ܘܰܕܪ̈ܚܡܐ. ܡܛܠ ܣܘܼܝܳܥܐ ܕܢܦܫ̈ܬܐ ܘܠܰܡܫܰܡܳܫܘܼܬܗܝܢ.

ܡܪܝ ܐܓܘܣܛܝܢܘܣ (354-430)

ܗܿܘ ܕܕܳܐܢ ܢܦܫܗ ܠܐ ܣܦܝܼܩ ܕܢܕܘܢ ܠܐܚܪ̈ܢܐ.

ܪܥܝܳܢܝ ܒܰܐܦ̈ܝ ܠܐ ܢܳܣܒ. ܘܨܶܒܝܳܢܝ ܒܳܬܪ ܠܐ ܥܳܢܐ.

ܠܐ ܦܪܝܼܫ ܐܰܝܢܐ ܕܠܒܪܗ ܒܬܰܪܣܝܼܬܐ ܕܕܶܒܫܳܐ ܩܳܛܠ ܡܼܢ ܗܿܘ ܕܩܳܛܠ ܒܣܰܟܝܢܐ.

ܡܪܝ ܐܝܣܚܩ ܕܢܝܢܘܐ (640-700)

ܡܶܠܬܐ ܩܫܝܼܬܐ ܐܝܟ ܠܘܼܟܳܝܬܳܐ ܒܠܶܒܐ ܡܬܩܰܒܥܐ. ܘܡܠܬܐ ܕܠܐ ܒܙܰܒܢܗܿ ܡܬܐܡܪܐ ܠܝܬܝܗܿ ܐܠܐ ܐܢ ܙܰܗܪܐ.

ܡܬܠܐ ܐܒܗܝܐ

ܐܠܦܳܪܐ ܕܡܰܗܡܐ ܒܦܘܼܪܩܳܢܐ ܕܐܝܠܝܢ ܕܩܰܒܠ ܐܢܘܢ ܒܐܠܦܗ܆ ܡܰܪܡܐ ܐܦ ܠܢܰܦܫܗ ܥܰܡܗܘܢ ܒܩܶܢܛܐ ܘܢܘܼܘܳܓܐ. ܘܐܢܗܘ ܕܗܢܘܢ ܢܐܒܕܘܢ ܡܛܠ ܡܗܡܝܢܘܬܗ ܐܦ ܗܘ ܢܐܒܕ ܥܡܗܘܢ.

ܡܬܠܐ ܐܒܗܝܐ

ܠܐ ܬܶܕܚܰܠ ܡܼܢ ܕܝܢܐ ܕܰܒܢܰܝ̈ܢܳܫܐ ܐܢ ܬܐܪܬܟ ܕܰܟܝܐ ܘܡܼܢ ܥܰܘܠܐ ܒܰܩܝܐ.

ܡܬܠܐ ܐܒܗܝܐ

ܡܬܬܪܝܼܡܢܘܬܐ ܗܟܝܠ ܕܥܠ ܨܰܠܡܐ܆ ܫܘܼܥܠܳܝܐ ܗ̱ܘ ܥܠ ܬܦܢܟܐ. ܗܿܘ ܕܥܠ ܐܚܘܗܝ ܡܶܫܬܰܩܰܠ ܕܐܝܬܘܗܝ ܕܡܘܬ ܐܠܗܐ܆ ܠܘܩܒܠ ܐܠܗܐ ܡܪܝܡ ܩܕܠܗ. ܘܳܝ ܠܰܕܠܐ ܡܶܫܬܰܘܕܰܥ ܫܶܦܠܐ ܕܟܝܢܗ.

ܡܬܠܐ ܐܒܗܝܐ

ܠܐ ܓܝܪ ܡܰܗܢܐ ܓܶܢܣܳܐ ܛܒܐ ܡܕܡ ܟܕ ܪ̈ܥܝܢܐ ܟܝܬ ܘܕܘܼܒܳܪ̈ܐ ܠܐ ܫܳܠܡܝܼܢ ܠܛܳܒ̈ܬܐ. ܘܠܐ ܡܬܟܰܠܝܐ ܡܰܘܗܒܬܐ ܟܕ ܥܡ ܓܢܣܐ ܥܕܺܝܼܠܐ ܕܘܼܒܪ̈ܐ ܛܒ̈ܐ ܘܪ̈ܥܝܳܢܐ ܚܠܝܼ̈ܡܐ ܐܳܘܝܢ.

ܡܬܠܐ ܐܒܗܝܐ

 

ܐܝܢܐ ܕܐܪ̈ܳܙܝ ܪܘܼܚܐ ܟܳܬܒ܆ ܟܕ ܪܘܼܚܐ ܠܗ ܠܐ ܡܰܟܬܶܒ܆ ܢܚܳܫܐ ܗ̱ܘ ܕܙܳܐܡ ܐܘ ܨܨܠܐ ܕܝܳܗܒ ܩܳܠܐ. ܟܕ ܪܘܼܚܐ ܒܦܶܬܓ̈ܳܡܰܘܗܝ ܚܰܠܝܘܼܬܗ ܠܐ ܚܳܠܛ. ܡܰܢ ܕܝܢ ܕܠܐܪ̈ܳܙܝ ܪܘܼܚܳܐ ܡܼܢ ܪܘܼܚܳܐ ܝܳܠܦ܆ ܡܼܢ ܡܶܠܰܘ̈ܗܝ ܟܠ ܒܘܼܣܳܡ ܩܳܢܝܢ ܫܳܡܘ̈ܥܰܘܗܝ. ܘܒܪܬ ܩܳܠܗ ܡܼܢ ܠܶܒܗܘܢ ܟܠ ܚܰܫ̈ܝܢ ܥܳܩܪܳܐ.

ܠܝܬ ܡܕܡ ܕܗܳܟܢܐ ܣܳܦܩ ܠܡܫܰܢܳܝܘܼ ܥܝ̈ܕܐ ܙܰܠܝ̈ܠܐ ܡܼܢ ܢܰܦܫܐ܆ ܘܠܰܡܬܰܟܳܣܘܼ ܠܥܘ̈ܗܕܳܢܐ ܡܙܝܼ̈ܥܢܐ ܡܩܝܼ̈ܡܰܝ ܫܠܗܒ̈ܝܳܬܐ ܫܓܝܼܪ̈ܬܐ ܒܓܘ̈ܫܡܐ ܐܝܟ ܒܰܠܝܼܥܘܬܐ ܕܒܪܶܚܡܰܬ ܝܘܼܠܦܳܢܐ ܘܦܶܗܝܳܐ ܕܒܳܬܪ ܥܘܼܡ̈ܩܐ ܕܣܘ̈ܟܳܠܝܗܘܢ ܕܦܬܓ̈ܡܐ ܕܟܬܒ̈ܐ.

ܡܪܝ ܓܪܝܓܘܪܝܘܣ ܝܘܚܢܢ ܒܪܥܒܪܝܐ (1226-1286)

ܣܰܡܝܘܼܬ ܥܰܝܢܐ ܛܒ ܡܼܢ ܣܰܡܝܘܬ ܠܒܐ. ܡܛܠ ܣܰܡܝܘܬ ܥܝܢܐ ܡܫܰܒܠܐ ܠܐܘܪܚܐ ܕܚ̈ܝܐ ܘܣܰܡܝܘܬ ܠܒܐ ܐܙܠܐ ܒܐܘܪܚܐ ܥܡܝܼܩܬܐ.

ܐܚܝܩܪ ܡܳܠܘܟܐ ܕܣܢܚܪܝܒ ܡܠܟܐ

ܫܘܼܡܠܳܝܐ܆ ܡܰܒܘܼܥܐ ܗ̱ܘ ܕܗܶܢ̈ܝܳܢܐ ܘܦܶܓ̈ܝܳܢܐ.

ܫܘܼܥܠܳܝܐ܆ ܡܰܒܘܼܥܐ ܗ̱ܘ ܕܫܘܼ̈ܢܳܩܐ ܘܕܘܼ̈ܢܳܩܐ.

ܠܐ ܒܳܐܬ ܠܘܬ ܫܘܼܡܠܳܝܐ ܐܝܼܩܳܪܐ ܘܐܰܓܪܐ ܕܥܳܡܠܳܐ ܘܠܰܐܝܳܐ.

ܐܝܢܐ ܕܡܶܬܪܰܘܪܰܒ ܒܬܰܚܬܘܼܪܳܐ܆ ܠܐ ܡܶܫܬܰܘܙܰܒ ܡܢ ܬܰܟܬܘܼܫܳܐ.

ܝܰܘܣܦ ܒܶܓܬܰܫ

ܦܪܘܫܘܬܐ

 

ܦܪܘܫܘܬܐ܆ ܦܳܬܚܐ ܩܘ̈ܦܠܐ ܕܗܰܘܢܐ ܟܰܣܝܐ.

ܦܪܘܫܘܬܐ܆ ܩܠܝܕܐ ܗܝ ܕܗܰܘܢܐ ܕܪܘܚܐ.

ܦܪܘܫܘܬܐ܆ ܐܡܐ ܗܝ ܕܝܕܥܬܐ ܝܬܡܬܐ. ܘܒܕܡܘܬ ܟܗܪܒܐ ܡܢܗܪܐ ܫܒܝܼ̈ܠܐ ܕܒܪܢܫܐ.

ܘܦܪܘܫܘܬܐ ܠܐ ܡܫܬܟܢܐ ܐܠܐ ܒܰܫܒܘܼܩܝܳܐ ܕܟܠܡܕܡ ܚܐܪܐ. ܘܒܰܠܒܘܼܟܝܐ ܬܰܪܒܝܼܬܳܢܝܐ ܘܐܝܩܪܐ ܕܡܬܦܪܥ ܠܟܠܡܕܡ. ܗܝܕܝܢ ܐܢ ܚܢܢ ܠܐ ܐܙܠܝܢܢ ܠܘܬܗܿ܆ ܗܝܼ ܐܬܝܐ ܠܘܳܬܢ. ܘܒܳܝܬܳܐ ܠܘܬܢ: ܒܐܘ̈ܢܐ ܕܥܳܠܡܰܢ ܓܰܘܳܝܐ.

ܘܢܝܼܚܘܬܐ ܘܬܡܝܡܘܬܐ ܒܣܝܡܘܬܐ ܘܡܨܠܚܢܘܬܐ ܘܛܘܒܬܢܘܬܐ ܬܰܠܝ̈ܢ ܒܪܒܘܬ ܐܝܢܳܝܘܬܗܿ.

ܝܘܣܦ ܒܓܬܫ

ܓܰܒܳܝܐ ܘܪܘܼܫܳܢܐ

 

ܚܝ̈ܐ ܡܿܢ ܒܰܙܒܰܢ ܕܳܡܝܢ ܠܓܰܒ̈ܝܐ ܘܡܳܟܣ̈ܐ ܗܿܢܘܢ ܕܫܳܩܠܝܢ ܟܣܦ ܪܝܫܐ ܘܡܰܕܐܬܐ. ܕܪܳܝܒܝܼܢ ܘܣܳܪܚܝܼܢ ܘܚܳܠܨܝܼܢ ܘܢܳܣܒܝܼܢ ܫܶܩܠܐ ܕܝܠܗܘܢ ܡܢ ܗܘ ܡܐ ܕܝܗܒ ܘܥܬܝܕܝܢ ܠܡܬܠ ܒܰܫܪܘܼܥܝܳܐ ܡܕܡ ܙܥܘܪܐ ܕܗܘܐ ܒܚܘܼܫܳܒܐ ܐܘ ܒܣܘܼܥܪܳܢܐ.

ܥܠܗܕܐ ܕܪܓܐ ܠܐ ܡܪܡܪܡ ܘܐܦܠܐ ܡܢܰܨܚ ܠܒܪܢܫܐ ܐܠܐ ܕܢܬܬܒܥ ܘܢܫܬܡܠܐ ܡܛܠ ܡܬܒܢܟܢܘܬܐ ܕܬܫܡܫܬܐ ܡܠܝܠܬܐ ܒܣܘ̈ܟܠܐ ܕܪܥܝܐ ܛܒܐ. ܡܕܝܢ ܙܕܩ ܕܢܬܠܣܛܪ ܡܢ ܪܥܝܢܐ ܕܪܘܼܫܳܢܐ ܗܢܐ ܕܒܳܥܐ ܘܬܳܒܥ ܕܪܓܐ ܘܐܩܡܐ ܡܛܠ ܥܶܠܳܝܘܼܬܐ ܘܪܡܘܼܬܐ ܘܫܘܼܒܚܐ ܕܝܳܬܐ...!

ܝܘܣܦ ܒܓܬܫ

ܚܪ̈ܝܙܐ ܘܚܙܝܼ̈ܩܐ

 

ܠܐ ܡܬܦܬܚ ܐܠܐ ܠܗܿܢܘܢ ܕܢܳܩܫܝܼܢ.

ܠܐ ܡܫܟܚܝܼܢ ܐܠܐ ܗܿܢܘܢ ܕܟܳܪܟܝܼܢ.

ܠܐ ܡܬܝܗܒ ܐܠܐ ܠܗܿܢܘܢ ܕܫܐܠܝܼܢ.

ܡܕܝܢ ܢܐܨܦ ܕܢܬܝܬܪ ܠܡܗܘܐ ܚܙܝ̈ܩܐ ܘܚܪ̈ܝܙܐ ܥܡ ܗܿܢܘܢ ܕܢܳܩܫܝܼܢ ܘܟܳܪܟܝܼܢ ܘܫܐܠܝܼܢ.

ܐܝܟ ܕܐܡܝܪܐ: «ܩܘܫܘ ܘܢܬܦܬܚ ܠܟܘܢ. ܘܫܐܠܘ ܘܢܬܝܗܒ ܠܟܘܢ.»

ܝܘܣܦ ܒܓܬܫ

ܡܪܰܒܝܳܢܐ ܘܛܒܬܐ

 

ܐܡܝܪܐ ܗܝ «ܡܪܰܒܝܢܐ ܗܿܘ ܐܝܢܐ ܕܡܣܰܟܐ ܦܘܪܥܢܐ ܠܛܒܬܗ» ܒܪܶܛܢ ܐ ܘܒܘܼܓܳܢܐ.

ܒܕ ܙܳܝܘܢܬܐ ܗ̱ܝ ܘܡܬܰܪܣܝܳܢܝܬܐ ܟܠ ܛܒܬܐ ܕܡܬܥܰܒܕܐ ܒܪܘܚܐ ܕܫܘܼܡܠܝܐ. ܕܠܐ ܡܘܼܪܳܝ ܡܫܬܦܰܥ ܘܡܶܫܬܰܪܬܰܚ ܚܰܝܠܐ ܚܰܬܝܼܬܐ ܕܪܘܼܚ ܒܪܢܫܐ ܟܕ ܡܫܡܠܐ ܚܣܝܪܘܬܐ ܕܐܚܪ̈ܢܐ ܒܢܝܫܐ ܕܠܐ ܩܡܝܛ ܒܩ̈ܨܨܐ ܓܘ̈ܝܐ. ܘܟܕ ܠܗܿ ܠܗܕܐ ܣܳܥܪ܆ ܪܘܙ ܘܕܐܨ ܘܡܬܒܣܡ ܕܡܫܡܠܐ ܚܕܘܐ ܒܨܝܪܐ ܘܰܣܢܝܩܐ ܕܒܰܪܢܫܗ ܓܰܘܳܝܐ.

ܡܕܝܢ ܠܐ ܦܐܝܐ ܕܢܦܠ ܒܩܘܼܛܥܐ. ܘܠܐ ܙܕܩ ܕܢܬܪܦܐ ܡܢ ܕܠܡܣܥܪ ܛܒܬܐ. ܗܳܝ ܕܟܕ ܨܒܝܢܐܝܬ ܘܪܚܡܬܢܐܝܬ ܡܣܬܰܥܪܐ ܝܳܗܒܐ ܣܘܼܟܳܠܐ ܛܥܝܼܡܐ ܘܬܘܼܩܳܢܐ ܪܣܝܼܟܐ ܠܚ̈ܝܐ ܬܢ̈ܢܝܐ ܘܓܦ̈ܐ ܠܥܳܠܰܡ ܥܳܠܡܝܼܢܳܝܘܼܬܐ. ܘܡܢܗܿ ܢܳܒܗܐ ܡܰܨܠܚܳܢܘܼܬܐ ܘܒܳܠܨܐ ܛܘܼܒܬܳܢܘܼܬܐ.

ܦܘ̈ܫܩܐ ܡܬܒܰܥܝ̈ܢܐ
ܡܪܰܒܝܳܢܐ: Tefeci / Pawnbroker
ܚܰܝܠܐ ܚܰܬܝܼܬܐ: ܚܝܠܐ ܫܪܝܪܐ. ܚܝܠܐ ܟܝܳܢܝܐ ܘܪܘܚܢܝܐ Authentic Power / Özgün / Gerçek Güç
ܝܘܣܦ ܒܓܬܫ

ܠܓܙܐ ܕܫܘܼܡܠܳܝܐ

 

ܙܡܳܡܐ ܚܰܠܝܐ ܘܨܰܘܬܐ ܒܣܝܼܡܐ ܕܫܘܼܡܠܳܝܐ ܐܰܦܪܥܘ ܩܘܼܠܣ̈ܐ ܘܝܘ̈ܒܳܒܐ ܘܓܘܼܪ̈ܓܐ ܡܢ ܟܠ ܩܘ̈ܡܳܢ ܘܡܘܼ̈ܫܚܳܢ: ܕܓܰܘ̈ܝܐ ܘܒܰܪ̈ܝܐ.

ܐܟܡܐ ܕܡܬܚܙܝܐ ܘܡܬܬܡܝܼܫܐ ܒܡܰܟܬܳܫܳܐ ܕܚ̈ܝܐ ܣܘܓܐܬ ܡܫܬܰܚܩܝܼܢܢ ܘܡܬܕܘܕܝܢܢ ܩܶܨܬ ܢܶܓ̈ܥܐ ܕܠܓܘ ܘܢܶܕ̈ܝܐ ܕܠܒܪ. ܥܠܗܕܐ ܢܶܓ̈ܙܶܐ ܕܫܘܼܡܠܳܝܐ ܠܝܬܝܗܘܢ ܐܠܐ ܠܶܓ̈ܙܐ ܕܡܨܝܒܝܢ ܠܐܦ̈ܝ ܕܘܼܒܳܪܐ ܘܗܘܼܦܳܟܐ ܡܢܝܼܚܳܢܐ: ܕܠܶܓ̈ܙܐ ܐܢܘܢ ܡܩܰܝ̈ܡܳܢܐ ܘܰܡܪ̈ܰܒܝܳܢܐ. ܘܡܳܠܝܢ ܢܶܓ̈ܥܶܐ ܘܰܡܫܰܘܝܢ ܢܶܕ̈ܝܐ.

ܘܗܘܼ ܫܘܼܡܠܳܝܐ ܒܝܳܬܗ ܡܳܠܘܼܝܐ ܗ̱ܘ ܕܢܶܓ̈ܥܶܐ ܕܠܓܘ ܘܰܡܫܰܘܝܳܢܐ ܗ̱ܘ ܕܢܶܕ̈ܝܶܐ ܕܠܒܪ. ܡܛܠܗܕܐ ܟܠܢܫ ܡܶܫܬܰܘܝܳܢܐ ܗ̱ܘ ܠܣܘ̈ܟܳܠܘܗܝ ܡܫܰܘܫ̈ܛܳܢܐ ܐܝܟܢܐ ܕܢܬܠܰܣܛܪ ܡܼܢ ܫܘܼܥܠܳܝܐ ܢܘܼܟ̈ܬܰܘܗܝ ܘܕܘܼܒܳܨ̈ܘܗܝ. ܕܠܝܬ ܡܕܡ ܕܗܟܢܐ ܕܳܠܚ ܘܟܳܐܪ ܡܘܼܙܳܓܐ ܕܝܼܠܳܢܳܝܐ ܘܰܡܫܰܘܬܦܐ ܐܝܟ ܪܶܓܰܬ ܪܘܼܫܳܢܐ ܗܢܐ ܕܡܙܕܩܶܬ ܡܼܢ ܬܰܪܥܝܼܬܐ ܕܫܘܼܥܠܳܝܐ......!

ܦܘ̈ܫܳܩܐ ܡܬܒܰܥܝ̈ܢܐ:
ܠܶܓܙܳܐ ܘܠܰܓܙܳܐ: Parable / Riddle / Motto / Allegori / Slogan / Özdeyiş / Alegori / Düşünce Meseli
ܢܶܓܙܐ ܘܢܰܓܙܳܐ: ܙܩ̈ܬܐ ܘܰܕܒ̈ܨܐ ܡܣܝܼ̈ܡܳܢܐ. ܠܘܒܛܐ. ܓܘܪܓܐ.Stimulation / Motion / İncentive / Dürtü / Güdü / Uyarma
ܢܶܓܥܳܐ:İçiboş / Çukur / Hollow / Depression
ܢܶܕܝܳܐ: ܟܠܡܕܡ ܕܢܳܦܩ ܠܐܦ̈ܝ ܠܒܪ. ܘܰܒܡܰܠܠܘܼܬ ܢܰܦܫܐ ܘܣܘܼܟܳܠܐ ܫܐܝܠܐ ܙܘ̈ܥܐ ܐܢܘܢ ܠܐ ܪ̈ܕܰܝܐ. ܕܐܝܟ ܡܬܚܙܰܘܙܝܳܢܘܼܬܐ ܘܫܰܦܘܼܪܬܳܢܘܼܬܐ ܘܫܘܼܦܰܪܕܝܼܩܘܼܬܐ ܘܙܘܼܪܟܳܠܐ ܘܪܘܼܒܠܐ ܘܰܣܛܪŞişlik / Kabartı / Tümsek / Mecazi anlamda ahlaki olmayan tafra, kasıntı, yalakalık, dalkavukluk gibi anlamlar / Protubarance
ܪܘܼܫܳܢܳܐ: ܪܶܓܬܐ ܕܚܰܝܠܐ ܘܡܶܫܬܰܠܛܳܢܘܼܬܐ.İktidar ve Otorite arzusu / Desire of power authority and jurisdiction
ܝܘܣܦ ܒܓܬܫ

ܫܘܼܓܳܢܳܝܐ ܓܰܘܳܝܐ

 

ܛܳܠܩܝܼܢ ܘܫܳܠܡܝܼܢ ܚܝ̈ܐ ܟܕ ܗܝܼ ܒܝܥܬܐ ܡܬܬܒܪܐ ܡܼܢ ܠܒܪ. ܐܠܐ ܒܳܠܨܝܼܢ ܘܫܳܘܚܝܼܢ ܘܡܶܫܬܰܪܝܢ ܘܡܶܬܗܰܒܒܝܢ ܟܕ ܡܬܬܒܪܐ ܡܼܢ ܠܓܘ.

ܡܕܝܢ ܩܛܘܠܐ ܗ̱ܘ ܟܠ ܫܘܼܓܢܳܝܐ ܘܫܘܼܚܠܦܐ ܕܠܐ ܡܶܫܬܰܪܐ ܡܼܢ ܠܓܘ.

ܥܠܗܕܐ ܝܬܝܪ ܡܬܕܰܠܠ ܘܡܬܦܰܫܩ ܚܙܘܼܩܝܐ ܒܰܪܳܝܐ ܟܕ ܡܬܢ̈ܩܠܢ ܘܡܶܬܪ̈ܘܚܳܢ ܐܘܼܪ̈ܚܳܬܐ ܕܐܶܣܦܰܪܣܐ ܓܰܘܳܝܐ.

ܝܘܣܦ ܒܓܬܫ

ܒܰܝܬܳܐ ܘܦܳܬܘܼܪܐ

 

ܫܰܚܠܦ ܒܰܝܬܳܟ ܠܡܰܠܟܘܼܬܐ. ܘܠܐ ܡܨܝܐ ܕܬܥܒܕ ܗܕܐ ܟܕ ܡܫܚܠܦ ܐܢܬ ܠܫܘܪ̈ܐ ܐܘ ܒܳܢܐ ܐ̱ܢܬ ܠܫܶܕ̈ܟܶܐ ܡܢܕܪܝܫ܆ ܐܠܐ ܐܢ ܕܰܬܙܰܡܢ ܡܪܝܐ ܚܰܝܘܼܣܬܳܢܐ ܠܦܳܬܘܪܟ.

ܘܐܠܗܐ ܠܐ ܡܰܗܡܐ ܒܐܝܢܐ ܦܳܬܘܼܪܐ ܕܗܘܼ. ܐܝܟܐ ܕܐܝܬ ܗ̱ܘ ܚܶܟܡܬܐ ܪܘܼܚܳܢܳܝܬܐ ܬܡܢ ܗܿܘܐ ܡܰܟܝܼܟܘܼܬܐ ܘܬܰܡܝܼܡܘܼܬܐ ܘܢܰܟܦܘܼܬܳܐ. ܘܟܕ ܒܰܥܠܐ ܘܐܢܬܬܐ ܘܛܠ̈ܝܐ ܡܬܐܣܪܝܼܢ ܒܰܚܕܳܝܘܼܬܐ ܕܢܘܼܓܳܕܳܐ ܠܳܚܡܳܝܳܐ ܕܰܡܝܰܬܪܘܼܬܐ܆ ܡܫܝܼܚܳܐ ܗܿܘܐ ܒܰܡܨܰܥܬܗܘܢ ܘܒܰܝܢܳܬܗܘܢ.

ܡܪܝ ܝܘܚܢܢ ܦܘܡܐ ܕܕܗܒܐ (347-407)

ܥܘܼܟܳܪ̈ܐ ܪ̈ܥܝܳܢܳܝܐ

ܐܡܪܝܢ ܩܕܡ̈ܝܐ ܕܝܠܢ: «ܡܿܢ ܕܰܡܫܰܡܫ ܠܐܢܳܫܘܼܬܐ ܩܰܪܝܒ ܗ̱ܘ ܠܐܠܗܘܬܐ.»

ܐܠܐ ܫܪܪܐ ܠܡܐܡܪ: ܡܫܰܚ̈ܩܳܢܐ ܘܡܕܰܘ̈ܕܢܐ ܘܡܰܚܦܪ̈ܢܐ ܐܢܘܢ ܥܘܼܟܳܪ̈ܐ ܪ̈ܥܝܳܢܳܝܐ ܕܡܬܝܰܠܕܝܢ ܡܼܢ ܢܶܓ̈ܥܶܐ ܕܠܓܘ ܘܢܶܕ̈ܝܐ ܕܠܒܪ ܒܐܘܪܚ ܬܫܡܫܬܐ ܡܠܝܼܠܬܐ ܒܦܢܝ̈ܬܢ ܕܡܕܢܚܐ.

ܒܪܡ ܗܢܝܐܘܬܐ ܨܪܺܝܼܪܳܐ ܒܣܘܼ̈ܟܳܠܐ ܕܡܰܕܪܟܳܢܘܼܬܐ ܗܝ ܕܐܳܡܪܐ: ܝܬܝܪ... ܘܛܒ ܝܰܬܝܪ ܡܰܗܢܝܐ ܕܢܶܚܦܘܼܪ ܘܢܶܦܠܘܼܚ ܘܰܢܥܘܼܕ ܚܰܘ̈ܩܶܐ ܘܐܶܫܟܳܪ̈ܐ ܕܝܠܢ ܡܼܢ ܗܿܝ ܕܢܶܬܒܰܩܐ ܘܢܶܥܕܘܼܠ ܟܳܬܳܐ ܘܙܝ̈ܙܳܢܐ ܕܚܰܩܠܐ ܕܐ̱ܚܪ̈ܢܐ.

ܥܘܼܟܳܪܐ: Mani / Engel / Hindrance
ܢܶܓܥܳܐ: İçiboş / Çukur / Hollow / Depression
ܢܶܕܝܳܐ: ܟܠܡܕܡ ܕܢܳܦܩ ܠܐܦ̈ܝ ܠܒܪ. ܘܰܒܡܰܠܠܘܼܬ ܢܰܦܫܐ ܘܣܘܼܟܳܠܐ ܫܐܝܠܐ ܙܘ̈ܥܐ ܐܢܘܢ ܠܐ ܪ̈ܕܰܝܐ. ܕܐܝܟ ܡܬܚܙܰܘܙܝܳܢܘܼܬܐ ܘܫܰܦܘܼܪܬܳܢܘܼܬܐ ܘܫܘܼܦܰܪܕܝܼܩܘܼܬܐ ܘܙܘܼܪܟܳܠܐ ܘܪܘܼܒܠܐ ܘܰܣܛܪ Şişlik / Kabartı / Mecazi anlamda ahlaki olmayan tafra, kasıntı, yalakalık, dalkavukluk gibi anlamlar / Protubarance
ܝܘܣܦ ܒܓܬܫ

ܥܶܠܬܳܐ ܘܥܶܠܬܳܢܳܐ

 

ܚܝ̈ܐ ܡܿܢ ܡܬܟܰܝܢܝܼܢ ܘܡܶܣܬܰܟܡܝܼܢ ܘܡܶܬܩܰܝܡܝܼܢ ܠܦܘܬ ܬܰܘܬܳܪ̈ܐ ܕܚܘܼܫ̈ܒܐ ܟܣ̈ܝܐ ܗܿܢܘܢ ܕܡܫܬܰܪܪܝܢ ܒܣܘܥܪ̈ܢܐ ܒܰܪ̈ܝܐ. ܒܕ ܠܟܠ ܡܕܡ ܥܶܠܬܐ ܐܝܬ ܗ̱ܘ. ܘܥܶܠܬܳܢܐ ܡܬܝܠܕ ܡܢ ܥܶܠܬܐ.

ܫܘܘ̈ܫܳܛܐ ܕܙܰܒܢܐ ܡܕܰܠܠܝܼܢ ܫܒܝܼ̈ܠܐ ܘܛܘܘܳܪ̈ܐ ܕܕܳܪܐ ܡܦܰܫܩܝܼܢ ܫܒܺܝ̈ܒܶܐ. ܐܠܐ ܙܪܝܼܩܳܐ ܘܰܫܚܝܼܩܐ ܘܩܰܪܝܼܫܐ ܪܘܼܚܐ ܒܙܰܒܢܐ ܗܢܐ. ܕܗܘܼ ܒܪܢܫܐ ܥܰܒܕܐܝܬ ܘܐܰܫܝܠܐܝܬ ܡܫܰܡܫ ܠܡܨ̈ܥܳܝܐ ܕܰܒܠܰܥܘ ܘܣܰܪܰܚܘ ܠܣܘ̈ܟܠܐ ܕܰܛܡܝܼܪܝܼܢ ܒܢܝܼܫܐ ܘܩܘܼܫܬܳܐ ܪܒܐ.

ܐܟܡܐ ܕܡܬܬܡܝܼܫܐ ܪܥܝܢܐ ܐܶܢܳܢܳܝܐ ܕܪܘܼܫܳܢܐ ܚܕ ܗܘ ܡܢ ܥܠܬ̈ܢܐ ܕܰܙܪܘܼܩܝܐ ܘܰܫܚܘܼܩܝܐ ܘܰܩܪܘܼܫܝܐ ܗܢܐ ܡܛܰܪܦܳܢܳܐ. ܡܟܐ ܫܳܪܳܐ ܕܠܡ ܠܐ ܙܕܩ ܕܢܰܘܒܕ ܣܘ̈ܟܳܠܐ ܕܪܳܥܝܳܐ ܛܒܐ ܗܿܢܘܢ ܕܰܟܪܝܼܙܺܝܢ ܘܰܦܪܝܼܣܺܝܼܢ ܒܰܫܪܪܐ ܘܰܨܪܺܝܼܪܺܝܢ ܘܰܩܪܝܼܚܝܼܢ ܒܩܘܼܫܬܐ: ܪܘܼܚܳܐ ܕܫܘܡܠܳܝܐ. ܒܕ ܢܝܼܫܐ ܬܢܳܢܳܝܐ ܠܝܬܘܗܝ ܐܠܐ ܕܢܗܘܐ ܥܶܠܰܬ ܡܕ̈ܡܐ ܛܒ̈ܐ ܡܛܠ ܥܶܠܬ̈ܢܐ ܡܢܝܼܚ̈ܳܢܐ ܠܩܘܼܕܳܡܳܐ ܝܳܬܳܢܳܝܐ ܘܫܘܼܘܫܳܛܐ ܐ̱ܢܳܫܳܝܐ.

ܝܘܣܦ ܒܓܬܫ

ܫܰܝܳܐ ܕܒܰܪܢܳܫܐ

 

ܡܫܰܒܚܝܼܢ ܘܰܡܩܰܠܣܝܼܢ ܪ̈ܡܙܐ ܕܚܘܒܐ ܕܩܰܪܝܒܐ. ܘܪܰܘܡܗܘܢ ܕܣܘܼ̈ܟܳܠܐ ܕܰܨܪܺܝܪܝܢ ܒܪܰܗܒܘܼܢܐ ܕܩܘܼܫܬܐ ܐܠܗܝܐ܆ ܡܝܰܩܪܢܘܬܐ ܐܝܬܝܗܿ ܕܫܰܝܐ ܕܒܪܢܫܐ ܒܠܥܕ ܦܘܼܪܫܢ ܕܘܼܟܬܐ ܘܦܢܝܼܬܐ ܘܐܬܪܐ ܘܪܥܝܢܐ ܘܬܘܕܝܬܐ ܘܰܚܢ̈ܝܐ ܦܘܠܝܼ̈ܛܝܩܳܝܐ.

ܐܝܟ ܕܝܼܕܝܼܥܐ܆ ܗܘܼ ܕܗܒܐ ܡܝܰܩܰܪ ܗ̱ܘ ܒܟܠܗܝܢ ܕܝܼܠܝ̈ܬܗ ܘܡܘܫ̈ܚܳܬܗ ܦܪ̈ܝܼܫܳܬܐ. ܐܠܐ ܕܗܒܐ ܣܢܝܼܢܐ ܝܬܝܪ ܡܫܰܒܰܚ ܘܰܡܝܰܩܰܪ ܘܰܡܥܰܠܰܝ ܠܘܬ ܡܰܚܒ̈ܢܘܗܝ.

ܗܝܼ ܗܟܘܬ ܐܦ ܒܪܢܫܐ ܡܶܬܝܰܩܰܪ ܘܡܶܬܥܰܠܐ ܒܡܰܣ̈ܩܳܢܐ ܘܡܶܕܝܳܪ̈ܐ ܕܚ̈ܝܐ ܒܦܶܚܡܳܐ ܕܐܝܩܪܐ ܕܦܳܠܓ ܘܝܳܗܒ ܒܬܶܫܡܶܫܬܗ ܘܕܰܪܓܗ ܠܫܰܝܳܐ ܐ̱ܢܳܫܳܝܐ. ܘܰܒܗܰܘ ܡܐ ܕܰܡܩܰܪܒ ܚܘܼܒܳܢܐܝܬ ܡܛܠ ܩܘܼܕܳܡܳܐ ܝܳܬܳܢܳܝܐ ܘܫܘܼܘܫܳܛܐ ܐ̱ܢܳܫܳܝܐ ܟܠ ܐܝܟܐ ܕܰܫܟܺܝܼܚ.

ܦܘܼܫܳܩܳܐ: ܫܰܝܐ ܐܘܟܝܬ ܐܝܩܪܐ ܪܒܐ. İnsan Onuru / Haysiyet / Dignity
ܝܘܣܦ ܒܓܬܫ

ܐܦ ܓܝܪ ܠܗܠ ܐܝܢܐ ܕܐܝܬܘܗܝ ܛܒܐ ܟܕ ܡܫܬܘܫܛ ܠܩܕܡܘܗܝ ܘܡܳܬܚ ܬܪܥܝܬܗ ܠܘܬ ܫܘܠܡܐ ܕܡܰܪܕܝܬܐ. ܘܣܒܪܐ ܕܙܟܘܬܐ ܐܝܬܘܗܝ ܥܠ ܩܠܝܠܘܬ ܪ̈ܓܠܘܗܝ. ܟܕ ܠܐ ܡܥܰܘܟ ܠܒܢ̈ܝ ܪܗܛܗ. ܐܝܢܐ ܕܝܢ ܕܐܝܬܘܗܝ ܫܰܦܠܐ ܘܚܰܠܫܐ ܒܐܓܘܢܐ: ܒܝܕ ܕܦܣܩ ܠܗ ܣܒܪܐ ܥܠ ܙܟܘܬܐ ܒܝܕ ܚܪܥܘܬܐ ܠܡܙܟܐ ܡܬܚܦܛ. ܘܗܕܐ ܒܠܚܘܕ ܡܬܦܰܪܣ. ܕܠܗܘ ܕܥܒܝܼܕ ܠܗ ܢܥܰܘܟ. ܐܘ ܢܬܘܦ ܘܢܟܠܐ. ܘܐܝܟ ܡܿܢ ܕܐܢ ܗܕܐ ܠܐ ܣܳܥܪ܆ ܠܐ ܡܬܘܡ ܡܨܐ ܠܡܙܟܐ.

ܡܠܦܢܐ ܐܢܫ ܣܘܪܝܝܐ

ܠܐ ܢܛܥܐ

 

ܡܢܗܘܢ ܕܚܰܒܪ̈ܐ ܡܰܘܗܒܬܐ ܐܢܘܢ.

ܘܡܢܗܘܢ ܗܪܓܐ ܘܕܘܢܩܐ.

ܡܢܗܘܢ ܕܪ̈ܚܡܐ ܡܘܗܒܬܐ ܐܢܘܢ.

ܘܡܢܗܘܢ ܗܪܓܐ ܘܗܘܕܣܐ.

ܡܢܗܘܢ ܕܐܣܪ̈ܐ ܡܘܗܒܬܐ ܐܢܘܢ.

ܘܡܢܗܘܢ ܗܪܓܐ ܘܫܘܡܠܝܐ.

ܡܢܗܘܢ ܕܒܢ̈ܝܢܫܐ ܡܘܗܒܬܐ ܐܢܘܢ.

ܘܡܢܗܘܢ ܚܢܢܐ ܘܚܘܣܢܐ.

ܝܘܣܦ ܒܓܬܫ

ܚܘܒܐ ܚܟܡܬܐ ܗܝ. ܘܣܢܐܬܐ ܠܶܠܘܬܐ ܗܝ. ܘܠܐ ܡܣܬܟܠܢܘܬܐ ܗܕܝܘܛܘܬܐ.

ܬܪ̈ܬܝܢ ܥܠ̈ܠܢ ܕܠ̈ܚܢ ܡܘܙܓܐ ܒܣܝܡܐ. ܚܕܐ ܡܣܬܟܠܢܘܬܐ ܦܰܕܝܕܬܐ. ܘܐܚܪܬܐ ܠܐ ܡܣܬܟܠܢܘܬܐ. ܘܬܪ̈ܬܝܗܝܢ ܒܪ̈ܝܢ ܚܰܘܓܐ ܥܰܩܪܐ ܒܐܣܪ̈ܐ ܐ̱ܢܳܫ̈ܝܐ. ܕܕܚ̈ܩܢ ܠܨܡܘܪܝܐ ܘܨܡܪܬܐ (ܗܘܬܐ) ܪܒܬܐ. ܘܡܛܠ ܡܣܬܰܟܠܢܘܼܬܐ ܥܪܝܼܡܬܐ ܘܪܘܝܚܬܐ܆ ܗܘ ܒܪܢܫܐ ܣܢܝܩ ܗܘ ܠܬܡܝܡܘܬܐ ܕܠܒܐ ܘܥܪܝܡܘܬܐ ܕܣܘ̈ܟܠܐ ܗܠܝܢ ܕܡܰܪܩܝܼܢ ܟܘ̈ܬܡܳܬܐ ܕܟ̈ܘܐ ܕܕܘܼܪ̈ܟܳܢܘܗܝ ܓܰܘ̈ܝܐ ܘܰܫܥܝܼܢܐ ܕܕܝ̈ܢܘܗܝ ܡܰܫܪ̈ܢܐ. ܘܩܕܡ ܡܬܦܰܥܠܢܘܼܬܐ܆ ܣܢܝܩ ܗ̱ܘ ܠܨܘܼܠܳܠܐ ܕܚܘ̈ܫܒܘܗܝ ܡܫܪ̈ܢܐ ܗܢܘܢ ܕܡܣܬܡܟ ܥܠܝܗܘܢ ܘܡܙܝܥܝܢ ܠܣܘܼܥܪ̈ܢܐ ܘܕܘܒܪ̈ܐ .ܘܐܢ ܠܐ ܡܬܪܟܢ ܠܗܠܝܢ ܦܐܫ ܬܚܝܬ ܡܥܒܕܢܘܬܐ ܕܗܘܢܐ ܟܣܝܐ. ܗܢܐ ܕܦܘ̈ܫܳܝܰܘܗܝ ܡܚܰܒܠܝܢ ܠܡܘܙܓܐ ܕܪܝܼܚܐ ܒܣܝܡܐ.

ܝܘܣܦ ܒܓܬܫ

ܣܰܝܒܰܪ ܝܘܣܦ ܘܐܬ̣ܪܡܪܡ. ܣܝܒܪ ܐܦ ܐܢ̱ܬ ܘܐܬܟܠܠ. ܠܐ ܢܥܝ̣ܩܟ ܚܫܐ ܕܙܒܢܐ܇ ܕܟܣܝܢ ܒܗ ܚܝ̈ܐ ܕܪܘܡܐ. ܠܟܘܟܒ̈ܐ ܚܐܪ ܡܰܠܚܳܐ܇ ܡ̇ܐ ܕܪܳܕܐ ܒܝܬ ܡܚܫܘ̈ܠܐ. ܘܐܢ ܬܷܡܪܰܬ ܥܰܝܢܗ ܩܠܝ̣ܠ܇ ܥܘܬܪܗ ܡܢܬܗ ܠܐ ܗ̇ܘܐ. ܐܰܩܬ ܥܝܢܟ ܒܨܠܝ̣ܒܐ܇ ܕܒܝܡܐ ܕܚܝ̣ܠܐ ܪܳܕܝܬ. ܠܐ ܬܷܬܰܗܐ ܒܒܪܝ̣ܬܐ܇ ܕܣܓܝ ܫܓܝ̣ܫܐ ܡ̣ܢ ܝܡܐ.

ܡܪܝ ܐܦܪܝܡ (373ـ 306)

ܠܢܡܘ̇ܣ̈ܐ ܥܝ̣ܪ̈ܐ: ܕܰܡܟ ܐܢܘ̇ܢ ܡܡܘ̇ܢܐ. ܐܢ ܕܳܡܟܝܢ ܪ̈ܥܘܳܬܐ܇ ܗ̇ܐ ܚܠܘ̇ܠܐ ܪܒܐ ܠܕܐܒ̈ܐ. ܐܢ ܢܡ̣ܘ ܘܰܕܡ̣ܟܘ ܥܠܠܢ̈ܐ܇ ܗ̇ܐ ܬܒ̇ܪܐ ܪܒܐ ܠܥܪ̈ܒܐ.

ܡܪܝ ܐܦܪܝܡ (373ـ 306)

ܐܝܢܐ ܕܪܚܡ ܐܘܪܚܐ ܕܚܝ̈ܐ ܠܚܘܒܐ ܢܝܩܪ. ܘܣܢܐܬ ܐ̱ܢܫܐ ܡ̣ܢ ܪܥܝܢܗ ܢܨܒܐ ܠܡܥܩܪ. ܒܦܫܝ̣ܛܘ̣ܬܐ ܘܰܚܘܝ̣ܚܘ̣ܬܐ ܥܡ ܟܠ ܐܝܩܪ܇ ܢܦܓܥ ܒܟܠܢܫ ܒܢܝ̣ܫܐ ܕܬܪܝ̣ܨ ܘܐܢ̱ܫ ܠܐ ܣܳܩܪ.

ܥܒܕܝܫܘܥ ܕܨܘܒܐ (1318)

ܝ̣ܕܥܬܐ ܡ̇ܢ ܡܢܨܚܐ ܠܐܝܢܐ ܕܒܗ̇ ܐܬ̣ܗܰܕܝ. ܝܕܘ̇ܥܐ ܕܝܢ ܐܝ̣ܬܘܗܝ ܐܝܢܐ ܕܚܘ̣ܒܐ ܩܰܕܝ.

ܥܒܕܝܫܘܥ ܕܨܘܒܐ (1318)

ܕܘܡܝܐ ܗ̱ܝ ܐܟܬܐ ܠܐܟܕܢܐ. ܘܬܪ̈ܬܝܗܝܢ ܢܳܫܡ̈ܢ ܡܘܬܐ. ܘܝܰܠܕܐ ܕܡ̣ܢ ܗ̇ܝ ܐܰܘ ܗ̇ܕܐ܇ ܠܝܳܠܕܬܐ ܩܳܛܠ ܩܰܕܡܐ.

ܐܠܝܐ ܕܐܢܒܪ ( 922)

ܒܡܰܪܕܘܬܐ ܪܕܝ̣ ܠܒܢ̈ܝܐ܇ ܕܝܘ̣ܠܦܢܐ ܘܕܚܟܡܬܐ. ܘܚܠܦ ܪ̈ܛܢܐ ܘܒܘܓ̈ܢܐ܇ ܡܙ̇ܘܓ ܕܚܠܬܐ ܒܪܚܡܬܐ.

ܐܠܝܐ ܕܐܢܒܪ ( 922)

ܐܢ ܐܝܬܝܟ ܪܝ̣ܫܐ ܠܥܡܐ܇ ܗܘ̣ܝ ܡܚܙܝ̣ܬܐ ܕܢܟܦܘܬܐ. ܕܠܐ ܬܗܘܐ ܐܱܒܢܐ ܕܟܫܠܐ܇ ܘܬܘܩܠܬܐ ܠܫܒܪ̈ܝ ܠܒܐ.

ܐܠܝܐ ܕܐܢܒܪ ( 922)

ܐܢ ܬܰܘܟܶܠ ܐܳܪܚܳܟ ܕܒܫܐ܇ ܒܦܪܨܘܦܐ ܡܠܷܐ ܟܡܝ̣ܪܘܬܐ܇ ܒܕܡܘܬ ܙܦܬܐ ܘܰܚܠܰܡܬܐ܇ ܚܫܝ̣ܒ ܠܗ ܒܬܐܪܬܐ ܡܡܰܚܰܝܬܐ.

ܐܠܝܐ ܕܐܢܒܪ ( 922)

ܐܝܬ ܗ̱ܘ ܣܗ̈ܕܐ ܕܟܣܝܘ̣ܬܐ܇ ܕܥܡ ܣܗܕ̈ܐ ܫܘܶܝܢ ܚܫܝ̈ܗܘܢ. ܘܡܛܠ ܕܰܟܣܶܐ ܐܘ̣ܠܨܢܗܘܢ܇ ܥܡ ܣܗܕ̈ܐ ܟܬܝ̣ܒ ܢܨܚܢܗܘܢ.

ܡܪܝ ܐܦܪܝܡ (373 - 303)

ܡ̇ܢܘ̣ ܓܝܪ ܕܠܐ ܝܳܕܥ܇ ܕܒܨܝ̣ܪܘܬ ܡܐܟܘܠܬܐ ܥܡ ܣܝܒܪܬܐ ܢܰܚܘܒܬܐ܇ ܚܘܠܡܢܐ ܝ̇ܗܒܝ̣ܢ ܠܗ ܠܓܘܫܡܐ. ܝܬܝܪܐܝܬ ܕܝܢ܇ ܡܐ ܕܢܰܩܝ̣ܦ ܠܗܝܢ ܐܦ ܥܡܠܐ ܕܡܫܘܚܬܐ. ܐܝܢܐ ܗ̱ܘ ܕܝܢ ܐܣܝܐ ܕܗܟܢܐ ܝܳܕܥ ܕܢܰܚܠܡ ܓܘܫܡܐ܇ ܐܝܟ ܡܐ ܕܡ̇ܚܠܡ ܠܗ ܦܘܠܚܢܐ ܕܥܡܠܐ.

ܡܪܝ ܦܝܠܘܟܣܝܢܘܣ ܕܡܒܘܓ (523 - 440)

ܗ̇ܘ ܓܝܪ ܕܗ̣ܘ ܡܨ̇ܥܪ ܠܩܢܘܡܗ܇ ܡ̇ܢܘ̣ ܢܝܩܪܝܘܗܝ. ܗ̇ܘ ܕܗ̣ܘ ܪܳܗܛ ܒܬܪ ܫܝܛܘ̣ܬܗ܇ ܡ̇ܢܘ̣ ܢܫܒܚܝ̣ܘܗܝ. ܘܗ̇ܘ ܕܗ̣ܘ ܡܟ̇ܢܫ ܥܠܘܗܝ ܒܙܚܐ ܘܡܡܠܠܐ ܣܢܝܐ܇ ܡ̇ܢܘ̣ ܕܝܰܬܝܪ ܡܢܗ ܢ̣ܬܒܛܠ ܥܠ ܫܡܗ ܫܦܝ̣ܪܐ.

ܡܪܝ ܦܝܠܘܟܣܝܢܘܣ ܕܡܒܘܓ (523 - 440)

ܐܟܙܢܐ ܕܫܠܝ̣ܬܐ ܒܓܘ ܟܪܣܐ܇ ܡ̣ܢ ܒ̇ܬܪ ܕܡ̣ܬܓܒܠ ܘܡ̣ܨܛܠܡ ܥܘ̣ܠܐ܇ ܗ̇ܝܕܝܢ ܡ̣ܬܟܪܟܐ ܥܠܘܗܝ ܕܬ̣ܛܪ ܚܝܘ̣ܬܗ܇ ܘܡܐ ܕܐܬܝ̣ܠܕ ܡ̣ܢ ܟܪܣܐ܇ ܡܬ̣ܦܣܩܐ ܘܡ̣ܫܬܕܝܐ ܠܒܪ ܡܢܗ܇ ܡܛܠ ܕܠܘ ܡܢ ܩܢܘܡܗ ܗܝ̣. ܗܟܢܐ ܘܐܦ ܥܘܬܪܐ ܘܩܢܝܢܐ ܘܥܡ ܫܪܟܐ ܕܟܠܗܝܢ ܐ̱ܢܫܝ̈ܬܐ܇ ܡ̣ܢ ܒܬܪ ܕܡ̣ܬܝܠܕ ܒܪܢܫܐ ܢܳܩܦ̈ܢ ܠܗ ܒܕܡܘܬܐ ܕܰܫܠܝ̣ܬܐ. ܘܡܐ ܬܘܒ ܕܐܬܐ ܕܢܬܝ̣ܠܕ ܡ̣ܢ ܥܠܡܐ ܠܥܠܡܐ ܒܝܕ ܡܘܬܐ܇ ܡ̣ܬܦܣܩܝ̣ܢ ܘܡ̣ܫܬܕܝܢ ܡܢܗ ܩܢܝ̈ܢܘܗܝ ܐܝܟ ܫܠܝ̣ܬܐ ܕܡ̣ܬܦܣܩܐ ܡܢ ܓܘܫܡܐ.

ܡܪܝ ܦܝܠܘܟܣܝܢܘܣ ܕܡܒܘܓ (523 - 440)

ܠܝܬ ܕܨܪܝ̣ܟ ܡ̣ܢ ܐܝܢܐ ܕܠܐ ܣܳܒܥ ܒܥܘ̣ܬܪܗ܇ ܘܠܝܬ ܕܰܡܫܰܪܬܰܚ ܡ̣ܢ ܐܝܢܐ ܕܣܳܦܩ ܠܢܦܫܗ ܒܨܶܦܬܐ ܙܥܘܪܬܐ.

ܚܟܝܡܐ ܐ̱ܢܫ

ܪܒܐ ܗ̱ܝ ܕܐ̱ܢܫ ܢ̣ܩܢܐ ܫܘ̣ܦܪܐ ܕܛܒ̈ܬܐ܇ ܝܰܬܝ̣ܪ ܡ̣ܢ ܕܬܗܘܐ ܠܗ ܒܛܝ̣ܠܘܬܐ ܥܠ ܫܘ̣ܦܪܐ ܕܟܝܢܐ.

ܚܟܝܡܐ ܐ̱ܢܫ

ܚܕܐ ܡܢ ܫܦܝܪ̈ܬܐ ܗܕܐ ܗ̱ܝ. ܕܢܫܬܠܛ ܐ̱ܢܫ ܥܠ ܚܐܪܘܬܗ܇ ܕܐܝܟ ܕܨܳܒܐ ܢܚܐ. ܗ̇ܢܘ ܕܝܢ ܕܒܒܘܝܳܢܐ ܢܚܐ ܒܗ̇.

ܚܟܝܡܐ ܐ̱ܢܫ

ܝܕܥܬܐ ܓܝܪ ܫܝܢܐ ܡܳܠܝܐ ܠܗ ܠܠܒܐ. ܘܒܚܕܘ̣ܬܐ ܡܩܰܝܡܐ ܠܗ ܠܒܪܢܫܐ. ܪܘܪ̈ܒܝ̣ܢ ܐܢܘܢ ܡܶܠܟܝ̈ܗ̇ ܘܬܡܝ̣ܗܝ̣ܢ ܘܡ̇ܢܗܪܝܢ ܥܝ̈ܢܐ.

ܡܪܝ ܐܝܣܚܩ ܕܢܝ̣ܢܘܐ

ܚܘ̣ܫ̈ܒܐ ܓܝܪ ܣܪ̈ܝ̣ܩܐ ܘܠܐ ܝ̣ܕܥܬܐ ܐܝܟ ܒܥܝ̣ܪܐ ܥ̇ܒܕܝ̣ܢ ܠܗ ܠܐܢ̱ܫ. ܘܡܣ̇ܪܩܝ̣ܢ ܠܗ ܡ̣ܢ ܗܝܡܢܘܬܐ. ܘܫ̇ܓܫܝ̣ܢ ܠܗ ܠܗܘܢܗ܇ ܘܡ̇ܠܝܢ ܠܗ ܗܓܓ̈ܐ ܕܚܘ̣ܫ̈ܒܐ ܫܳܛܘ̇ܪ̈ܐ.

ܡܪܝ ܐܝܣܚܩ ܕܢܝ̣ܢܘܐ

ܠܐ ܡܬ̣ܘܡ ܒܠܥܕ ܕܡ̣ܫܬܘܐ ܒܪܢܫܐ ܠܘܩܕܡ ܠܚܘܒܐ ܗ̇ܘ ܗܢܝܐܐ ܘܡܪܘܝܢܐ ܕܐܠܗܐ܇ ܡܬܩܪܒ ܠܚܘܒܐ ܫܦܝܐ ܕܒܢܝ̈ܢܫܐ.

ܡܪܝ ܐܝܣܚܩ ܕܢܝ̣ܢܘܐ

ܡܟܝ̣ܟܘܬܐ: ܚܝܠܐ ܡܕܡ ܐܝܬܝܗ̇܇ ܕܒܠܫܢܐ ܠܐ ܡ̣ܬܐܡܪܐ ܘܒܚܝܠܐ ܐ̱ܢܫܝܐ ܠܐ ܡ̣ܬܩܢܝܐ.

ܡܪܝ ܐܝܣܚܩ ܕܢܝ̣ܢܘܐ

ܠܡܬܟ ܡ̇ܢ ܐܝܟ ܝܘܣܦ ܐܚܒ. ܘܠܐܘܡܬܟ ܕܝܢ ܐܝܟ ܡܘܫܐ ܝܰܩܪ. ܘܚܠܦ ܥܡܟ ܬܘܒ ܐܝܟ ܡܫܝ̣ܚܐ ܚܰܫ.

ܢܥܘܡ ܦܐܝܩ ܐܡܝ̣ܕܝܐ

ܢܘ̣ܗܪܐ ܡ̇ܢ ܕܒܝܬܐ܇ ܫܪܓܐ ܗ̱ܝ. ܘܢܘܗܪܗ ܕܝܢ ܕܥܠܡܐ܇ ܝܕܘ̣ܥ̈ܬܢܐ ܐܢܘܢ.

ܢܥܘܡ ܦܐܝܩ ܐܡܝ̣ܕܝܐ

ܩܪ̈ܒܐ ܬܘܕܝ̣ܬܢ̈ܝܐ܇ ܡܥ̇ܘܟܝܢ ܠܣܘܥܪ̈ܢܐ ܡܪ̈ܕܘܬܢܝܐ.

ܢܥܘܡ ܦܐܝܩ ܐܡܝ̣ܕܝܐ

ܠܝܬ ܡܕܡ ܓܝܪ ܕܡܥ̇ܕܪ ܠܣܕܩܐ ܕܥܕܬܐ܇ ܝܬܝ̣ܪ ܡ̣ܢ ܪܚܡܬ ܕܪܓܐ. ܘܠܝܬ ܡܕܡ ܕܝܢ ܕܡܫ̇ܠܗܒ ܪܘܓܙܗ ܕܠܠܗܐ ܐܝܟ ܣܕܩܐ ܕܥܕܬܐ.

ܝܘܚܢܢ ܦܘܡܐ ܕܕܗܒܐ

ܕܐܠܘ ܠܐ ܡܬܚܙܝܐ ܗ̱ܘܬ ܠܟ ܢܦܫܟ ܕܐܝܬ ܒܗ̇ ܡܘ̈ܡܐ܇ ܟܠܟ ܡܘ̈ܡܐ ܗ̱ܘܝܬ.

ܡܪܝ ܝܥܩܘܒ ܕܣܪܘܓ

ܣܳܬܘܪ̈ܐ܇ ܬܢܢܐ ܚܠܦ ܫܡܫܐ ܐܰܚܝ̣ܕܝ̣ܢ. ܚܰܝܳܒܝ̣ܢ ܓܝܪ ܕܢܶܓܒܘܢ ܥܢ̈ܒܐ ܘܠܐ ܢܥܰܒܘܢ ܥܠ ܒܶܣܪ̈ܐ ܣܟܠܐܝܬ.

ܒܪܥܒܪܝܐ

ܐܢ ܢܬ̣ܬܥܝ̣ܩ ܚܰܒܪܟ ܒܩܘ̣ܠܣܟ ܕܡ̣ܢ ܣܓܝ̈ܐܐ܇ ܘܢܬܐܠܨ ܕܢܙܪܘ̇ܥ ܫܪܒܟ ܣܰܢܝܐ܇ ܠܐ ܬܬܒܠܥ ܡ̣ܢ ܥܩܬܐ. ܘܬܡܙܘܓ ܠܗܘܢܐ ܚܡܪܐ ܬܛܝ̣ܪܐ. ܣܛܢܐ ܓܝܪ ܡܬ̣ܦܰܪܰܣ ܕܠܗ̇ܘ ܢ̣ܫܓܘ̇ܪ ܒܰܚܣܳܡܳܐ. ܘܠܟ ܕܝܢ ܢܫܰܢܩ ܒܥܩܬܐ.

ܒܪܥܒܪܝܐ

ܒܠܘ̇ܡ ܦܘܡܐ ܕܗ̇ܢܘܢ ܕܡ̇ܪܡܝܢ ܒܐܕܢ̈ܝܟ ܥܠ ܚܒܪ̈ܝܟ. ܘܠܐ ܬܬ̣ܕܡܪ ܐܢ ܡܨ̇ܚܝܢ ܠܟ ܣܓܝ̈ܐܐ. ܕܝ̈ܘܐ ܓܝܪ ܥܳܒܕܝܢ ܗܕܐ. ܗ̇ܢܘܢ ܕܨܳܒܝܢ ܕܠܐ ܢܗܘܐ ܡܚܰܪܰܪ ܡ̣ܢ ܣܢܐܬܐ ܘܐܰܟܬܐ ܓܒܪܐ ܓܡܝ̣ܪܐ.

ܒܪܥܒܪܝܐ

ܐܟܙܢܐ ܕܡܥܘ̈ܟܢ ܥܢܢ̈ܐ ܠܙܰܠܝ̣̈ܩܝ ܫܡܫܐ ܕܢܢܗܪܘܢ. ܗܟܢܐ ܡܥܰܡܛ ܪܘ̣ܓܙܐ ܢܰܗܝ̣ܪܘ̣ܬܐ ܕܢܦܫܐ.

ܒܪܥܒܪܝܐ

ܢܝ̣ܚܘܬܐ ܐܝܬܝܗ̇ ܫܘ̣ܥܐ ܕܠܥܠ ܡ̣ܢ ܝܡܐ ܕܚܶܡܬܐ ܣܝ̣ܡ. ܘܠܟܠܗܘܢ ܓ̈ܠܠܐ ܕܛܪܝܢ ܒܗ ܫܳܪܐ܇ ܘܗܘ̣ ܠܐ ܡ̣ܙܕܰܥܙܰܥ.

ܒܪܥܒܪܝܐ

ܚܡܬܢܐ ܫܳܢܝܐ ܗ̱ܘ ܨܒܝܳܢܝܳܐ܇ ܕܡ̣ܢ ܥܝܳܕܐ ܕܥܫܶܢ ܠܐ ܨܒܝܢܐܝܬ ܡ̣ܬܦܰܪܬ ܘܢܳܦܠ.

ܒܪܥܒܪܝܐ

ܥܘܬܪܐ ܓܝܪ ܘܓܢܣܐ ܘܚܟܡܬܐ ܕܒܠܥܕ ܕܘܒܪ̈ܐ ܬܩܢ̈ܐ܇ ܙܒܠܐ ܐܢܘܢ.

ܒܪܥܒܪܝܐ

ܡܨܪ̈ܝܐ ܒܟ̇ܠܙܒܢ ܡܛܫܝܢ ܡܝܰܬܪ̈ܬܐ ܕܝܠܗܘܢ. ܘܒܘܨܪ̈ܐ ܐܝܠܝܢ ܕܠܝܬ ܠܗܘܢ ܐܡ̇ܪܝܢ. ܝܘܢ̈ܝܐ ܕܝܢ ܘܣܘ̣ܪ̈ܝܝܐ ܥܠ ܡܝܰܬܪ̈ܬܐ ܐܝܠܝܢ ܕܠܝܬ ܠܗܘܢ ܐܡܪܝ̣ܢ ܕܐܝܬ ܠܗܘܢ. ܘܒܘ̣ܨܪ̈ܐ ܐܝܠܝܢ ܕܐܝܬ ܠܗܘܢ ܡܛܫܝܢ.

ܒܪܥܒܪܝܐ

ܒܘ̣ܫܠܐ ܟܡܐ ܕܥܠ ܢܘܪܐ ܗ̱ܘ܇ ܠܐ ܩܳܪܒܝ̣ܢ ܠܗ ܕܒܒ̈ܐ. ܗܟܢܐ ܘܠܠܒܐ ܕܪܬܚ ܒܪܘܚܐ܇ ܠܐ ܩܳܪܒܝ̣ܢ ܠܗ ܚܘ̣ܫܒ̈ܐ ܨ̈ܐܐ.

ܒܪܥܒܪܝܐ

ܐܟܙܢܐ ܕܰܡܬܰܥܶܠ ܟܠܒܐ ܠܡ̣ܚܛܦ ܦܶܬܬܳܐ ܕܠܚܡܐ ܡ̣ܢ ܫܒܪܐ܇ ܗܟܢܐ ܐܦ ܚܘ̣ܫܒܐ ܒܝ̣ܫܐ ܚܟܡܬܐ ܡ̣ܢ ܠܒܐ.

ܐܒܐ ܐܘܓܪܝܣ

ܐܦܢ ܟܝܳܢܐܝܬ ܫܰܦܝܐ ܬܪܥܝ̣ܬܟ܇ ܘܠܰܓܡܳܪ ܠܐ ܣܢܝ̣ܩܐ ܥܠ ܕܟܝܘ̣ܬܐ܇ ܣܳܦܩܝ̣ܢ ܡܰܥ̈ܠܢܐ ܕܪ̈ܓܫܐ ܕܰܢܕܰܠܚܘܢܗ̇ ܘܰܢܛܡܰܐܘܢܗ̇ ܒܡܠܘ̣ܐܐ ܕܫܳܩܠܝ̣ܢ ܡ̣ܢ ܣܓܝ̈ܐܐ.

ܡܪܝ ܐܝܣܚܩ

ܕܐܠܘ ܠܐ ܡܬܚܙܝܐ ܗ̱ܘܬ ܠܟ ܢܦܫܟ ܕܐܝܬ ܒܗ̇ ܡܘ̈ܡܐ܇ ܟܠܟ ܡܘ̈ܡܐ ܗ̱ܘܝܬ.

ܡܪܝ ܝܥܩܘܒ ܕܣܪܘܓ

ܠܐ ܬܥܕܘܠ ܓܕ̈ܫܐ ܘܙܒܢ̈ܐ܆ ܘܠܐ ܫܘܼܚ̈ܠܦܐ ܘܫܘ̈ܓܢܳܝܐ. ܠܐ ܚܰܟܝܡ ܐܢ̱ܬ ܡܼܢ ܡܪܝܐ܆ ܡܛܰܟܣܳܢܐ ܕܙܒ̈ܢܐ ܘܥܠܡ̈ܐ.

ܠܐ ܬܥܨܐ ܠܘܩܒܠ ܓܕ̈ܫܐ܆ ܕܥܳܪܨܝܼܢ ܡܛܠ ܫܘܼܚ̈ܠܦܐ. ܕܠܐ ܬܬܢܣܐ ܒܐ̱ܚܪ̈ܢܐ܆ ܕܥܰܣܩܝܼܢ ܡܼܢ ܩܕܡ̈ܝܐ.

ܡܪܝ ܐܠܝܐ ܕܐܢܒܪ

ܠܰܝܬ ܒܰܟܝܳܢܰܢ ܡܶܕܶܡ ܕܰܛܡܰܐܐ. ܘܶܐܢܕܶܝܢ ܠܳܐ܆ ܡܶܢ ܫܽܘܪܳܝܳܐ ܠܳܐ ܒܳܪܶܐ ܗܘܳܐ ܠܶܗ. ܐܠܳܗܳܐ ܠܳܐ ܒ̣ܪܳܐ ܡܶܕܶܡ ܛܰܡܰܐܐ. ܠܰܝܬ ܡܶܕܶܡ ܕܛܰܡܰܐܐ܇ ܐܶܠܳܐ ܐܶܢ ܚܛܺܝܬܳܐ ܒܰܠܚܽܘܕ. ܕܠܰܘ ܒܪܺܝܬܳܐ ܐܺܝܬܶܝܗ̇܆ ܐܶܠܳܐ ܓܠܺܝܙܽܘܬܳܐ ܕܡܶܢ ܛܳܒ̈ܳܬܳܐ܇ ܐܰܘܟܺܝܬ ܠܳܐ ܡܶܫܬܰܡܥܳܢܽܘܬܳܐ.

ܡܘܫܐ ܒܪ ܟܐܦܐ (813-903 )

ܠܐ ܬܩܪܐ ܣܟ ܡܠܦܢܐ ܠܕܡܐܠܦ ܡܶܠܬܐ ܫܚܝܼܡܬܐ. ܕܠܘ ܡܠܦܢܐ ܗ̱ܘ ܒܫܪܪܐ ܐܝܢܐ ܕܠܐ ܩܳܢܐ ܣܘܥܪܢܐ. ܐܢ ܡܰܠܦ ܩܘܼܫܬܐ ܒܓܶܠܝܐ. ܘܰܒܟܶܣܝܐ ܣܳܥܪ ܫܘܼܩܪܐ. ܥܡ ܣܳܦܪ̈ܐ ܕܥܰܡܐ ܦܰܩܪܐ ܡܬܚܰܣܕ ܡܼܢ ܦܪܘܩܐ.

ܡܪܝ ܐܠܝܐ ܕܐܢܒܪ (ܕܪܐ ܥܣܝܪܝܐ)

ܣܰܟܠܐ ܕܝܳܕܥ ܕܰܢܟܰܣܐ ܨܰܥܪܗ܆ ܒܨܢ̈ܥܬܐ ܘܦܘܼܪ̈ܣܶܐ. ܛܒ ܡܼܢ ܚܰܟܝܡܐ܆ ܕܠܐ ܩܳܢܐ ܝܕܥܬܐ ܕܫܘܼܒܚܳܐ ܢܶܓܠܐ. ܝܕܥܬܗ ܕܗܘ ܩܕܡܝܐ܆ ܥܪܝܼܡܘܼܬܐ ܥܳܠܡܳܢܳܝܬܐ. ܘܕܝܼܠܳܝܬܐ ܕܰܬܪܝܢܐ܆ ܚܟܡܬܐ ܠܐ ܡܥܦܰܩܳܢܝܬܐ.

ܡܪܝ ܐܠܝܐ ܕܐܢܒܪ (ܕܪܐ ܥܣܝܪܝܐ)

ܬܫܥܝܼܬܐ

 

ܬܐܪܬܐ ܒܨܝܪܬܐ ܘܰܡܢܰܘܠܬܐ ܠܐ ܝܳܗܒܳܐ ܐܠܐ ܚܘܼܣܪܳܢܐ ܘܨܘܼܪܟܳܢܐ...

ܘܰܕܪ̈ܳܫܐ ܥܰܩܪ̈ܐ ܕܡܢܰܟܪܝܢ ܡܼܢ ܩܠܗܿ ܥܰܫܝܼܢܐ܆ ܠܐ ܡܰܘܠܕܝܼܢ ܐܠܐ ܚܶܪ̈ܝܢܐ ܘܛܘܼܓܳܪ̈ܐ ܘܬܰܟܬܘܼ̈ܫܐ ܡܕܘ̈ܕܢܐ ܘܡܰܚܣܪ̈ܢܐ.

ܒܣܘܼܟܳܠܐ ܗܢܐ ܬܰܫܥܝܼܬܐ ܡܼܢ ܬܫܥܝـܼܬܐ ܦܪܝܼܫܐ ܒܕܝܼܠܝ̈ܬܗܿ...

ܐܟܡܐ ܕܡܬܬܡܝܼܫܐ܆ ܬܪܬܝܢ ܬܫܥܝ̈ܢ ܡܬܕܰܪ̈ܫܳܢ ܝܘܡܐܝܬ ܒܝܢܬܢ.

ܚܕܐ: ܛܳܥܢܐ ܘܣܳܒܠܐ ܠܘܬ ܙܘܼܗܳܝܐ ܘܣܘܼܠܳܩܐ ܘܫܘܼܪܬܳܚܐ ܘܫܘܼܘܫܛܐ ܗܰܘܢܳܢܳܝܐ.

ܘܐ̱ܚܪܬܐ: ܣܳܪܟܳܐ ܘܦܳܟܪܐ ܒܥܘܼܘܳܟܐ ܘܥܘܼܛܳܠܐ ܘܫܘܼܘܚܪܐ ܘܢܘܼܛܳܠܐ ܗܰܘܢܳܢܳܝܐ.

ܡܟܐ ܟܕ ܠܐ ܘܳܠܝܐ ܕܢܿܚܒܘܼܟ ܫܰܪܒܐ ܒܫܰܪܒܐ ܘܦܰܪܨܘܼܦܐ ܒܦܰܪܨܘܼܦܐ܆ ܙܕܩ ܕܢܬܠ ܚܰܝܠܐ ܠܪ̈ܘܼܨܳܢܐ ܕܬܰܫܥܝܼܬܐ ܕܩܘܼܕܳܡܐ ܘܙܘܼܗܳܝܐ ܘܣܘܼܠܳܩܳܐ ܘܫܘܘܫܛܐ ܕܢܐܬܘܢ ܘܢܶܓܢܘܢ ܘܢܶܫܪܘܢ ܒܝܢܬܢ.

ܠܐ ܢܛܥܐ: ܟܠ ܡܐ ܕܐܡܝܼܪ ܡܼܢ ܩܕ̈ܡܝܐ ܚܳܒܫ ܠܟܠܢ ܘܠܟܠ ܩܰܘܡ̈ܢ ܘܡܘܼ̈ܫܚܳܢ ܒܠܥܕ ܦܘܼܪܫܳܢ ܕܰܪܓܐ ܘܐܰܩܡܐ.

ܘܡܪܢܐܝܬ ܘܦܪܝܼܫܐܝܬ ܝܘܼܠܦܳܢܐ ܡܫܝܼܚܳܝܐ ܗܿܘ ܕܡܛܠܬܗ ܐܬܪܕܶܦܢܢ ܘܡܬܪܰܕܦܝܼܢܢ ܘܐܬܩܛܶܠܢܢ ܘܡܬܩܰܛܠܝܼܢܢ ܠܝܬܘܗܝ ܐܠܐ ܫܘܼܡܠܳܝܐ. ܘܠܐ ܚܳܒܫ ܣܟ ܡܠܘ̈ܐܐ ܙܘ̈ܡܳܝܐ ܕܪܶܓܰܬ ܪܘܼܫܳܢܐ ܘܫܘܼܠܛܳܢܐ ܘܫܘܼܦܪܳܚܐ ܘܫܘܼܒܙܳܙܐ ܘܫܘܼܥܒܳܕܐ.....

ܦܘ̈ܫܩܐ:
ܛܘܼܓܳܪܐ: Polemik / Polemic
ܢܰܛܶܠ ܢܘܼܛܳܠܐ ܘܡܰܛܠܐ: İkiliem / Çelişki / Dilemma / Contradiction
ܥܰܛܶܠ ܥܘܼܛܳܠܐ: Atalet / Stagnancy / İnertia
ܪܰܫܶܢ ܪܘܼܫܳܢܐ: İkitidar / Nüfuz / Otorite Olma / İnfluence / Authority / Ascendancy
ܫܰܦܪܰܚ ܫܘܼܦܪܳܚܐ: Kendini Beğenmişlik / Smugness
ܫܰܒܙܶܙ ܫܘܼܒܙܳܙܐ: İstismar / Sömürü / Exploitation
ܝܰܘܣܦ ܒܶܓܬܰܫ

ܬܰܪܥܳܐ ܘܒܰܪܢܳܫܐ

 

ܬܰܪܥܳܐ ܡܼܢ ܬܰܪܥܳܐ ܦܪܝܼܫ ܗ̱ܘ ܒܕܝ̈ܠܳܝܳܬܗ. ܘܠܒܐ ܡܿܢ ܒܰܕܡܘܬ ܬܰܪܥܐ ܣܝܼܡ ܗ̱ܘ ܒܡܰܥܰܠ ܪܘܼܚܐ ܕܒܪܢܫܐ. ܠܐ ܡܨܝܐ ܕܢܥܘܠ ܠܒܝܬܐ (ܪܘܚܐ) ܕܒܪܢܫܐ ܐܝܢܐ ܕܗܘ ܩܛܝܼܪܐܝܬ ܘܰܥܫܝܼܡܳܐܝܬ ܟܕ ܬܒܪܝܼܢܢ ܐܘ ܡܙܰܥܙܥܝܼܢܢ ܠܬܰܪܥܐ ܒܰܪܝܐ.

ܙܕܩ ܕܢܐܠܦ ܠܡܶܩܰܫ ܪܰܕܝܐܝܬ ܘܠܰܡܣܰܟܳܝܘ ܫܰܠܝܐܝܬ. ܕܰܡܝܰܬܰܪ ܗ̱ܘ ܣܘܼܟܳܝܐ ܪܰܕܝܐ ܘܫܰܠܝܐ ܛܒ ܡܼܢ ܬܒܳܪܐ ܘܙܘܼܥܙܳܥܐ. ܐܝܟ ܕܐܡܝܼܪܐ: «ܩܘܼܫܘ ܘܢܶܬܦܬܰܚ ܠܟܘܢ.»

ܡܳܕܝܢ ܟܘܼܫܳܪܐ ܗ̱ܘ ܕܢܶܩܘܼܫ ܘܢܶܥܘܼܠ ܘܢܬܒܰܣܰܡ ܘܢܶܬܦܰܪܦܰܥ ܥܡ ܡܳܪܐ ܒܰܝܬܐ.

ܝܰܘܣܦ ܒܶܓܬܰܫ

ܟܟܪ̈ܐ

 

ܟܟܪ̈ܐ ܠܐ ܡܬܬܓܪ̈ܢ. ܘܡܘܗ̈ܒܬܐ ܠܐ ܡܫܬܘ̈ܫܛܢ ܐܠܐ ܢܗ̈ܘܝܢ ܒܠܘܼܚܳܡܐ ܘܬܰܪܥܘܬܐ ܥܡ ܢܡܘ̈ܣܐ ܐܠܗ̈ܝܐ ܘܟܝ̈ܢܝܐ. ܘܡܛܠܗܕܐ ܗܘܼ ܒܪܢܫܐ ܙܕܩ ܕܢܰܘܪܶܒ ܡܰܕܪܟܳܢܘܼܬܗ ܘܢܰܪܘܰܚ ܡܣܬܰܟܠܢܘܼܬܗ ܒܠܥܕ ܡܫܬܥܠܝܢܘܬܐ ܘܡܬܚܰܬܪܢܘܬܐ.

ܝܰܘܣܦ ܒܶܓܬܰܫ

ܚܰܘܣܳܢܐ ܠܝܬܘܗܝ ܒܰܠܚܘܕ ܪܓܫܐ ܕܚܳܐܪ ܚܰܝܘܼܣܬܳܢܐܝܬ܆ ܐܠܐ ܐܦ ܪܘܼܚܳܦܐ ܗ̱ܘ ܕܟܳܠܐ ܡܼܢ ܗܿܝ ܕܠܐ ܢܰܟܐ ܘܰܢܣܰܓܦ ܠܐ ܠܢܰܦܫܰܢ ܘܐܳܦܠܐ ܠܐܚܪ̈ܢܐ.

ܝܰܘܣܦ ܒܶܓܬܰܫ

ܒܝܼܫܐ ܗ̱ܝ ܓܝܪ ܡܢ ܒܘܪܘܬܐ ܝܕܥܬܐ ܗܿܝ ܕܠܐ ܡܬܬܪܣܝܐ ܡܼܢ ܬܰܨܒ̈ܝܼܬܐ ܕܕܘܒܪ̈ܐ ܬܰܩܢ̈ܐ ܕܫܰܦܝܪܘܬ ܙܢ̈ܝܐ.

ܝܰܘܣܦ ܒܶܓܬܰܫ

ܡܶܬܓܰܕܡܝܼܢܢ ܘܡܶܬܦܰܠܩܝܼܢܢ ܟܕ ܪܗܛܝܢܢ ܒܬܪ ܚܰܝܠܐ ܒܰܪܳܝܳܐ. ܡܛܠܗܕܐ ܙܕܩ ܕܢܪܗܛ ܒܬܪ ܚܝܠܐ ܓܰܘܳܝܐ ܘܬܡܢ ܡܫܟܚܝܢܢ ܐܦ ܠܗܘ ܒܰܪܳܝܳܐ.

ܝܰܘܣܦ ܒܶܓܬܰܫ

ܠܒܐ ܕܟܝܐ

 

ܡܢ ܠܒܐ ܕܟܝܐ ܘܢܝܼܚܐ ܢܳܦܩܝܢ ܦܪ̈ܝܐ ܡܘܬܪ̈ܢܐ ܘܕܘܒܪ̈ܐ ܡܦܨ̈ܚܢܐ. ܐܠܐ ܟܕ ܡܬܕܰܠܚܐ ܘܡܬܚܰܒܠܐ ܫܶܢܰܓܬܐ ܓܰܘܳܝܬܐ܆ ܡܬܥܰܟܪܐ ܘܡܬܥܰܘܟܐ ܐܦ ܡܙܝܥܢܘܬܐ ܘܐܫܝܕܘܬܐ ܒܪܝܬܐ. ܘܗܝ ܗܕܐ ܠܐ ܡܘܠܕܐ ܐܠܐ ܥܰܛܠܘܬܐ ܘܚܰܣܝܪܘܬܐ ܒܪܕܝܐ ܕܚܰܝܠܐ ܓܰܘܳܝܐ ܕܒܰܪܢܫܐ.

ܝܰܘܣܦ ܒܶܓܬܰܫ

ܢܘܼܦܳܩܳܐ ܘܦܘܼܢܳܩܳܐ

 

ܠܝܬ ܦܘܼܢܳܩܳܐ ܕܠܐ ܕܘܼܢܳܩܳܐ. ܐܢ ܚܘܼܒܰܢ ܒܰܙܒܢ ܗܘܳܐ ܟܐܒܰܢ ܘܕܘܢܳܩܢ܆ ܗܘܼ ܟܺܐܒܰܢ ܡܨܝܐ ܕܢܗܘܐ ܐܦ ܢܘܼܦܳܩܰܢ ܘܦܘܼܢܳܩܰܢ: ܟܕ ܡܚܰܕܬܝܢܰܢ ܚܶܟܡ̈ܬܐ ܒܣܳܚܪ̈ܬܐ ܕܡܰܪܕܘܼܬܐ ܕܠܫܢܐ ܣܘܼܪܝܝܐ ܘܰܡܬܰܩܢܝܼܢܢ ܬܰܪܒܝܼܬܐ ܒܕܳܪ̈ܳܬܐ ܕܣܶܦܪܳܝܘܬܗ ܢܰܨܝܼܚܰܬ ܫܰܪܒܐ!....

ܝܰܘܣܦ ܒܶܓܬܰܫ

ܪܚܡܬ ܬܫܥܝܼܬܐ

 

ܪܚܡܬ ܡܬܐ ܘܐܬܪܐ ܘܠܫܢܐ ܡܥܰܫܢܐ ܠܬܫܥܝܬܐ ܐܝܬܘܬܢܝܬܐ ܘܡܰܪܕܘܬܢܳܝܬܐ ܘܐܰܡܢܳܝܬܐ ܕܒܪܢܫܐ. ܘܡܰܫܩܝܐ ܫܪ̈ܫܐ ܕܐܡܝܢܘܬܗܿ ܕܬܫܥܝܬܐ ܗܕܐ. ܐܠܐ ܟܕ ܡܬܬܟܣ ܫܘܼܦܳܥܗܿ ܘܚܘܼܒܳܒܗܿ ܘܒܳܨܪ (ܐܘ ܫܳܠܡ) ܪܕܝܗܿ ܡܪܕܘܬܢܝܐ: ܓܳܪܦܳܐ ܠܡܬܬܰܘܫܢܘܬܐ ܚܕܐ ܡܰܠܝܰܬ ܫܪ̈ܘܼܥܝܐ ܘܰܣܪ̈ܘܼܩܝܐ ܣܘ̈ܟܳܠܳܝܐ.

ܝܰܘܣܦ ܒܶܓܬܰܫ

ܨܘܼܡܳܕܐ ܘܥܘܼܨܳܒܐ

 

ܠܐ ܡܶܫܬܰܡܠܐ ܨܘܼܡܳܕܐ ܘܥܘܼܨܳܒܐ ܕܠܡܚܪܝ ܐܢ ܠܐ ܢܬܝܕܥ ܦܘܕܐ ܘܢܬܕܪܫ ܘܛܰܥܘܳܢܐ ܘܢܫܝܢܐ ܕܐܬܡܠܝ.

ܐܝܟܢܐ ܕܢܬܚܪܪ ܡܢ ܚܒܘܼܫܝܐ ܕܚܘܼܬܚ̈ܬܐ ܝܰܨܪ̈ܢܝܐ ܘܢܫܬܪܪ ܒܨܒܝܢܐ ܚܐܪܐ܆ ܙܕܩ ܕܢܦܫܘܛ ܪ̈ܓܠܝܢ ܠܦܘܬ ܓܰܠܐ ܚܟܡܬܳܢܝܐ ܘܝܕܥܬܢܝܐ ܒܠܥܕ ܫܶܓܝܐ ܘܦܶܗܝܐ ܘܢܡܙܘܓ ܩܘܼܫܬܐ ܐܠܗܝܐ ܒܰܫܪܪܐ ܬܐܪܬܢܝܐ ܕܐܣܝܪ ܒܢܝܼܫܐ ܛܒܐ ܘܨܝܼܠܐ ܡܥܠܝܐ.

ܝܰܘܣܦ ܒܶܓܬܰܫ

ܚܝܠܐ ܚܰܬܝܬܐ

 

ܚܝܠܐ ܚܰܬܝܼܬܐ܆ ܚܝܠܐ ܗ̱ܘ ܐܠܗܝܐ ܕܩܒܝܼܥ ܗ̱ܘ ܘܛܡܝܼܪ ܒܒܪܢܫܐ. ܘܠܐ ܡܬܩܰܕܐ ܐܠܐ ܒܰܦܠܘܼܚܝܐ ܘܰܟܪܘܼܒܝܐ ܘܰܚܦܘܼܪܝܐ ܕܝܳܬܐ. ܘܰܪܚܘܼܩܝܐ ܕܡܼܢ ܟܠ ܙܢ̈ܝ ܚ̈ܫܐ ܡܰܚܛܝ̈ܢܐ ܘܥܘܗ̈ܕܢܐ ܡܰܣܛܝ̈ܢܐ ܘܟܠ ܡܐ ܕܥܳܪܐ ܘܟܳܒܠ ܪܘܼܚܐ.

ܚܝܠܐ ܗ̱ܘ ܡܫܰܓܢܝܢܐ ܕܡܬܝܗܒ ܟܕ ܗܳܘܐ ܒܪܢܫܐ ܪܓܝܼܫܐ ܘܰܙܗܝܼܪܐ ܒܦܰܪܬܝܼܩܐ ܕܡܰܓܥܠܐ ܘܫܒܝܼܩܐ ܠܒܛܝܼܠܘܬܗ. ܘܒܰܩܛܝܪ ܡܼܢ ܢܣܝ̈ܘܢܐ ܘܐܘ̈ܠܨܢܐ ܘܥܘܼܟܳܪ̈ܐ ܘܥܘܼ̈ܣܳܩܐ ܢܗܘܐ ܡܬܬܓܪ ܟܟܪܗ ܠܡܰܚܝܳܢܘܼܬܐ ܘܡܫܬܘܫܛܢܘܬܐ ܕܓܰܘܐ.

ܦܰܪܬܝܩܐ: Vedia / Emanet / Senet / Deposit / Consignation
ܝܰܘܣܦ ܒܶܓܬܰܫ

ܡܠܟܘܬ ܢܦܫܐ

 

ܗܳܘܳܝ ܗܳܘܳܝ ܕܒܰܪܢܫܐ ܥܰܬܝܼܩܐ ܥܕܟܝܠ ܚܰܝ ܗ̱ܘ ܒܝܼ. ܘܠܐ ܙܩܝܼܦ ܟܠܗ. ܘܐܦܠܐ ܡܝܬ ܡܫܰܡܠܝܐܝܬ. ܐܠܐ ܡܰܩܪܒ ܬܰܩܝܦܐܝܬ ܠܘܼܩܒܠ ܪܘܚܐ ܘܰܡܙܝܼܥ ܩܪ̈ܒܐ ܓܘ̈ܝܐ. ܘܠܐ ܫܳܒܩ ܕܬܬܢܝܼܚ ܡܠܟܘܬ ܢܦܫܐ.

ܡܠܦܢܐ ܐܢܫ ܣܘܪܝܝܐ

ܦܪܬܝܩܐ

 

ܡܠܬܐ ܕܩܘܫܬܐ ܘܫܪܪܐ܆ ܦܰܪܬܝܼܩܐ ܗ̱ܝ ܕܐܠܗܐ. ܕܡܬܓܰܥܠܐ ܡܼܢ ܪܘܚܩܘܕܫܐ ܠܡܠܦܢܐ ܕܢܚܐ ܠܓܰܘܐ.

ܦܰܪܬܝܩܐ: Vedia / Emanet / Senet / Deposit / Consignation
ܡܪܝ ܐܠܝܐ ܕܐܢܒܪ

ܟܝܢܐ ܕܛܝܢܐ

 

ܬܳܒܰܥ݂.... ܘܬܳܒܰܥ... ܘܬܘܒ ܬܳܒܰܥ ܘܠܐ ܣܳܒܥ ܗܘܼ ܟܝܳܢܐ ܕܛܝܼܢܐ. ܟܕ ܛܳܥܐ ܕܠܝܬ ܦܘܼܪܦܳܥܐ ܡܩܰܘܝܳܢܐ ܘܰܡܦܰܝܓܳܢܐ ܐܝܟ ܗܿܘ ܕܡܶܠܬܐ.

ܢܩܰܘܐ ܡܕܝܢ ܘܰܢܒܘܼܬ ܒܦܰܘܫܳܐ ܕܦܘܼܪܫܳܢܐ ܘܕܘܼܪܟܳܢܐ ܡܣܰܟܿܠܳܢܐ. ܘܛܰܘܣܳܐ ܕܥܘܼܕܪܳܢܐ ܘܣܘܼܡܟܳܢܐ ܡܢܰܨܚܰܢܐ܆ ܠܰܡܥܰܕܳܝܘ ܚܢܢ ܠܢ ܡܼܢ ܢܺܝܒ̈ܐ ܕܣܘܼܪܚܳܢܐ ܘܣܘܼܓܦܳܢܐ. ܟܕ ܦܳܬܚܝܼܢܢ ܬܰܪ̈ܥܐ ܣܟܺܝܼܪ̈ܐ ܕܒܘܼܝܳܢܐ ܬܪܒܝܼܬܳܢܳܝܐ ܠܥܳܠܘ̈ܠܐ

ܝܰܘܣܦ ܒܶܓܬܰܫ

ܐܝܟܢܐ ܕܢܩܘܐ ܚܢܢ ܒܢ ܠܐ ܡܨܛܠܝ̈ܢܐ ܢܝܼ̈ܚܐ ܘܰܒܗ̈ܝܼܠܐ܆ ܙܕܩ ܕܢܓܪܓ ܚܢܢ ܠܢ ܠܡܶܚܰܬ ܡܼܢ ܛܘܪ̈ܐ ܪ̈ܳܡܐ ܕܐܢܳܢܝܘܼܬܐ ܘܢܬܦܰܪܣ ܠܡܶܥܡܰܕ ܘܠܡܶܣܚܳܐ ܒܢܰܗܪܐ ܫܦܘܥܐ ܘܒܣܝܼܡܐ ܕܐܢܰܚܢܳܝܘܬܐ.

ܐܢܰܚܢܳܝܘܬܐ: Alturism / Özgecilik / Diğergamlık
ܝܰܘܣܦ ܒܶܓܬܰܫ

ܒܣܬܪܝܘܬܐ ܨܝܠܝܬܐ

 

ܐܢ ܠܐ ܡܬܓܰܪܕܐ ܘܡܶܬܢܰܩܕܐ ܒܶܣܬܪܳܝܘܬܐ ܨܝܼܠܳܝܬܐ ܕܬܰܪܥܝܼܬܐ ܘܥܳܠܡܐ ܓܰܘܳܝܐ ܕܡܰܚܫܰܒܬܐ ܡܢ ܥܘ̈ܩܣܰܝ ܣܢܐܬܐ ܘܐܟܬܐ ܘܚܣܡܐ ܘܟܠ ܙܢ̈ܝ ܐܠܡܐ ܘܚܢ̈ܝܐ ܣܩܺܝܪ̈ܐ ܕܚܳܣܘܕܘܬܐ܆ ܠܐ ܨܳܡܚܳܐ ܐܘܣܝܐ ܕܚ̈ܝܐ ܒܗܝܟܕܗܝܝܘܬܗܿ ܢܗܝܪܬܐ ܘܐ̱ܢܫܝܬܐ. ܘܐܦܠܐ ܡܨܝܐ ܕܢܫܬܟܚ ܘܢܬܚܙܐ ܐܠܗܐ ܒܟܰܡܗ̈ܬܐ ܘܚܫܘ̈ܟܝܬܐ ܕܬܡܢ.

ܐܟܡܐ ܕܐܡܪ ܒܪܥܒܪܝܐ «ܢܚܛܘܦ ܚܢܢ ܠܢ ܘܠܓܘ ܡܢܢ ܢܬܓܘܐ ܕܢܫܟܚ ܡܠܟܘܬܢ ܕܡܛܫܝܐ ܒܠܒܢ ܟܐܡܬ ܕܢܚܙܐ ܠܐܠܗܢ.»

ܨܝܠܐ: Zihin / Intellect
ܒܶܣܬܪܳܝܘܼܬܐ ܨܝܼܠܳܝܬܐ: Entellektüel arkaplan / Intellectual background
ܝܰܘܣܦ ܒܶܓܬܰܫ

ܥܫܘܼܡܝܐ

 

ܡܝܰܬܰܪ ܐܢܐ ܕܐܗܘܐ ܣܩܺܝܼܪܐ ܒܥܳܠܡܐ ܐܶܢܳܢܳܝܐ܆ ܘܠܐ ܪܕܝܼܦܐ ܒܥܳܠܡܐ ܐܶܢܰܚܢܳܝܐ. ܘܡܛܠܬܝ ܡܿܢ ܥܫܘܼܡܝܳܐ܆ ܬܳܐܡܰܐ ܗ̱ܘ ܕܛܠܘܼܡܝܐ. ܘܫܘܳܬ ܣܳܓܦܝܼܢ ܘܣܳܪܚܝܼܢ ܘܕܳܠܚܝܼܢ ܡܘܼܙܓܐ ܕܚܘܼܒܐ ܘܚܰܕܘܬܐ. ܘܟܳܒܠܝܢ ܪܘܼܚܐ. ܘܙܳܓܪܝܢ ܚܰܝܠܐ ܡܣܝܼܡܳܢܐ ܕܒܪܢܫܐ.

ܥܫܘܡܝܐ: Diretme / Dayatma / İnsisting / İmposition
ܝܰܘܣܦ ܒܶܓܬܰܫ

ܒܘܼܝܳܢܐ ܒܨܝܼܪܐ

 

ܟܕ ܠܰܝܬ ܝܕܰܥܬܐ ܕܰܡܢܰܟܪܝܐ ܡܼܢ ܒܘܨܪ̈ܐ. ܘܠܰܝܬ ܒܘܼܝܳܢܐ ܕܰܡܒܰܪܰܝ ܡܼܢ ܨܰܘܪ̈ܳܢܐ. ܗܘܼ ܒܰܪܢܳܫܐ ܥܪܺܝܼܨ ܗ̱ܘ ܠܰܒܨܺܝܼܪܘܬܐ. ܘܰܐܡܝܢܳܐܝܬ ܣܢܺܝܼܩ ܗ̱ܘ ܠܫܘܼܡܠܳܝܐ ܘܫܘܼܘܫܳܛܐ...!

ܗܿܘ ܕܡܫܬܰܦܪܰܚ ܠܐ ܝܳܠܦ. ܘܗܰܘ ܕܝܳܠܦ ܠܐ ܡܶܫܬܰܦܪܰܚ...!

ܘܗܝܼ ܬܰܪܥܺܝܬܐ ܙܠܺܝܼܡܬܳܐ ܠܐ ܡܬܥܰܨܒܐ܆ ܐܠܐ ܒܣܰܡ̈ܡܳܢܐ ܡܰܐܣܝ̈ܢܐ ܕܪܰܕܝܘܼܬܐ ܘܰܪܡܝܼܣܘܼܬܐ ܕܠܐ ܚܒܝܼܟܝܼܢ ܒܗܿ ܚܢ̈ܳܝܐ ܣܩܺܝܼܪ̈ܐ...

ܟܕ ܗܼܘ ܒܰܪܢܫܐ ܠܝܬܘܗܝ ܡܶܕܶܡ ܐܠܐ ܗܿܘ ܡܐ ܕܰܡܟܰܢܫ ܘܐܳܣܶܢ ܒܬܰܪܥܝܼܬܗ ܘܬܰܪܒܝܼܬܗ....

ܡܶܟܐ ܩܳܠܐ ܕܠܶܒܰܢ ܘܪܘܼܚܰܢ ܙܳܕܩ ܕܢܗܘܐ ܥܶܠܳܝ ܡܼܢ ܩܳܠܐ ܕܡܶܠܬܰܢ ܘܩܳܠܰܢ...!

ܘܰܢܚܘܼܪ ܘܰܢܕܘܼܩ ܫܦܝܐܝܬ ܐܝܟ ܛܠܝ̈ܐ. ܘܢܫܡܥ ܘܰܢܨܘܬ ܘܢܶܒܩܘܼܪ ܪܟܝܼܢܳܐܝܬ ܐܝܟ ܝܕܘܥ̈ܬܢܐ ܘܚܰܟܘ̈ܡܬܳܢܐ....!

ܡܢܗܪܢܘܬܐ: ܫܰܦܪܰܚ. ܘܡܢܗܿ ܐܫܬܰܦܪܰܚ. ܟܐܡܬ ܩܡ ܒܫܘܼܦܪܳܚܐ. ܚܫܺܝܼܠܬܳܐ ܗ̱ܝ ܕܰܟܢܘܼܬܰܢ ܠܶܫܳܢܳܝܬܐ. ܘܚܫܝܼܚܳܐ ܒܣܘܟܠ: Kendini Beğenmek, Kendini Beğenmişlik / Smugness
ܝܰܘܣܦ ܒܶܓܬܰܫ

ܫܪܓܐ ܘܦܬܝܼܠܬܐ

 

ܐܢ ܡܕܡܝܢܢ ܚܝ̈ܐ ܒܰܫܪܓܐ܆ ܪ̈ܥܝܢܐ ܡܶܫܚܐ ܐܢܘܢ. ܘܗܘ ܒܪܢܫܐ ܦܬܝܼܠܬܐ.

ܐܝܢܳܝܘܬܐ ܕܡܶܫܚܐ ܘܕܘܟܰܬ ܒܳܛܠܐ ܐܠܨ̈ܝܝܢ ܒܡܰܢܗܪܳܢܘܼܬܐ ܘܡܰܒܗܪܳܢܘܼܬܐ ܕܫܪܓܐ. ܘܟܕ ܡܶܫܚܐ ܛܒܐ ܡܫܬܰܚܠܦ ܠܚܘܼܢܬܳܐ܆ ܦܬܝܼܠܬܐ ܝܳܩܕܐ ܘܡܬܛܦܛܦܐ ܒܪܕܝܐ ܕܚ̈ܝܐ.

ܡܶܟܐ ܘܳܠܝܬܐ ܡܳܪܳܢܳܝܬܐ ܘܪܝܼܫܳܝܬܐ ܕܒܪܢܫܐ ܠܝܬܝܗܿ ܐܠܐ ܕܢܣܝܡ ܡܶܫܚܐ ܛܒܐ ܒܫܪܓܐ ܕܐܚܪ̈ܢܐ (ܘܕܝܠܢܐܝܬ ܕܒܢ̈ܝ ܠܘܝܬܐ) ܡܛܠ ܡܰܢܗܪܳܢܘܼܬܐ ܘܡܰܒܗܪܳܢܘܼܬܐ ܚܰܘܩܳܝܬܐ ܘܐܫܟܳܪܝܬܐ. ܒܕ ܚܢܳܢܐ ܘܢܘܗܪܐ ܕܚ̈ܝܐ ܫܪܝܪ̈ܐ ܠܐ ܢܳܛܚ ܐܠܐ ܕܗܘ ܒܪܢܫܐ ܢܗܘܐ ܚܰܢܝܼܢܳܐ ܘܠܘ ܚܰܢܝܼܢܳܐ ܘܐܰܚܝܕ ܒܚܘܼܠܳܐ ܘܠܘ ܒܚܶܪܡܐ ܘܢܗܘܐ ܚܰܢܳܢܐ ܘܚܰܝܘܣܬܳܢܳܐ ܘܠܘ ܘܪܰܥܘܼܡܬܳܢܐ ܘܪܰܓܘܙܬܳܢܐ ܒܕܘܼܒܳܪܐ ܘܩܰܘܡܐ ܕܦܬܝܼܟ ܒܚܣܘܕܘܬܐ ܘܐܟܬܐ ܘܚܣܳܡܐ ܘܣܢܐܬܐ.

ܒܳܛܠܳܐ: ܕܘܟܬܐ ܐܘ ܡܢܪܬܐ ܕܥܠܝܗܿ ܡܬܬܣܝܡܐ ܫܪܓܐ . Lamp holder
ܚܰܢܝܼܢܳܐ: ܣܘܼܟܠܐ ܗܘ ܕܕܪܝܼܫ ܘܝܕܝܥ ܟܐܡܬ ܪܰܚܡܳܢܐ ܘܒܰܣܝܡܐ Sevecen / Pleasant
ܚܰܢܝܼܢܳܐ: ܣܘܼܟܠܐ ܗܢܐ ܬܪܝܢܐ ܣܰܩܘܒܠܝܐ ܗ̱ܘ ܕܗܿܘ ܩܕܡܝܐ ܘܠܐ ܦܪܝܣ. ܟܐܡܬ ܣܰܪܝܐ ܘܡܰܣܝܐ: Rance / Kokuşmuş
ܚܪܡܐ: Haram
ܚܘܼܠܐ: Helal
ܚܘܼܢܬܐ: Kokuşmuş / Kötü Yağ / Rancid Oil
ܝܰܘܣܦ ܒܶܓܬܰܫ

ܓܦ̈ܐ ܘܩܢ̈ܛܐ

 

ܗܿܘ ܕܐܰܘܥܺܝ ܓܶܦ̈ܐ ܠܐ ܪܳܫܦ. ܕܫܩܝܼܠܝܼܢ ܩܢ̈ܛܐ ܡܼܢ ܡܰܚܫܰܒܬܗ. ܘܰܡܦܳܣ ܕܠܡ ܪ̈ܥܝܢܐ ܡܓܰܢ̈ܝܢܐ ܒܕܡܘܬ ܫܰܩܠܘܼܠܐ ܘܫܰܦܠܘܼܠܐ ܐܢܘܢ ܟܕ ܠܘܝܐ ܠܗܘܢ ܚܘܼܒܐ ܕܚܰܡܺܝܼܡ ܒܰܬܪܝܼܨܘܼܬܐ ܘܐܝܩܪܐ ܕܰܚܡܺܝܼܡ ܒܫܰܪܝܼܪܘܼܬܐ ܕܠܐ ܬܳܒܥܐ ܐܠܐ ܙܘܼܟܳܝܐ ܘܢܘܼܨܳܚܐ ܕܚܘܼܠܡܳܢܐ ܘܦܘܼܠܚܳܢܐ ܘܫܘܼܠܚܳܢܐ ܘܝܘܬܪܢܐ ܓܰܘܢܝܐ..

ܦܘܼܫ̈ܳܩܐ ܥܰܣ̈ܩܐ:
ܪܫܰܦ: ܪܚܰܫ ܘܫܰܦܦ ܐܝܟ ܪܰܚܫܐ ܘܚܶܘܝܐ. ܘܗܠܟܬܐ ܕܐܣܝܪܐ ܒܩܰܘ̈ܕܐ Sürünmek / Grovel / Crawl / Creep
ܫܰܩܠܘܼܠܐ: ܛܥܢܐ ܩܰܠܘܼܠܐ ܘܝܘܼܩܪܐ ܙܥܘܪܐ Hafif Yük / Mild Burden
ܫܰܦܠܘܼܠܐ: ܒܫܠܡܘܬܐ ܕܐܣܘ̈ܬܐ ܣܘܼܡܣ̈ܡܐ ܗܿܢܘܢ ܕܡܥܒܪܝܼܢ ܒܥܙܩܬܐ ܠܡܫܠܝܘ ܟܐܒ̈ܐ ܕܗܳܘܝܢ ܒܰܫܦܘܠܐ ܕܡܰܥܝܐ ܠܡܥܕܪܘ ܠܢܘܼܦܳܨܐ Fitil (ilaç) / Kapsül / Levman Sıvısı / Enema
ܪ̈ܥܝܢܐ ܡܓܰܢܝ̈ܢܐ: Eliştirel Düşünceler / Critical Thoughts
ܚܘܒܐ ܕܚܰܡܝܼܡ: ܐܘܟܝܬ ܚܘܒܐ ܕܫܰܚܝܼܢ ܘܠܐ ܩܰܪܝܪ.
ܐܝܩܪܐ ܕܰܚܡܝܼܡ: ܐܝܩܪܐ ܕܰܟܢܝܼܫ ܘܰܨܡܝܼܕ ܕܠܐ ܡܒܰܕܪ ܘܐܦܠܐ ܡܦܰܠܗܰܕ ܦܰܗܝܐܝܬ ܘܫܰܓܝܐܝܬ.
ܫܘܼܠܚܳܢܐ: Misyon / Mission
ܝܰܘܣܦ ܒܶܓܬܰܫ

ܠܐ ܓܝܪ ܡܰܗܢܶܐ ܓܶܢܣܳܐ ܛܳܒܳܐ ܡܕܡ ܟܕ ܪ̈ܶܥܝܳܢܐ ܟܝܬ ܘܕܘܼܒܳܪ̈ܐ ܠܐ ܫܳܠܡܺܝܼܢ ܠܛܳܒ̈ܬܳܐ. ܘܠܐ ܡܶܬܟܰܠܝܳܐ ܡܰܘܗܰܒܬܳܐ ܟܕ ܥܡ ܓܶܢܣܳܐ ܥܕܺܝܼܠܐ ܕܘܼܒܳܪ̈ܐ ܛܳܒ̈ܐ ܘܪ̈ܶܥܝܳܢܐ ܚܠܝܼ̈ܡܶܐ ܐܳܘܶܝܢ.

ܡܠܦܢܐ ܐ̱ܢܫ ܣܘܪܝܝܐ

ܒܪܝ ܠܐ ܬܗܰܝܡܢ ܠܪܶܚܡܬܟ ܕܐܝܬܝ̇ܗ ܗܫܐ. ܒܕ ܡܶܫܬܰܚܠܦܐ ܠܝܓ ܠܝܓ. ܟܡܐ ܕܚܰܝܰܬ ܒܗܠܝܢ ܚ̈ܝܐ ܡܫܰܥܒܰܕ ܐܢܬ ܠܫܘ̈ܚܠܦܐ ܘܐܦܢ ܠܐ ܬܨܒܐ. ܐܝܟ ܐܝܬܐ ܠܡܐܡܪ: ܒܰܙܒܢ ܬܶܚܕܐ ܘܒܰܙܒܢ ܬܬܥܝܩ. ܒܰܙܒܰܢ ܢܝܼܚܳܐ ܘܒܰܙܒܢ ܫܓܝܼܫܐ. ܒܰܙܒܰܢ ܥܢܘܳܝ ܘܒܰܙܒܢ ܡܰܗܡܰܝ. ܒܰܙܒܰܢ ܚܦܝܼܛܐ ܘܒܰܙܒܰܢ ܚܒܰܢܢܐ ܘܡܰܐܝܢܐ. ܗܫܐ ܝܰܩܝܼܪܐ ܘܒܳܬܰܪ ܩܰܠܝܠܐ. ܒܪܡ ܒܰܪܢܫܐ ܚܰܟܝܡܐ ܘܰܡܗܝܪܐ ܒܪܘܼܚܐ ܐܡܝܢܐܝܬ ܡܩܰܘܐ ܪܡܝܣܐ ܠܥܠ ܡܢ ܗܠܝܢ ܡܶܫܬܚ̈ܠܦܳܢܝܬܐ ܟܕ ܠܐ ܚܐܪ ܒܡܶܬܪ̈ܓܫܳܢܝܳܬܐ. ܐܦܠܐ ܡܐܨܕ ܕܡܢ ܐܝܕܐ ܦܢܝܼܬܐ ܢܳܫܒܐ ܪܘܚܐ ܕܫܘܼܚܠܳܦܐ. ܐܠܐ ܬܳܪܨ ܬܰܪܥܝܼܬܐ ܕܗܰܘܢܗ ܠܚܰܪܬܐ ܘܳܠܝܳܝܬܐ ܘܰܦܐܝܬܐ. ܒܕ ܒܪܢܫܐ ܒܗܢܐ ܙܢܐ ܡܨܐ ܠܰܡܟܰܬܪܘ ܗܘܼ ܒܗ ܠܐ ܡܶܫܬܰܚܠܦܳܢܐ ܘܠܐ ܡܙܕܥܙܥܢܐ ܒܝܢܬ ܐܘܠ̈ܨܢܐ ܡܫܰܚ̈ܠܦܐ ܟܕ ܥܝܪܐܝܬ ܡܩܰܘܐ.

ܡܠܦܢܐ ܐ̱ܢܫ ܣܘܪܝܝܐ

ܦܐܪ̈ܐ ܕܒܪܢܫܐ

 

ܗܘܼ ܐܝܠܳܢܐ ܐܝܟܢܐ ܕܢܶܬܶܠ ܦܐܪ̈ܐ ܙܕܩ ܕܰܢܩܰܘܐ ܝܰܪܘܩܐ ܘܪܰܛܝܼܒܐ. ܐܠܐ ܒܰܪܢܳܫܐ ܐܝܟܳܢܐ ܕܢܩܘܐ ܝܰܪܘܩܐ ܘܪܛܝܼܒܐ (ܟܐܡܬ ܚܰܝܐ) ܙܕܩ ܕܢܬܠ ܦܐܪ̈ܐ. ܘܢܡܙܘܓ ܩܘܼܫܬܐ ܐܠܗܳܝܐ ܒܰܫܪܪܐ ܬܐܪܬܳܢܳܝܐ ܕܐܰܣܝܪ ܒܢܺܝܼܫܳܐ ܛܳܒܐ ܘܨܺܝܼܠܐ (zihin / intellect) ܡܥܰܠܝܐ. ܟܕ ܠܐ ܛܳܥܐ ܣܘܼ̈ܟܠܐ ܩܰܛܝܼ̈ܢܐ ܕܒܳܕܩ ܘܒܳܕܪ ܡܰܬܠܐ ܨܝܼܢܳܝܐ ܕܐܡܿܪ: «ܙܰܪܥܐ ܕܗܰܒ̈ܒܐ ܕܠܡܚܪܝ܆ ܣܝܼܡ ܗ̱ܘ ܒܙܰܪ̈ܥܐ ܕܝܰܘܡܢܐ.»

ܝܰܘܣܦ ܒܶܓܬܰܫ

ܬܐܡ̈ܢ ܚܟܡܬܐ ܕܪܘܼܚܐ ܘܪܘܼܚܐ ܕܚܟܡܬܐ. ܘܐܒܗ̈ܬܢ ܣܦܺܝܼܪ̈ܐ ܫܰܡܶܫܘ ܠܚܶܟܡܬܐ ܕܪܘܼܚܐ ܒܪܘܼܚܐ ܕܚܟܡܬܐ. ܘܒܪܘܼܚܳܐ ܕܣܶܦܪܝܘܼܬܐ ܠܣܶܦܪܳܝܘܼܬܐ ܕܪܘܼܚܐ..

ܝܰܘܣܦ ܒܶܓܬܰܫ

ܥܳܬܪܐ ܘܢܳܨܚܐ ܬܰܪܥܝܼܬܐ ܒܐܘ̈ܚܕܢܝܗܿ ܟܕ ܥܳܛܪܐ ܒܪܝܼܚܐ ܒܣܝܡܐ ܕܪܘܚ ܫܘܼܡܠܝܐ ܘܒܘܼܝܳܢܐ ܪܘܝܼܚܳܐ ܕܣܘ̈ܟܳܠܐ ܕܬܐܪܬܐ.

ܘܗܝ ܡܰܒܪܳܢܘܼܬܐ ܠܐ ܥܳܡܪܐ ܘܢܰܘܚܐ ܠܐ ܒܳܐܬ ܒܬܰܪܥܝܼܬܐ ܕܡܬܬܪܣܝܐ ܡܢ ܪܘܼܚܐ ܕܫܘܼܥܠܳܝܐ ܘܫܘܼܦܪܳܚܳܐ ܘܫܘܼܒܙܳܙܐ ܘܫܘܼܒܗܳܪܐ.

ܫܘܼܒܙܳܙܐ: İstismar / Explotation
ܫܘܦܪܳܚܐ: Kendini Beğenmişlik/Smugness
ܝܰܘܣܦ ܒܶܓܬܰܫ

ܐܠܗܐ ܪܘܼܚܐ ܗ̱ܘ ܦܫܝܼܛܐ. ܘܦܫܝܼܛ ܐܦ ܪܢܝܐ ܗܿܘ ܕܢܳܒܥ ܘܡܶܬܬܰܙܠܰܓ ܡܢܗ. ܘܟܡܐ ܕܦܫܝܼܛ ܝܬܝܪ ܡܬܦܰܪܣܰܥ ܘܡܬܦܪܶܣ.

ܝܰܘܣܦ ܒܶܓܬܰܫ